Yehova U Rhandza Lava Nyikaka Hi Ku Tsaka
“Un’wana ni un’wana a a nyike hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.”—2 VAKORINTO 9:7.
1. Xana Xikwembu na Kriste va ve vanyiki lava tsakeke hi ndlela yihi?
YEHOVA a a ri yena wo sungula la nyikeke a tsakile. Hi ntsako u nyike N’wana wa yena la nga un’we vutomi naswona a n’wi tirhisa ku vumba tintsumi ni vanhu. (Swivuriso 8:30, 31; Vakolosa 1:13-17) Xikwembu xi hi nyike vutomi ni ku hefemula ni swilo hinkwaswo, ku katsa ni timpfula to huma etilweni na tinguva ta ndzalo, xi tata timbilu ta hina hi ku tsaka. (Mintirho 14:17; 17:25) Hakunene, Xikwembu ni N’wana wa xona, Yesu Kriste, va nyika va tsakile. Va nyika va tsakile hi moya wo pfumala vutianakanyi. Yehova u rhandzile misava ya vanhu swonghasi a ko a “nyika N’wana wa yena la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” Kutani Yesu hi ku ntshunxeka ‘u nyikete vutomi bya yena ku kutsula lavo tala.’—Yohane 3:16; Matewu 20:28.
2. Hi ku ya hi Pawulo, Xikwembu xi rhandza munyiki wa muxaka muni?
2 Hikokwalaho, malandza ya Xikwembu na Kriste ma fanele ma va lama nyikaka ma tsakile. Ku nyika ko tano ku khutaziwe eka papila ra vumbirhi ra muapostola Pawulo leri yaka eka Vakriste va le Korinto, leri tsariweke kwalomu ka 55 C.E. Entiyisweni loko a vulavula hi minyikelo yo tirhandzela kumbe ya mali ya le xihundleni leyi ngopfu-ngopfu a yi endleriwa ku pfuna Vakriste lava pfumalaka eYerusalema ni le Yudiya, Pawulo u te: “Un’wana ni un’wana a a nyike hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.” (2 Vakorinto 9:7; Varhoma 15:26; 1 Vakorinto 16:1, 2; Vagalatiya 2:10) Xana vanhu va Xikwembu va angule njhani eka malunghelo yo nyika? Naswona hi nga dyondza yini eka ndzayo ya Pawulo yo nyika?
Ku Susumetiwa Hi Timbilu Leti Swi Rhandzaka
3. Vaisrayele va ku seketele ku fikela kwihi ku akiwa ka tabernakele ya vugandzeri bya Yehova?
3 Timbilu leti swi rhandzaka ti susumeta vanhu va Xikwembu ku tinyiketa ni ku nyikela timali ta vona ku seketela xikongomelo xa Xikwembu. Hi xikombiso, Vaisrayele va siku ra Muxe hi ku tsaka va seketele ku akiwa ka tabernakele ya vugandzeri bya Yehova. Timbilu ta vavasati van’wana ti va susumetele ku luka voya bya timbuti, vavanuna van’wana va ri karhi va tirha tanihi vavatli. Vanhu va nyikele nsuku, silivhere, timhandzi, minceka ni swilo swin’wana hi ku tsaka, tanihi “minyikelo ya Yehova” yo tirhandzela. (Eksoda 35:4-35) A va hanana swinene lerova swilo leswi va nga swi nyikela “ŝa ku endla ntirho hikwawo a ŝi ringene, ŝi ko ŝi sala.”—Eksoda 36:4-7.
4. Davhida ni van’wana va endle munyikelo wa tempele va ri ni langutelo rihi?
4 Endzhaku ka malembe xidzana, Hosi Davhida u nyikerile swinene eka tempele ya Yehova leyi a yi ta akiwa hi n’wana wa yena Solomoni. Tanihi leswi Davhida a a ‘tsakela yindlu ya Xikwembu,’ u humesile ‘rifuwo ra yena ro hlawuleka’ ra nsuku ni silivhere. Tihosana, tindhuna ni van’wana ‘va tate mavoko ya vona hi nyiko leyi humeseriwaka Yehova.’ Ku ve ni vuyelo byihi? Phela, “tiko ri ṭakela e ku nyika ka v̌ona, hikuv̌a a v̌a humeserile Yehova e mihlengo hi timbilu hinkwato ta v̌ona”! (1 Tikronika 29:3-9) A va ri vanyiki lava tsakeke.
5. Vaisrayele va byi seketele njhani vugandzeri bya ntiyiso eka malembe xidzana hinkwawo?
5 Eka malembe xidzana hinkwawo, Vaisrayele a a va ri ni lunghelo ro seketela tabernakele, titempele ta le ndzhakunyana, ni mintirho ya vaprista ya Valevhi leyi a yi ri kwalaho. Hi xikombiso, emasikwini ya Nehemiya Vayuda va bohe ku endla mihlengo leswaku va hlayisa vugandzeri lebyi tengeke, va ri karhi va xiya leswaku a va fanelanga va honisa yindlu ya Xikwembu. (Nehemia 10:32-39) Hi laha ku fanaka namuntlha, Timbhoni ta Yehova hi ku tsaka ti endla minyikelo yo tirhandzela yo aka ni ku hlayisa tindhawu ta minhlangano ni yo seketela vugandzeri bya ntiyiso.
6. Nyika swikombiso swa ku nyika ka Vakriste hi ntsako.
6 Vakriste vo sungula a va ri vanyiki lava tsakeke. Hi xikombiso, Gayo a a endla ‘ntirho wo tshembeka’ hi ku amukela vaendzi lava famba-fambaka hikwalaho ka swilaveko swa Mfumo, tanihi leswi Timbhoni ta Yehova ti kombisaka malwandla eka valanguteri lava famba-fambaka lava sweswi va rhumiwaka hi Watch Tower Bible and Tract Society. (3 Yohane 5-8) Swi lava swo karhi leswaku vamakwerhu lava va endzela mabandlha ni ku kombisa malwandla eka wona, kambe leswi swi vuyerisa swonghasi hi tlhelo ra moya!—Varhoma 1:11, 12.
7. Vafilipiya va swi tirhise njhani swilo swa vona leswi vonakaka?
7 Mabandlha hinkwawo ma tirhise timali ta wona leswaku ma yisa swilaveko swa Mfumo emahlweni. Hi xikombiso, Pawulo u byele vapfumeri eFilipiya: “Hambi ku ri le Tesalonika, mi ndzi rhumerile swo ndzi pfuna eka leswi a ndzi swi pfumala, naswona ku nga ri kan’we ntsena. A hi leswaku ndzi lava ku kuma tinyiko, kambe ndzi lava leswaku n’wina mi kuma mihandzu leyi yi nga ta andza yi mi twarisa.” (Vafilipiya 4:15-17) Vafilipiya va nyike hi ntsako, kambe hi swihi swivangelo leswi susumetelaka ku nyika ko tano ka ntsako?
I Yini Lexi Susumetelaka Ku Nyika Hi Ntsako?
8. U nga swi kombisa njhani leswaku moya wa Xikwembu wu susumeta vanhu va xona ku va vanyiki lava tsakeke?
8 Moya wo kwetsima wa Yehova, kumbe matimba lama tirhaka, wu susumeta vanhu va yena ku va lava nyikaka va tsakile. Loko Vakriste va le Yudiya va ri eku pfumaleni, moya wa Xikwembu wu susumete vapfumeri van’wana ku va pfuna hi leswi vonakaka. Leswaku a khutaza Vakriste eKorinto ku endla minyikelo yo tano hi laha va nga kotaka ha kona, Pawulo u tshahe xikombiso xa mabandlha ya le Makedoniya. Hambi leswi vapfumeri va le Makedoniya a va tokota nxaniso ni vusiwana, va kombise rirhandzu ra vumakwerhu hi ku nyika ku tlula hi laha va nga kotaka ha kona. Va thlele va kombela lunghelo ra ku nyika! (2 Vakorinto 8:1-5) Xikongomelo xa Xikwembu a xi titsheganga hi minyikelo ya rifuwo ntsena. (Yakobo 2:5) Malandza ya xona lama tinyiketeleke lama nga swisiwana hi tlhelo ra leswi vonakaka ma ve vaseketeri-nkulu eku seketeleni ka ntirho wo chumayela Mfumo hi timali. (Matewu 24:14) Kambe, a ma xaniseki hikwalaho ka ku hanana ka wona, hikuva minkarhi hinkwayo Xikwembu xi khathalela swilaveko swa vanhu va xona eka ntirho lowu, naswona moya wa xona i matimba lama wu endlaka wu ya emahlweni ni ku ngeteleka.
9. Ripfumelo, vutivi ni rirhandzu swi fambelana njhani ni ku nyika u tsakile?
9 Ku nyika hi ntsako swi susumetiwa hi ripfumelo, vutivi ni rirhandzu. Pawulo u te: “[Vakorinto] mi swifumi eka hinkwaswo leswi mi nga na swona, eku pfumeleni, eku vulavuleni, evutivini, ni le ku hisekeni hinkwako, ni le rirhandzwini leri hi ri pfuxeke eka n’wina; hi mukhuva wolowo, kombani leswaku mi swifumi eku humeseni ka nyiko yoleyo ya tintswalo. A ndzi mi lerisi, kambe ndzo mi byela ntsena hilaha van’wana va hisekelaka ku pfuna hakona, ndzi ta tiva ku tiya ka rirhandzu ra n’wina.” (2 Vakorinto 8:7, 8) Ku nyikela eka xikongomelo xa Yehova, ngopfu-ngopfu loko loyi a nyikaka a nga fuwanga, swi lava ripfumelo eka malunghiselelo ya Xikwembu ya nkarhi lowu taka. Vakriste lava nga ni vutivi lebyikulu va lava ku tirhela xikongomelo xa Yehova, kutani lava fuweke hi rirhandzu ra yena ni vanhu va yena, hi ntsako va tirhisa timali ta vona ku yisa xikongomelo xa yena emahlweni.
10. Hikwalaho ka yini ku nga vuriwaka leswaku xikombiso xa Yesu xi susumeta Vakriste ku nyika hi ntsako?
10 Xikombiso xa Yesu xi susumetela Vakriste ku nyika hi ntsako. Endzhaku ko khongotela Vakorinto leswaku va nyika hi ku swi rhandza, Pawulo u te: “Ma ti tiva tintswalo ta Hosi ya hina Yesu Kriste: A a fumile, hambiswiritano ú hundzukile xisiwana hikwalaho ka n’wina, leswaku mi endliwa swifumi hi vusiwana bya yena.” (2 Vakorinto 8:9) Hambi leswi a a fuwile etilweni ku tlula vana hinkwavo va Xikwembu, Yesu u tshikile swilo leswi hinkwaswo a hanya vutomi bya vanhu. (Vafilipiya 2:5-8) Hambi swi ri tano, hi ku va xisiwana hi ndlela leyo yo pfumala vutianakanyi, Yesu u engetele ku kwetsimisiwa ka vito ra Yehova ni ku nyikela vutomi byakwe tanihi gandzelo ra nkutsulo ku pfuna vanhu lava a va ta ri amukela. Hi ku pfumelelana ni xikombiso xa Yesu, xana a hi fanelanga ku nyika hi ntsako leswaku hi pfuna van’wana ni ku engetela ku kwetsimisiwa ka vito ra Yehova?
11, 12. Nkunguhato lowunene wu nga hi endla lava nyikaka va tsakile hi ndlela yihi?
11 Nkunguhato lowunene wu endla leswaku swi koteka ku nyika hi ntsako. Pawulo u byele Vakorinto: “Hi siku ro sungula ra vhiki, un’wana ni un’wana wa n’wina a a veke swin’wana hi tlhelo, eka leswi a swi bindzuriseke, leswaku nhlengo wu nga ha endliwi siku ndzi taka.” (1 Vakorinto 16:1, 2) Hi ndlela leyi fanaka, ya xihundla ni ya ku tirhandzela, lava rhandzaka ku nyikela minyikelo leswaku va yisa emahlweni ntirho wa Mfumo namuntlha, va nga endla tano hi ku vekela etlhelo swilo swin’wana swa vona hikwalaho ka xikongomelo xexo. Hikwalaho ka nkunguhato wo tano lowunene, Timbhoni tin’wana ni tin’wana, mindyangu ni mabandlha ma nga endla minyikelo yo yisa vugandzeri lebyi tengeke emahlweni.
12 Ku endla makungu yo nyikela swi ta hi endla hi tsaka. Hi laha Yesu a vuleke ha kona, “ku nyika i nkateko lowu tlulaka ku nyikiwa.” (Mintirho 20:35) Kutani Vakorinto a va ta engetela ntsako wa vona hi ku landzela xitsundzuxo xa Pawulo xa ku endla kungu ra vona leri a ri ri ni lembe, ro yisa minyikelo eYerusalema. U vurile: “A xi kombeli leswi a nga riki na swona, kambe xi amukela swoleswi a swi humesaka.” Loko un’wana a endla minyikelo hi leswi a nga na swona, yi fanele yi tekiwa yi ri ya nkoka. Loko hi tshembela eka Xikwembu, xi nga ringanisa swilo leswaku lava nga ni swo tala va hanana, va nga swi tlangisi, ni leswaku lava nga na switsongo va nga vi ni vusiwana lebyi hungutaka matimba ya vona ni vuswikoti byo n’wi tirhela.—2 Vakorinto 8:10-15.
Mafambiselo Yo Nyika Hi Vukheta
13. Hikwalaho ka yini Vakorinto a va ta va ni ntshembo eka vulanguteri bya Pawulo bya minyikelo?
13 Hambi leswi Pawulo a a langutela lunghiselelo ra munyikelo leswaku vapfumeri lava pfumalaka va tiphina hi mpfuno wa swilo leswi vonakaka ni ku hlanganyela hi matimba swinene eka ntirho wo chumayela, hambi ku ri yena kumbe van’wana a va yi tekanga minhlengo leswaku va yi tirhisela mintirho ya vona. (2 Vakorinto 8:16-24; 12:17, 18) Pawulo u tirhile leswaku a langutana ni swilo swa yena swa nyama ematshan’wini yo rhwexa ndzhwalo wa swa timali eka bandlha rihi na rihi. (1 Vakorinto 4:12; 2 Vatesalonika 3:8) Hikokwalaho, loko va n’wi nyika minyikelo, Vakorinto a va yi nyika nandza wa Xikwembu loyi a tshembekaka, la tirhaka hi matimba.
14. Emhakeni ya ku tirhisiwa ka minyikelo, xana hi yihi rhekhodo leyi Sosayiti ya Watch Tower yi nga na yona?
14 Hi mpfhuka ku simekiwa Watch Tower Bible and Tract Society hi 1884, vanyikeri va ve ni vumbhoni bya leswaku i mulanguteri la tshembekaka wa minyikelo hinkwayo leyi nyikeriwaka hikwalaho ka ntirho wa Yehova wa Mfumo. Hi ku ya hi tsalwa ra yona ra timfanelo, Sosayiti yi lwela ku eneta xilaveko lexikulu xa vanhu hinkwavo, xilaveko xa swilo swa moya. Leswi swi endliwa hi ku tirhisa tibuku ta Bibele ni ndzetelo wa ndlela yo pona. Namuntlha, Yehova u hatlisisa ku hlengeletiwa ka lava fanaka ni tinyimpfu eka nhlengeletano ya yena leyi ndlandlamukaka, naswona nkateko wa yena eku tirhisiweni ka minyikelo hi vutlhari eka ntirho wo chumayela Mfumo i vumbhoni lebyi nga erivaleni bya ku amukela ka Xikwembu. (Esaya 60:8, 22) Ha tshemba leswaku u ta ya emahlweni ni ku susumeta timbilu ta vanyiki lava tsakeke.
15. Hikwalaho ka yini magazini lowu wu boxa minyikelo minkarhi hinkwayo?
15 Minkarhi hinkwayo Sosayiti yi tirhisa magazini lowu ku xalamukisela vahlayi eka lunghelo ra vona ro endla minyikelo yo tirhandzela eka ntirho wo chumayela Mfumo wa misava hinkwayo. Lexi a hi xikombelo, kambe i xitsundzuxo eka hinkwavo lava navelaka ku seketela ‘ntirho lowo kwetsima wa mahungu lamanene’ tanihi leswi Xikwembu xi va pfunaka. (Varhoma 15:16; 3 Yohane 2) Sosayiti yi tirhisa mali hinkwayo leyi nyikeriwaka hi ndlela ya vukheta swinene ku twarisa vito ni Mfumo wa Yehova. Minyikelo hinkwayo ya amukeriwa, yi tlangeriwa hi ku nkhensa, kutani yi tirhisiwa ku twarisa mahungu lamanene ya Mfumo wa Xikwembu. Hi xikombiso, hi tindlela leti, mintirho ya varhumiwa yi yisiwa emahlweni ematikweni yo tala, naswona switirho swo kandziyisa leswi pfunaka ku hangalasa dyondzo ya Bibele swa hlayisiwa ni ku engeteriwa. Nakambe, minyikelo ya ntirho wa misava hinkwayo yi tirhiseriwa ku pfuna ku hakelela minxavo leyi tlakukaka yo kandziyisa Tibibele ni tibuku leti sekeriweke eBibeleni ni tikhasete tikhasete ta mpfumawulo ni tikhasete ta video. Hi tindlela teto swilaveko swa Mfumo swi yisiwa emahlweni hi lava nyikaka va tsakile.
Hayi Hi Ku Sindzisiwa
16. Hambi leswi Timbhoni ti nga ri tingani ta Yehova ti fuweke hi swilo leswi vonakaka, hikwalaho ka yini minyikelo ya tona yi tlangeriwa?
16 Timbhoni ti nga ri tingani ta Yehova ti fuwile hi swilo leswi vonakaka. Hambi loko ti nyikela timali leti ringaneleke, minyikelo ya tona i ya nkoka. Loko Yesu a vona noni leyi a yi ri xisiwana yi hoxa swimalana swimbirhi leswi nga riki na nkoka ngopfu exibyeni xa nhlengo wa tempele, u te: “Noni leyi ya xisiwana yi humesile ku tlula hinkwavo; hikuva vanhu lava hinkwavo [vanyikeri van’wana] va humesile tinyiko leti va ti pambuleke exumeni xa vona lexo tala, kasi wansati loyi ú humesile swa vusiwana bya yena, swi nga hinkwaswo leswi a ta hanya ha swona.” (Luka 21:1-4) Hambi leswi nyiko ya yena a a yi ri yitsongo, a a ri munyiki loyi a tsakeke—kutani nyiko ya yena yi tlangeriwile.
17, 18. Hi wihi mongo wa marito ya Pawulo eka 2 Vakorinto 9:7, naswona i yini lexi kombisiwaka hi rito ra Xigriki leri hundzuluxeriweke va ku ‘ku tsaka’?
17 Malunghana ni ntirho wo pfuna Vakriste va le Yudiya, Pawulo u te: “Un’wana ni un’wana a a nyike hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.” (2 Vakorinto 9:7) Muapostola a nga ha va a tshahe xiphemu xa Swivuriso 22:8 eka ku hundzuluxela ka Septuagint leyi nge: “Xikwembu xi katekisa loyi a nyikaka a tsakile; naswona xi ta anerisa xilaveko xa mintirho ya yena.” (The Septuagint Bible, leyi hundzuluxeriweke hi Charles Thomson) Pawulo u sive “katekisa” hi “rhandza,” kambe swa twanana, hikuva mikateko leyi tshoveriwaka yi huma eka rirhandzu ra Xikwembu.
18 Loyi a nyikaka a tsakile hakunene wa swi tsakela ku nyika. Phela, eka rito ra Xigriki leri hundzuluxeriweke va ku ‘ku tsaka’ eka 2 Vakorinto 9:7 ku huma rito leri nge “ku nyanyuka”! Endzhaku ko kombisa leswi, mudyondzi R. C. H. Lenski u te: “Xikwembu xi rhandza munyiki wa mbilu leyinene, wo rhula, loyi a tsakeke . . . [Loyi] ripfumelo ra yena ri talaka hi ku n’wayitela loko a kuma nkarhi wo nyikela.” Munhu la nga ni moya wo tano wo tsaka a nga nyiki a nga ntshunxekanga kumbe hi ku sindzisiwa kambe u nyika hi ku rhandza ka mbilu ya yena. Xana wa tsaka hi ku nyikela leswaku u seketela swilaveko swa Mfumo?
19. Vakriste vo sungula a a va yi endla njhani minyikelo ya vona?
19 Vakriste vo sungula a va nga fambisi swibye swa minhlengo kumbe ku tirhisa vukhume hi ku nyikela vukhume bya xuma xa vona ku endlela vukhongeri. Ematshan’wini ya sweswo, minyikelo ya vona a yi ri yo tirhandzela hi laha ku heleleke. Tertullian, loyi a hundzuluxeriweke eka Vukriste hi 190 C.E., u tsarile: “Hambi leswi hi nga ni xibye xa nhlengo, mali ya kona a hi yo xava ku ponisiwa, tanihi ya vukhongeri lebyi vekeke ntsengo wa byona. Kumbexana kan’we hi n’hweti, un’wana ni un’wana u humesa munyikelo lowutsongo, loko a swi rhandza; kambe hi ku swi tsakela ka yena ntsena ni loko a swi kota; hikuva a ku sindzisiwi munhu; hinkwaswo i swa ku tirhandzela.”—Apology, Ndzima XXXIX.
20, 21. (a) Xana nkandziyiso wo sungula wa magazini lowu wu vule yini hi ta lunghelo ro seketela xikongomelo xa Xikwembu hi swa timali naswona leswi swi tirha njhani na sweswi? (b) Ku humelela yini loko hi dzunisa Yehova hi rifuwo ra hina?
20 Minyikelo yo tirhandzela yi tolovelekile swinene exikarhi ka malandza ya Yehova ya manguva lawa. Hambi swi ri tano, minkarhi yin’wana van’wana a va ri tirhisi hi xitalo lunghelo ra vona ro seketela xikongomelo xa Xikwembu hi ku endla minyikelo. Hi xikombiso, hi February 1883 magazini lowu wu te: “Van’wana va rhwala ndzwalo lowukulu wa swikweleti [hi tlhelo ra mali] hikwalaho ka van’wana, lerova matimba ya vona yo seketela hi swa timali ma hunguteka hi ku tirha ku tlula mpimo ni ku karhala, xisweswo ku pfuna ka vona ka hela; ku nga ri sweswo ntsena, kambe lava va . . . nga xi twisisangiki kahle xiyimo, va lahlekeriwile hikwalaho ka ku nga nyikeli hi swa timali.”
21 Tanihi leswi ntshungu lowukulu wu khitikanelaka eka nhlengeletano ya Yehova namuntlha, ni leswi ntirho wa Xikwembu wu kulaka eYuropa Vuxa ni le ka tindhawu tin’wana leti eku sunguleni a wu yirisiwile eka tona, ku na xilaveko lexikulu xo engetela minkandziyiso ni switirho swin’wana. Tibibele to tala ni tibuku tin’wana ti fanele ti gandlisiwa. Mintirho yo tala ya swa le tilweni ya endliwa; hambi swi ri tano, yin’wana yi nga hatlisa swinene loko a ku ri na timali leti eneleke. Kavula, ha tshemba leswaku Xikwembu xi ta nyikela leswi lavekaka naswona ha swi tiva leswaku lava ‘dzunisaka Yehova hi rifuwo ra vona’ va ta katekisiwa. (Swivuriso 3:9, 10) Hakunene, “loyi a byalaka swo tala ú ta tshovela swo tala.” Yehova u ta ‘hi fuwisa hi ku hanana ka hina hinkwako,’ naswona ku nyika ka hina hi tsakile ku ta endla leswaku vo tala va n’wi nkhensa ni ku n’wi dzunisa.—2 Vakorinto 9:6-14.
Kombisa Ku Tlangela Ka Wena Tinyiko Ta Xikwembu
22, 23. (a) Xana i yini nyiko ya Xikwembu ya mahala leyi nga hlamuselekiki? (b) Tanihi leswi hi tlangelaka tinyiko ta Yehova, hi fanele ku endla yini?
22 Hi ku susumetiwa hi ku tlangela loku enteke, Pawulo hi yexe u te: “A ku nkhensiwe Xikwembu hikwalaho ka nyiko ya xona ya mahala, leyi nga hlamuselekiki.” (2 Vakorinto 9:15, NW) Tanihi “mhamba” ya swidyoho swa Vakriste lava totiweke ni ya misava hinkwayo, Yesu i xisekelo ni ntila wa nyiko ya mahala leyi nga hlamuselekiki ya Yehova. (1 Yohane 2:1, 2) Nyiko yoleyo i “vunene lebyo hlamarisa [bya] Xikwembu” lebyi xi byi kombiseke vanhu va xona emisaveni ha Yesu Kriste naswona byi endla leswaku va ponisiwa ni ku kwetsimisa Yehova ni ku n’wi lwela.—2 Vakorinto 9:14.
23 Ku tlangela ka hina loku enteke ku ya eka Yehova hikwalaho ka nyiko ya yena ya mahala leyi nga hlamuselekiki ni tinyiko tin’wana to tala ta moya ni ta swilo leswi vonakaka evanhwini va yena. Phela, vunene bya Tatana wa hina wa le tilweni eka hina bya hlamarisa lerova matimba ya munhu a ma swi koti ku byi hlamusela! Naswona hakunene byi fanele byi hi susumetela ku va vanyiki lava tsakeke. Kutani, hi ku tlangela loku humaka embilwini a hi endleni leswi hi nga swi kotaka ku yisa emahlweni xikongomelo xa Xikwembu xa hina lexi hananaka, Yehova, Munyiki la tsakeke wo sungula ni lonkulu!
Wa Tsundzuka Xana?
◻ Timbilu leti swi rhandzaka ti susumete vanhu va Yehova ku endla yini?
◻ I yini lexi susumetelaka ku nyika u tsakile?
◻ Sosayiti ya Watch Tower yi yi tirhisa njhani minyikelo hinkwayo leyi yi yi kumaka?
◻ Xana Xikwembu xi rhandza munyiki wa muxaka muni, naswona hi fanele hi ku kombisa njhani ku tlangela ka hina tinyiko ta xona to tala?
[Xifaniso lexi nga eka tluka 15]
Loko tabernakele ya ha akiwa, Vaisrayele va tirhe hi ku chivirika naswona va nyikele minyikelo yo hanana eka Yehova
[Xifaniso lexi nga eka tluka 18]
Minyikelo yo fana ni ya noni ya xisiwana ya tlangeriwa naswona i ya nkoka