Swiyindlwana Swa Le Istanbul

● Swi tolovelekile ku vona swihahlu leswi endleriweke swinyenyana etindhawini to hambana-hambana ta misava. Swihahlu sweswo swi endleriwe leswaku swinyenyana swi dyela kona, swi kufumela, swi aka swisaka, swi kurisa mavondlo, swi ti sirhelela eka swiharhi ni le ka maxelo yo biha. Le Istanbul, swihahlu swa swinyenyana swi endliwe ku fana ni tindlu leti tolovelekeke. Swin’wana swi fana ni tindlu letikulu, tikereke kumbe tindlu ta vuhosi.a Swi tiviwa tanihi tindhawu ta matuva, swihahlu leswikulu swa swinyenyana hambi ku ri swigodlo swa swindzingiri.

Swin’wana swa swona leswi nga swa khale swinene swi endliwe hi lembe-xidzana ra vu-15 naswona swi fana ni miako ya manguva lawa, kambe maakelo ya kona i ya xikhale. A swi nga ri miako ya xiyimo xa le henhla, kambe ku sukela hi lembe-xidzana ra vu-18 swi sungule ku antswisiwa, kutani swi va miako ya manyunyu. Swin’wana swi ni ndhawu yo veka swakudya ni mati, tiphaseji ni rikupakupa. A swi tala ku hayekiwa etlhelo ka muako, laha dyambu ri tlhavaka kona naswona a swi sirhelela swinyenyana eka moya. Nakambe a swi vekiwa laha swimanga, timbyana ni laha makhamba a ma nga ta swi teka hi ku olova. Minkarhi yin’wana swilo leswi a swi ri endzeni ka swihahlu leswi, a swi nga endleriwi swinyenyana ntsena kambe a swi sasekisa ni miako yoleyo. Swisaka swa swinyenyana u nga ha swi vona etikerekeni letikulu ni letitsongo, etindhawini leti vanhu va kaka kona mati, etilayiburari, emabulohweni ni le makaya ya vanhu.

Lexi twisaka ku vava hileswaku swo tala swa swisaka leswi swi onhiwe hi maxelo yo biha, kasi swin’wana swi onhiwe hi vanhu lava a va nga swi tekeli enhlokweni. Swisaka sweswo swa kala manguva lawa. Loko wo tshuka u endzela doroba ra Istanbul u ta tiphina hi ku vona ndlela leyi miako ya khale a yi akiwe ha yona, leswi se u swi tivaka rhalarhala ku vona loko u ta tshuka u vona swisaka leswi swi nga etlhelo ka malwangu ya miako leyikulu.

[Nhlamuselo ya le hansi]