Xiviko Xa Vahuweleri Va Mfumo
Rirhandzu Ri Hlanganisa Mindyangu
VUN’WE bya ndyangu byi nga fikeleriwa loko vukati byi seketeriwe ehenhla ka rirhandzu leri kongomisiwaka hi ku pfumala vutianakanyi ntsena. Rirhandzu ro tano ri huma eka Yehova, Xikwembu xa rirhandzu, kutani i muhandzu wa moya wa Xikwembu. (Vagalatiya 5:22, 23; 1 Yohane 4:8) Mintokoto leyi landzelaka yi kombisa ndlela leyi rirhandzu leri seketeriweke evutivini bya Bibele ri hlanganiseke mindyangu ha yona.
Hong Kong
◻ EHong Kong phayona ri sungule dyondzo ya le kaya ya Bibele ni manana wa ndyangu ni vana va yena vambirhi va vanhwanyana. Nuna wa yena u phofule ku vilela leswaku a nga ha va a ri eku katsekeni eka ntlawa wa vukhongeri lowu pfukelaka. Phayona ri ringanyete eka wansati wa yena leswaku a rhamba nuna wa yena ku tshama edyondzweni ivi a boha makungu hi yexe, ku nga leswi a swi endleke. Hi nkarhi lowu fanaka, nsati u sungule ku va kona eminhlanganweni, kambe u ve na xiphiqo xo letela vana va yena. Nkarhi na nkarhi a a holovela lonkulu ivi a lema lontsongo. Manuku swi tivekile leswaku yena ni nuna wa yena a va ri na swiphiqo. Ku holova ka vona hakanyingi a ku pfuxa vukari, naswona minkarhi yo hlayanyana a ku fanele ku vitaniwa maphorisa. Phayona ri tirhise Rito ra Xikwembu ra matimba ku va dyondzisa ndlela yo kombisa rirhandzu ra Xikwembu evukatini bya vona. Hi ku hatlisa tindlela ni mikhuva leya khale swi sungule ku hundzuka. Hinkwavo va ve vahlanganyeri va minhlangano va nkarhi na nkarhi, naswona moya lowu tsakisaka swinene wu kurile ekaya. Nuna u tshike ku dzaha naswona sweswi u joyine Xikolo xa Vutirheli bya le Tilweni. Nsati sweswi i muhuweleri la khuvuriweke.
Vun’we bya ndyangu byi fikeleriwe hi ku kombisa rirhandzu, muhandzu wa moya wa Xikwembu.
Britain
◻ Ntokoto lowu humaka eBritain wu kombisa ndlela leyi ha yona Yehova a katekisaka wanuna loyi a kombisaka rirhandzu, ku leha mbilu ni ku tiyisela eku tirhisaneni ni nsati wa yena. Loko nuna a ta entiyisweni malembe ya 12 lama hundzeke, ku kaneta ka tihanyi ka nsati wa yena ku n’wi kongomise eku kumeni ku dlaya vukati loku nga enawini. Hambi swi ri tano, wanuna u ye emahlweni a n’wi kombisa tintswalo, a tiyiseka leswaku wa khathaleriwa hi swa timali, a n’wi endlela mintirho leyintsongo ya nkarhi na nkarhi. Endzhaku ka malembe ya mune naswona ku nga khathariseki ku kaneta ka yena ko sungula, u kunguhate ku n’wi byela ntiyiso nakambe. Lexi n’wi hlamariseke swinene, loko a ringanyete leswaku makwerhu wa xisati a dyondza Bibele na yena, u pfumerile. Eku heteleleni, u teke xiyimo xa yena xa ntiyiso naswona u khuvuriwile. Wanuna a nga kalanga a lahla rirhandzu ra yena ha yena, naswona loko a kombise leswaku u endle ntiyiso wu va wa yena n’wini, u n’wi kombele ku tlhela va tekana. A a nyanyukile, a nga n’wi langutelanga ku endla leswi hikwalaho ka langutelo ra yena lero biha ra khale. Sweswi va na kwalomu ka malembe ya nhungu va tekanile nakambe, naswona hinkwavo va endla nhluvuko lowunene entiyisweni.
Pacific Dzonga
◻ Hi malembe lama tlulaka 20 lama hundzeke, wanuna loyi a tshamaka exihlaleni eTuvalu ePacific Dzonga u tsalele Sosayiti ya Watch Tower a kombela tibuku. A ku nga ri na Timbhoni exihlaleni hi nkarhi wolowo. Kambe ke, u hlaye tibuku a ri yexe ivi a wu xiya tanihi ntiyiso. Hambi swi ri tano, nsati wakwe u kanete vupfumeri bya yena lebyintshwa hi matimba, kutani u byi tshikile.
Sweswinyana, loko tibuku ti sungula ku va kona hi Xituvalu, wansati u xave tibuku tin’wana naswona u swi kotile ku ti hlaya a ri yexe. Manuku u xiye ntiyiso ivi a vilela eka nuna wa yena a ku: “Hi malembe lawa hinkwawo a wu ri ni ku twisisa, kambe a wu ku kombisanga. Ha yini u nga ndzi hlamuselanga mhaka leyi ha yona u pfumeleke leswaku Timbhoni a ti tiyisile?” Sweswi wu hlanganeke entiyisweni wa Bibele, mpatswa lowu wu sungule ku hlanganyela ni Timbhoni.
Loko vana va vona vambirhi va vanhwanyana, lava a va ye exikolweni eFiji, va vuye ekaya, vatswari va va tivise hi makungu ya vona ya ku va Timbhoni ta Yehova. Va khutaze vanhwanyana ku va joyina edyondzweni ya Bibele, kambe lexi va hlamariseke, va kume leswaku vanhwanyana ana se a va va kona eminhlanganweni eFiji. Ndyangu hi ntsako wu amukele ntiyiso kun’we, naswona tatana, manana, ni un’wana wa vanhwanyana va ve vahuweleri va Mfumo.
A hi ku tsakisa ka swona ku vona ndlela leyi ha yona ntiyiso wa Bibele ni rirhandzu swi hlanganisaka mindyangu emisaveni hinkwayo.