Xiviko Xa Vahuweleri Va Mfumo

Tinyimpfu Ta Yesu Ti Yingisa Rito Ra Yena

TANIHI leswi ntirho wo chumayela wu yaka emahlweni eswiphen’wini hinkwaswo swa misava, Yehovha hi ku tirhisa tintsumi ta yena u kongomisa malandza ya yena eka lava fanaka ni tinyimpfu. Va twa rito ra Yesu naswona va dyondza ku n’wi tirhela va langutele vutomi lebyi nga heriki. Yesu eka Yohane 10:27, 28 u te: “Tinyimpfu ta mina ti yingisa rito ra mina; ndza ti tiva, kutani ta ndzi landzelela. Ndzi ti nyika vutomi lebyi nga heriki.” Xiya ndlela leyi lava timbilu letinene eMadagascar va yingiseleke ha yona rito ra Yesu.

Un’wana wa Timbhoni ta Yehovha u nyike dokodela loyi a ta eku kambeleni ka tata wa yena la vabyaka, tikopi ta tibuku leti nge U Nga Hanya Hi Masiku aParadeyisini eMisaveni ni Your Youth—Getting the Best Out Of It.

Dokodela yoloye a a ri Muprotestente naswona a a ti kaneta swinene Timbhoni, kambe u hlaye buku yoleyo a kamba ni matsalwa eBibeleni ya yena. Nsati wa yena, loyi a a ri Mukhatoliki a tlhela a va dokodela, u hlaye buku leyi nge Youth minkarhi yo tala hikuva u vule leswaku onge yi tsaleriwe ngopfu-ngopfu yena. Nhlamuselo ya Sosayiti leyi sekeriweke eBibeleni leyi kombaka nkoka wa 1914 yi va tsakise hinkwavo. Nuna wa yena u tihlanganise ni Mbhoni leyi n’wi nyikeke tibuku teto. Mbhoni yoleyo yi tlhele yi n’wi nyika buku leyi nge Life—How Did It Get Here? By Evolution or by Creation? naswona yi endle malunghiselelo yo n’wi endzela ni nsati wa yena leswaku yi hlamula swivutiso swa vona. Loko yi va endzela, yi sungule dyondzo ya nkarhi hinkwawo ni mpatswa wolowo ni vana va wona vanharhu. Va yi twisise hi ku hatlisa Bibele.

Endzhaku ka dyondzo yo sungula, ndyangu hinkwawo wu sungule ku ta eminhlanganweni eHolweni ya Mfumo kutani endzhakunyana wu tsarise eXikolweni xa Vutirheli bya le Tilweni. Matikhomele ya vana va vona ma antswe hi ku hatlisa. Va swi dyondze eBibeleni leswaku, ku tlangela masiku yo velekiwa ni tiholideyi tin’wana ta vukhongeri a a swi nga ri swa Vukreste, kutani va tshika ku swi tlangela. Nuna wa kona a nga pfumelanga ku nyikela ngati ya yena eka maxaka, hambi leswi mhaka yoleyo a ku nga si vulavuriwa ha yona eka dyondzo ya Bibele. Hi ku hatlisa u suse yunifomo ya yena ya karati eka wadiropo ya yena; a yi yisa eka murhungi leswaku a rhungela vana va yena swiambalo ha yona. U hise timagazini ta yena ni tibuku leti vulavulaka hi vungoma bya tinyeleti. Endzhaku ka tin’hweti tinharhu ntsena loko va sungule ku dyondza, nuna ni nsati hi vumbirhi bya vona va sukele tikereke ta vona kutani va kombisa ku tsakela ka vona ku hlanganyela entirhweni wo chumayela. Sweswi va khuvuriwile.

◻ Wansati un’wana eThailand a a ri ku laveni ka ntiyiso. Hambi leswi a a ri Mubudha, a nga kalanga a tinyikela evukhongerini bya yena hikwalaho ka leswi a voneke vukanganyisi ni makwanga. Handle ka sweswo, a ku ri ni mikhuva yo hambana-hambana leyi a yi vona yi ri leyi onhaka. U twe yi n’wi karhata swinene.

Kutani, muakelani wa yena u n’wi tsundzuxe leswaku a ringeta Vukreste kutani a n’wi teka a n’wi yisa ekerekeni ya yena ya Pentekosta. Hambi swi ri tano, hi nkarhi wa tidyondzo wansati yoloye u navele swinene ku huma a famba a ya ekaya hikwalaho ka pongo, tanihi leswi lava a va ri kwalaho a va khongela hi marito lamakulu. A a ku ri ro hetelela ku ya ekerekeni yoleyo.

Endzhakunyana, u ringete kereke ya Rhoma Khatoliki. Kambe, endzhaku ko hlanganyela minkarhi yo tala, u vone vukanganyisi ni makwanga, xikan’we ni hanyelo ra vaprista ra vulovolovo. U nyangatsekile kutani a nga ha yi. Muprista a a hisekela ku tiva leswaku ha yini a sukile. Endzhaku ko twa xivangelo xa kona, u vungunye a ku: “Loko u lava ku joyina vanhu va rilondzo hakunene, yana eka Timbhoni ta Yehovha.” Wansati yoloye u vutise a ku: “Va kwihi?” Muprista u hlamule a ku: “Va tshama laha ku simekiweke vulawuri bya mphakelo wa mati.” Siku leri tlhandlamaka u va lavile a nga va kumi. A a hele matimba, kambe u hambete a anakanya hi Timbhoni ta Yehovha.

Siku rin’wana u twe un’wana wa vaakelani va yena a ri karhi a vungunya un’wana a ku: “Ku nga ri khale u ta va un’wana wa Timbhoni ta Yehovha!” Endzhaku ko twa sweswo, wansati yoloye u tsutsume a ya eka muakelani wa yena a ku: “Xana ti kona Timbhoni ta Yehovha laha kusuhi?” Nhlamulo yi te: “Ina, van’wana va vona va ta ta emugangeni wa ka hina va ri karhi va chumayela hi yindlu ni yindlu. U ta va vona hi maambalelo ya vona lamanene.” Ku te loko a twe sweswo a hatlisa a ya va languta. Eku sunguleni a nga va kumanga, kambe loko a ri karhi a tlhelela ekaya, u vone vavasati vambirhi va ri karhi va vulavula ni munhu un’wana. U va tshinelerile a vutisa loko va ri Timbhoni ta Yehovha. Loko va hlamula va ku hi vona, u va komberile a ku: “Tanani ekaya ra mina. Ndzi lava ku vulavula na n’wina.”

Ku sunguriwe dyondzo ya Bibele naswona ku nga khathariseki ku kanetiwa ni ku hlekuriwa hi swirho swa ndyangu, manana loyi u sungule ku va kona eminhlanganweni ni ku chumayela eka maxaka ya yena.

Entiyisweni Yesu wa ti tiva tinyimpfu ta yena naswona u ti hlengeletela enhlengeletanweni ya yena leswaku ti ponela emisaveni leyintshwa ya ku lulama.