Xiviko Xa Vahuweleri Va Mfumo
Mahungu Lamanene Yo Huma eNorway
MINTOKOTO yo tala leyinene ya kumiwa hi vahuweleri va mahungu lamanene lava tlulaka 9 500 eNorway. Vanhu va timbilu letinene va xiya mahungu ya Bibele lama twarisiwaka hi Timbhoni ta Yehova tanihi ntiyiso ni nhlamulo ya swikhongelo swa vona, hi laha swi xiyiweke ha kona eka mintokoto leyi landzelaka.
◻ Mpatswa lowuntshwa wu khongele Xikwembu leswaku xi wu pfuna ku kuma xikongomelo evuton’wini. Vhiki endzhakunyana Timbhoni ta Yehova ti fikile, naswona wansati u va rhambe leswaku va nghena. Wanuna a tsundzuxiwile ehenhleni ka Timbhoni, kutani u humele ehandle a ya hlantswa movha wa yena. Wansati a tswaleriwe eLebanon kutani a a ri na xiphiqo xa ririmi, kutani Timbhoni ti n’wi kombe vito ra Yehova eBibeleni ya yena ya Xiarabu. Mavhiki mambirhi endzhakunyana Timbhoni ti tlhelerile, nakambe wanuna u humele ehandle ku ya hlantswa movha wa yena. Timbhoni ti kombele wansati loko a nga swi kota leswaku nuna wa yena a va kona nkarhi lowu landzelaka loko va ta leswaku a ta toloka, u tshembise ku n’wi kombela.
Eka riendzo ra vunharhu, movha a wu basile lerova wanuna a a nga ta wu tirhisa tanihi xivangelo xo huma, kutani u tshamile a vutisa swivutiso swi nga ri swingani ku kuma ku hambana exikarhi ka Timbhoni ni kereke ya Tiko. Riendzo ri teke tiawara tinharhu naswona broxara yi siyiwile ni mpatswa. Loko Timbhoni ti famba, wansati u ye eku etleleni kambe wanuna u sungule ku hlaya broxara, a languta matsalwa hinkwawo. Exikarhi ka vusiku u pfuxe nsati wa yena kutani a ku: “U fanele ku hlaya leswi.” U pfukile, kutani va hlaya swin’we ku kondza ku va awara ya ntlhanu nimixo. Hi ku xiya leswaku va kume ntiyiso, va ririle hi ntsako kutani va khongela eka Yehova, hi ku tirhisa vito ra yena. Dyondzo ya Bibele ya nkarhi na nkarhi yi sunguriwile na vona, naswona va sungule ku va kona eminhlanganweni. U tshike ntirho wa yena wa nyimpi, kutani a huma ni le kerekeni naswona a tshika ku dzaha. Sweswi va khuvuriwile naswona hi ntsako wa tirhela Yehova kun’we ni vamakwavo va vona va xinuna ni va xisati emisaveni hinkwayo.
◻ Vamakwerhu vambirhi va xisati evutirhelini bya vona bya yindlu na yindlu eNorway va hlangane ni wansati la kombeke ku tsakela. U va rhambele ku tlhela va vuya kutani a va vutisa loko a nga rhamba vavasati van’wana. Eka riendzo ra vumbirhi, a ku ri ni vavasati van’wana vamune. Un’wana wa vona a hiseka swinene ekerekeni. U vule leswaku ku sukela a ha ri ntsongo, u lave ku yingisa xileriso xa Yesu xo endla vadyondzisiwa. Leswi swi n’wi yise eAfrika ni nuna wa yena eka ntirho wo pfuna matiko mambe. Vavasati hinkwavo a va ri ni swivutiso swo tala, naswona ku lunghiseleriwile leswaku vamakwerhu va va endzela endzhaku ka mavhiki man’wana ni man’wana mambirhi. Vaakelani lavantshwa va rhambiwile, naswona van’wana va hambete va ta loko van’wana va tshika ku va kona, kambe xirho lexi chivirikaka xa kereke xi swi vonile leswaku a xi ri ku dyondzeni ka ntiyiso. Siku rin’wana, loko mufundhisi wa kereke ya yena a vule leswaku u ta seketela nyimpi ni leswaku u pfumela eka dyondzo ya Vunharhu-un’we, u humile ekerekeni. U sungule ku va kona eminhlanganweni ya Timbhoni ta Yehova naswona hi ku hatlisa u sungule ku hlanganyela entirhweni wo chumayela. Hi ku hatlisa endzhakunyana u khuvuriwile. Kutani sweswi, endzhaku ka malembe ya 30, a nga tsaka eku yingiseni ka ntiyiso ka xileriso xa Yesu xo endla vadyondzisiwa.—Matewu 28:19.
Yehova wa va katekisa vamakwerhu eNorway entirhweni wa vona wo kwetsima kun’we ni lava yingisaka mahungu lamanene!