Xiviko Xa Vahuweleri Va Mfumo

‘Wa Tsaka Munhu La Kumeke Vutlharhi’

XIVURISO lexi xi ve xa ntiyiso eKorea, laha sweswi ku nga ni Timbhoni ta Yehovha leti tlulaka 71 000. (Swivuriso 3:13) Naswona ehleketa, 42 wa tiphesente ta vatirheli lava va le ntirhweni wa nkarhi hinkwawo! Ntokoto lowu landzelaka wu ta kombisa leswaku ntsako i njombo ya lava lavisisaka vutlharhi bya ntiyiso.

Wansati un’wana wa le Pusan u nghene yin’wana ya tikereke ta Vujagana ku ringana malembe ya 16. U vone swilo swo tala swinene leswi nga riki swa matsalwa, laha a nga sungula ku anakanya leswaku a ku na Xikwembu. Hi hala tlhelo, a a nga byi ali vukona bya Xikwembu, kutani u khongele Xikwembu hi mbilu hinkwayo leswaku a kuma kereke ya ntiyiso loko yi ri kona. Hi nkarhi wolowo, u tsundzuke Timbhoni ta Yehovha, naswona u kumbuke leswaku kereke yakwe yi ti sandzile, yi byela vangheni va kereke leswaku va tivonela hikuva Timbhoni a ti pfumeli eka Vunharhu-un’we, ndzilo wa tihele, ni tidyondzo tin’wana ta Vujagana. Kumbexana a a ti ri kereke ya ntiyiso? Hi ku pfuniwa hi muakelani, u kume laha ku nga ni Holo ya Mfumo. Hi xa-mundzuku ka kona, u ve kona enhlanganweni.

U hlamarisiwe hi ku hleleka ka nhlangano. A ku nga ri na pongo ro huwelela kumbe ku yimbelela hi ndlela leyi nga tolovelekangiki ku fana ni le kerekeni ya ka vona. U hlangane ni Mbhoni yin’wana leyi nga tsakela ku dyondza na yena Bibele, naswona dyondzo yo rhanga yi teke tiawara to hlaya hikwalaho ka swivutiso swakwe leswinyingi. Edyondzweni ya vumbirhi, u te u ta tshika kereke yakwe a va Mbhoni. U byele makwerhu wa xisati leswaku a swa ha laveki a dyondza na yena, hikuva se a ta ta emihlanganweni. Hambi swi ri tano, u kombiwe ku hlawuleka ka ku va ni dyondzo ya yena n’wini ya Bibele handle ka ku ya emihlanganweni. U amukele xiringanyeto xexo, a tinyiketela edyondzweni yakwe, naswona loko ku fika nkarhi u khuvuriwile.

Sweswi wa tsaka leswi a kumeke vutlharhi bya Xikwembu xa ntiyiso, Yehovha, naswona u ni ntshembo wo hanya hi laha ku nga heriki emisaveni leyintshwa ya Xikwembu.

Ndhuna Leyi Nga Ha Tirhiki Yi Dyondza Ntiyiso

Nsati wa ndhuna ya mavuthu u khuvuriwe hi 1962. Nuna wakwe u rhange hi ku n’wi kaneta, kambe endzhaku u tshike ku n’wi kaneta, naswona emalembeni lama landzeleke ya 28, vamakwerhu vo hambana-hambana a va hlaya na yena va pfa va tshika, va ringeta ku n’wi tisa entiyisweni. A ya emihlanganweni ni le mintsombanweni, kambe hi un’wana wa lava a va nga lavi ku amukela ntiyiso hi ku helela. Hi 1990, yena ni nsati wakwe va ye eJapani, laha va nga ya entsombanweni wa muganga. Entsombanweni lowu u yingiserisise tinkulumo—ku nga nchumu lowu a nga si tshamaka a wu endla. U hlamarisiwe hi tinkulumo ta matimba leti paluxaka vukhongeri bya mavunwa, kambe leswi swi n’wi pfule mahlo leswaku a vona vukanganyisi bya Vujagana. U tsakisiwe hi nhleleko ni ku tsaka ka vanhu va Xikwembu eJapani, leswi a swi fana ni leswi a swi voneke eKorea. Loko a vuyela eKorea, u sungule dyondzo ya xiviri ya Bibele naswona eku heteleleni u khuvuriwile.

Kutani a fanele ku endla yini loko a khuvuriwile? U tshike ntirho wakwe wo va muungameri wa hotela yo duma swinene ya vapfhumba ivi a landzela nsati wakwe evutirhelini bya vuphayona bya nkarhi hinkwawo. U vona onge ku va phayona ra nkarhi hinkwawo i ndlela yo antswa yo hakela malembe ya 28 lawa a ma tlangiseke loko a ha kokela endzhaku.

Sweswi wa swi xiya leswaku xivuriso lexi nge, ‘wa tsaka munhu la kumeke vutlharhi’ xa tirha ni le ka yena!