Ntsombano Wa Muganga Wa Timbhoni Ta Yehovha Wa 2006 Lowu Nge “Nkutsulo Wu Tshinele!”
1. Xana vanhu va Xikwembu va le nkarhini wa khale va swi kombise hi ndlela yihi leswaku va byi tlangela vugandzeri bya ntiyiso, naswona hi xihi xirhambo lexi fanaka lexi na hina hi xi kumeke?
1 Hosi Hezekiya wa khale ka tiko ra Yuda u rhume vanhu leswaku va tsutsuma va yisa mapapila lama rhambaka vanhu enhlengeletanweni eYerusalema. (2 Tikr. 30:6, 13) Ndlela leyi vanhu va anguleke ha yona eka xirhambo lexi yi kombise langutelo leri a va ri na rona hi vugandzeri bya ntiyiso. (2 Tikr. 30:10-12) Etin’hwetini leti taka, malandza ya Yehovha ya namuntlha ma ta kuma nkarhi wo kombisa leswaku ma ri tlangela lunghelo ro hlengeletana ma gandzela Yehovha. Ku ni papila leri ana se ri rhumeriweke evandlheni ra ka n’wina, leri mi rhambaka eka Ntsombano wa Muganga lowu nge “Nkutsulo Wu Tshinele!” Xana u ta angurisa ku yini eka xirhambo lexi?
2. I yini lexi hi nga xi endlaka sweswi leswaku hi vuyeriwa swinene entsombanweni?
2 Sungula Ku Endla Malunghiselelo Sweswi: Leswaku hi vuyeriwa eka swakudya swa moya leswi hi lunghiseleriweke swona hi rirhandzu, hi fanele ku va kona masiku hinkwawo. Entsombanweni wa n’wexemu, a ku ri ni vanhu va 101 317 hi Ravuntlhanu. Hi Sonto a va ri 143 687. Leswi swi vula leswaku vanhu va 42 370 va lahlekeriwe hi swakudya swa moya swa Ravuntlhanu. Xana hi nga wu papalata njhani mukhuva lowu? Hi vutlhari, sungula ka ha ri sweswi ku endla malunghiselelo hinkwawo lama lavekaka leswaku wena ni ndyangu wa wena mi va kona masiku hinkwawo ya ntsombano. (Swiv. 21:5) Malunghiselelo wolawo ma nga katsa ku kombela muthori wa wena leswaku a ku nyika masiku, ku bula hi ntsombano ni munghana wa wena wa vukati loko a nga ri Mbhoni, ku endla malunghiselelo ya byetlelo ni ku pfuna swichudeni swa Bibele leswaku swi va kona masiku hinkwawo. Loko vana va wena va nga si pfala exikolweni, tivisa nhloko ya xikolo hi ta ntsombano ni leswaku va ta xwa exikolweni hi Ravuntlhanu. U nga ha yimayimi, sungula ka ha ri sweswi ku endla malunghiselelo lama lavekaka. Ma tivise Yehovha hi xikhongelo, u ri ni ntshembo wa leswaku “yena u ta teka goza.”—Ps. 37:5.
3. Ha yini hi fanele hi landzelela nkongomiso wa malunghiselelo lama endliweke ya byetlelo?
3 Nhlengeletano ya Yehovha yi tirhe hi matimba leswaku ku va ni byetlelo lebyi ringaneke kun’wana ni kun’wana laha ntsombano wu nga ta khomeriwa kona. Loko ho wu landzela hilaha ku heleleke nkongomiso lowu tsariweke eka xihloko lexi, hi ta va hi kombisa leswaku hi tlangela ku tinyiketela ka vamakwerhu lava tirheke hi matimba va endla malunghiselelo lawa, hi ta va hi anakanyela vamakwerhu lava hi hlengeletaneke na vona entsombanweni, naswona hi ta va hi xixima nhleleko lowu nga kona enhlengeletanweni ya Yehovha.—1 Kor. 13:5; 1 Tes. 5:12, 13; Hev. 13:17.
4. Hi tihi tinhla ta nkoka leti hi faneleke hi ti tsundzuka loko hi kombela ku hlayiseriwa byetlelo naswona ha yini?
4 Tihotela/Tindlu Ta Vaendzi/Tindhawu To Paka Tikharavhani: I swa nkoka ku kombela ku hlayiseriwa ntsena ndhawu leyi u nga ta yi tirhisa hi nkarhi wa ntsombano. Ku tiyisekisa leswaku ndhawu u ta yi kuma, u fanele u hakela mali yo vekisa ndhawu yoleyo ya byetlelo. Tindhawu ta byetlelo ti nga komberiwa hi ku tirhisa Ndzawulo ya Byetlelo ya ntsombano.
5, 6. Xana lava nga ni swilaveko swo hlawuleka va nga pfuniwa njhani?
5 Swilaveko Swo Hlawuleka: Swivuriso 3:27 yi ri: “U nga tshuki u ala ku va endlela leswinene lava swi va lulameleke, loko swi ri ematimbeni ya voko ra wena ku swi endla.” Xana u nga va endlela njhani van’wana leswinene loko swi ta etimhakeni leti khumbaka ntsombano? Vahuweleri lava dyuhaleke, lava lamaleke, lava nga entirhweni wa nkarhi hinkwawo ni van’wana va nga ha lava ku pfuniwa hi swo famba kumbe hi byetlelo. Maxaka hi wona ma nga ni vutihlamuleri lebyikulu byo khathalela swilaveko swa vanhu vo tano. (1 Tim. 5:4) Loko ma nga swi koti, vapfumeri-kulobye va nga pfuna. (Gal. 6:10) Valanguteri va dyondzo ya buku ya vandlha va fanele va vutisa lava nga emintlaweni ya vona loko ku ri ni lava faneleke va pfuniwa hi ndlela yo hlawuleka, leswaku swilo swi va leswi hlelekeke nkarhi wa ntsombano wu nga si fika.
6 Tifomo leti nge Room Request ta kumeka loko vahuweleri va lava ku kombela byetlelo. Komiti ya Ntirho ya Vandlha yi fanele yi kambela timfanelo ta muhuweleri la endlaka xikombelo, yi tirhisa nkongomiso lowu tsariweke eka fomo leyi ni papila ra July 15, 2006, leri kongomisiweke eka tihuvo hinkwato ta vakulu. Lunghiselelo leri i ra vahuweleri lava nga ni ndhuma leyinene swin’we ni vana va vona lava tikhomeke kahle.
7. (a) Ha yini hi fanele ku ya eka ntsombano lowu vandlha ra hina ri averiweke eka wona? (b) Hi wahi magoza lama faneleke ma landzeriwa loko swiyimo swi boha leswaku u ya eka ntsombano wun’wana?
7 Ku Ya eNtsombanweni Wun’wana: Leswaku ku va ni ndhawu leyi ringaneke yo tshama, minkandziyiso leyi ringaneke, byetlelo lebyi ringaneke ni swin’wana, hi khutaziwa ku ya entsombanweni lowu vandlha ra hina ri averiweke eka wona. Loko swiyimo swi boha leswaku u ya entsombanweni wun’wana, hi kombela u kombela adirese ya ndhawu ya ntsombano wolowo eka matsalana wa vandlha ra ka n’wina. Tiyiseka leswaku u tsala adirese ya wena eka mvhilopho leyi u rhumelaka xikombelo xa byetlelo ha yona kumbe u tsala rungula rihi na rihi leri lavekaka. Loko ku ta va ni mintsombano yo hlayanyana endhawini yoleyo u kunguhataka ku ya eka yona, tsala masiku ya ntsombano lowu u yaka eka wona.
8. Hi yihi ndlela yin’wana leyi hi nga hoxaka xandla ha yona leswaku vamakwerhu va tiphina hi ntsombano lowu taka?
8 Vatirhi Va Ku Tirhandzela: A swi kanakanisi leswaku hinkwavo lava nga ta va kona entsombanweni va ta tiphina hi swakudya swa moya ni nkarhi lowunene wa vunakulobye lebyi akaka. Kambe hi ta tiphina ngopfu loko hi hoxa xandla emintirhweni leyi faneleke yi endliwa leswaku swilo swi famba kahle entsombanweni. (Mint. 20:35) Ku nga ri khale, Tikomiti ta Mintsombano ya kwala ti ta sungula ku rhamba vamakwerhu leswaku va pfuneta entirhweni lowu. Xana na wena u nga hoxa xandla?—Ps. 110:3.
9. I yini lexi u xi rhandzaka hi ntsombano wa muganga lowu vaka kona lembe ni lembe naswona i yini lexi u faneleke u tiyimisela ku xi endla?
9 Xifanyetana xin’wana xa malembe ya ntlhanu hi vukhale xi vule leswi hi ntsombano lowu a xi ri eka wona: “Ntsombano wa muganga i ndlela yo gandzela Yehovha leyi ndzi yi rhandzaka ngopfu.” Marito wolawo lama humaka embilwini, ma hi pfuna hinkwerhu hi swi vona leswaku swi tsakisa ngopfu ku va kona entsombanweni wa muganga lembe ni lembe. Hakunene swi hilaha mupisalema a yimbeleleke hakona a ku: “Siku rin’we eswivaveni swa wena ri tlula gidi endhawini yin’wana.” (Ps. 84:10) Davhida u yimbelerile a phofula leswaku u navela ku ‘tshama endlwini ya Yehovha masiku hinkwawo ya vutomi bya yena, a vona ku tsakisa ka Yehovha ni ku languta tempele yakwe.’ (Ps. 27:4) Davhida a a tsaka ngopfu loko a ri ni vagandzeri va Yehovha. Onge na hina hi nga fana na yena, hi tlangela vugandzeri bya ntiyiso hi ku va kona masiku hinkwawo ya Ntsombano wa Muganga lowu nge “Nkutsulo Wu Tshinele!”
[Bokisi leri nga eka tluka 3]
Minkarhi Ya Nongonoko
Ravuntlhanu
9:00 a.m. - 4:25 p.m.
Mugqivela
9:00 a.m. - 4:15 p.m.
Sonto
9:00 a.m. - 3:20 p.m