Ta Rivala

Swilo swo basisa ha swona leswi kamberiweke swi kombisa leswaku michini ya mali [ti-ATM] ta le Nghilandhi ti ni switsongwatsongwana swo tala leswi nga ni khombo ku fana ni switshamo swa swihambukelo swa mani na mani.—THE TELEGRAPH, BRITAIN.

“Minkarhi yin’wana van’wasayense va sala va tikhome swihlaya hikwalaho ka ku tsekatseka ka misava [ko tanihi loku veke kona eNew Zealand nan’waka ni loku veke kona eHaiti n’wexemu] hikuva swi humelela swi nga languteriwanga. . . . Sweswo swi tlakusa xivutiso lexi vilerisaka lexi nge: I ku tsekatseka kungani ka misava loku nga ha humelelaka loku ngo ehleketeleriwa kumbe loku nga humelelaka hikwalaho ka swiendlakalo leswi nga languteriwangiki?”—THE NEW YORK TIMES, U.S.A.

“Vanhu va mune lava fumeke emisaveni hinkwayo va ni mali yo tala ku tlula leyi matiko ya 57 lama nga swisiwana ma nga na yona emisaveni hinkwayo.”—FOREIGN POLICY, January/February 2011, U.S.A.

Eka malembe mambirhi lama hundzeke ku vikiwe leswaku vanhu lava lawulaka 90 wa tiphesente ta mabindzu ya le Poland i makhamba kumbe va ni vungungundzwana naswona va mangaleriwe hi vatirhi va vona.—GAZETA PRACA, POLAND.

Sweswi kereke ya Khatoliki ya le Brazil yi hakerisa vatekiwa ndziho wa R2 000 hikwalaho ko xwela emicatweni ya vona. Mimpatswa yi fanele yi sayina cheke siku ra mucato ri nga si fika naswona yi ta tlheriseriwa mali ya yona ntsena loko yo fika hi nkarhi.—G1, BRAZIL.

Mupapa A Tshika Ku Nyikela Hi Swirho Swakwe

Phepha-hungu ra le Italiya ra La Repubblica ri vike leswaku loko Joseph Ratzinger, a ha ri mufundhisi lonkulu wa kereke ya Rhoma Khatoliki a a nyikela hi swirho swo karhi swa miri wakwe leswaku ku pfuniwa vanhu lava vabyaka. Kambe, ku sukela loko a ta va a hlawuriwile ku va mupapa, Benedict wa vu-16 a a nga ha nyikeli hi swirho swakwe. Ha yini? Hikuva Zygmunt Zimowski, bixopo-nkulu la nga xirho xa ntlawa wa Vatican u te: “Miri wa Bixopo i wa Kereke hinkwayo. Hikwalaho, swa twisiseka leswaku loko mupapa a fa, miri wakwe wa hlayisiwa tanihi leswi wu nga ta gandzeriwa enkarhini lowu taka.”

Xana Swa Koteka Ku Xavisa Vutomi Hikwalaho Ka Mali?

Xana vanhu va nga tiyimisela ku heta lembe va ri mahlonga leswaku va ta kuma tiyuro ta miliyoni? Nkambisiso lowu a wu kongomisiwa hi nhlangano wa Emnid hi ku yimela nhlangano wa Reader’s Digest Deutschland wu vule leswaku eJarimani wanuna un’we eka va mune ni wansati un’we eka va tsevu a nga swi endla sweswo. Nkambisiso lowu endliweke eka vantshwa wu kombisa leswaku va nga swi tsakela ku xavisa vutomi bya vona—29 wa tiphesente ta vantshwa lava nga exikarhi ka malembe ya 14 na 29 ni tiphesente ta 25 ta lava nga exikarhi ka malembe ya 30 na 39, va nga endla tano. Hambiswiritano, loko vanhu va kula va ya va teka vutomi byi ri bya risima swinene. Ko va tiphesente ta 13 ntsena ta vanhu lava nga exikarhi ka malembe ya 50 na 59 ni tiphesente ta 11 ta lava nga ni malembe ya 60, lava nga anakanyaka hi ku endla sweswo.