Swimalana Swimbirhi Swa Nsimbi Swa Nxavo Lowutsongo

Ndlela yin’wana ya nkoka leyi hi seketelaka ntirho wa Mfumo ha yona i ku nyikela hi mali eka ntirho wo chumayela wa misava hinkwayo. Ku humelela yini loko hi nga ri na mali leyi eneleke?

Eka xiendlakalo xin’wana, Yesu u vone noni leyi nga xisiwana yi nyikela etempeleni hi swimalana swimbirhi swa nsimbi swa nxavo lowutsongo. Leswi a yi rhandza Yehovha, yi susumeteleke ku nyikela hi ‘hinkwaswo leswi a yi ri na swona, swo tihanyisa swa yona hinkwaswo, hambileswi a yi pfumala.’ (Marka 12:41-44) Ku va Yesu a vulavule hi mhaka leyi, swi kombisa leswaku munyikelo wa yona a wu ri wa nkoka eka Xikwembu. Hilaha ku fanaka, Vakreste va lembe-xidzana ro sungula a va nga teki vutihlamuleri byo nyikela ku ri lunghelo leri nyikiweke Vakreste lava nga swigwili ntsena. Muapostola Pawulo u vulavule hi xikombiso xa vanhu va le Makedoniya lava ku nga khathariseki ‘vusiwana bya vona lebyikulu a va hambeta va kombela hi xikhongotelo lexikulu hi ku tilavela ka vona lunghelo ra ku nyika hi musa.’—2 Kor. 8:1-4.

Hikwalaho, loko ho nyikela hi ‘swimalana swimbirhi swa nsimbi swa nxavo lowutsongo,’ hi fanele hi tsundzuka leswaku swimalana leswitsongo loko swi hlanganisiwa swi endla mali yo tala. Loko hi nyikela swi huma embilwini hi kwetsimisa Tata wa hina wa le tilweni, hikuva “Xikwembu xi rhandza munyiki la tsakeke.”—2 Kor. 9:7.