Ku Endla Malunghiselelo “Hi Ku Tenga Ni Hi Ku Hleleka”

¹ Leswaku ntsombano wa muganga wu kota ku humelela, ku fanele ku endliwa matshalatshala yo tala. Ndzawulo leyi kongomisaka ntsombano yi hlela ndhawu leyi faneleke ya ku tsombana ni ku endla malunghiselelo ya byetlelo. Munhu ha un’we ni mindyangu va endla malunghiselelo ya swo famba ni ya byetlelo. Kasi mavandlha ma endla malunghiselelo ya ku hoxa xandla eka tindzawulo to hambana-hambana leti endlaka leswaku ntsombano wu va kona. Xikongomelo xa sweswo i ku endlela leswaku ‘swilo swi endliwa hi ku tenga ni hi ku hleleka.’—1 Kor. 14:40.

² Loko mi ri karhi mi endla matshalatshala ya ku tirhisana ni lava va lunghiselelaka ntsombano, tsundzukani leswaku swi teka tin’hweti—minkarhi yin’wana ni malembe—ku endla malunghiselelo wolawo. Madzana ya vamakwerhu va heta nkarhi wo tala va ri karhi va endla malunghiselelo. Malunghiselelo wolawo ma katsa ku hirha tindhawu, ku hlengeleta leswi nga ta tirhisiwa ni ku kuma vatirhi. Vanhu hinkwavo va vuyeriwa hi mikateko ya moya hikwalaho ka malunghiselelo lama endliwaka ka ha ri ni nkarhi. Xana hi nga pfuna hi ndlela yihi?

³ Khomisana Ni Lava Va Endlaka Malunghiselelo Ya Byetlelo: I swa nkoka leswaku hinkwerhu hi khomisana ni malunghiselelo ya ntsombano. Leswi swa tirha ngopfu-ngopfu loko hi tilunghiselela byetlelo. Eka ntsombano ha wun’we ku ni xilaveko xa byetlelo byo tala bya lava teke entsombanweni. Vamakwerhu vo tala i swisiwana, hikwalaho va ta lava byetlelo lebyi nga durhiki. Ku endliwe matshalatshala lamakulu hilaha swi nga kotekaka ha kona leswaku ku kumeka byetlelo lebyi nga durhiki. Hi fanele hi anakanyela swilaveko swa van’wana hi rirhandzu, ‘hi nga veki tihlo etimhakeni ta hina ntsena, kambe ni le timhakeni ta van’wana.’—Filp. 2:4.

⁴ Loko hi yi namarhela swinene minkongomiso ya ntsombano malunghana ni ku kuma byetlelo, hinkwavo lava katsekaka va ta vuyeriwa. Kambe loko hi yi honisa, hi ta vanga swiphiqo swi nga fanelanga. Njhani? Loko hi landzelela minkongomiso leyi, tihotela ni tihositele ti kota ku swi tiva ka ha ri ni nkarhi leswaku ti nga langutela vanhu vangani. Sweswo swi ti pfuna ku endla malunghiselelo. Loko vo tala va hina hi byela vafambisi va tihotela leswaku a hi nge he ti kumbe hi endla malunghiselelo man’wana, sweswo swi ta va kavanyeta, swi tlhela swi endla leswaku vamakwerhu lava a va navela ku kuma byetlelo kwalaho va nga byi kumi. I swinene leswaku hi khomelela eka leswi hi swi vuleke, ‘Ina wa hina a va Ina’!—Mat. 5:37.

⁵ Xiya Vuyelo Lebyi Lebyinene: Endzhaku ka ntsombano wun’wana, mufambisi wa ndhawu ya ku dzima matende u te: “Ndzi xiye leswaku Timbhoni ta Yehovha ta tshembeka eka xin’wana ni xin’wana lexi ti xi endlaka. Vhiki leri nga hundza, 40 wa tona a ti dzime matende endhawini ya mina naswona a ndzi va nga ni xiphiqo ni xin’we. Ku ri na sweswo hi tona ntsena ti taka ti ta vika loko ti ri ni vanhu lava engetelekeke eka tikharavhani kumbe matende ya tona. Hi ku ya hi mina, i vanhu vo antswa swinene lava u nga tirhisanaka na vona.” A swi ta va swinene ngopfu loko hinkwavo lava hi hirhaka tindhawu eka vona a vo vula leswi fanaka ha hina! Sweswo swi ta nyikela vumbhoni lebyinene!

⁶ Mufambisi-nkulu wa tihotela to hlayanyana u tshama a ku: “A ndzi tsundzuki ku te ntlawa lowukulu wa vanhu lowu vekeke xikombiso lexinene ngopfu xa leswi va swi pfumelaka, ku fana ni Timbhoni ta Yehovha. Hi tshemba leswaku ti ta tlhela ti vuya.” Marito lama ma kombisa leswaku ku tikhoma lokunene a ku tsakisi hina ntsena kambe ku tsakisa ni lava va hi vonaka, emisaveni hinkwayo.

⁷ Tindlela Ta Xisekelo Leti Hi Nga Khomisanaka Ha Tona: Leswaku hi khomisana ni malunghiselelo ya ntsombano yo kuma byetlelo, a swi lavi swilo leswikulu. (1) Hi nga kombeli makamara yo tala ku tlula lawa hi nga ma tirhisaka. (2) A hi rhumeleni mali leyi ringaneke ya ku hi hlayisela wona. (3) Loko ku ri ni swo fihlula ha swona, hi nga tluli milawu leyi vekiweke malunghana na swona. (4) A hi tsundzukeni leswaku vini va ndhawu yoleyo va rindzele leswaku hi fambisana ni milawu ya vona.

⁸ Leswi hi nga malandza ya Yehovha Xikwembu, hi ni lunghelo ra ku kombisa vumunhu bya yena eka hinkwaswo leswi hi swi endlaka. Leswi swi katsa ku endla malunghiselelo ya ntsombano ni ku va kona eka yona, laha ku yimeriwaka vito ra Xikwembu. A hi tsundzukeni leswaku “a hi Xikwembu xa mpfilumpfilu, kambe i xa ku rhula.” (1 Kor. 14:33) Hikwalaho, loko hi ri karhi hi endla malunghiselelo ya Ntsombano wa Muganga wa “Vadyondzisi Va Rito Ra Xikwembu” ni ku va kona eka wona, a hi tiyimiseleni leswaku vanhu hinkwavo lava va hi vonaka va xiya mfanelo leyi ya Yehovha eka leswi va swi vonaka eka hina—ku nga ku tikhoma ni mahanyelo ya hina. Onge vanhu va timbilu to tshembeka va nga swi vona leswaku mintshungu leyi hlengeletaneke ya Yehovha yi endla malunghiselelo “hi ku tenga ni hi ku hleleka.”—Ps. 68:26.