Xiviko Xa Vahuweleri Va Mfumo

“Hlawulekani”

XILERISO xa Xikwembu eka Vakriste xi ri “mi nga landzi ku navela ka n’wina loko biha loku a mi ri na kona mi nga si tiva nchumu. Kambe leswi loyi a nga mi vitana a hlawulekeke, hlawulekani na n’wina emahanyelweni hinkwawo ya n’wina. Hikuva ku tsariwile va ku: ‘Hlawulekani, hikuva mina ndzi hlawulekile.’” (1 Petro 1:14-16) Mahanyelo yo tano yo hlawuleka hakanyingi i vumbhoni lebyinene eka van’wana. (1 Petro 2:12) Emisaveni hinkwayo, tanihi laha mintokoto leyi landzelaka yi kombaka ha kona, vanhu lavanene va endla ku hundzuka loku faneleke ku twananisa mahanyelo ya vona ni xileriso lexi.

◻ AEcuador wanuna un’wana u tshike dyondzo yakwe ya Bibele loko Mbhoni leyi a yi dyondza na yena yi tsemeriwe vunghwavava. Xilaveko xakwe xa moya xi n’wi vangele ku lavisisa vukhongeri byin’wana. U tinyiketele vukhongeri bya Vuevangeli ivi a ya emahlweni ku fikela eyinhleni yo va mufundhisi wa kereke ya yena n’wini. Hambi swi ri tano, ripfalo rakwe a ri n’wi karhata, tanihi leswi a a tshama ni wansati loyi a va nga tekanangi. Loko a hlanganile ni vafundhisi va tikereke tin’wana, va n’wi tiyisile leswaku sweswo a ku nga ri xiphiqo. Kambe, u swi vonile leswaku leswi a swi nga ri swinene, tanihi leswi Mbhoni liya a yi dyondza na yena a yi tsemeriwe vunghwavava. A a nga twisisi leswaku hikwalaho ka yini a nga tshinyiwi hi kereke ya yena n’wini. Endzhaku, munghana wakwe loyi va tshamaka swin’we u hlangane ni Timbhoni ta Yehova ivi a sungula ku dyondza na vona. Wanuna loyi u sungule ku dyondza na yena. Hinkwavo ka vona sweswi va va kona eminhlanganweni, va kula evutivini bya milawu ya Bibele, naswona va teka magoza yo tekana leswaku va ta tirhela Yehova hi ndlela leyi baseke ni leyi amukelekaka.

◻ Eka ntokoto wun’wana wa le Ecuador, Mbhoni ya hlamusela: “Hi February 1984, wansati wa malembe ya le xikarhi u hi kombele ku dyondza na yena.” I yini xi susumeteleke xikombelo lexi? Makwavo wa xinuna wa wansati loyi a a ri un’wana wa Timbhoni ta Yehova, kutani u tsakisiwile swinene hi mahanyelo yakwe lamanene. Enkarhini wa dyondzo ya vumbirhi ya Bibele, va khumbe mhaka ya ku dzaha, leyi a ku ri yin’wana ya swiphiqo swa wansati loyi. Hambi swi ri tano, eka dyondzo leyi landzelaka endzhaku ka vhiki hi ku tikukumuxa u vule leswaku ku sukela a dyondze malangutelo ya Bibele ya ku dzaha a nga si khumba sigarete! A a ri na xiphiqo xin’wana—yindlu ya yena a yi tele hi swifaniso swa vukhongeri. Kambe loko a hlaya Deuteronoma 7:26, leyi nge: “U nga ṭhuki u nghenisa le’ŝi yilaka e ndlwini ya wena . . . Hikuv̌a ŝa yila,” u ye emahlweni a swi hisa hinkwaswo.

Ku sukela enkarhini wolowo ku ya emahlweni, u sungule ku va kona eminhlanganweni naswona a nga hundziwanga na hi wun’we ku sukela kwalaho. Hi ku hatlisa endzhaku ka sweswo, u swi kotile ku hlula xiphiqo xakwe lexikulu xo nonon’hwa—u tsemile vugangu byakwe ni wanuna la tekeke. Sweswi, ro sungula evuton’wini byakwe, u swi kotile ku tokota ntsako wa xiviri, tanihi leswi sweswi a swi kotaka ku tirhela Yehova hi ripfalo leri tengeke. U khuvuriwile hi April 1985 naswona hi nkarhi wolowo a a fambisa tidyondzo ta mune ta Bibele ni van’wana. Pakani yakwe leyi landzelaka i ku va phayona, tanihi leswi a vonaka leswaku leyi i ndlela leyi antswaka leyi a nga kombaka ku tlangela kakwe eka Yehova ha kona, loyi a n’wi ntshunxeke eka “vutomi bya hava ni lebyo biha.”

◻ Mimbuyelo leyinene ya mahanyelo lamanene yi voniwile exikolweni xa vanhwanyana lexi nga ni hositela aKenya, laha mahanyelo lamanene ya Mbhoni ya xiyiweke swinene. Vadyondzisi va kaye va xinuna va thoriwile hi xikolo, ku katsa ni un’wana wa Timbhoni ta Yehova. Kambe ha un’we-un’we va hlongoriwile hikwalaho ka mahanyelo lamo biha ya rimbewu ni swichudeni swa vanhwanyana. Endzhaku ka nkarhinyana a ku sele un’we eka lava kaye—mudyondzisi loyi a a ri un’wana wa Timbhoni ta Yehova!

Hakunene, swa olova eka vanhu lava hanyeke hi vunghwavava ku hundzuka. Loko hi va lava ‘hlawulekeke emahanyelweni ya hina hinkwawo,’ a hi nyikeli vumbhoni lebyinene eka van’wana ntsena kambe hi tlhela hi tsakisa mbilu ya Yehova. Xisweswo, hi tiveka eku pfumelelaneni ni vutomi lebyi nga heriki.—Swivuriso 27:11.

[Bokisi leri nga eka tluka 21]

“Hikuv̌a hi mina Yehova, Šikwembu ša ṅwina; mi ta tihlawula, mi v̌a la’v̌a hlawuriweke, hikuv̌a nḍi hlawulekile.”—Levitika 11:44.

[Bokisi leri nga eka tluka 21]

“Hi fanele ku tibasisa, hi susa thyaka hinkwaro ra miri ni ra moya.”—2 Vakorinto 7:1.