Langutelo Ra Bibele

Ndlela Yo Endla Leswaku Vukati Byi Humelela

“Loyi a va tumbuluxeke eku sunguleni u va endle va va waxinuna ni waxisati kutani a ku, ‘Hikwalaho ka sweswo, wanuna u ta siya tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we’ . . . Hikokwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka.”—Marito lawa ma vuriwe hi Yesu Kreste eka Matewu 19:4-6.

EMISAVENI leyi mahanyelo ya vanhu ma tshamelaka ku cinca, vukati a bya ha tekiwi byi ri bya nkoka. Mimpatswa yo tala yi tshama swin’we kukondza yi nga ha tsakelani kumbe yi va ni swiphiqo—hambiloko minkarhi yin’wana swiphiqo swa kona swi nga nyawuli, ya hambana kumbe yi dlaya vukati. Lexi twisaka ku vava hileswaku leswi swi endla leswaku vana va tshikileleka.

Leswi a swi va hlamarisi Vakreste. Malunghana ni ‘masiku yo hetelela’ lawa hi hanyaka eka wona, Bibele yi profete leswaku vanhu va ta kayivela timfanelo leti endlaka leswaku mindyangu yi va ni vun’we, to tanihi ku tshembeka, rirhandzu ra xiviri ni xinakulobye xa ntumbuluko. (2 Timotiya 3:1-5) Xana mahanyelo lawa ni leswi endlekaka emindyangwini swa ku karhata? Xana u byi teka byi ri bya nkoka vukati?

Loko swi ri tano, Bibele yi nga ku chavelela hikuva xitsundzuxo xa yona lexi pfuneke mimpatswa yo tala xi hambeta xi yi pfuna. Hi xikombiso, xiya magoza ya ntlhanu lama nga pfunaka swinene evukatini.a

Magoza Ya Ntlhanu Yo Va Ni Vukati Lebyi Humelelaka

(1) Teka vukati tanihi xiboho xo kwetsima. Hilaha marito ya Yesu lama tshahiweke evokweni ra ximatsi ma swi kombiseke hakona, Yesu na Yehovha Xikwembu lexi nga Muvumbi va teka vukati tanihi xiboho xo kwetsima. Leswi swi kandziyisiwe hi ndzayo ya Xikwembu leyi a yi kongomisiwe eka vavanuna van’wana va khale lava a va dlaya vukati hi xikongomelo xo teka lava ha riki vantshwa. Xikwembu xi te: “A wu xi hetisisanga xitshembiso xa wena eka nsati wa vuntshwa bya wena. A a ri nsati wa wena, kambe a wu xi hetisisanga xitshembiso xa wena eka yena hambileswi u hlambanyeke emahlweni ka Xikwembu leswaku u ta tshembeka eka yena.” Endzhaku ka sweswo Xikwembu xi te: “A ndzi tsaki loko un’wana wa n’wina a kombisa tihanyi to tano eka nsati wakwe.” (Malakiya 2:14-16, Today’s English Version) Swi le ri valeni leswaku Xikwembu xi byi teka byi ri bya nkoka vukati; xa yi xiya ndlela leyi vavanuna ni vavasati va khomanaka ha yona.

(2) Va na wanuna la nga ni vutihlamuleri. Loko ku tshuka ku va ni timhaka ta nkoka endyangwini, un’wana u fanele a endla xiboho. Vutihlamuleri byebyo Bibele yi byi nyika wanuna. Vaefesa 5:23 yi ri: “Wanuna i nhloko ya nsati wakwe.” Kambe vunhloko a byi vuli swona leswaku wanuna u fanele a tshikilela nsati wakwe. Wanuna u fanele a tsundzuka leswaku yena ni nsati wakwe i “nyama yin’we” naswona u fanele a n’wi xixima ni ku bula na yena hi timhaka leti khumbaka ndyangu. (1 Petro 3:7) Bibele yi vula leswaku “vavanuna va fanele ku rhandza vasati va vona ku fana ni mimiri ya vona.”—Vaefesa 5:28.

(3) Va na nsati la seketelaka nuna. Bibele yi vula leswaku wansati i “mupfuni” wa nuna wakwe. (Genesa 2:18) Hikwalaho ka sweswo, wansati u ni vutihlamuleri bya nkoka swinene evukatini. Tanihi mupfuni wa nuna wakwe, a nga ringeti ku tiringanisa na yena, kambe wa n’wi seketela naswona sweswo swi endla leswaku ku va ni ku rhula endyangwini. Vaefesa 5:22 yi ri: “Vavasati a va tiveke ehansi ka vanuna va vona.” Kambe ku vuriwa yini loko a nga pfumelelani ni nuna wakwe hi mhaka yo karhi? Exiyin’weni xo tano, u fanele a titwa a ntshunxekile ku vula leswi a swi ehleketaka hi ndlela ya xichavo ni hi ndlela leyi a nga ta lava leswaku nuna wakwe a vulavula na yena ha yona.

(4) Anakanyela naswona u langutela swiphiqo. Vukati byi nga xungetiwa hi marito lama vuriwaka handle ko anakanya, swiphiqo swa timali, vuvabyi lebyikulu kumbe ntshikilelo wo kurisa vana. Kambe Bibele yi swi veka erivaleni leswaku vanhu lava nghenelaka vukati “va ta va ni nhlomulo enyameni ya vona.” (1 Vakorinto 7:28) Kutani nhlomulo kumbe miringo a swi fanelanga swi tsanisa vukati. Entiyisweni, loko vanhu vambirhi va rhandzana hakunene naswona va ri ni vutlhari bya Xikwembu lebyi va byi kumaka eRitweni ra xona, va ta swi kota ku tlhantlha swiphiqo leswi va nga ha langutanaka na swona. Xana u na byona vutlhari lebyi nga ta ku pfuna leswaku u tlhantlha swiphiqo leswi nga ha tshukaka swi va kona endyangwini wa wena? Bibele yi ri: “Loko mani na mani eka n’wina a kayivela vutlhari, a a hambete a kombela eka Xikwembu, hikuva xi nyika hinkwavo hi mbilu yo basa, handle ka ku sandza.”—Yakobo 1:5.

(5) Tshembekani. Ku ni swilo swo karhi leswi nga vekaka vukati ekhombyeni handle ka vumbhisa kumbe ku va un’wana wa vatekani a va ni vuxaka bya rimbewu ni munhu loyi a nga tekanangiki na yena, ku nga xona ntsena xivangelo lexi amukelekaka eka Xikwembu xa ku dlaya vukati. (Matewu 19:9) Bibele yi ri: “Vukati a byi xiximeke exikarhi ka hinkwavo, ni sangu ra vukati ri nga vi ni xilo lexi nyamisaka, hikuva Xikwembu xi ta avanyisa timbhisa ni vaoswi.” (Vaheveru 13:4) I yini leswi nga pfunaka mimpatswa leswaku yi nga ringeki leswaku yi va ni vuxaka bya rimbewu ni vanhu lava yi nga tekanangiki na vona? Bibele yi ri: “Wanuna a a nyike nsati wa yena mfanelo yakwe; kambe na yena wansati a a endle leswi fanaka eka nuna wa yena.”—1 Vakorinto 7:3, 4.

Van’wana va nga ha vula leswaku magoza lawa ya ntlhanu a nga kona munhu loyi a nga kotaka ku hanya ha wona kumbe ma hundzeriwe hi nkarhi. Kambe vuyelo byi kombisa leswi hambaneke. Entiyisweni vuyelo bya kona bya fana ni lebyi kumiwaka hi munhu loyi a lavaka ku kongomisiwa hi Xikwembu evuton’wini byakwe: “U ta fana ni murhi lowu byariweke etlhelo ka swinambyana swa mati, lowu humesaka mbhandzu wa wona hi nguva ya kona, lowu switluka swa wona swi nga vuniki, hinkwaswo leswi a swi endlaka swi ta humelela.” (Pisalema 1:2, 3) Rito leri nge “hinkwaswo” ri katsa ni ku humelela evukatini.

[Nhlamuselo ya le hansi]

XANA U TSHAME U TIVUTISA?

● Xana Xikwembu xi swi languta njhani ku dlaya vukati?—Malakiya 2:14-16.

● Xana wanuna u fanele a n’wi khoma njhani nsati wakwe?—Vaefesa 5:23, 28.

● I vutlhari bya mani lebyi nga endlaka leswaku vukati byi humelela?—Pisalema 1:2, 3.