Vantshwa Va Vutisa
Ha Yini Ndzi Vule Tano?
Xihloko lexi xi ta ku pfuna leswaku u kuma
XIVANGELO xo va u tshamela ku vula swilo leswi hoxeke
LESWI u nga swi endlaka loko ririmi ri rhetile
NDLELA yo lawula ririmi ra wena
“Hakanyingi ndza swi kota ku lawula ririmi ra mina, kambe minkarhi yin’wana ra rhetemuka naswona endzhaku ka sweswo ndzi twa onge misava yi ngo pandzeka ndzi nghena!”—Chase
“Minkarhi yin’wana ndzi vula swilo leswi vanhu va nga ha vaka va swi ehleketa kambe leswi nga fanelangiki swi vuriwa exikarhi ka vanhu . . . Endzhaku ka sweswo ndza tisola!”—Allie
XIVANGELO XO VA SWI ENDLEKILE
Tsalwa leri nga ku pfunaka: “Loko mani na mani a nga va khunguvanyisi van’wana hi rito, loyi i munhu la hetisekeke.” (Yakobo 3:2) Xana tsalwa leri ri vula yini? A nga kona munhu la nga kotaka ku lawula ririmi rakwe hi ku helela. Vo tala va nga pfumelelana nileswi vuriweke hi Annette,a u te: “A ndzi nga swi koti ku lawula ririmi ra mina, xin’wana ni xin’wana lexi taka emiehleketweni ya mina a ndzo xi vula.”
Mhaka ya xiviri: “Munghana wa mina u tsakele swiambalo leswi a ndzi ya eku swi lahleni. Handle ko anakanya ndzi te, ‘Ndzi anakanya leswaku a swi nge ku ringani.’ U ndzi hlamule a ku: ‘Yini? U anakanya leswaku ndzi nyuherile?’”—Corrine.
Leswaku u twisisa leswi endlaka leswaku minkarhi yin’wana u tsandzeka ku lawula ririmi ra wena, ringeta leswi landzelaka.
● Tiva ku tsana ka wena.
․․․․․ Ndzi tala ku vulavula loko ndzi hlundzukile
․․․․․ Ndzi tala ku vulavula handle ko ehleketa
․․․․․ Ndzi tala ku vulavula handle ko yingisela
․․․․․ Swin’wana ․․․․․
Xikombiso: “Xiphiqo xa mina hileswaku ndzi munhu wa misavu naswona minkarhi yin’wana vanhu va teka leswi ndzi swi vulaka hi ndlela leyi hoxeke.”—Alexis.
● Tiva vanhu lava ririmi ra wena ri talaka ku rheta loko u vulavula na vona.
․․․․․ Mutswari
․․․․․ Makwerhu
․․․․․ Munghana
․․․․․ Un’wana ․․․․․
Xikombiso: Christine la nga ni malembe ya 20 u ri: “Swi twisa mbilu ku vava hikuva vanhu lava ndzi va rhandzaka ngopfu, hi vona lava ndzi talaka ku va khunguvanyisa ndzi nga swi xiyi. Kumbexana swi vangiwa hileswi ndzi ntshunxekaka ngopfu loko ndzi ri na vona, kutani ndzi nga ha khathali ngopfu hileswi ndzi swi vulaka.”
LESWI U NGA SWI ENDLAKA LOKO RIRIMI RI RHETILE
Tsalwa leri nga ku pfunaka: “A hi lavisiseni swilo leswi endlaka ku rhula.” (Varhoma 14:19) Ndlela yin’wana yo landzela xitsundzuxo xexo i ku kombela ku rivaleriwa.
Mhaka ya xiviri: “Manana u love ndzi ri ni tin’hweti ta khume naswona tatana a ndzi n’wi tivi, kutani ndzi kurisiwe hi mhani-nkulu ni nuna wakwe. Siku rin’wana loko ndzi ri ni malembe ya kwalomu ka khume kumbe 11, ndzi titwe ndzi ri ni xivundza naswona ndzi pfilunganyekile hileswi manana a nga fa naswona a ndzi twa onge ndzi nga sola munhu un’wana. Xisweswo, loko mhani-nkulu a ndzi kombela leswaku ndzi n’wi pfuna hi swo karhi, swi ndzi hlundzukisile; naswona leswi swi endle leswaku ndzi n’wi byela marito yo tanihi lama nge, ‘Ndza ku venga,’ ‘A wu mana wa mina wa xiviri.’ Leswi swi n’wi chuhisile. U tipfalele ekamareni rakwe naswona ndzi n’wi twe a ri karhi a rila. Ndzi twe ku vava swinene. U ndzi kurisile naswona a a ndzi endlela xin’wana ni xin’wana kambe ndzi n’wi khome tanihi xitlakati. Nuna wakwe u vulavule na mina hi mhaka leyi naswona u ndzi kombe Matsalwa lama vulavulaka hi ku lawula ririmi. Endzhaku ka sweswo, ndzi kombele ku rivaleriwa eka mhani-nkulu. Ndzi swi xiyile leswaku ndzi n’wi dyoherile.”—Karen.
Laha hansi, tsala xivangelo lexi nga ha endlaka leswaku swi ku tikela ku kombela ku rivaleriwa.
․․․․․
Ha yini ku kombela ku rivaleriwa swi ta endla leswaku u titwa u antswa?
․․․․․
Lexi nga ku pfunaka ku kuma nhlamulo: Xiya milawu leyi kumekaka eka Swivuriso 11:2 na Matewu 5:23, 24.
Entiyisweni, i swinene ku papalata xiyimo lexi nga ta ku boha leswaku u kombela ku rivaleriwa. U nga swi endlisa ku yini sweswo?
NDLELA YO LAWULA RIRIMI RA WENA
Tsalwa leri nga ku pfunaka: “Hatlisa emhakeni yo twa, [u] nonoka emhakeni yo vulavula, [u] nonoka emhakeni ya vukarhi.” (Yakobo 1:19) Hi leswi swiringanyeto swin’wana leswi nga ta ku pfuna leswaku u tirhisa ndzayo leyi.
Hlaya Matsalwa lama landzelaka kutani u kombisa tindzimana leti fambisanaka na wona eka swivulwa leswi nga evokweni ra xinene.
1 “Ringeta ku ka u nga titeki u ri wa nkoka ngopfu; loko u endla tano a wu nge khunguvanyeki hi ku hatlisa.”—Danette.
2 “Loko ndzi hlundzukile ndzi famba ndzi beriwa hi moya. Sweswo swi ndzi nyika nkarhi wo va ndzexe ni wo rhurisa mbilu.”—Brielle.
3 “Loko ndza ha ri ntsongo a ndzi anakanya leswaku nyimpi yin’wana ni yin’wana yi fanele yi lwiwa, naswona swilo leswi nga vuliki nchumu a ndzi swi endla mhaka leyikulu. Kambe ndzi dyondze leswaku swa antswa ku tshika swilo leswi nga vuriki nchumu swi hundza.”—Celia.
4 “Loko munhu wo karhi a ku rhukana naswona u nga tlheriseli, munhu yoloye u ta karhala ivi a ku tshika. Lehisa mbilu. U nga timeli ndzilo hi mafurha.”—Kerrin.
5 “Ku ni minkarhi leyi ndzi hlundzukelaka munhu un’wana. Hi nkarhi wolowo, ndzi va ndzi ri karhi ndzi anakanya hileswi ndzi nga ta n’wi byela swona. Kambe loko ndzi rindza, ndza swi xiya leswaku leswi a ndzi ta n’wi byela swona a swi nga ta pfuna nchumu. Leswi ndzi swi dyondzeke hileswaku a ndzi fanelanga ndzi hatla ndzi teka goza.”—Charles.
Swihloko swin’wana leswi nge “Vantshwa Va Vutisa” swi kumeka eka Web site leyi nge www.watchtower.org/ype
[Nhlamuselo ya le hansi]
a Mavito man’wana ma cinciwile exihlokweni lexi.
[Bokisi leri nga eka tluka 23]
Allie—Loko ndzi nga si vula swo karhi, ndzi rhanga ndzi tivutisa swivutiso swo tanihi leswi: ‘Xana leswi ndzi nga ta swi vula swi ta antswisa xiyimo? Xana leswi ndzi swi vulaka swi ta n’wi khumba njhani munhu loyi ndzi vulavulaka na yena?’ Loko u kanakana malunghana ni leswi u lavaka ku swi vula, swa antswa u nga swi vuli.
Chase—Loko ndzi lava ku vula swin’wana, ndzi ringeta ku ehleketa hi ndlela leyi lava ndzi nga na vona swi nga va khumbaka ha yona. Ndzi anakanya leswaku loko ndzi ya ndzi kula, ndzi ya ndzi antswisa ndlela leyi ndzi ri lawulaka ha yona ririmi ra mina. I ntiyiso leswaku vanhu va dyondza eka swihoxo swa vona.
[Bokisi leri nga eka tluka 23]
HA YINI U NGA VUTISI VATSWARI VA WENA?
Leswi ku nga riki na munhu la hetisekeke—hilaha Yakobo a vuleke hakona leswaku “hinkwerhu ha khunguvanyeka minkarhi yo tala”—vulavula ni vatswari va wena malunghana ni leswi va bohekeke ku lwisana na swona leswaku va lawula ririmi ra vona.—Yakobo 3:2.
[Xifaniso lexi nga eka tluka 22]
“Loko wo kama xisibi xa meno echubini ra xona, a wu nge he swi koti ku xi tlherisela. Swi tano ni hileswi hi swi vulaka. Loko wo kala u vula marito lama tlhavaka, a wu nge swi koti ku ma tlherisela endzhaku.”—James.