Mintsombano Ya Hina Ya Muganga—Ndlela Yo Nyikela Vumbhoni

1. Minkhuvo leyi vekiweke ya Vaisrayele yi va nyike nkarhi wo anakanyisisa ni ku bula hi swilo swihi swa nkoka?

¹ Vaisrayele va khale a va hlengeletana kanharhu hi lembe va tlangela minkhuvo. Hambileswi a ku languteriwe leswaku ku hlengeletana vavanuna ntsena, hakanyingi mindyangu hinkwayo a yi ya eYerusalema leswaku yi ya tlangela mintsombano leyi yo tsakisa. (Det. 16:15, 16) Minkhuvo yoleyo a yi endla leswaku va anakanyisisa va tlhela va bula hi nkoka wo va ni vuxaka lebyinene ni Xikwembu. Hi swihi swilo swin’wana swa nkoka leswi a va bula ha swona? Nchumu wun’wana hileswaku Yehovha wa hanana naswona i Munyiki la nga ni rirhandzu. (Det. 15:4, 5) Kasi mhaka yin’wana hileswaku hi nga titshega ha yena leswaku hi kuma nkongomiso ni nsirhelelo. (Det. 32:9, 10) Nakambe leswi Vaisrayele a va byarhisiwe vito ra Yehovha, mahanyelo ya vona a ma fanele ma kombisa tindlela takwe to lulama. (Det. 7:6, 11) Hilaha ku fanaka, namuntlha mintsombano ya hina ya lembe na lembe ya hi vuyerisa.

2. Ntsombano wa muganga wu ta hi pfuna njhani leswaku hi twisisa ntiyiso wa Bibele?

² Nongonoko Wu Pfuna Ku Twisisa Ntiyiso Wa Bibele: Eka mintsombano ya hina ya miganga hi tiphina hi tinkulumo, tidrama, minkombiso ni mimbulavurisano leyi hi pfunaka ku twisisa ni ku tirhisa leswi Bibele yi swi dyondzisaka. (Yoh. 17:17) Se ku endliwe malunghiselelo yo tala ya ntsombano lowu nga ta landzela. Nhlengeletano ya Yehovha yi le ku lunghiseleleni ka nongonoko lowu xikongomelo xa wona ku nga ku vulavula hi swilaveko swa nsimu emisaveni hinkwayo. (Mat. 24:45-47) Xana u swi langutele hi mahlo-ngati ku vona ni ku twa leswi wu nga ta va wu vulavula ha swona?

3. Hi fanele hi endla yini leswaku hi ta vuyeriwa?

³ Entiyisweni hi ta vuyeriwa ntsena loko hi va kona hi tlhela hi yingiserisisa khwatsi eka masiku hinkwawo manharhu. Loko u nga si vulavula ni muthori wa wena, burisana na yena malunghana ni ku teka masiku yo karhi entirhweni. Tiyiseka leswaku u kuma nkarhi lowu eneleke wo wisa madyambu man’wana ni man’wana leswaku u ta kota ku tshama u xalamukile loko nongonoko wu ri karhi wu ya emahlweni. Van’wana swi va pfunile ku tshama va xalamukile hi ku languta xivulavuri ni ku tsala tinotsi loko nongonoko wu karhi wu ya emahlweni. U nga pfumeli leswaku selfoni ya wena kumbe xiciyoti xi ku kavanyeta kumbe swi kavanyeta van’wana. Papalatani ku vulavula, ku rhumelana marungula, ku dya kumbe ku n’wa loko nongonoko wu ri karhi wu ya emahlweni.

4. Xana vatswari va nga va pfuna njhani vana va vona leswaku va vuyeriwa hi nkarhi wa ntsombano?

⁴ Hi malembe ya Savata, loko mindyangu ya Vaisrayele yi hlengeletana leswaku yi ta twa Nawu loko wu hlayiwa hi nkarhi wo tlangela Nkhuvo wa Mintsonga, a yi ri “ni vana” va yona “leswaku va yingisa nileswaku va dyondza.” (Det. 31:12) Mawaku ndlela leyi swi khutazaka ha yona ku vona mindyangu yi tshame swin’we hi nkarhi wa ntsombano ni vana va yona va xalamukile ni ku yingisela khwatsi! Swi nga va swinene loko madyambu man’wana ni man’wana mi bula hi tinhla leti mi ti tsaleke leti mi ti tsakeleke hi nkarhi wa nongonoko. “Vuphukuphuku byi tsimbiwe embilwini ya mufana,” xisweswo vatswari mi ta va mi endla kahle loko mi tshama mi veke vana va n’wina tihlo, ku katsa ni lava nga emalembeni ya kondlo-a-ndzi-dyi, hi nkarhi wo wisa ni loko mi ri laha mi etlelaka kona, ematshan’weni yo va tshika va “ntshunxekile.”—Swiv. 22:15; 29:15.

5. Xana mahanyelo ya hina loko hi ri ehotela ma nyikela vumbhoni hi ndlela yihi?

⁵ Mahanyelo Ya Hina Lamanene Ma Nyikela Vumbhoni: Mahanyelo ya hina lamanene ma nyikela vumbhoni loko hi ri endhawini ya ntsombano. (Tito 2:10) Vatirhi va le hotela va swi xiya loko ntlawa wo karhi wu landzela milawu ya le hotela ni loko wu lehisela vatirhi mbilu wu tlhela wu va ni nsovo eka vona. (Kol. 4:6) N’wexemu loko vayimeri va rhavi va ri karhi va vulavurisana ni vini va hotela, Mukongomisi wa Hotela u te: “Ha swi tsakela ku rhurhela vanhu va n’wina hikuva i vanhu lavanene. Va tikhoma hi ndlela leyinene, va ni musa naswona minkarhi hinkwayo va tirhisana kahle ni vatirhi va hina nakambe va yi xixima ndhawu ya hina.”

6. Hi nga byi nyikela njhani vumbhoni hi ndlela leyi hi ambalaka ha yona?

⁶ Tibeji ta hina a hi ta ku navetisa ntsombano ni ku endla leswaku vapfhumba va hi tiva ntsena kambe ti tlhela ti nyikela vumbhoni eka lava hi hlaleleke. Vanhu lava tshamaka endhawini leyi hi nga ta va hi khome ntsombano eka yona va ta swi xiya leswaku vanhu lava ambaleke tibeji va ambale hi ndlela leyinene ni leyi xiximekaka, ku nga ri hi ndlela leyi hundzeletiweke ni leyi solekaka leyi misava yi ambalaka ha yona namuntlha. (1 Tim. 2:9, 10) Hikwalaho, hi fanele hi yi tekela enhlokweni ndlela leyi hi ambalaka ni ku tisasekisa ha yona loko hi ri entsombanweni niloko hi ri ehotela. Ku fika hi ambale maburuku yo koma ni swikipa swi ta hi susa xindzhuti. Hambiloko ntsombano wu ri exitediyamu, ndlela leyi hi ambalaka ha yona yi fanele yi va leyi xiximekaka. Loko ho tshuka hi cinca swiambalo endzhaku ka xiyimiso kutani hi ya eswitolo, a hi fanelanga hi rivala leswaku ha ha ri vapfhumba va le ntsombanweni, xisweswo hi fanele hi ambala hi ndlela leyi xiximekaka.

7. Hi yihi ndlela yin’wana yo tiphina hi vun’we bya Vakreste entsombanweni?

⁷ Eka minkhuvo leyi vekiweke, Vaisrayele a va tiphina hi xinakulobye lexi akaka ni vagandzeri-kulobye lava a va huma etindhawini tin’wana naswona sweswo a swi kondletela vun’we. (Mint. 2:1, 5) Vun’we lebyi Vakreste va nga na byona byi vonaka kahle hi nkarhi wa ntsombano wa muganga. Hakanyingi vahlaleri va xi xiya xiendlakalo lexi xo tsakisa xa xinakulobye xa Vukreste. (Ps. 133:1) Ematshan’weni yo suka endhawini ya ntsombano hi ya xava swakudya hi nkarhi wo wisa, swi nga va swinene leswaku hi ta ni swakudya leswaku hi ta va ni nkarhi lowu eneleke wo hlangana ni ku bula ni vamakwerhu lava nga tshama ekusuhi na hina!

8. Hi swihi swivangelo leswi hi nga na swona swo va hi hoxa xandla entsombanweni loko swiyimo swi pfumela?

⁸ Hakanyingi vanhu lava hi vonaka va tsakisiwa hi ndlela leyi mintsombano ya hina yi hlelekeke ha yona, ngopfu-ngopfu loko va xiya leswaku ntirho hinkwawo wu endliwa hi vatirhi vo tirhandzela. Xana u nga swi kota ku “tinyikela hi ku tirhandzela” leswaku u tirha entsombanweni? (Ps. 110:3) Mindyangu hinkwayo ya tinyikela leswaku yi tirha hi ku tirhandzela tanihi ndlela yo letela vana va yona leswaku va pfuna van’wana. Loko u ri ni tingana, ku tirha entsombanweni i ndlela leyinene yo hlangana ni vapfhumba van’wana. Makwerhu un’wana wa xisati u te: “A ndzi nga tivi vanhu vo tala handle ka ndyangu wa mina ni vanghana va nga ri vangani. Kambe loko ndzi sungula ku pfuna eku basiseni ndzi sungule ku tiva vamakwerhu vo tala. Ndzi tiphinile swinene!” Ku endla xinghana ni vanhu vo tala hi ku va hi hoxa xandla eku pfuneteni entsombanweni swi ta hi tisela ntsako lowukulu. (2 Kor. 6:12, 13) Loko u nga si tshama u pfuneta entsombanweni, vutisa vakulu leswaku u nga endla yini leswaku u faneleka.

9. Hi ta va rhambela njhani van’wana entsombanweni?

⁹ Rhamba Van’wana Leswaku Va Ta Twa Ntiyiso: Hilaha a swi ri hakona eka malembe lama hundzeke, loko ka ha sale mavhiki manharhu ntsombano wa hina wu nga si sungula, hi ta hlanganyela eka tsima ro rhamba van’wana leswaku va va kona. Mavandlha ma ta lava ku hlanganisa nsimu ya wona hinkwayo hi ku hangalasa swirhambo hilaha ma nga kotaka hakona. (Vona bokisi leri nge, “Hi Ta Swi Fambisa Njhani Swirhambo?”) Swirhambo leswi nga ta sala swi ta tisiwa entsombanweni. Swi ta tirhisiwa hi vapfhumba loko va nyikela vumbhoni bya xitshuketa entsombanweni.

10. Boxa mintokoto leyi kombisaka leswaku swirhambo swa hina swi ni mihandzu.

¹⁰ Xana vanhu va angula eka tsima leri ra lembe ni lembe? Entsombanweni wun’wana, murindzi u pfune mpatswa wun’wana leswaku wu kuma ndhawu yo tshama. Wu byele murindzi yoloye leswaku wu kume xirhambo ivi wu “vona leswaku a xi tsakisa.” Xisweswo wu chayele tikhilomitara ta 320 ku ya entsombanweni! Eka xiendlakalo xin’wana makwerhu wa xisati loyi a a famba hi yindlu ni yindlu u rhambe wanuna un’wana loyi a a tikomba a lava ku tiva swo tala hi ntsombano. Xisweswo u teke nkarhi a ri karhi a bula na yena hi xirhambo xexo. Endzhaku ka masiku ma nga ri mangani, makwerhu wa xisati u vone wanuna yoloye a ri ni munghana wakwe entsombanweni naswona havumbirhi bya vona a va khome minkandziyiso leya ha ku humesiwaka!

11. Ha yini swi ri swa nkoka ku va kona entsombanweni?

¹¹ Minkhuvo ya Vaisrayele a ku ri lunghiselelo ra rirhandzu leri humaka eka Yehovha, leri a ri ta va pfuna leswaku va “n’wi tirhela hi ndlela leyi pfumalaka xihoxo ni ntiyiso.” (Yox. 24:14) Hilaha ku fanaka, ku va hi ya entsombanweni lembe ni lembe swi hi pfuna leswaku hi ‘hambeta hi famba entiyisweni’ naswona sweswo i xiphemu xa nkoka swinene evugandzerini bya hina. (3 Yoh. 3) Onge Yehovha a nga katekisa matshalatshala ya vanhu hinkwawo lava rhandzaka ntiyiso leswaku va va kona, va tlhela va vuyeriwa swinene!

[Marito lama tshahiweke exihlokweni lama nga eka tluka 3]

Mahanyelo ya hina lamanene ma nyikela vumbhoni loko hi ri endhawini ya ntsombano

[Marito lama tshahiweke exihlokweni lama nga eka tluka 4]

Loko ka ha sale mavhiki manharhu ntsombano wa hina wu nga si sungula, hi ta hlanganyela eka tsima ro rhamba van’wana

[Bokisi leri nga eka matluka 5]

Switsundzuxo Swa Ntsombano Wa Muganga Wa 2012

◼ Minkarhi Ya Nongonoko: Nongonoko wu ta sungula hi 9:00 nimixo masiku hamanharhu. Tinyangwa ti ta pfuriwa hi 7:00 nimixo. Loko vuyimbeleri byi sungula, hinkwerhu hi fanele hi tshamiseka leswaku nongonoko wu ta sungula hi ndlela leyi xiximekaka. Hi Ravuntlhanu ni hi Mugqivela, nongonoko wu ta hela hi 4:35 nindzhenga kasi hi Sonto wu ta hela hi 3:20 ni ndzhenga.

◼ Ku Paka Timovha: Etindhawini hinkwato leti mintsombano yi nga ta khomeriwa eka tona, ku ta va ni ndhawu yo paka timovha mahala ya lava va nga ta va kona naswona swi ta ya hileswaku i mani loyi a rhangeke ku fika. Eka tindhawu leti yirisiweke ku paka, ku ta paka ntsena lava nga ni mpfumelelo kumbe lava lamaleke. Leswi hakanyingi ndhawu yo paka yi kayivelaka, swi ta va swinene leswaku mi famba hi movha wun’we loko swi koteka.

◼ Byetlelo: Fomo leyi vuriwaka Special Needs Room Request (CO-5) ya kumeka naswona vahuweleri lava lavaka byetlelo va nga tikumela yona. Komiti ya Ntirho ya Vandlha yi fanele yi kambisisa timfanelo ta muhuweleri hi ku tirhisa swiletelo leswi kumekaka eka fomo yoleyo ni papila ra December 14, 2010, leri tsaleriweke tihuvo hinkwato ta vakulu. Lunghiselelo leri i ra vahuweleri lava nga exiyin’weni lexinene swin’we ni vana va vona lava nga ni mahanyelo lamanene.

◼ Ku Vekela Van’wana Ndhawu Yo Tshama: Ndhawu yo tshama yi nga vekeriwa ntsena lava u tshamaka na vona ekaya kumbe lava u fambaka na vona hi movha kumbe swichudeni swa wena swa Bibele.—1 Kor. 13:5.

◼ Swakudya Swa Ninhlikanhi: Hi kombela mi ta ni swakudya ematshan’weni yo suka endhawini ya ntsombano leswaku mi ya xava swakudya hi nkarhi wo wisa. Mi nga ha tirhisa nkwama lowutsongo wo endla leswaku swakudya swi nga hisi, lowu nga ringanaka ehansi ka xitulu. Minkwama leyikulu yo titimerisa swakudya yi fanele yi vekiwa laha varindzi va nga ta kongomisa leswaku yi vekiwa kona. Swibya leswi fayekaka ni swakunwa swa xihoko a swi pfumeleriwi endhawini ya ntsombano.

◼ Minyikelo: Hi kombisa leswaku ha ma tlangela matshalatshala yo lunghiselela ntsombano hi ku nyikela eka ntirho wa misava hinkwayo entsombanweni. Loko u nyikela hi cheke u fanele u yi kongomisa eka “Christian Congregation of Jehovah’s Witnesses.” Ku sukela lembe leri, mintsombano hinkwayo yi ta pfumela ku nyikela hi khadi ra swikweleti ku katsa ni mali swin’we ni cheke.

◼ Timhangu Ni Swiyimo Swa Xihatla: Loko ko tshuka ku va ni loyi a lavaka vutshunguri bya xihatla entsombanweni, hi kombela mi tivisa murindzi la nga kusuhi na yena, kutani yena u ta tivisa Ndzawulo ya Xilamulela-mhangu leyi nga ta nyika munhu yoloye mpfuno lowu lavekaka hi xihatla.

◼ Vutshunguri: Loko u kongomisiwe hi dokodela ku nwa mirhi yo karhi, hi kombela u titela na yona, tanihi leswi mirhi ya wena yi nga ta va yi nga ri kona entsombanweni. Vanhu lava tirhisaka tineleta kumbe swilo swin’wana swa vutshunguri, va fanele va swi cukumeta endhawini leyi faneleke loko va heta ku swi tirhisa kumbe endhawini leyi hlayisekeke.

◼ Tintangu: Lembe ni lembe ku va ni timhangu to tala leti vangiwaka hi tintangu. Hikwalaho, i swinene ku ambala tintangu leti xiximekaka, leti ku ringanaka kahle leswaku u kota ku famba kahle eswitepisini, endhawini leyi ehlelaka ni le tindhawini tin’wana to fana ni teto.

◼ Tipureme Ta Vana Ni Switulu Leswi Rhwalekaka: A swi fanelanga swi nghenisiwa eholweni ya ntsombano. Hambiswiritano, switulu swa vana swi nga pfumeleriwa ntsena loko swi ta va swi hlayisekile naswona swi vekiwe ekusuhi ni vatswari.

◼ Tiphefumu: Mintsombano yo tala yi khomeriwa etindhawini leti pfalekeke, laha moya wu kumekaka hi ku tirhisa michini ya moya. Kutani hi ta va hi kombisa rirhandzu loko hi papalata ku tirhisa tiphefumu leti nuhelaka ngopfu, leti nga ha endlaka leswaku van’wana swi va tikela ku hefemula kahle.—1 Kor. 10:24.

◼ Fomo Leyi Nge Please Follow Up (S-43): Tifomo leti ti fanele ti tirhisiwa ku tsala rungula ra mani na mani la tsakelaka, loyi a kumiweke loko hi ri karhi hi chumayela hi xitshuketa kumbe hi nkarhi wa ntsombano. Vahuweleri va fanele va ta ni fomo yin’we kumbe timbirhi entsombanweni. Tifomo leti tsariweke vuxokoxoko bya kona ti fanele ti yisiwa eka Ndzawulo ya Tibuku kumbe mi ti nyika matsalana wa vandlha ra n’wina loko mi vuya entsombanweni.—Vona Vutirheli Bya Hina Bya Mfumo bya May 2011, tluka 3.

◼ Tikhefi: Xixima vito ra Yehovha hi ku tikhoma hi ndlela leyinene loko u ri etikhefini. Nkhensa vatirhi hi mali yo karhi loko swi tolovelekile endhawini yoleyo.

◼ Ntirho Wa Ku Tirhandzela: Munhu un’wana ni un’wana la tsakelaka ku pfuna entsombanweni u fanele a tivisa Ndzawulo ya Ntirho wa ku Tirhandzela. Vana lava nga ehansi ka malembe ya 16 va fanele va tirha ehansi ka nkongomiso wa vatswari kumbe muhlayisi kumbe munhu un’wana lonkulu loyi a komberiweke ku endla tano hi mutswari kumbe muhlayisi.

◼ Tinsimu: Mavandlha ma nga ha tsakela ku titoloveta tinsimu leti nga ta yimbeleriwa entsombanweni ka ha sale nkarhi. Ravuntlhanu: 52, 57, 113, 106, 116 na 98. Mugqivela: 96, 68, 58, 67, 95, na 89. Sonto: 110, 61, 134, 73, 36, na 49.

[Bokisi leri nga eka tluka 4]

Hi Ta Swi Fambisa Njhani Swirhambo?

Leswaku hi kota ku hlanganisa nsimu ya hina, hi fanele hi komisa. Hi nga ha ku: “Xewani. Hi le ka tsima ra misava hinkwayo ro fambisa swirhambo leswi. Hi lexi xirhambo xa wena. U ta kuma vuxokoxoko lebyi engetelekeke endzeni ka xona.” U fanele u hiseka. Loko u fambisa swirhambo hi mahelo-vhiki, u nga ha swi fambisa ni timagazini loko swi fanerile.