Ndzima 79

Tiko Leri Lahlekeke, Kambe Hayi Hinkwaro

ENDZHAKUNYANA ka bulo ra Yesu ni lava a va hlengeletanile ehandle ka yindlu ya Mufarisi, vanhu van’wana va n’wi byela “ta Vagaleliya lava [mufumi wa Rhoma Pontiyo] Pilato a nga pfanganisa ngati ya vona ni magandzelo ya vona.” Vagaleliya lava kumbexana hi lava va dlayiweke loko magidi ya Vayuda va kanete ku tirhisa ka Pilato mali ya rifuwo ra tempele ku aka muhocho lowu tisaka mati eYerusalema. Lava va hlamuselaka mhaka leyi eka Yesu va nga ha va va ringanyeta leswaku Vagaleliya va xanisiwe hi khombo hikwalaho ka swiendlo swa vona leswo biha.

Hambi swi ri tano, Yesu, wa va lulamisa, a vutisa a ku: “Xana mi ehleketa leswaku Vagaleliya volavo a va ri vadyohi ku tlula Vagaleliya van’wana hinkwavo, leswi va nga twisiwa ku vaviseka loko tano xana? “E-e,” ku hlamula Yesu. Kutani u tirhisa xiendlakalo lexi ku tsundzuxa Vayuda a ku: “Loko mi nga hundzuki, mi ta lovisa xisweswo hinkwenu.”

Loko a ya emahlweni, Yesu u tsundzuka mhangu yin’wana ya kwalaho, kumbexana na yona a yi yelana ni ku akiwa ka muhocho. Wa vutisa: “Ni vanhu va 18 lava xihondzo xa Silowama xi nga va wela henhla, xi va dlaya, xana mi ehleketa leswaku a va ri ni nandzu ku tlula vaaki hinkwavo va Yerusalema xana?” E-e, a ku nga ri hikwalaho ka vubihi bya vanhu lava leswi endleke leswaku va fa, ku vula Yesu. Ematshan’wini ya sweswo, ‘nkarhi ni xiendlakalo lexi nga languteriwangiki’ hi ntolovelo swi ni vutihlamuleri bya timhangu to tano. Hambi swi ri tano, Yesu nakambe u tirhisa nkarhi lowu ku tsundzuxa a ku: “Loko mi nga hundzuki, mi ta lovisa xisweswo hinkwenu.”

Kutani Yesu u ya emahlweni a nyika xifaniso lexi fanelaka, a hlamusela a ku: “Munhu un’wana a a ri ni murhi wa nkuwa lowu simekiweke ensin’wini ya yena ya vhinya; a ya lava mihandzu eka wona, kutani a nga yi kumi. Hi loko a ku ka murimi: ‘Vona, swi ni malembe manharhu ndzi ri karhi ndzi ta ku ta lava mihandzu enkuweni lowu, kutani ndzi nga yi kumi. Wu tseme! Wu onhela yini misava ntsena xana?’ Kambe murimi a n’wi hlamula a ku: ‘Hosi, wu tshike nan’waka ntsena, leswaku ndzi kuma nkarhi wa ku wu rimela, ndzi wu chela ni vulongo; kumbe xana haxawu wu ta veka mihandzu; loko swi nga ri tano, u ta wu tsema.’”

Yesu u ringete malembe lama tlulaka manharhu leswaku a hlakulela ripfumelo exikarhi ka tiko ra Vayuda. Kambe ko va ntsena vadyondzisiwa vantsongo va dzana lava nga hlayiwaka tanihi mihandzu ya mintirho ya yena. Sweswi, exikarhi ka lembe leri ra vumune ra vutirheli bya yena, u kurisa matshalatshala ya yena, a cela ni ku chela quva hi ndlela yo fanekisela, ematlhelo ka murhi wa nkuwa wa Vayuda hi ku chumayela ni ku dyondzisa eYudiya ni le Periya hi ku chivirika. Kambe a swi pfunanga nchumu! Tiko ri ala ku hundzuka kutani ri le nxaxamelweni wa ku lovisiwa. Ko va masalela ya tiko ntsena lama swi amukelaka.

Endzhakunyana Yesu u dyondzisa esinagogeni hi Savata. Kwalaho u vona wansati loyi, hikwalaho ka demona leri n’wi hlaselaka, a petsekeke hi malembe ya 18. Hi ntwela-vusiwana, Yesu u vulavula na yena a ku: “Wansati, u ntshunxiwile eku lamaleni ka wena.” Kwalaho u tlhandleka mavoko ya yena eka yena, kutani hi ku hatlisa a ololoka kutani a sungula ku dzunisa Xikwembu.

Hambi swi ri tano, mufambisi la ungamelaka esinagogeni u hlundzukile. Wa kaneta a ku: “Ku ni masiku ya 6 lawa mintirho yi fanelaka ku tirhiwa ha wona; tanani hi masiku walawo ku ta hanyisiwa, ku nga ri hi siku ra Savata.” Xisweswo mufambisi u xiya matimba ya Yesu yo hanyisa kambe u sola vanhu ku ta va ta hanyisiwa hi Savata!

Yesu wa hlamula a ku: “Vakanganyisi, xana, hi siku ra Savata, un’wana ni un’wana wa n’wina a nga ka a nga ntshunxi homu ya yena kumbe mbhongholo ya yena exivaleni, leswaku a yi yisa eku nweni ka mati xana? Kutani, wansati hi loyi, wa rixaka ra Abrahama, loyi a bohiweke hi Sathana hi malembe ya 18! Xana a nga fanelanga ku ntshunxiwa eku bohiweni loku hi siku ra Savata ke?”

Ina, loko va twa leswi, lava kanetaka Yesu va sungula ku khomiwa hi tingana. Hambi swi ri tano, ntshungu wu tsakela swilo hinkwaswo leswo saseka leswi wu vonaka Yesu a swi endla. Loko a hlamula Yesu u phindha swifaniso swimbirhi swa vuprofeta mayelana ni Mfumo wa Xikwembu, leswi a swi vuleke a ri exikepeni eLwandle ra Galeliya kwalomu ka lembe emahlweninyana. Luka 13:1-21; Eklesiasta 9:11; Matewu 13:31-33.

▪ I timhangu tihi leti ti vuriwaka laha, naswona i dyondzo yihi leyi Yesu a yi humesaka eka tona?

▪ I nhlamuselo yihi leyi nga endliwaka mayelana ni murhi wa nkuwa lowu nga vekiki mihandzu, kun’we ni matshalatshala ya ku wu endla wu tswala mihandzu?

▪ Mufambisi la ungamelaka u byi xiyisa ku yini vuswikoti bya Yesu bya ku hanyisa, kambe Yesu u byi paluxa njhani vukanganyisi bya wanuna loyi?