Xiviko Xa Vahuweleri Va Mfumo

Mintirho Leyinene Leyi Dzunisaka Yehovha

EDYONDZWENI ya yena ya le Ntshaveni, Yesu u byele vadyondzisiwa va yena a ku: “Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge matilweni.” (Matewu 5:16) Hilaha ku fanaka, Vakreste va ntiyiso namuntlha va hlanganyela eka “mintirho leyinene” leyi dzunisaka Yehovha.

Xana i yini mintirho leyi leyinene? Yi katsa ku chumayeriwa ka mahungu lamanene, kambe mahanyelo ya hina lamanene na wona i xiphemu xa nkoka. Hakanyingi i mahanyelo ya hina lamanene lama sungulaka ma kokela vanhu evandlheni ra Vukreste. Mintokoto leyi landzelaka yi kombisa ndlela leyi Timbhoni ta Yehovha le Martinique ti ‘endlaka ku vonakala ka tona ku voningela vanhu’ ha yona.

◻ Loko a ri karhi a endla ntirho wo chumayela hi yindlu na yindlu, un’wana wa Timbhoni ta Yehovha u endzele wansati wa Mukhatoliki. Ku ringana malembe ya 25 wansati loyi a a tshama ni wanuna loyi a va nga tekananga. A a tolovelane ni tidyondzo ta Timbhoni ta Yehovha tanihi leswi kwalomu ka malembe ya nkombo lama hundzeke, a a kume buku leyi nge U Nga Hanya Hi Masiku aParadeyisini eMisaveni.a Wansati loyi u byele Mbhoni leyi a ku: “Ku ni vukhongeri byo tala swinene. A ndzi tivi leswaku i bya mani lebyi ndzi faneleke ku pfumela eka byona exikarhi ka mpfilungano lowu hinkwawo.” Mbhoni yi hlamusele leswaku ntiyiso wu nga kumiwa ntsena eBibeleni ni leswaku loko a ta kota ku wu kuma, u fanele ku dyondza Matsalwa hi vurhon’wana kutani a khongela eka Xikwembu leswaku xi n’wi nyika moya wa xona ni nkongomiso wa xona.

Hambileswi a a swi tsakela ku dyondza Bibele, ku ringana nkarhi wo karhi wansati loyi u ale swirhambo swo hlayanyana swo ya hlanganyela minhlangano ya Vukreste eHolweni ya Mfumo ya Timbhoni ta Yehovha. Hikwalaho ka yini? Hikuva a a ri ni tingana swinene. Hambiswiritano, endzhaku ko kuma xirhambo xo ya eXitsundzuxweni xa rifu ra Kreste, u hlule tingana leti a ri na tona kutani u ve kona.

Lexi n’wi tsakiseke ngopfu malunghana ni nhlangano lowu a ku ri moya wa rirhandzu lowu a wu ri kona eHolweni ya Mfumo. A a nga si tshama a tokota xinghana xo tano lexi tiyeke ekerekeni ya yena! Endzhaku ka nhlangano wolowo u sungule ku va kona eminhlanganweni hinkwayo leyi a yi fambisiwa hi Timbhoni ta kwalaho, naswona ku nga ri kungani u tekane ni wanuna loyi a tshama na yena. Sweswi i xirho xa vandlha lexi khuvuriweke.

◻ Mintirho leyinene ya Mbhoni yin’wana yi ve ni mimbuyelo leyinene. A yi ri ni xikhundla lexi lavaka vutihlamuleri entirhweni wa le hofisini. Endzhaku ka loko ku thoriwe wanuna loyi a huma exihlaleni xa Réunion, vatirhi van’wana va sungule ku n’wi hlekula hikwalaho ka leswi a komile. U hundzuke xihlekiso. Ku hambana ni sweswo, nkarhi hinkwawo Mbhoni yona a yi ri ni tintswalo eka wanuna loyi yi tlhela yi n’wi xixima. Ku nga ri kungani u lave ku tiva leswaku hikwalaho ka yini yena a hambane swinene ni lavan’wana.

Mbhoni yi hlamusele leswaku mahanyelo ya yena lama nga ni xichavo i vuyelo bya misinya ya milawu ya Bibele leyi yi yi dyondzeke eka Timbhoni ta Yehovha. Yi tlhele yi n’wi komba leswi Matsalwa ma swi vulaka malunghana ni swikongomelo swa Xikwembu ni ntshembo wa misava leyintshwa. Wanuna loyi u amukele dyondzo ya Bibele, a sungula ku va kona eminhlanganweni ya Vukreste, ivi a tekana ni wansati loyi a hanya na yena.

Eku heteleleni u tlhelele eRéunion. Enkarhini lowu hundzeke a hanyisana ku tika ni maxaka yakwe, ngopfu-ngopfu vandyangu wa ka va nsati. Kambe sweswi va tsakisiwe ngopfu hi mahanyelo ya yena lamanene ya Vukreste. Wanuna loyi u khuvuriwile naswona sweswi i nandza wa vutirheli. Swirho swo hlayanyana swa ndyangu, ku katsa ni nsati wakwe swin’we ni vana vambirhi va vanhwanyana, na vona i vahuweleri va mahungu lamanene ya Mfumo wa Xikwembu evandlheni ra Vukreste.

[Nhlamuselo ya le hansi]