‘Dzunisa Yehovha Hi Rifuwo Ra Wena’—Njhani?
“ḌUNISA Yehova hi rifuwo ra wena, ni ŝirangana ŝa hikwaŝo le’ŝi ku taleleke.” Leswi nga eka marito lawa lama huhuteriweke ya vutlhari, lama tsariweke malembe ya 2600 lama hundzeke, i xilotlelo xo kuma mikateko ya Yehovha hi vutalo, hikuva mutsari u ya emahlweni a hlamusela a ku: “Kutani ŝitlati ŝa wena ŝi ta tala, ŝikhuv̌uto ŝa wena ŝi ta khapa-khapa hi vinyo yo ṭokombela.”—Swivuriso 3:9, 10.
Kambe swi vula yini ku dzunisa Xikwembu? I yini rifuwo leri hi faneleke hi dzunisa Yehovha ha rona? Naswona hi nga swi endlisa ku yini leswi?
‘Dzunisa Yehovha’
Ematsalweni, rito-nkulu ra Xiheveru leri vulaka ku dzunisa, ka·vohdhʹ, hi ku kongoma ri vula “ntiko.” Kutani ku dzunisa munhu swi vula ku n’wi teka a ri wa ntikelo, a ri la tsakisaka ni la nga wa nkoka. Rito rin’wana ra Xiheveru leri vulaka ku dzunisa, yeqarʹ, ri tlhela ri hundzuluxeriwa ri va “risima” na “swilo swa risima.” Hilaha ku fanaka, rito ra Xigriki ti·meʹ, leri hundzuluxeriweke ri va “dzunisa” eBibeleni, ri vula ku va wa nkoka, wa ntikelo, wa risima. Xisweswo munhu u dzunisa un’wana hi ku kombisa munhu yoloye xichavo lexi enteke ni ku n’wi teka a ri wa nkoka.
Ku dzunisa na kona ku ni xivumbeko xin’wana. Xiya mhaka ya Muyuda wo tshembeka Mordekayi, loyi hi nkarhi wun’wana a paluxeke rhengu ro dlaya Hosi Ahasuwerusi wa le Persia wa khale. Endzhakunyana, loko hosi yi vone leswaku a ku endliwanga nchumu ku dzunisa Mordekayi hikwalaho ka xiendlo xolexo, u vutise holobyenkulu wa yena, Hamani, leswaku a nga n’wi dzunisa hi ndlela yihi loyi hosi yi n’wi tsakeleke. Hamani a a ehleketa leswaku ku ta dzunisiwa yena, kambe wa nga vona ndlela leyi a hoxe ha yona! Hambiswiritano, Hamani u vule leswaku munhu wo tano u fanele ku ambexiwa “šifunengelo ša v̌uhosi” ivi a khandziyisiwa “hantši le’yi khanḍiyaka hi hosi.” U gimete hi ku: “A fambisiwa hi hantši e nṭenḍeleni wa muti, kutani ku huweleriwa e mahlweni ka yena, v̌a ku: Ku endliwa ŝeŝo e ka munhu loyi hosi yi ranḍaka ku ṅwi ṭakisa!” (Estere 6:1-9) Eka xikombiso lexi, ku dzunisa munhu a ku katsa ku n’wi tlakusa erivaleni leswaku a ta xiximiwa swinene hi vanhu hinkwavo.
Hi ku fanana, ku dzunisa Yehovha ku na swivumbeko swimbirhi: ku n’wi xixima swinene ni ku n’wi tlakusa erivaleni hi ku hlanganyela ni ku seketela ntirho wo huwelela vito ra yena erivaleni.
‘Rifuwo Ra Wena’—I Yini?
Rifuwo ra hina entiyisweni ri katsa vutomi bya hina, nkarhi wa hina, vuswikoti bya hina ni matimba ya hina. Ku vuriwa yini hi swilo swa hina leswi vonakaka? Xiya marito ya Yesu loko a vone noni leyi pfumalaka yi hoxa swingwece swimbirhi leswitsongo leswi nga na nkoka wutsongo ebokisini ra munyikelo. U te: “Noni leyi ya xisiwana yi humesile ku tlula hinkwavo; hikuva vanhu lava hinkwavo [lava humeseke] va humesile tinyiko leti va ti pambuleke exumeni xa vona lexo tala, kasi wansati loyi u humesile swa vusiwana bya yena, swi nga hinkwaswo leswi a a ta hanya ha swona.” (Luka 21:1-4) Yesu u dzunise noni leyi hi ku tirhisa rifuwo ra yona eku seketeleni ka vugandzeri bya Yehovha.
Kutani, swi le rivaleni leswaku rifuwo leri boxiweke hi Solomoni ri katsa ni swilo swihi na swihi leswi vonakaka leswi hi nga ha vaka hi ri na swona. Naswona xiga lexi nge “ŝirangana ŝa hikwaŝo le’ŝi ku taleleke” ri ni mianakanyo yo nyika Yehovha leswinene ngopfu eka rifuwo ra hina.
Kambe, xana ku nyikela hi swilo leswi vonakaka swi nga dzunisa Xikwembu hi ndlela yihi? Xana swilo hinkwaswo ana a hi swa yena ke? (Pisalema 50:10; 95:3-5) “Hikwaŝo ŝi huma ka wena,” ku vule Hosi Davhida eka xikhongelo lexi humaka embilwini lexi yaka eka Yehovha. Naswona hi munyikelo lowukulu lowu yena ni vanhu va yena va wu endleke eku akiweni ka tempele, Davhida u te: “Leŝi hi ku humeselaka ŝona hi nyikiwile hi v̌oko ra wena.” (1 Tikronika 29:14) Kutani loko hi nyikela tinyiko eka Yehovha, hi tlherisela leswi hikwalaho ka ku lulama ka mbilu ya yena a hi nyikeke swona. (1 Vakorinto 4:7) Kambe, tanihi leswi swi boxiweke eku sunguleni, ku dzunisa Yehovha swi katsa ku n’wi tlakusa emahlweni ka van’wana. Naswona tinyiko ta swilo leswi vonakaka leti tirhiseriwaka ku yisa vugandzeri bya ntiyiso emahlweni ta xi dzunisa Xikwembu. Bibele yi ni swikombiso leswinene ngopfu swa ndlela leyi yo dzunisa Yehovha.
Swikombiso Swa Le Nkarhini Lowu Hundzeke
Malembe lama nga vaka 3500 lama hundzeke, loko nkarhi wu fikile wa leswaku Yehovha a nyikela tabernakela emananga tanihi ndhawu yo gandzela eka yona ya Vaisrayele, ku ve ni xilaveko xa swilo swa risima swo hambana-hambana leswi a swi laviwa hi pulani leyi va nyikiweke yona hi Xikwembu. Yehovha u lerise Muxe ku ‘pfumelela un’wana ni un’wana loyi mbilu ya yena yi n’wi susumetaka a tisa munyikelo wa Yehovha.’ (Eksoda 35:5) Mhaka yi ya emahlweni yi ku: “Munhu uṅwana ni uṅwana l’a ṭunḍušiweke hi mbilu ya yena, ni hikwav̌o la’v̌a ŝi ranḍeke, v̌a tisa le’ŝi v̌a ŝi nyikaka Yehova, ku ta tira ntiro wa Yindlu ya nhlengeletano, ni hikwaŝo ŝa ntiro wa yona, ni tinguv̌u le’ti hlawuriweke.” (Eksoda 35:21) Entiyisweni, minyikelo ya vona ya ku tirhandzela a yi tele ngopfu ku tlula leswi a swi laveka eka ntirho lowu, lerova vanhu va kala va “siv̌eriwa . . . e ku tisa ŝilo”!—Eksoda 36:5, 6.
Xiya xikombiso xin’wana. Loko xikongomelo xa tabernakele xi herile naswona ku ri karhi ku endliwa malunghiselelo ya ku akiwa ka tempele, Davhida hi yexe u endle munyikelo lowukulu wa tempele leyi n’wana wa yena Solomoni a ta yi aka. U tlhele a kombela van’wana leswaku va hlanganyela, kutani vanhu va angula hi ku nyikela tinyiko ta swilo swa nkoka eka Yehovha. Silivhere ni nsuku ntsena, a swi ta vitana 222 wa magidi ya timiliyoni ta tirhandi hi mali ya sweswi. “Tiko ri ṭakela e ku nyika ka v̌ona.”—1 Tikronika 29:3-9; 2 Tikronika 5:1.
‘Minyikelo Ya Ku Tirhandzela’ eSikwini Ra Hina
Xana hi nga hlanganyela njhani eka ntsako wa ku endla minyikelo ya ku tirhandzela esikwini ra hina? Ntirho wa nkoka swinene lowu yaka emahlweni emisaveni sweswi i wa ku chumayela hi Mfumo ni ku endla vadyondzisiwa. (Matewu 24:14; 28:19, 20; Mintirho 1:8) Naswona Yehovha u vone swi fanerile leswaku a byarhisa Timbhoni ta yena swilaveko swa laha misaveni swa Mfumo.—Esaya 43:10.
Swi le rivaleni leswaku mali ya laveka leswaku ku hakeleriwa ntirho lowu Timbhoni ta Yehovha ti wu endlaka namuntlha. Ku aka ni ku hlayisa Tiholo ta Mfumo, Tiholo ta Tinhlengeletano, tihofisi ta marhavi, tifektri ni makaya ya Bethele swi lava mali. Ku kandziyisa ni ku hangalasa Tibibele ni tibuku leti sekeriweke eBibeleni hi tindzimi to hambana-hambana naswona swi lava mali. Xana mali yo tano ya ku endla leswi yi huma kwihi? I minyikelo leyi nga ya ku tirhandzela ntsena!
Yo tala ya minyikelo yi huma eka vanhu lava—ku fana ni noni leyi Yesu a yi voneke—va nga riki na mali yo nyawula. Hikwalaho ka ku lava ku va ni xandla eka ndlela leyi ya ku dzunisa Yehovha, va nyikela mali yitsongo “hi ku ya hi hinkwaswo leswi a va ri na swona,” naswona minkarhi yin’wana, hambi ku ri “ku hundzisa kwalaho.”—2 Vakorinto 8:3, 4.
“Un’wana ni un’wana a a nyike hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile,” ku vule muapostola Pawulo eka Vakreste va le Korinto. (2 Vakorinto 9:7) Ku nyika u tsakile swi lava ku kunguhata lokunene. Pawulo u byele Vakorinto a ku: “Hi siku ro sungula ra vhiki, un’wana ni un’wana wa n’wina a a veke swin’wana hi tlhelo, eka leswi a swi bindzuriseke, leswaku nhlengo wu nga ha endliwi siku ndzi taka.” (1 Vakorinto 16:2) Hi ku fanana, va ri exihundleni naswona hi ku tirhandzela, lava navelaka ku endla minyikelo yo yisa ntirho wa Mfumo emahlweni namuntlha va nga vekela etlhelo yin’wana ya mali leyi va yi kumaka leswaku va ta nyikela ha yona.
Yehovha U Katekisa Lava N’wi Dzunisaka
Hambileswi ku humelela hi tlhelo ra swilo leswi vonakaka swi nga n’wi endliki munhu a hluvuka hi tlhelo ra moya, ku tirhisa rifuwo ra hina hi malwandla—nkarhi wa hina, matimba ya hina ni swilo swa hina leswi vonakaka—leswaku hi dzunisa Yehovha swi tisa mikateko leyi fuweke. Sweswo swi tano hikuva Xikwembu, lexi swilo hinkwaswo swi nga swa xona, xa hi tiyisekisa: “L’a hananaka o ta nona, l’a tšheletaka o ta tšheletiwa na yena.”—Swivuriso 11:25.
Endzhaku ka rifu ra Hosi Davhida, n’wana wa yena Solomoni u tirhise minyikelo yo tirhandzela leyi tata wa yena a yi hlengeleteke ku aka tempele leyi dzunekaka, hilaha Yehovha a leriseke hakona. Naswona ntsendze loko Solomoni a tshama a tshembekile eku gandzeleni ka yena Xikwembu, “ku suka Dan e ku fika Beeršeba v̌a-Yuda ni v̌a Israel, a v̌a akile, v̌a nga tšhav̌i ntšhumu . . . e masikwini hikwawo ya Salomon.” (1 Tihosi 4:25) Switlati a swi tele, swikamelo a swi khapa—ntsendze loko Israyele ‘a dzunisa Yehovha hi rifuwo ra yena.’
Endzhakunyana, hi ku tirhisa muprofeta Malakiya, Yehovha u te: “Mi nḍi ringa ha kona, ku v̌ula Yehova wa mav̌andla, kutani mi ta v̌ona šana nḍi nga ka nḍi nga mi pfuleri mafester ya tilo, nḍi v̌a nḍi mi tšhululela e ku kateka hi mpimo lo’wu tlurisaka.” (Malakiya 3:10) Ku hluvuka hi tlhelo ra moya loku malandza ya Yehovha ma tiphinaka ha kona namuntlha i vumbhoni bya leswaku Xikwembu xi hlayise xitshembiso xa xona.
Yehovha wa tsaka hakunene loko hi endla xiphemu xa hina eku yiseni ka swilaveko swa Mfumo emahlweni. (Vaheveru 13:15, 16) Naswona u tshembisa ku hi seketela loko hi ‘hambeta hi rhangisa mfumo ni ku lulama ka yena.’ (Matewu 6:33) Hi ku tsaka lokukulu ka mbilu, onge hi nga ‘dzunisa Yehovha hi rifuwo ra hina.’
[Bokisi leri nga eka tluka 28, 29]
Tindlela Leti Van’wana Va Hlawulaka Ku Nyikela Ha Tona Minyikelo eNtirhweni Wa Misava Hinkwayo
Vo tala va vekela etlhelo, kumbe va hlengeleta mali leyi va nga ta yi nghenisa emabokisini ya minyikelo eHolweni ya Mfumo. N’hweti na n’hweti mavandlha ma rhumela minyikelo leyi hi ku kongoma eyindlu-nkulu eBrooklyn, eNew York, kumbe ehofisini ya rhavi ya le kusuhi.
Minyikelo ya ku tirhandzela na yona yi nga ha rhumeriwa hi ku kongoma eka Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, kumbe ehofisini ya rhavi ra Sosayiti leyi langutelaka tiko ra ka n’wina. Swin’wetsin’wetsi kumbe swilo swin’wana swa nkoka na swona swi nga ha nyikeriwa. Minyikelo yo tano yi fanele ku fambisana ni papila ro koma leri hlamuselaka leswaku leyi i nyiko.
Lunghiselelo Ra Minyikelo Ya Ku Ya Hi Swiyimo
Mali yi nga nyikiwa Sosayiti ya Watch Tower leswaku yi yi hlayisa ku kondza loyi a yi nyikeleke a lova, swi endliwa hi lunghiselelo ra leswaku loko munhu wa kona a yi lava, yi ta tlheriseriwa eka yena. Leswaku u kuma rungula leri engetelekeke, hi kombela u tihlanganisa ni Treasurer’s Office eka adirese leyi nga laha hansi.
Nyiko Leyi Kunguhatiweke
Ku engetela eka minyikelo leyi kongomeke ni minyikelo ya mali ya ku ya hi swiyimo, ku na tindlela tin’wana ta ku nyikela leti vuyerisaka ntirho wa Mfumo wa misava hinkwayo. Leti ti katsa:
Ndzindza-khombo: Sosayiti ya Watch Tower yi nga ha tsarisiwa tanihi leyi nga ta vuyeriwa eka fambiselo ra ndzindza-khombo wa vutomi, eka mali ya ku tshika ntirho kumbe mudende. Sosayiti yi fanele yi tivisiwa hi lunghiselelo rihi na rihi ro tano.
Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Sosayiti ya Watch Tower tanihi munyikelo yi ri hinkwayo kumbe hi lunghiselelo ra leswaku ntswalo wa yona wu ta hamba wu nyikiwa munhu la yi nyikeleke.
Purasi: Purasi leri xavisiwaka ri nga ha nyikeriwa eka Sosayiti ya Watch Tower tanihi nyiko leyi heleleke kumbe hi ntwanano wa leswaku a ri nge tekiwi loko loyi a ri nyikeleke a ha tshama ka rona kumbe a ha hanya. Munhu u fanele a tivisa Sosayiti a nga si nyikela ndhawu yo karhi eka Sosayiti.
Swiboho: Nhundzu kumbe mali swi nga ha nyikiwa Sosayiti ya Watch Tower hi ku tirhisa xileriso xa mufi lexi nga enawini. Kopi ya xiboho lexi yi fanele yi rhumeriwa eka Sosayiti. Lava va lavaka ku tiva hi man’wana ya malunghiselelo ya tinyiko leti kunguhatiweke, va fanele va vulavurisana ni Treasurer’s Office eka adirese leyi nga laha hansi kumbe eka hofisi ya Sosayiti leyi langutelaka tiko ra ka n’wina. Treasurer’s Office yi fanele yi rhumeriwa kopi ya matsalwa ya le nawini lama faneleke, lama yelanaka ni malunghiselelo lawa.
Treasurer’s Office
Watch Tower Bible and Tract Society of Pennyslvania
Private Bag X2067, Krugersdorp, 1740
Riqingho: (011) 761-1000