Tihlo Ra Hanti Leyi Vuriwaka Peacock Mantis Shrimp

Xana Ri Lo Endliwa?

● Hanti ra Peacock mantis shrimp, leri kumekaka eGreat Barrier Reef le Australia, ri ni mahlo lama rharhanganeke swinene ku tlula ya swiharhi hinkwaswo. Dok. Nicholas Roberts u te: “Ma hlamarisa hakunene naswona ma vona kahle ku tlula nchumu wihi na wihi lowu hina vanhu hi tshameke hi wu endla.”

Xiya: Hanti leri ri nga kota ku vona ku vonakala loku magandlati ya kona ma fambaka elayinini leyi nga lo thwii (polarized light), loku munhu a nga kotiki ku ku vona. Magandlati wolawo ma nga ha famba elayinini leyi nga lo thwii, kumbe ma rhendzeleka. Ku hambana ni swivumbiwa swin’wana, hanti leri a ri koti ku vona ku vonakala loku fambaka elayinini leyi nga lo thwii, ni loku rhendzelekaka ntsena, kambe ri kota ni ku hundzula ku vonakala kun’wana ku va lokun’wana. Leswi swi endla leswaku ri kota ku vona swilo kahle.

Michini leyi tlangaka ti-DVD yi tirha hi ndlela leyi fanaka. Leswaku yi tlanga rungula leri nga eka DVD, yi fanele yi hundzula ku vonakala loku fambaka elayinini leyi nga lo thwii, loku kongomeke eka diski ku va loku rhendzelekaka ivi yi tlhela yi ku hundzula ku famba elayinini leyi nga lo thwii! Kambe hanti leri ri endla swilo leswi tlulaka sweswo. Michini leyi tolovelekeke yo tlanga ti-DVD yi kota ntsena ku hundzula rivoni ro tshwuka—kasi leyi tlangaka ti-DVD ta higher-resolution yi kota ku hundzula rivoni ra wasi—kambe tihlo ra hanti leyi ri nga kota ku hundzula mivala hinkwayo leyi vonakaka.

Valavisisi va pfumela leswaku vanjhiniyara va nga kota ku endla muchini wo tlanga ti-DVD leti nga ni rungula ro tala ku tlula leti tirhisiwaka namuntlha loko vo tshuka va kopa ndlela leyi tihlo ra hanti leri ri tirhaka ha yona. Roberts u ri: “Lexi xi tsakisaka ngopfu hi tihlo leri i ndlela leyi ri oloveke ha yona. Ri tirha kahle ngopfu ku tlula michini yihi na yihi leyi hi ringeteke ku yi endla.”

U anakanya yini? Xana tihlo leri hlamarisaka ra hanti leyi vuriwaka peacock mantis shrimp ri lo tiendlekela kumbe ri lo endliwa?

[Laha Xifaniso Xi Humaka Kona eka tluka 24]

Courtesy Stephen Childs