Xiviko Xa Vahuweleri Va Mfumo
“Ku Vonakala Ka N’Wina A Ku Voningele Vanhu”
EDYONDZWENI ya yena ya le Ntshaveni, Yesu u byele vadyondzisiwa va yena a ku: “N’wina mi ku vonakala ka misava.” U ye emahlweni a va khutaza a ku: “Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge matilweni.”—Matewu 5:14-16.
Le Italy mintirho leyinene ya Timbhoni ta Yehovha yi xiyiwile. Hi xikombiso, ku tikhoma ka vona lokunene loko va ri emintsombanweni ya vona ya lembe na lembe ku tisa ku dzuneka eka Xikwembu, tanihi laha swiviko leswi landzelaka swi nyikaka vumbhoni hakona:
▪ Emalembeni yo tala, wansati un’wana wa le Terni, eItaly, a a pfuna n’wana wa yena leswaku a fambisa vhengele ra yena leri nga ekusuhi ni rivala ra mintlango leri nga edorobeni leri. Wansati loyi wa hlamusela: “Ndzi xiye ku hambana lokukulu exikarhi ka lava va taka emintlangwini ya bolo ya milenge ni va vapfhumba lava taka emintsombanweni ya Timbhoni ta Yehovha endhawini leyi. Timbhoni a ti ambale hi ndlela leyinene, a ti tshembeka ni ku va ni xichavo. A ndzi tshamela ku tivutisa leswaku swi ta njhani leswaku vanhu va tinxaka to hambana-hambana va twanana hi ndlela leyi.
“Siku rin’wana Mbhoni yin’wana yi ndzi yimisile exitarateni ivi yi ndzi vutisa loko ndzi ri tiva vito ra Xikwembu. A ndzi nga ri tivi, naswona tanihi leswi a ndzi swi tiva leswaku Timbhoni ta Yehovha i vanhu lavanene, ndzi pfumerile leswaku yi ndzi endzela. A ndzi ri ni swivutiso mayelana ni xiyimo xa vafi, leswi yi swi hlamuleke hi ku tirhisa Bibele. Handle ko kanakana, ndzi amukele dyondzo ya Bibele, naswona endzhaku ka mavhiki mambirhi ndzi sungule ku va kona eminhlanganweni.
“Eku sunguleni n’wana wa mina a a lwisana na mina, kambe mahanyelo ya mina ni ku tiyimisela ka mina swi cince langutelo ra yena. Ana se a ndzi ri ni tin’hweti ta kaye ndzi ri karhi ndzi dyondza. Namuntlha n’wana wa mina ni nuna wa yena va bumabumela Timbhoni leti xavaka evhengeleni ra vona. Mina ndzi khuvuriwe eka ntsombano wun’wana lowu a wu ri erivaleni leri ra mintlangu.”
▪ Endzhaku ka ntsombano lowu a wu ri eRoseto degli Abruzzi, mufambisi wa ndhawu ya tikampa u te: “Ndzi swi xiyile leswaku Timbhoni ta Yehovha ti tshembekile eka hinkwaswo leswi ti swi endlaka. Vhiki leri hundzeke, a ku ri na 40 wa tona endhawini ya mina ya tikampa, naswona a ti ndzi vangelanga xiphiqo nikatsongo. Ku hambana ni sweswo, hi tona ntsena leti tlhelaka ti ta ku byela leswaku nhlayo ya lava va tshamaka na tona eka golonyi-kokiwa kumbe etendeni ra vona yi engeteleke hi munhu un’we. Hi ku ya hilaha ndzi ti tivaka hakona, i tikhasitama letinene ngopfu.”
▪ Endzhaku ka ntsombano lowu fanaka, mufambisi wa hotela u te: “Timbhoni ta Yehovha hinkwato i vanhu vo rhula. A ti bi pongo, ti ya eku etleleni hi nkarhi. Hakunene ti ni musa, ta tshembeka naswona ti tikhoma kahle. A swi ta tsakisa ngopfu loko vanhu hinkwavo a vo fana na tona. Van’wana va yiva xin’wana ni xin’wana—mabodlhela ya swiluva, swibya swo chela nkuma wa fole, hambi ku ri maphepha ya le xihambukelweni kun’we ni chukele! A ku si tshama ku humelela swilo swo fana ni leswi eka n’wina. Loko vana va n’wina va teka tiayisikrimi exigwitsirisini nimadyambu, a ndzi tikarhati hi ku ya ndzi ya langutisisa leswaku va teke yini. Va hlayela mali leyi va ndzi kolotaka yona naswona va ta va ta ndzi hakela hi ku hatlisa. Ndzi va tshemba hi ku helela. A swi ta tsakisa swonghasi loko ni van’wana a va ri tano! Ndzi navela onge vapfhumba hinkwavo va mina va ngo va Timbhoni ta Yehovha.”
Timbhoni ta Yehovha ta tiveka swinene le Italy, ku fana ni le matikweni man’wana ya misava. Ti ‘hanya hi mukhuva lowo saseka exikarhi ka vamatiko’ naswona hi ndlela leyi ti tisa ku dzuneka eka Xikwembu xa ntiyiso, lexi ti byarhaka vito ra xona.—1 Petro 2:12.