Xana U Ri Lulamerile Siku Ra Yehovha?

“Siku ra Yehova le’rikulu ri ṭhinele, ri ṭhinerile, ri v̌uya ri hatlisa hi ku tlurisa.”—SOFONIYA 1:14.

1. Matsalwa ma ri hlamusela njhani siku ra Yehovha?

“SIKU le’rikulu, le’ri tšhav̌isaka” ra Yehovha ri ta ta ehenhla ka mafambiselo lawa yo biha ya swilo ku nga ri khale. Matsalwa ma hlamusela siku ra Yehovha tanihi leri nga ta va ra nyimpi, munyama, vukarhi, nhlomulo, maxangu, huwa ni ra ku onhetela. Kambe, ku ta va ni vaponi, hikuva “uṅwana ni uṅwana l’a khongelaka v̌ito ra Yehova o ta pona.” (Yuwele 2:30-32; Amosi 5:18-20) Ina, Xikwembu xi ta herisa valala va xona kutani xi ponisa vanhu va xona.

2. Hikwalaho ka yini hi fanele hi teka siku ra Yehovha ri ri leri tshineleke?

² Vaprofeta va Xikwembu va vulavule hi ku tshinela ka siku ra Yehovha. Hi xikombiso, Sofoniya u tsarile: “Siku ra Yehova le’rikulu ri ṭhinele, ri ṭhinerile, ri v̌uya ri hatlisa hi ku tlurisa.” (Sofoniya 1:14) Xiyimo lexi i xa xihatla swinene namuntlha hikuva Mulovisi Lonkulu la vekiweke hi Xikwembu, ku nga Hosi Yesu Kreste, u le kusuhi ni ku ‘boha banga ra yena etsheveni ra yena, a ya lwela ntiyiso, vutitsongahati ni vululami.’ (Pisalema 45:3, 4) Xana u ri lulamerile siku rero?

A Va Ri Ni Ku Langutela Lokukulu

3. Hi kwihi ku langutela loku Vakreste van’wana va le Tesalonika a va ri na kona, naswona a va hoxile hi swivangelo swihi swimbirhi?

³ Leswi vo tala a va swi languterile malunghana ni siku ra Yehovha a swi hetisekanga. Vakreste van’wana vo sungula va le Tesalonika va te, “Siku ra Hosi sweswi ri fikile!” (2 Vatesalonika 2:2) Kambe a ku ri ni swivangelo swimbirhi swa xisekelo leswi a swi endla leswaku ri nga fiki hi ku hatlisa. Loko a tshaha xin’wana xa swona, muapostola Pawulo u te: “Siku vanhu va nga ta ku: ‘Ku rhulile, ku hava xo karhata,’ hi wona nkarhi lowu ku onhaka ku nga ta va wela henhla hi xitshuketa.” (1 Vatesalonika 5:1-6) “[E]nkarini [lowu] wa makumu,” hina hi rindzele ku hetiseka ka marito wolawo. (Daniyele 12:4) Nakambe Vatesalonika a va lava xikombiso xin’wana xa ku ta ka siku ra Yehovha lerikulu, hikuva Pawulo u va byerile a ku: “A ri nge fiki loko ku nga si sungula ku va ni vugwinehi.” (2 Vatesalonika 2:3, NW) Loko Pawulo a tsala marito lawa (kwalomu ka 51 C.E.), “vugwinehi” eka Vukreste bya ntiyiso a byi nga si vonaka hi ku helela. Namuntlha, hi byi vona kahle eVujaganini. Hambiswiritano, ku nga khathariseki ku langutela ka vona loku nga hetisekangiki, vatotiwa lava va le Tesalonika, lava hambeteke va tirhela Xikwembu hi ku tshembeka ku fikela eku feni, eku heteleleni va kume hakelo ya le tilweni. (Nhlavutelo 2:10) Na hina hi ta hakeriwa loko ho tshama hi tshembekile loko hi ri karhi hi rindzele siku ra Yehovha.

4. (a) Xana siku ra Yehovha ri fanisiwa na yini eka 2 Vatesalonika 2:1, 2? (b) Hi rihi langutelo leri lava vuriwaka Vatatana va Kereke a va ri na rona malunghana ni ku vuya ka Kreste, ni timhaka leti yelanaka na kona?

⁴ Bibele yi hlanganisa “siku ra Yehova le’rikulu” ni “[vukona bya, NW] Hosi ya hina Yesu Kriste.” (2 Vatesalonika 2:1, 2) Lava vuriwaka Vatatana va Kereke a va ri ni mianakanyo yo hambana-hambana malunghana ni ku vuya ka Kreste, vukona bya yena ni ku Fuma ka yena ka Gidi ra Malembe. (Nhlavutelo 20:4) Eka lembe-xidzana ra vumbirhi C.E., Papias wa le Hiyerapoli a a ri ni ntshembo wa leswaku misava yi ta va leyi noneke hi nkarhi wa ku Fuma ka Kreste ka Gidi ra Malembe. Justin Martyr u vulavule hi vukona bya Yesu hi ku phindha-phindha naswona a a langutele leswaku Yerusalema lowu pfuxetiweke a wu ta va ndhawu leyi Mfumo wa Yena a wu ta va eka yona. Irenæus wa Lyons u dyondzise leswaku endzhaku ka ku lovisiwa ka Mfumo wa Rhoma, Yesu a a ta humelela a ri la voniwaka, a boha Sathana, kutani a fuma eYerusalema wa le misaveni.

5. Swidyondzi swin’wana swi te yini malunghana ni “ku Vuya ra Vumbirhi” ka Kreste ni ku Fuma ka yena ka Gidi ra Malembe?

⁵ N’wamatimu Philip Schaff u vule leswaku “dyondzo-nkulu” enkarhini wa le mahlweni ka Huvo ya Nicaea hi 325 C.E. a ku ri “dyondzo ya leswaku Kreste u ta fuma hi ndlela leyi vonakaka hi ku vangama emisaveni swin’we ni vakwetsimi lava pfuxiweke eku feni ku ringana gidi ra malembe, emahlweni ka ku pfuxiwa ka vafi lavan’wana ni ku avanyisa.” A Dictionary of the Bible, leyi hleriweke hi James Hastings, ya vika: “Tertullian, Irenæus na Hippolytus va ha langutele ku Vuya [ka Yesu Kreste] hi xihatla; kambe Vatatana va le Alexandria va hi yisa eka mianakanyo yin’wana. . . . Loko tidyondzo ta Augustine ti fanisa Gidi ra Malembe ni nkarhi wa vuthu ra Kereke, ku Vuya loku ka Vumbirhi ku tlhentlhiseriwe ekule swinene.”

Siku Ra Yehovha Ni Vukona Bya Yesu

6. Hikwalaho ka yini hi nga fanelanga hi fikelela makumu ya leswaku siku ra Yehovha ri le kule?

⁶ Ku twisisa swilo hi ndlela leyi hoxeke swi vange ku khomiwa hi tingana, kambe hi nga tshuki hi anakanya leswaku siku ra Yehovha ri le kule. Vukona bya Yesu lebyi nga vonakiki, lebyi sekeriweke eMatsalweni, ana se byi sungurile. Xihondzo xo Rindza ni minkandziyiso ya Timbhoni ta Yehovha leyi fambisanaka na xona, nkarhi na nkarhi yi nyikele vumbhoni bya Matsalwa bya leswaku vukona bya Kreste byi sungule hi lembe ra 1914.a Kutani ke, Yesu u te yini hi vukona bya yena?

7. (a) Hi swihi swivumbeko swin’wana swa xikombiso xa vukona bya Yesu ni xa makumu ya mafambiselo ya swilo? (b) Hi nga ponisiwa njhani?

⁷ Vukona bya Yesu byi ve nhloko-mhaka ya mbulavurisano emahlweninyana ka ku fa ka yena. Endzhaku ko n’wi twa a vhumbha ta ku lovisiwa ka tempele ya Yerusalema, vaapostola va yena, Petro, Yakobo, Yohane na Andriya va vutisile: “Xana timhaka leti ti ta humelela rini xana? Xana xikombiso xa [vukona bya, NW] wena ni xa ku hela ka [minkarhi] xi ta va xihi ke?” (Matewu 24:1-3; Marka 13:3, 4) Loko a hlamula, Yesu u vhumbhe tinyimpi, tindlala, ku tsekatseka ka misava ni swivumbeko swin’wana swa “xikombiso” xa vukona bya yena ni xa makumu ya mafambiselo ya swilo. U tlhele a ku: “Loyi a tiyiselaka ku fika makumu, hi yena loyi a nga ta ponisiwa.” (Matewu 24:13) Hi ta ponisiwa loko ho tiyisela hi ku tshembeka ku fikela emakumu ya vutomi bya hina bya sweswi, kumbe ku ya fika emakun’wini ya mafambiselo lawa yo biha.

8. Emahlweni ka ku hela ka mafambiselo ya swilo ya Xiyuda, hi wihi ntirho lowu a wu fanele wu endliwa, naswona i yini leswi endliwaka namuntlha malunghana na wona?

⁸ Loko makumu ma nga si fika, xivumbeko xa nkoka swinene xa vukona bya Yesu xi fanele xi hetiseka. Malunghana na xona, u te: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14, xiitaliki i xerhu.) Emahlweni ko va Varhoma va lovisa Yerusalema ni ku va mafambiselo ya swilo ya Xiyuda ma fika emakumu hi 70 C.E., Pawulo u swi kotile ku vula leswaku mahungu lamanene “[ma] twarisiwile eka swivumbiwa hinkwaswo leswi nge hansi ka tilo.” (Vakolosa 1:23) Hambiswiritano, namuntlha ntirho lowukulu wo chumayela wu endliwa hi Timbhoni ta Yehovha “eka vanhu va matiko hinkwawo.” Emalembeni ma nga ri mangani lama hundzeke, Xikwembu xi pfule ndlela ya leswaku ku va ni ku nyikeriwa lokukulu ka vumbhoni eYuropa Vuxa. Hi ku va ni tindhawu to kandziyisa ni miako yin’wana emisaveni hinkwayo, nhlengeletano ya Yehovha yi lunghekele ku andza ka ntirho, hambi ku ri “esin’wini leyi nga fikeleriwangiki.” (Varhoma 15:22, 23, NW) Xana mbilu ya wena yi ku susumeta leswaku u endla hilaha u nga kotaka hakona leswaku u nyikela vumbhoni makumu ma nga si fika? Lokoswiritano, Xikwembu xi nga ku nyika matimba leswaku u va ni vuyelo entirhweni lowa ha riki kona.—Vafilipiya 4:13; 2 Timotiya 4:17.

9. Hi yihi yinhla leyi Yesu a yi vuleke, hilaha swi tsariweke hakona eka Matewu 24:36?

⁹ Ntirho lowu vhumbhiweke wa ku chumayela hi Mfumo ni swivumbeko swin’wana swa xikombiso xa vukona bya Yesu swa karhi swa hetiseka sweswi. Hikwalaho, makumu ya mafambiselo lawa yo biha ya swilo, ma tshinele. Entiyisweni, Yesu u te: “Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le matilweni, hambi a ri N’wana; swi tiviwa hi Tatana ntsena.” (Matewu 24:4-14, 36) Kambe vuprofeta bya Yesu byi nga hi pfuna leswaku hi ri lulamela “siku ra kona ni nkarhi wa kona.”

A Va Ri Lulamerile

10. Xana hi swi tivisa ku yini leswaku swa koteka ku tshama u xalamukile hi tlhelo ra moya?

¹⁰ Leswaku hi pona siku lerikulu ra Yehovha, hi fanele hi tshama hi xalamukile naswona hi yima hi tiyile evugandzerini bya ntiyiso. (1 Vakorinto 16:13) Ha swi tiva leswaku ku tiyisela ko tano ka koteka, hikuva ndyangu lowu a wu chava Xikwembu wu swi endlile sweswo, naswona wu pone Ndhambi leyi loviseke vanhu vo homboloka hi 2370 B.C.E. Loko a fanisa nguva yoleyo ni vukona bya yena, Yesu u te: “Ku vuya ka N’wana-wa-Munhu ku ta fana ni leswi humeleleke emasikwini ya Nowa. Hikuva emasikwini walawo, loko ndhambi ya mati yi nga si ta, vanhu a va ri eku dyeni, va nwa, va hlomisa ni ku hlomiselana, ku ko ku fika siku leri Nowa a ngheneke engalaveni ha rona; a va nga anakanyi nchumu ku kondza loko ndhambi leyi ya mati yi ta, kutani yi va kukula hinkwavo; swi ta va tano ni le [ka vukona bya, NW] N’wana-wa-Munhu.”—Matewu 24:37-39.

11. Hi yihi ndlela leyi Nowa a yi landzeleke ku nga khathariseki madzolonga lawa a ma ri kona esikwini ra yena?

¹¹ Ku fana na hina, Nowa ni ndyangu wakwe a va hanya emisaveni leyi nga ni madzolonga. “V̌ana v̌a Šikwembu” va tintsumi vo pfumala ku yingisa va tihundzule va va ni mimiri ya nyama kutani va teka vavasati lava va va tswaleleke vana va swihontlovila va Tinefelimi—va mona, lava handle ko kanakana a va endla leswaku swiyimo swi nyanya ku biha hi madzolonga. (Genesa 6:1, 2, 4; 1 Petro 3:19, 20) Hambiswiritano, “Noa a ṭhama a famba ni Šikwembu” eripfumelweni. U “tikombise a nga ri na xihoxo exikarhi ka vanhu lava a va hanya enkarhini wa yena”—ku nga xitukulwana lexo homboloka xa le sikwini ra yena. (Genesa 6:9-11, NW) Loko hi titshega hi Xikwembu hi xikhongelo, hi nga swi kota ku endla leswi fanaka emisaveni leyi yo homboloka leyi nga ni madzolonga, loko ha ha rindzele siku ra Yehovha.

12. (a) Handle ko aka ngalava, hi wihi ntirho lowu Nowa a a wu endla? (b) Vanhu a va angula njhani eku chumayeleni ka Nowa, naswona ku ve ni vuyelo byihi eka vona?

¹² Nowa u tiviwa swinene a ri muaki wa ngalava yo ponisa vutomi eka Ndhambi. Nakambe a a ri “mutwarisi wa leswo lulama,” kambe vanhu lava a a hanya enkarhini wun’we na vona “a va nga ri na mhaka” ni rungula leri a a nyikiwe rona hi Xikwembu. A va dya, va nwa, va hlomisana, va va ni mindyangu ni ku ya emahlweni ni timhaka ta vutomi leti tolovelekeke ku kondza Ndhambi yi va lovisa. (2 Petro 2:5; Genesa 6:14) A va nga lavi ku twa nchumu hi mavulavulelo ni mahanyelo lamanene, hilaha xitukulwana xa namuntlha lexo homboloka xi alaka hakona ku yingisa leswi Timbhoni ta Yehovha ti swi vulaka malunghana ni “ku hundzukela eka Xikwembu,” ku kombisa ripfumelo eka Kreste, ku va ni vululami ni hi “ta ku avanyisiwa loku nga ta ta.” (Mintirho 20:20, 21; 24:24, 25) Ku hava matimu lama kombaka leswaku a ku ri ni vanhu vangani emisaveni loko Nowa a huwelela rungula ra Xikwembu. Kambe nchumu lowu hi nga tiyisekaka ha wona, hileswaku vaaki va misava va hunguteke swinene hi 2370 B.C.E.! Ndhambi yi dlaye lavo homboloka hinkwavo, ku tsetseleriwa ntsena lava a va tilulamisele goza rero ra Xikwembu—ku nga Nowa ni van’wana va nkombo va le ndyangwini wa yena.—Genesa 7:19-23; 2 Petro 3:5, 6.

13. Hi xihi xileriso xa vululami lexi Nowa a vekeke ntshembo lowu heleleke eka xona, naswona u endle hi ku pfumelelana na xona hi ndlela yihi?

¹³ Xikwembu a xi tivisanga Nowa ka ha sale malembe yo tala, siku ni nkarhi lowu kongomeke lowu Ndhambi a yi ta va ha wona. Hambiswiritano, loko Nowa a ri ni malembe ya 480 hi vukhale, Yehovha u humese xileriso a ku: “Moya wa nga a wu nga ha ṭhami hi masiku e munhwini, hikuv̌a i nyama, kutani masiku ya yena ma ta v̌a dzana ra malembe ni makume mambiri.” (Genesa 6:3) Nowa u veke ntshembo lowu heleleke eka xileriso lexi xo lulama xa Xikwembu. Endzhaku ka loko a ri ni malembe ya 500 hi vukhale, “a kuma Sem na Kam na Yefet,” naswona hi ku ya hi mukhuva wa le minkarhini yoleyo, ku ringanyetiwa leswaku ku hundze 50 ku ya eka 60 wa malembe majaha yakwe ma nga si teka. Loko Nowa a byeriwa ku aka ngalava leswaku a ta pona Ndhambi, majaha lawa ni vasati va wona, handle ko kanakana ma n’wi pfunile entirhweni wolowo. Ku aka koloko ka ngalava kumbexana ku kotlane ni vutirheli bya Nowa byo va “mutwarisi wa leswo lulama,” lebyi endleke leswaku a tshama a khomekile emalembeni yo hetelela ya 40 ku ya eka 50 emahlweni ka Ndhambi. (Genesa 5:32; 6:13-22) Emalembeni walawo hinkwawo, yena ni ndyangu wakwe va kombise ripfumelo. Na hina a hi kombiseni ripfumelo loko hi ri karhi hi chumayela mahungu lamanene naswona hi rindzela siku ra Yehovha.—Vaheveru 11:7.

14. I yini leswi Yehovha eku heteleleni a swi byeleke Nowa, naswona ha yini?

¹⁴ Loko ngalava yi ri kusuhi ni ku hela, kumbexana Nowa a a ehleketa leswaku Ndhambi yi le kusuhi, hambileswi a a nga swi tivi hi ku kongoma leswaku yi ta ta rini. Eku heteleleni Yehovha u n’wi byerile: “Ka ha sele masiku ya ntlhanu na mambiri, kutani nḍi ta nisa mpfula e misav̌eni hi masiku ya mune wa makume, ni v̌usiku bya mune wa makume.” (Genesa 7:4) Sweswo swi nyike Nowa ni ndyangu wakwe nkarhi lowu eneleke wo nghenisa tinxaka hinkwato ta swiharhi engalaveni, ni ku va va nghena endzeni ka yona Ndhambi yi nga si sungula. A swi kali swi lava hi tiva siku ni nkarhi lowu ku lovisiwa ka mafambiselo lawa ya swilo ku nga ta sungula ha wona; a hi byarhisiwanga vutihlamuleri byo ponisa swiharhi, naswona vanhu lava nga ni ntshembo wo pona va karhi va nghena engalaveni yo fanekisela, ku nga paradeyisi ya moya ya vanhu va Xikwembu.

“Hitekani”

15. (a) Hi marito ya wena n’wini, u nga ma hlamusela njhani marito ya Yesu lama kumekaka eka Matewu 24:40-44? (b) Ku ka hi nga wu tivi hi ku kongoma nkarhi lowu Yesu a nga ta tisa ku avanyisa ka Xikwembu ha wona, swi ni vuyelo byihi?

¹⁵ Malunghana ni vukona bya yena, Yesu u hlamuserile: “Enkarhini wolowo, eka vanhu vambirhi lava nga ta va [eku tirheni] emasin’wini, ku ta tekiwa un’wana, un’wana a siyiwa; eka vavasati vambirhi lava nga ta va eku sileni [ka tindzoho ti va mapa], ku ta tekiwa un’wana, un’wana a siyiwa. Hitekani ke, hikuva a mi tivi siku leri Hosi ya n’wina yi nga ta ta ha rona. Swi tiveni ke: Loko onge n’wini wa yindlu ú tivile nkarhi lowu khamba ri nga ta ta ha wona, ingi a hitekile, a nga tshikanga yindlu ya yena yi tshoviwa. Hikokwalaho na n’wina, tshamani mi tilunghisile, hikuva N’wana-wa-Munhu ú ta ta enkarhini lowu mi nga wu ehleketiki.” (Matewu 24:40-44; Luka 17:34, 35) Ku ka hi nga wu tivi hi ku kongoma nkarhi lowu Yesu a nga ta ku tisa ha wona ku avanyisa ka Xikwembu, swi endla leswaku hi gingiriteka, nakambe siku na siku swi hi nyika nkarhi wa leswaku hi kombisa leswaku hi tirhela Yehovha handle ka vutianakanyi.

16. Ku ta humelela yini hi vanhu lava nga “ta siyiwa” ni lava nga “ta tekiwa”?

¹⁶ Vanhu lava “siyiwa[ka]” eku lovisiweni ni lavo homboloka, va ta katsa lava dyondzisiweke, kambe va phasiweke hi hanyelo ra vutianakanyi. Onge hi nga va exikarhi ka lava nga “ta tekiwa,” lava tinyiketeleke eka Yehovha hi ku helela, naswona va ma tlangelaka hakunene malunghiselelo ya yena ya swa moya hi ku tirhisa “nandza la tshembekaka, wo tlhariha.” (Matewu 24:45-47) Ku ya fika emakumu, a hi tirheleni Xikwembu hi “rirhandzu leri humaka embilwini leyo tenga ni le ripfalweni lerinene, ni le ku pfumeleni ka xiviri.”—1 Timotiya 1:5.

Mintirho Leyo Kwetsima I Ya Nkoka

17. (a) I yini leswi vhumbhiweke eka 2 Petro 3:10? (b) Hi yihi yin’wana ya mintirho ni swiendlo leswi khutaziwaka hi 2 Petro 3:11?

¹⁷ Muapostola Petro u tsarile: “Siku ra Hosi ri ta ta tanihi khamba, kutani matilo ma ta hundza hi huwa leyikulu; hinkwaswo swa ntumbuluko swi ta tshwa hi ndzilo swi hela, kutani misava ni mintirho leyi nga ka yona swi ta hisiwa.” (2 Petro 3:10) Matilo yo fanekisela ni misava ya kona a swi nge poni ku hisa ka vukarhi bya Xikwembu lebyi pfurhaka. Kutani Petro wa engetela: “Leswi ku nga ta tshwa swilo leswi hinkwaswo swi hela hi ndlela leyi, mi fanele ku va ni vutomi lebyo hlawuleka bya vukhongeri!” (2 Petro 3:11) Yin’wana ya mintirho leyi ni swiendlo swa kona i ku va kona eminhlanganweni ya Vukreste nkarhi na nkarhi, ku endlela van’wana leswinene, ni ku hlanganyela hi xitalo eku chumayeleni ka mahungu lamanene.—Matewu 24:14; Vaheveru 10:24, 25; 13:16.

18. Loko se hi sungule ku namarhela misava, xana hi fanele ku endla yini?

¹⁸ “Vutomi lebyo hlawuleka bya vukhongeri” byi lava leswaku “[hi] papalata swilo leswi nyameke swa misava leyi.” (Yakobo 1:27) Kambe ku vuriwa yini hi loko se hi sungule ku namarhela misava leyi? Kumbexana hi kokeriwa exiyin’weni lexi nga ni khombo emahlweni ka Xikwembu hi ku lava vutihungasi lebyi thyakeke, kumbe ku yingisela vuyimbeleri ni tinsimu leti khutazaka moya wa misava leyi wo pfumala ku chava Xikwembu. (2 Vakorinto 6:14-18) Lokoswiritano, a hi kombeleni mpfuno wa Xikwembu hi xikhongelo leswaku hi ta ka hi nga hundzi ni misava, kambe hi amukeriwa emahlweni ka N’wana-wa-munhu. (Luka 21:34-36; 1 Yohane 2:15-17) Loko hi tinyiketerile eka Xikwembu, handle ko kanakana, hi ta lava ku endla hilaha hi nga kotaka hakona leswaku hi aka ni ku hlayisa vuxaka lebyikulu na xona, xisweswo hi tilulamisela siku ra Yehovha lerikulu ni leri chavisaka.

19. Hikwalaho ka yini vunyingi bya vahuweleri va Mfumo byi nga langutelaka ku pona makumu ya mafambiselo lawa yo biha ya swilo?

¹⁹ Nowa loyi a a chava Xikwembu ni ndyangu wakwe va ponile eka Ndhambi leyi loviseke misava ya khale. Vanhu lava lulameke va pone makumu ya mafambiselo ya swilo ya Xiyuda hi 70 C.E. Hi xikombiso, muapostola Yohane a ha gingiriteka entirhweni wa Xikwembu kwalomu ka 96-98 C.E., loko a tsala buku ya Nhlavutelo, rungula ra Evhangeli ya yena ni mapapila manharhu lama huhuteriweke. Eka magidi ya vanhu lava amukeleke ripfumelo ra ntiyiso hi Pentekosta ya 33 C.E., handle ko kanakana vo tala va vona va ponile loko ku hela mafambiselo ya swilo ya Xiyuda. (Mintirho 1:15; 2:41, 47; 4:4) Namuntlha vunyingi bya vahuweleri va Mfumo byi nga va ni ntshembo wo pona makumu ya mafambiselo ya sweswi ya swilo yo homboloka.

20. Hikwalaho ka yini hi fanele hi va ‘vachumayeri va leswo lulama’ lava gingiritekaka?

²⁰ Leswi hi nga ni ntshembo wo ponela emisaveni leyintshwa leyi ya ha riki emahlweni ka hina, a hi veni ‘vachumayeri va leswo lulama’ lava gingiritekaka. Mayana lunghelo ronghasi ro tirhela Xikwembu emasikwini lawa ya makumu! Naswona mayana ntsako wonghasi wo kongomisa vanhu “engalaveni” ya manguva lawa, ku nga paradeyisi ya moya leyi vanhu va Xikwembu va tiphinaka ha yona! Onge timiliyoni leti nga eka yona sweswi ti nga tshama ti tshembekile, ti xalamukile hi tlhelo ra moya, naswona ti lulamele siku ra Yehovha lerikulu. Kambe i yini lexi nga ta hi pfuna hinkwerhu leswaku hi tshama hi xalamukile?

[Nhlamuselo ya le hansi]

A Wu Ta Hlamurisa Ku Yini?

◻ Hi kwihi ku langutela loku van’wana a va ri na kona malunghana ni siku ra Yehovha ni vukona bya Kreste?

◻ Ha yini hi nga vulaka leswaku Nowa ni ndyangu wakwe a va yi lunghekerile Ndhambi?

◻ Ku ta humelela yini eka lava “hiteka[ka]” ni le ka lava nga hitekiki?

◻ Hikwalaho ka yini mintirho leyi kwetsimaka yi ri ya nkoka, ngopfu-ngopfu leswi hi yaka hi tshinelela siku lerikulu ra Yehovha?