Munyiki Wa “Nyiko Yin’wana Ni Yin’wana Leyo Saseka”

“Siku rin’wana ndzi vitaniwe hi mufundhisi wa kereke ya Reformed. A a lava ku tiva leswaku ndzi swi kotisa ku yini ku fambisa kereke ya mina. Ndzi te ka yena: . . . ‘A hi hakeli mali; a ku na nchumu lexi vangaka timholovo. A ku humesiwi nhlengo.’ U vutise a ku: ‘Xana mi yi kumisa ku yini mali?’ Ndzi hlamurile, ‘Dok.——, loko ndzo ku byela ntiyiso wa kona lowu olovaka, a wu nge wu tshembi. Loko vanhu va ta eka vukhongeri lebyi, a va kumi ku ri na swibya swa nhlengo leswi hundzisiwaka emahlweni ka vona. Kambe va swi vona leswaku ku ni swilo leswi lavaka mali. Kutani va tibyela leswi, “Holo leyi yi dya mali. . . . Xana ndzi nga yi humesa njhani mali yo pfuna?”’ U ndzi langutile onge hi loko a ehleketa leswaku, ‘Xana u ndzi teka ndzi ri yini—xiphukuphuku?’ Ndzi te, ‘Phela, Dok.——, ndzi ku byela ntiyiso lowu heleleke. . . . Loko munhu a kuma nkateko naswona a ri ni swilo leswi vonakaka, u lava ku swi tirhisa eHosini. Loko a nga ri na nchumu, ha yini hi fanele ku n’wi londza wona?’”

—Charles T. Russell, muungameri wo sungula wa Sosayiti ya Watch Tower, “The Watch Tower” ya July 15, 1915.

HI NYIKA hi mhaka ya leswi Yehovha Xikwembu a nga yena a sunguleke ku nyika. Ku nyika kakwe ku sungule eka malembe yo tala lama hundzeke hi ntumbuluko—xivumbiwa xakwe xo rhanga, “N’wana wa [yena] la nga un’we.” (Yohane 3:16) Hi rirhandzu, u nyike van’wana nyiko ya vutomi.

N’wana wa Xikwembu, Yesu Kreste, i nyiko leyikulu leyi Yehovha a hi nyikeke yona. Kambe N’wana wa Xikwembu a hi makumu ya ku nyika ka Xikwembu. ‘Musa lowukulu lowu nga fanelangiki wa Xikwembu’ hi leswi muapostola Pawulo a swi vitanaka “nyiko leyi marito ma kayivelaka ku yi hlamusela,” ya Yehovha. (2 Vakorinto 9:14, 15) Swi le rivaleni leswaku nyiko leyi yi katsa vunene ni musa wa rirhandzu hinkwawo lowu Xikwembu xi wu kombisaka vanhu hi Yesu. Musa wolowo lowu nga fanelangiki i wunene ngopfu lerova munhu a nga swi koti ku wu hlamusela kumbe ku wu kombisa. Kambe, ku na swin’wana nakambe leswi fambisanaka ni ku nyika ka Xikwembu.

Khale ka masiku, hosi yi pfumele hi vutlharhi ni hi ku titsongahata leswaku xin’wana ni xin’wana lexi a yi endla nyiko ha xona a xi ri xa Yehovha. Yi te: “Hikuv̌a hikwaŝo le’ŝi nge tilweni ne misav̌eni, ŝi na wena; e ka wena Yehova, ku v̌e ku fuma, wena l’a titlakuseke ku v̌a hosi henhla ka ŝilo hikwaŝo! . . . Hikuv̌a nḍi mani šana, ni tiko ra nga i rihi šana, leŝaku hi tiv̌a ku humesa ŝilo leŝi? Hikuv̌a hikwaŝo ŝi huma ka wena, kutani leŝi hi ku humeselaka ŝona hi nyikiwile hi v̌oko ra wena.”—1 Tikronika 29:11-14.

Xikombiso Xa Xikwembu

Yakobo, mudyondzisiwa wa Yesu Kreste, a a swi tiva leswaku Yehovha Xikwembu i xihlovo xa swilo hinkwaswo leswi nga swinene matlhelo hinkwawo. Yena u ni tinyiko leti hetisekeke ntsena. Yakobo u tsarile: “Nyiko yin’wana ni yin’wana leyo saseka ni minkateko hinkwayo leyi hetisekeke, swi ta hi le henhla, swi xika hi le ka Muvumbi wa leswi voningaka, loyi ku nga hava ku hundzuka-hundzuka eka yena, kumbe ku fularhela munhu a sala exinyamini.”—Yakobo 1:17.

Hambi ku ri emhakeni ya ku nyika, Yakobo u yi vonile ndlela leyi Xikwembu xi hambanaka ha yona ni vanhu. Vanhu va nga ha ti endla tinyiko letinene kambe a va ti endli hi masiku. Ti nga ha vangiwa hi ku lava ku vuyeriwa kumbe ti nga ha tirhiseriwa ku endla leswaku munhu a endla xilo xo biha. Yehovha a nga hundzuki; a nga cinci. Hikwalaho, tinyiko ta yena a ti cinci. I tinene minkarhi hinkwayo. Nkarhi hinkwawo ti endla vanhu va hlayiseka ni ku tsaka. Minkarhi hinkwayo ti nyikeriwa hi musa naswona ta pfuna, a ti na khombo.

Minsusumeto Yo Endla Tinyiko

Emasikwini ya Yakobo, varhangeri va vukhongeri lava dumeke va endle tinyiko leswaku va voniwa hi vanhu ntsena. A a va nga nyiki hi mbilu yo basa. Hikwalaho ka ku lava ku nkhensiwa hi vanhu, va landzule mimpimanyeto ya vona yo lulama. Hambi swi ri tano, Vakreste a va fanele va hambana na vona. Yesu u va layile, a ku: “Loko u nyika swisiwana, u nga tidzunisi ha swona kukotisa leswi vakanganyisi va swi endlaka emasinagogeni ne tindleleni, leswaku va ta dzunisiwa hi vanhu. Ndzi tiyisile ndzi ri ka n’wina: Hakelo ya vona va yi kumile. Kambe wena, loko u nyika swisiwana, voko ra wena ra ximatsi ri nga tshuki ri tiva leswi endliwaka hi lera xinene, leswaku ku nyika ka wena ku endleriwa exihundleni; kutani Tata wa wena la vonaka exihundleni, hi yena la nga ta ku hakela.”—Matewu 6:2-4.

Xivangelo xa Mukreste xa ku endla nyiko i ku pfuna van’wana kumbe ku va endla va tsaka kumbe ku yisa vugandzeri bya ntiyiso emahlweni. A hi swa ku titsakisa. Nakambe, mahlo ya Yehovha ma nga kota ku vona endzeni ka timbilu ta hina. A nga vona nsusumeto wa le ndzeni lowu vangelaka tinyiko ta hina ta tintswalo.

Timbhoni ta Yehovha ti lwela ku landzela xikombiso xa Yehovha ni N’wana wa yena eku endleni ka tinyiko. Va nyikela hi leswi va nga na swona. Va ni mahungu lamanene ya Mfumo, kutani va nyikela hi wona leswaku va katekisa van’wana. Va swi tiva leswaku Swivuriso 3:9 yi ri: “Ḍunisa Yehova hi rifuwo ra wena, ni ŝirangana ŝa [wena] hikwaŝo le’ŝi ku taleleke.” Hikuva hofisi ya rhavi, vandlha ni munhu un’wana ni un’wana, u lava ku endla leswaku hinkwavo va hlayiseka, vamakwerhu hinkwavo va tiyisiwa emoyeni naswona va humelela. Ku humelela hi swilo leswi vonakaka a ku ku tisi ku eneriseka emoyeni, kambe ku humelela emoyeni ku tisa rifuwo ra swilo leswi vonakaka leswi eneleke leswaku swi nyikeriwa eka swilaveko swa ntirho wa Yehovha.

Tindlela To Hoxa Xandla

Ku ni tindlela to tala leti un’wana ni un’wana a nga hoxaka xandla ha tona eku seketeleni ka mahungu lamanene. Ndlela yin’wana yi fambisana ni Tiholo ta Mfumo. Swirho hinkwaswo swa vandlha swi tirhisa Holo ya Mfumo. Ku ni loyi a humeseke mali ya ku aka kumbe ya rhente, ya timboni, swa ku berisa moya ni ku yi hlayisa. Tanihi leswi vandlha ri faneleke ku sekeriwa hi un’wana ni un’wana, ku vekiwa mabokisi ya munyikelo eHolweni ya Mfumo, naswona minhlengo ya ku tirhandzela leyi amukeriwaka yi tirhiseriwa ku hakela swikweleti swa vandlha. Eka leyi salaka, ku nga ha endliwa munyikelo wu ya eka rhavi ra le kusuhi ra Watch Tower, hi ku ya hi xiboho xa vandlha.

Minyikelo ya ku letela ni ku seketela varhumiwa ni maphayona yo hlawuleka eswiphen’wini swa misava laha mahungu lamanene ma nga si fikaka eka van’wana yi nga rhumeriwa eka Sosayiti hi ku kongoma. Timali tin’wana leti tirhisiwaka ku hangalasa mahungu lamanene ti khumba ntirho wa valanguteri lava famba-fambaka. Muapostola Pawulo, loyi a vekeke xikombiso lexinene entirhweni wo famba-famba eka lembe xidzana ro sungula, u bumabumele vandlha ra le Filipiya, a ku: “Mi ndzi rhumerile swo ndzi pfuna eka leswi a ndzi swi pfumala, naswona ku nga ri kan’we ntsena.” (Vafilipiya 4:14-16) Handle ka timali ta swiyenge leswi swa ntirho wa nkarhi hinkwawo, leswi marhavi hinkwawo ma nga na swona, ku ni ku hlayisiwa ka kaya rin’wana ni rin’wana ra Bethele ni lava tirhaka ni ku tshama kona. Ku tsala ni ku kandziyisiwa ka tibuku leti tameleke rungula ro saseka ra mahungu lamanene hakunene i malunghelo lama nyikiwaka hi Xikwembu, kambe ku hangalasiwa ka tibuku na kona ka laveka, naswona ku dya mali. Kutani ku ni timali ta tinhlengeletano ni mintsombano, hi nga ha vuli mintengo ya huvo leyi lwiweke leswaku ‘ku lweriwa ni ku simeka mahungu lamenene hi nawu.’—Vafilipiya 1:7.

Nkarhi lowu hetiwaka eku chumayeleni ka mahungu lamanene hi nandza un’wana ni un’wana wa Yehovha i wa ku tirhandzela, kun’we ni ku nyikela ka yena hi swilo leswi vonakaka. Muapostola Pawulo u khutaza ku hamba u veka mali leyi nga tirhisiwaka eku kuriseni ka vugandzeri bya ntiyiso: “Loko wu ri nhlengo lowu humeseriwaka vahlawuriwa, . . . hi siku ro sungula ra vhiki, un’wana ni un’wana wa n’wina a a veke swin’wana hi tlhelo, eka leswi a swi bindzuriseke.”—1 Vakorinto 16:1, 2.

Loko munhu a endla nhlengo, minkarhi yin’wana a nga swi tivi leswaku wu ta tirhisiwa njhani, kambe u vona vuyelo bya kona hi ku kurisiwa ka ku chumayela hi ta Mfumo. Swiviko leswi nga eka 1993 Yearbook of Jehovah’s Witnesses swi komba leswaku mahungu lamanene ya Mfumo ma chumayeriwa ematikweni yo tlula 200 ni le swihlaleni swa lwandle hi vatirheli va Vakreste lava tlulaka 4 500 000. Swiviko leswi swa tsakisa. Kutani nyiko yin’wana ni yin’wana, ku nga khathariseki mpimo wa yona, ya pfuna eku hangalaseni ka mahungu lamanene emisaveni hinkwayo.

Ntirho lowu wu hakeleriwa hi ku nyika ka hina hinkwerhu. Van’wana va kota ku nyika swo tala, leswi swi pfunaka swinene entirhweni wo chumayela. Van’wana va nyika switsongo. Kambe lava endlaka minyikelo leyi tolovelekeke a va fanelanga va khomiwa hi tingana kumbe va vona onge nyiko ya vona a hi ya nkoka. Yehovha a nga titwi hi ndlela yoleyo. Yesu u swi veke erivaleni leswi loko a kombisa ndlela leyi Yehovha a tlangeleke ha yona malinyana ya noni. “A vona ni noni leyi a yi ri xisiwana, yi hoxa swimalana swimbirhi leswi lavaka ku ringana sente ntsena. Kutani a ku: ‘Hakunene ndzi ri ka n’wina: Noni leyi ya xisiwana yi humesile ku tlula hinkwavo; hikuva vanhu lava hinkwavo va humesile tinyiko leti va ti pambuleke exumeni xa vona lexo tala, kasi wansati loyi ú humesile swa vusiwana bya yena, swi nga hinkwaswo leswi a a ta hanya ha swona.’”—Luka 21:2-4.

Ku nga khathariseki leswaku xiyimo xa hina xa timali xi njhani, hi nga nyika hi tindlela leti tsakisaka Yehovha. Mupisalema u yi hlamusela kahle ndlela leyi hi nga dzunisaka Hosi ni Muavanyisi wa hina ha yona. U ri: “Nyikani ka Yehova e ku kwetsima lo’ku fanelaka v̌ito ra yena. Tisani maganḍelo, mi nghena rikupakupeni ra yena.” (Pisalema 96:8) Hikwalaho, onge hi nga tekelela xikombiso xa rirhandzu xa Tata wa hina wa le tilweni hi ku nyika hi ntsako hikuva u rhangile a nyika hina.

[Bokisi leri nga eka tluka 30]

NDLELA LEYI VAN’WANA VA NYIKELAKA HA YONA ENTIRHWENI WA KU CHUMAYELA HI MFUMO

◻ TINYIKO: Minyikelo ya ku tirhandzela ya mali yi nga ha rhumeriwa hi ku kongoma eka Watch Tower Bible and Tract Society of Pennsylvania, 25 Columbia Heights, Brooklyn, New York 11201, kumbe eka hofisi ya rhavi ra Sosayiti ya kwalaho. Swin’wetsin’wetsi kumbe swilo swin’wana swa nkoka na swona swi nga ha nyikeriwa. Minyikelo yo tano yi fanele yi fambisana ni papila ro koma leri kombisaka leswaku i nyiko.

◻ LUNGHISELELO RA MINYIKELO YA KU YA HI SWIYIMO: Mali yi nga nyikiwa Sosayiti ya Watch Tower leswaku yi yi hlayisa ku kondza loyi a yi nyikeleke a lova, swi endliwa hi lunghiselelo ra leswaku loko munhu wa kona a yi lava, yi ta tlheriseriwa eka yena.

◻ NDZINDZA-KHOMBO: Sosayiti ya Watch Tower yi nga ha tsarisiwa tanihi leyi nga ta vuyeriwa eka fambiselo ra ndzindza-khombo wa vutomi kumbe eku kunguhateni ka ku tshika ntirho/phenceni. Sosayiti yi fanele ku tivisiwa hi lunghiselelo ro tano.

◻ MALI LEYI LOMBISIWEKE: Mali leyi lombisiweke yi nga nyikeriwa eka Sosayiti ya Watch Tower tanihi munyikelo yi ri hinkwayo kumbe hi lunghiselelo ra leswaku ntswalo wa yona wu ta hamba wu nyikiwa munhu la yi nyikeleke.

◻ PURASI: Purasi leri xavisekaka ri nga ha nyikeriwa eka Sosayiti ya Watch Tower tanihi nyiko leyi heleleke kumbe hi ntwanano wa leswaku a ri nge tekiwi loko loyi a ri nyikeleke a ha tshama ka rona, a ha hanya. Munhu u fanele a tivisa Sosayiti a nga si nyikela ndhawu yo karhi eka Sosayiti.

◻ SWIBOHO: Nhundzu kumbe mali swi nga ha nyikiwa Watch Tower Bible and Tract Society of Pennsylvania hi ku tirhisa xileriso xa mufi lexi nga enawini. Kopi ya xileriso xa mufi yi fanele yi rhumeriwa eka Sosayiti.

Leswaku u kuma rungula leri engetelekeke hi timhaka ta muxaka lowu, tsalela, Treasurer’s Office, Watch Tower Bible and Tract Society of Pennsylvania, Private Bag X2067, Krugersdorp, 1740, kumbe hofisi ya Sosayiti leyi nga ekusuhi.

[Swifaniso leswi nga eka tluka 31]

Ndlela leyi minyikelo ya wena yi tirhaka ha yona:

1. Vatirhi vo tirhandzela va le Bethele

2. Ku akiwa ka hofisi ya rhavi

3. Xilamulela-mhangu

4. Tiholo ta Mfumo

5. Varhumiwa