Langutelo Ra Bibele
I Mani Loyi A Nga Cincaka Misava?
“Vanhu a va ha lavi ku twa nchumu hi vafumi va vona. Va lava leswaku va teka goza ematshan’weni yo nyikela swivangelo leswi nga twaliki.”—BAN KI-MOON, MURHANGERI-NKULU WA NHLANGANO WA MATIKO.
HI HANYA enkarhini lowu Bibele yi wu vitanaka “minkarhi ya mangava leyi swi nonon’hwaka ku langutana na yona.” (2 Timotiya 3:1) Emahungwini ku vulavuriwa ngopfu hi tinyimpi, vutherorisi, ku hohloka ka ikhonomi ni ku onhiwa ka mbango.
Xana swa tshembisa leswaku swilo swi ta antswa? Xana tihulumendhe ta vanhu ti nga swi kota ku tlhantlha swiphiqo swa misava? Kumbe, xana swi nga lava leswaku hi lava mpfuno kun’wana?
Leswi Matiko Yo Tala Ma Tibyelaka Swona
Matiko yo tala ma tibyela leswaku ma seketeriwa hi Xikwembu. Hi xikombiso, Risimu Ra Rixaka ra le United States of Amerika ri vula leswaku “tiko leri ri seketeriwa hi Xikwembu” naswona eka mali ya rona ya tinsimbi ni ya maphepha ku ni marito lama nge “Hi Tshembele Eka Xikwembu.”
Kambe lexi hlamarisaka hileswaku vanhu vo tala lava tshamaka eUnited States a va tshembi ni leswaku Xikwembu xi kona naswona swi tano ni le matikweni man’wana lama tibyelaka leswaku ma seketeriwa hi Xikwembu. Hambi ku ri lava pfumelaka eka Xikwembu va ni mavonelo yo hambana malunghana ni ndlela leyi xi pfunaka vanhu ha yona.
● Van’wana va vula leswaku Xikwembu a xi na mhaka naswona vanhu va fanele va tifuma.
● Van’wana va vula leswaku Xikwembu xi tirhisa tihulumendhe ta vanhu naswona xi nga katekisa matshalatshala ya tona yo cinca misava.
Eka swivulwa leswimbirhi, hi xihi lexi u yimaka na xona?
Xiya: Loko ku ri leswaku lexo sungula i ntiyiso, a hi ta va hi khome nyarhi hi timhondzo. Loko lexa vumbirhi xi ri ntiyiso, hi fanele hi tivutisa swivutiso leswi: ‘Xana ku ni tiko ro karhi leri Xikwembu xi ri rhandzaka? Loko matiko mambirhi ma ya enyimpini naswona hinkwawo ma khongelela ku hlula, xana Xikwembu xi ta seketela rihi?’ Xana swi nga endleka leswaku xi nga yimi na wona hamambirhi?
Leswi Bibele Yi Swi Dyondzisaka
1. Munhu a nga vumberiwanga ku tifuma. Bibele yi ri: “Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Matimu ma tiyisekisa ntiyiso wa marito wolawo. Tihulumendhe ta vanhu a ti nge yi antswisi misava, hambiloko vafumi va kona va ri ni swikongomelo leswinene. Ematshan’weni ya sweswo, ‘munhu u fuma munhu ku n’wi endla swo biha.’—Eklesiasta 8:9.
2. Xikwembu xi ni mhaka ni leswi hi langutanaka na swona. Xa swi xiya leswi endlekaka evuton’wini bya hina naswona xi twelana na hina. Ku tlula kwalaho, xi ta hi pfuna. Njhani? Hi Mfumo wa xona lowu “nga ta ka wu nga lovisiwi.”—Daniyele 2:44.
3. Mfumo wa Xikwembu i hulumendhe ya xiviri. I Mfumo lowu vanhu va timiliyoni va wu khongelelaka eka Xikhongelo lexi dumeke xa Hosi. Eka xona vanhu va kombela Xikwembu va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Xiya leswaku Mfumo lowu a wu katsi matilo ntsena; wu tlhela wu endla leswaku ku rhandza ka Xikwembu ku hetiseka laha emisaveni.
4. Xikwembu xi ta cinca misava hi ku tirhisa Mfumo wa xona. Loko u nga swi tshembi, kambisisa leswi Bibele yi swi dyondzisaka.
● Xikwembu xi nyike vanhu masungulo lamanene endhawini leyinene.—Genesa 1:27-31.
● Hambileswi misava yi nga ni swiphiqo, Xikwembu a xi xi rivalanga xikongomelo xa xona ha yona.—Pisalema 37:11, 29.
● Xikwembu a na se xi teke magoza yo karhi leswaku xiyimo xa misava ni vanhu swi va hilaha a xi kunguhate ha kona eku sunguleni.—Yohane 3:16.
Xana u nga swi tsakela ku dyondza leswi engetelekeke hi Mfumo wa Xikwembu ni leswaku wu ta yi cincisa ku yini misava? Timbhoni ta Yehovha ku nga vakandziyisi va magazini lowu, ti nga swi tsakela ku ku pfuna. Loko ti ku endzela siku rin’wana, ha yini u nga ti kombeli leswaku mi bula hi swivutiso leswi landzelaka?
● Mfumo wa Xikwembu i yini?
● Hi kwihi ku cinca loku wu nga ta ku tisa?
● Wu ta ku tisa rini naswona njhani?
XANA U TSHAME U TIVUTISA?
● Ha yini tihulumendhe ta vanhu ti nga swi koti ku antswisa xiyimo xa misava?—Yeremiya 10:23.
● Xikwembu xi swi kombise njhani leswaku xa khathala hi hina?—Yohane 3:16.
● I yini leswi Mfumo wa Xikwembu wu nga ta swi endlela vanhu ni misava?—Pisalema 37:11, 29.
[Marito lama tshahiweke exihlokweni lama nga eka tluka 27]
Xana tihulumendhe ta vanhu ti nga swi kota ku tlhantlha swiphiqo swa misava? Kumbe, xana swi nga lava leswaku hi lava mpfuno kun’wana?