“Xikwembu Xi Rhandza Munyiki La Tsakeke”

YEHOVHA i ximunhuhato xa ku hanana. Hakunene, Bibele yi vula leswaku i Munyiki wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” (Yakobo 1:17) Hi xikombiso, anakanya hi swilo leswi Xikwembu xi swi vumbeke. Xi endle swakudya leswi nandzihaka, hayi leswi phyamaka; swiluva leswi nga ni mavala-vala, hayi leswo kwalala; ku pela ka dyambu loku tsakisaka mahlo, hayi loku dzwihaleke. Ina, xiyenge xin’wana ni xin’wana xa ntumbuluko wa Yehovha xi nyikela vumbhoni bya rirhandzu ra yena ni ku hanana ka yena. (Pisalema 19:1, 2; 139:14) Ku tlula kwalaho, Yehovha i Munyiki la tsakeke. U tsakela ku endlela malandza ya yena swilo leswinene.—Pisalema 84:11; 149:4.

Vaisrayele a va lerisiwe leswaku va tekelela Xikwembu emhakeni yo hanana, loko va tirhisana hi xivona. Muxe u va byerile a ku: “U nga ṭhuki u nonoṅhwisa mbilu ya wena, ni ku pfalela makwenu wa šisiwana e šandla ša wena.” “Ṅwi nyike hi ku ṭaka, . . . e mbilu ya wena yi nga ṭhuki yi v̌ilela.” (Deteronoma 15:7, 10) Tanihi leswi ku nyika a ku fanele ku huma embilwini, Vaisrayele a va fanele va tsakela swiendlo swa ku hanana.

Vakreste va nyikiwe xitsundzuxo lexi fanaka. Ina, Yesu u vule leswaku “ku nyika swi tisa ntsako.” (Mintirho 20:35) Vadyondzisiwa va Yesu a va ri xikombiso lexinene emhakeni ya ku nyika u tsakile. Hi xikombiso, Bibele yi vika leswaku eYerusalema, lava veke vapfumeri “a va xavisa swilo swa vona ni rifuwo ra vona ni ku ava mpindzulo wa kona eka hinkwavo, hilaha un’wana ni un’wana a a pfumala hakona.”—Mintirho 2:44, 45.

Kambe vanhu lava va le Yudiya lava hananaka, endzhakunyana va weriwe hi vusweti. Bibele a yi hlamuseli hi ku kongoma leswaku i yini lexi va ngheniseke eka xiyimo xexo. Swidyondzi swin’wana swi vula leswaku ndlala leyi ku vulavuriwaka ha yona eka Mintirho 11:28, 29 ku nga ha va ku ri yona leyi byi vangeleke. Kambe ntiyiso hi leswaku, Vakreste va le Yudiya a va ri exiyin’weni xo tika, naswona Pawulo a a lava ku tiyiseka leswaku swilaveko swa vona swa khathaleriwa. Xana a a ta swi endlisa ku yini sweswo?

Nhlengo Wa Lava Pfumalaka

Pawulo u tsale hi mpfuno wa mavandlha ku ya fika eMakedoniya, naswona u hlele leswaku ku endliwa nhlengo wu endleriwa Vakreste lava hlaseriweke hi vusweti eYudiya. Pawulo u tsalele Vakorinto a ku: “Hilaha ndzi leriseke hakona emavandlheni ya Galatiya, na n’wina endlani hi ndlela yoleyo. Siku rin’wana ni rin’wana ro sungula evhikini, un’wana ni un’wana wa n’wina a a veke swo karhi etlhelo endlwini ya yena, hi ku ya hilaha a kotaka hakona.”a—1 Vakorinto 16:1, 2.

Pawulo a lava leswaku minyikelo leyi yi fambisiwa hi ku hatlisa yi yisiwa eka vamakwerhu va le Yerusalema, kambe Vakorinto a va hatlisanga va angula eka swiletelo swa Pawulo. Ha yini? Xana a va nga ri na mhaka ni khombo leri a ri wele vamakwavo va le Yudiya? E-e, hikuva Pawulo a swi tiva leswaku Vakorinto a va “andz[a] eka hinkwaswo, eripfumelweni ni le ritweni ni le vutivini ni le ku gingiritekeni hinkwako.” (2 Vakorinto 8:7) Kumbexana a va khomekile va khathalela timhaka tin’wana ta nkoka leti Pawulo a vulavuleke ha tona eka papila ra yena ro sungula leri yaka eka vona. Kambe sweswi xiyimo xa le Yerusalema a xi ri xa xihatla. Kutani Pawulo u vulavule hi mhaka leyi eka papila ra yena ra vumbirhi leri yaka eka Vakorinto.

Xikombelo Xo Hanana

Xo sungula, Pawulo u byele Vakorinto malunghana ni vanhu va le Makedoniya, lava n’wangulo wa vona eka matshalatshala ya mphalalo a ma ri xikombiso lexinene. Pawulo u tsarile: “Hi nkarhi wa ndzingo lowukulu loko va xaniseka, ntsako wa vona lowukulu ni vusiwana bya vona lebyikulu swi andzise rifuwo ra ku hanana ka vona.” Vanhu va le Makedoniya a va nga lavi ku khutaziwa leswaku va nyika. Ku hambana ni sweswo, Pawulo u vule leswaku “vona a va hambeta va hi kombela hi xikhongotelo lexikulu hi ku tilavela ka vona lunghelo ra ku nyika ka musa.” Ku hanana hi ntsako ka vanhu va le Makedoniya hi kona loku xiyekaka ngopfu loko hi xiya leswaku vona hi voxe a va ri ‘evusiwaneni lebyikulu.’—2 Vakorinto 8:2-4.

Loko a nkhensa vanhu va le Makedoniya, xana Pawulo a ringeta ku pfuxa moya wa ku phikizana exikarhi ka Vakorinto? Nikatsongo, hikuva a a swi tiva leswaku leyi a ku nga ri yona ndlela leyi faneleke yo khutaza. (Vagalatiya 6:4) Ku tlula kwalaho, a a swi tiva leswaku Vakorinto a va nga lavi ku khomisiwa tingana loko va endla nchumu lowunene. Ematshan’weni ya sweswo, a a tshemba leswaku Vakorinto a va va rhandza hakunene vamakwavo va vona va le Yudiya naswona a va navela ku nyikela eka mphalalo. U va byerile a ku: “Lembe leri ana se ri hundzeke, mi sungule ku swi endla, mi tlhela mi kombisa ni leswaku ma swi lava ku swi endla.” (2 Vakorinto 8:10) Hakunene, etimhakeni tin’wana ta mphalalo, Vakorinto na vona va ve xikombiso lexinene. Loko a engetela, Pawulo u va byerile a ku: “Ndza yi tiva mianakanyo ya n’wina yo lungheka leyi ndzi tibumaka ha yona eka va le Makedoniya malunghana na n’wina, . . . vunyingi bya vona byi khutaziwe hi ku hiseka ka n’wina.” (2 Vakorinto 9:2) Kambe, sweswi Vakorinto a va fanele va hundzula ku hiseka ka vona ni mianakanyo ya vona yi lunghekela ku tirha.

Hikwalaho, Pawulo u va byerile a ku: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) Hikwalaho, xikongomelo xa Pawulo a ku nga ri ku tshikilela Vakorinto, hikuva munhu a nge vi munyiki la tsakeke loko a sindzisiwa. Kahle-kahle, Pawulo u ehlekete leswaku nsusumeto lowunene ana se a wu ri kona, wa leswaku un’wana ni un’wana ana se u tiyimisele ku nyika. Ku engetela kwalaho, Pawulo u va byerile a ku: “Loko ku lungheka ku ri kona ku sungula, swi amukeleka hi ku hlawuleka hi ku ya hi leswi munhu a nga na swona, ku nga ri hi leswi a nga riki na swona.” (2 Vakorinto 8:12) Ina, loko ku ri na ku lungheka—loko munhu a susumetiwa hi rirhandzu—leswi a swi nyikelaka swi ta amukeleka eka Xikwembu, ku nga khathariseki ndlela leyi swi nga vonakaka swi ri switsongo ha yona.—Ringanisa Luka 21:1-4.

Vanyiki Lava Tsakeke Namuntlha

Mphalalo lowu a wu endleriwa Vakreste va le Yudiya wu nyikela xikombiso lexinene esikwini ra hina. Timbhoni ta Yehovha ti nghenele tsima ro chumayela emisaveni hinkwayo, ti nyika timiliyoni ta vanhu lava nga ni ndlala ya moya swakudya. (Esaya 65:13, 14) Ti endla leswi hi ku pfumelelana ni xileriso xa Yesu lexi nge: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula . . . mi va dyondzisa ku hlayisa swilo hinkwaswo leswi ndzi mi leriseke swona.”—Matewu 28:19, 20.

Ku hetisisa xileriso lexi a hi ntirho wo olova. Swi katsa ku hlayisa makaya ya varhumiwa ni miako ya marhavi yo tlula dzana emisaveni hinkwayo. Swi tlhela swi katsa ku akiwa ka Tiholo ta Mfumo ni Tiholo ta Nhlengeletano leswaku vagandzeri va Yehovha va ta va ni tindhawu leti faneleke to hlanganyela eka tona ni ku khutazana. (Vaheveru 10:24, 25) Minkarhi yin’wana, Timbhoni ta Yehovha ti tlhela ti nyikela mpfuno wa mphalalo etindhawini leti hlaseriweke hi makhombo ya ntumbuluko.

Nakambe, anakanya hi timali to tala ta ku kandziyisa. Hi xiringaniso, vhiki na vhiki ku kandziyisiwa tikopi to tlula 22 000 000 ta Xihondzo xo Rindza na tikopi ta kwalomu ka 20000000 ta Xalamuka! Ku engetela eka mphakelo wa nkarhi na nkarhi wa swakudya swa moya ku ni timiliyoni ta tibuku, tibroxara, tikhasete na tikhasete ta vhidiyo leti humesiwaka lembe na lembe.

Xana ntirho lowu hinkwawo wu seketeriwa njhani? Hi minyikelo ya ku tirhandzela. Minyikelo leyi a yi endleriwi ku voniwa kumbe hikwalaho ka vutianakanyi, kambe yi endleriwa ku yisa vugandzeri bya ntiyiso emahlweni. Hikwalaho, ku nyika koloko ku tisa ntsako eka munyiki, swin’we ni nkateko wa Xikwembu. (Malakiya 3:10; Matewu 6:1-4) Hambi ku ri vana exikarhi ka Timbhoni ta Yehovha va tikombisa va ri lava hananaka, vanyiki lava tsakeke. Hi xikombiso, endzhaku ko twa hi ku onha loku vangiweke hi xidzedze exiphen’wini xin’wana xa United States, Allison wa malembe ya mune hi vukhale u nyikele hi $2 (R12). U tsarile a ku: “Hi yona mali leyi ndzi nga na yona exibokisanini xa mina xa mali. Ndza swi tiva leswaku vana va lahlekeriwe hi switlangiso swa vona hinkwaswo ni tibuku ni swipopana. Kumbexana mi nga tirhisa mali leyi ku xavela xinhwanyatana lexi ringanaka na mina buku.” Maclean wa malembe ya nhungu hi vukhale, u tsale leswaku a tsakile hi leswi xidzedze lexi xi nga dlayangiki na un’we wa vamakwerhu. U engeterile a ku: “Ndzi kume $17 [R107] hi ku xavisa swipfalo swa mavhilwa na tata wa mina. A ndzi lava ku xava nchumu wo karhi hi mali leyi, kambe ndzi anakanye hi vamakwerhu.”—Nakambe vona bokisi leri nga laha henhla.

I ntiyiso, mbilu ya Yehovha ya tsaka loko yi vona lavatsongo ni lavakulu va rhangisa swilaveko swa yena swa Mfumo hi ku ‘n’wi dzunisa hi swilo swa vona swa nkoka.’ (Swivuriso 3:9, 10) Ina, a nga kona loyi a nga fuwisaka Yehovha, hikuva swilo hinkwaswo i swa yena. (1 Tikronika 29:14-17) Kambe ku seketela ntirho i lunghelo leri nyikaka mugandzeri nkarhi wo kombisa ku rhandza ka yena Yehovha. Ha tlangela eka un’wana ni un’wana loyi mbilu ya yena yi n’wi susumeteleke ku endla tano.

[Nhlamuselo ya le hansi]

[Bokisi leri nga eka tluka 26, 27]

Tindlela Leti Van’wana Va Hlawulaka Ku Nyikela Ha Tona Minyikelo eNtirhweni Wa Misava Hinkwayo

Vo tala va yi vekela etlhelo, kumbe va hlengeleta mali leyi va nga ta yi nghenisa emabokisini ya minyikelo. N’hweti na n’hweti mavandlha ma rhumela minyikelo leyi hi ku kongoma eyindlu-nkulu eBrooklyn, eNew York, kumbe ehofisini ya rhavi ya le kusuhi.

Minyikelo ya ku tirhandzela na yona yi nga ha rhumeriwa hi ku kongoma eka Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, kumbe ehofisini ya rhavi ra Sosayiti leyi langutelaka tiko ra ka n’wina. Swin’wetsin’wetsi kumbe swilo swin’wana swa nkoka na swona swi nga ha nyikeriwa. Minyikelo yo tano yi fanele ku fambisana ni papila ro koma leri hlamuselaka leswaku leyi i nyiko.

Lunghiselelo Ra Minyikelo Ya Ku Ya Hi Swiyimo

Mali yi nga nyikiwa Sosayiti ya Watch Tower ehansi ka lunghiselelo ro hlawuleka, loko munhu wa kona a yi lava, yi ta tlheriseriwa eka yena. Leswaku u kuma rungula leri engetelekeke, hi kombela u tihlanganisa ni Accounting Office eka adirese leyi nga eka tluka leri landzelaka.

Nyiko Leyi Kunguhatiweke

Ku engetela eka minyikelo leyi kongomeke ni minyikelo ya mali ya ku ya hi swiyimo, ku na tindlela tin’wana ta ku nyikela leti vuyerisaka ntirho wa Mfumo wa misava hinkwayo. Leti ti katsa:

Ndzindza-khombo: Sosayiti ya Watch Tower yi nga ha tsarisiwa tanihi leyi nga ta vuyeriwa eka fambiselo ra ndzindza-khombo wa vutomi, eka mali ya ku tshika ntirho kumbe mudende.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Sosayiti ya Watch Tower tanihi munyikelo yi ri hinkwayo kumbe hi lunghiselelo ra leswaku ntswalo wa yona wu ta hamba wu nyikiwa munhu la yi nyikeleke.

Purasi: Purasi leri xavisiwaka ri nga ha nyikeriwa eka Sosayiti ya Watch Tower tanihi nyiko leyi heleleke kumbe hi ntwanano wa leswaku a ri nge tekiwi loko loyi a ri nyikeleke a ha tshama ka rona kumbe a ha hanya. Munhu u fanele a tivisa Sosayiti a nga si nyikela ndhawu yo karhi eka Sosayiti.

Swiboho: Nhundzu kumbe mali swi nga ha nyikiwa Sosayiti ya Watch Tower hi ku tirhisa xileriso xa mufi lexi nga enawini.

Accounting Office yi fanele yi rhumeriwa kopi ya matsalwa ya le nawini lama faneleke, lama yelanaka ni malunghiselelo lawa. Lava va lavaka ku tiva hi man’wana ya malunghiselelo ya tinyiko leti kunguhatiweke, va fanele va vulavurisana ni Accounting Office hi ku tsala papila kumbe hi ku ba riqingho, eka adirese leyi nga laha hansi kumbe eka hofisi ya Sosayiti leyi langutelaka tiko ra ka n’wina.

Accounting Office

Watch Tower Bible and Tract Society of Pennsylvania

Private Bag X2067, Krugersdorp, 1740, South Africa

Riqingho: (011) 761-1000

[Swifaniso leswi nga eka tluka 25]

Mintirho ya Timbhoni ta Yehovha yi seketeriwa hi minyikelo ya ku tirhandzela