Xiviko Xa Vahuweleri Va Mfumo
“Xikwembu A Xi Yi Hi Nghohe”
MALEMBE ya 1 900 lama hundzeke, muapostola Petro la huhuteriweke u tsale a ku: “Xikwembu a xi yi hi nghohe; kambe ematikweni hinkwawo, loyi a xi chavaka a vuya a endla leswi lulameke, xa n’wi tsakela.” (Mintirho 10:34, 35) Exikarhi ka Timbhoni ta Yehovha ku kumeka vanhu va tinxaka hinkwato ni lava kuriseriweke evukhongerini byo hambana. Va lava vululami, naswona va chava Xikwembu. Yehovha u amukela hinkwavo ka vona evandleni ra misava leyintshwa, hi laha swi endlekeke ha kona eka wansati un’wana le Chad.
Wansati loyi a a nga enerisiwi hi vukhongeri byakwe. Emalembeni lama hundzeke u amukele kopi ya buku leyi nge Your Youth—Getting the Best Out Of It, leyi humesiweke hi Timbhoni ta Yehovha naswona u tlangele ndzayo leyinene leyi nga ebukwini. Dyondzo ya Bibele yi sunguriwile, naswona nkarhi hinkwawo a ri kona loko ku dyondziwa. Hambi swi ri tano, loko a khutaziwe ku va kona eminhlanganweni eHolweni ya Mfumo, a nga humelelanga. Ha yini? Hambi leswi nuna wakwe a a nga n’wi arisi ku dyondza, a a nga n’wi nyiki mpfumelelo wo ya eminhlanganweni eHolweni ya Mfumo.
Loko wansati a lava ku va kona enhlengeletanweni ya xifundzha, Mbhoni leyi fambisaka dyondzo yi kombe nuna wakwe nongonoko wa nhlengeletano, yi kandziyisa ndzayo leyinene leyi nga ta va kona. U pfumelele nsati wakwe ku ya “kan’we ntsena.” U ve kona, naswona u tiphine swinene hi nongonoko. Endzhaku ka loko a hlamusele nuna wakwe leswi a swi dyondzeke, a nga ha n’wi alelanga ku va kona eminhlanganweni leyin’wana. U tsakisiwe hi ku vona leswaku vandlha ri ni vanhu va tinxaka to hambana, lava khathalelanaka swinene. Endzhaku u ve kona entsombanweni wa muganga naswona u hlamarisiwe hi ku vona vana va yena va xingiwe hi Timbhoni leti humaka ematikweni man’wana. Timbhoni ti dye swakudya na vana va yena naswona ti va khome tanihi ndyangu. Loku a ku ri ku cinca loku xiyekaka eka yena.
Kambe ku kanetiwa ku landzerile. Hambi leswi a a nga titshembi hi ntumbuluko, u sungule ku hlamula eminhlanganweni ni ku tiyimela loko maxaka ni vaakelani va n’wi kaneta. Hambi leswi a a tshame ni nuna wakwe malembe yo tala, a va nga byi tsarisanga vukati bya vona. Xana a a ta yi sungula njhani mhaka leyi ya ku tsarisa vukati hi nawu? Endzhaku ka ku khongela hi mbilu hinkwayo eka Yehovha, u vulavule ni nuna wa yena, loyi a nga vula leswaku u ta swi vona. Eku heleleni u pfumerile, naswona mpatswa wu tekane hi nawu.
Muharivo wakwe loyi a a tshama na vona u vange swiphiqo leswo tala, kambe nuna a yima ni nsati wakwe. Kutani tata wa nuna u va endzerile. U lerise n’wana wakwe ku tshika nsati wakwe, tanihi leswi a a tshike vukhongeri bya yena. Tata wakwe u n’wi byele leswaku u ta n’wi lovolela “wansati wo antswa swinene.” N’wana wakwe u hlamule a ku: “E-e, a ndzi nge swi endli sweswo. I nsati lonene. Loko yena a lava ku famba, i swa yena sweswo, kambe mina ndzi nge n’wi hlongoli.” Wansati loyi a a titsongahata swinene eka tata wa nuna wakwe, kutani tatana loyi u khomiwe hi tingana hikwalaho ka swiendlo swa yena. Hambi swi ri tano, loko a tlhelela ekaya, u tsalele n’wana wa yena, a endla xiboho. U vule leswaku loko n’wana wakwe a ala ku hlongola nsati wa yena, a nga ha ri n’wana wa yena. Nakambe n’wana wakwe u yime ni nsati wakwe. Anakanya hi ntsako lowu wansati loyi a veke na wona loko a vona nuna wakwe a teka goza ro tano ro tiya.
Sweswi vana va vona vambirhi lavatsongo va rhandza ku famba ni mana wa vona eHolweni ya Mfumo. Va tlhele va kombela tata wa vona leswaku a va xavela tithayi, tanihi leswi va voneke leswaku vamakwerhu hinkwavo va xinuna lava nyikelaka tinkulumo va bohe tithayi. Namuntlha wansati loyi i makwerhu la khuvuriweke.
I un’wana wa Timbhoni leti tsakeke ta 345 le Chad leti twarisaka mahungu lamanene ya Mfumo wa Yehovha ni leti swi vonaka leswaku hakunene, “Xikwembu a xi yi hi nghohe.”