Ndzima 93

Loko N’wana Wa Munhu A Paluxiwa

LOKO Yesu a ha ri en’walungu (eSamariya kumbe eGaleliya), Vafarisi va n’wi vutisa hi ta ku ta ka Mfumo. Va anakanya leswaku wu ta ta hi xidumo ni nkhuvo lowukulu, kambe Yesu u ri: “Mfumo wa Xikwembu a wu humeleli wu ri karhi wu voniwa hi mahlo; a ku nga vuriwi leswaku: ‘Vonani, hi wolowo!’, kumbe: ‘Hi lowuya!’, hikuva Mfumo wa Xikwembu wu kona exikarhi ka n’wina.”

Marito ya Yesu lama nge “exikarhi ka n’wina” hakanyingi ya hundzuluxeriwe ya ku “endzeni ka n’wina.” Van’wana va anakanye leswaku Yesu a a vula leswaku Mfumo wa Xikwembu wu fuma endzeni ka timbilu ta malandza ya Xikwembu. Kambe, kavula, Mfumo wa Xikwembu a wu le timbilwini ta Vafarisi lava va nga pfumeriki lava Yesu a vulavulaka na vona. Kambe, wu le xikarhi ka vona, tanihi leswi Hosi leyi kunguhatiweke ya Mfumo wa Xikwembu, Yesu Kriste, yi nga xikarhi ka vona.

Kumbexana hi le ndzhaku ka loko Vafarisi va fambile loko Yesu a vulavula a ya emahlweni ni vadyondzisiwa va yena ehenhleni ka ku ta ka Mfumo. Ngopfu-ngopfu u tsundzuka vukona bya yena bya nkarhi lowu taka ematimbeni ya Mfumo loko a tsundzuxa a ku: “[Vanhu] va ta ku ka n’wina: ‘Langutani lahaya!’ kumbe: ‘Langutani haleno!’ Kambe mi nga tshuki mi ya kona, mi nga tsutsumeli kona [eka Vamesiya lava va mavunwa]. Hikuva kukotisa rihati loko ri hatima, ri voninga ku sukela etlhelweni rin’wana ra tilo ku yisa eka lerin’wanyana, N’wana-wa-Munhu u ta endlisa sweswo hi siku ra yena.” Hikwalaho, Yesu u kombisa leswaku tanihi leswi rihati ri voniwaka endhawini leyi anameke, vumbhoni bya ku va kona ka yena ematimbeni ya Mfumo byi ta vonaka kahle eka hinkwavo lava navelaka ku byi vona.

Kutani Yesu u pimanisa ni swiendlakalo swa khale ku kombisa leswi malangutelo ya vanhu ya nga ta va swona hi nkarhi wa ku va kona ka yena ka nkarhi lowu taka. Wa hlamusela a ku: “Hi laha swilo swi humeleleke ha kona emasikwini ya Nowa, swa ha ta humelerisa xisweswo emasikwini ya N’wana-wa-Munhu. . . . Na swona swi humelerise xisweswo emasikwini ya Lota; a va dya, va nwa, va xava ni ku xavisa, va byala, va aka tindlu; kambe siku leri Lota a humeke eSodoma ha rona, ndzilo ni xivavula swi na hi le tilweni, swi va lovisa hinkwavo. Swi ta va tano hi siku leri N’wana-wa-Munhu a nga ta humelela ha rona erivaleni.”

Yesu a nga vuli swona leswaku vanhu va siku ra Nowa ni siku ra Lota va lovisiwile hikuva a va landzelela mintirho leyi tolovelekeke ya ku dya, ku nwa, ku xava, ku xavisa, ku byala ni ku aka. Hambi ku ri Nowa na Lota ni mindyangu ya vona a va swi endla swilo leswi. Kambe lava van’wana a va endla mintirho yoleyo ya siku na siku va nga yingisi ku rhandza ka Xikwembu, naswona a ku ri hikwalaho ka xivangelo lexi leswi va lovisiweke. Hikwalaho ka xivangelo lexi fanaka, vanhu va ta lovisiwa loko Kriste a humelela hi nkarhi wa nhlomulo lowukulu eka mafambiselo lawa ya swilo.

Loko a kandziyisa nkoka wa ku amukela vumbhoni bya ku ta ka yena ka nkarhi lowu taka ematimbeni ya Mfumo hi ku hatlisa, Yesu wa engetela a ku: “Hi siku rero, loyi a nge henhla ka yindlu, nhundzu ya yena yi ri ndlwini, a nga tshuki a xika, a ya yi teka; ni loyi a nge masin’wini a nga tshuki a vuyela kaya. Tsundzukani ta nsati wa Lota.”

Loko vumbhoni bya vukona bya Yesu byi humelela, vanhu va nge pfumeleli ku namarhela swilo swa vona leswi vonekaka swi va sivela ku teka goza ra xihatla. Endleleni ya yena yo huma eSodoma, swi le rivaleni leswaku nsati wa Lota u langute endzhaku a navela swilo leswi saleke endzhaku, kutani u hundzuke tshuka ra munyu.

Loko a hambeta ni nhlamuselo ya yena ya xiyimo lexi a xi ta va kona hi nkarhi wa vukona bya yena bya nkarhi lowu taka, Yesu u byela vadyondzisiwa va yena a ku: “Hi vusiku bya kona, eka vavanuna vambirhi lava nga ta va va etlerile endhawini yin’we, ku ta tekiwa un’wana, un’wana a siyiwa. Eka vavasati vambirhi lava nga ta sila swin’we, ku ta tekiwa un’wana, un’wana a siyiwa.”

Ku tekiwa swi fambelana ni ku nghena ka Nowa ni ndyangu wa yena engalaveni ni ku humesiwa ka Lota ni ndyangu wa yena hi tintsumi eSodoma. Swi vula ku pona. Hi tlhelo lerin’wana, ku siyiwa swi vula ku lovisiwa.

Emhakeni leyi, vadyondzisiwa va vutisa va ku: “Hosi, swi ta va kwihi ke?”

Yesu wa hlamula a ku: “Laha ntsumbu wu nga kona, hi laha [magama] ma nga ta hlengeletana kona.” Lava va ‘tekeriwaka’ ku pona va fana ni magama lama vonaka ekule hikuva ya hlengeletana laha “ntsumbu wu nga kona.” Ntsumbu wu kombetela eka Kriste wa ntiyiso eka vukona bya yena lebyi nga vonekiki ematimbeni ya Mfumo ni le nkhubyeni wa moya lowu Yesu a wu lunghiselelaka. Luka 17:20-37; Genesa 19:26.

▪ Mfumo a wu ri exikarhi ka Vafarisi hi ndlela yihi?

▪ Xana vukona bya Kriste byi fana ni rihati hi ndlela yihi?

▪ Ha yini vanhu va ta lovisiwa hi swiendlo swa vona hi nkarhi wa vukona bya Kriste?

▪ Xana swi vula yini ku tekiwa, ni ku siyiwa?