“Xana Mali Yi Huma Kwihi?”

VAHLALERI va vhidiyo ya Sosayiti ya Watch Tower leyi nge “Jehovah’s Witnesses—The Organization Behind the Name” va tsaka. Va vona vavanuna ni vavasati lava tengeke va tinxaka ni mindhavuko yo hambana, va ri karhi va n’wayitela ni ku tirha hi ntwanano. Vahlaleri lava a va kokiwi nyingiso ntsena hi vatirhi va magidi lava tsakeke ntsena kambe ni hi miako leyikulu eyindlu-nkulu ya Sosayiti eBrooklyn ni mapurasi ya vona e Wallkill, New York. Vhidiyo leyi yi kombisa leswaku endzeni ka miako leyi ku kumeka switirho swa manguva lawa—michini yo kandziyisa hi rivilo lerikulu ni muchini wo boha tibuku lowu endlaka timiliyoni ta tibuku n’hweti na n’hweti, tikhomphyuta to tala to hambana-hambana, ni tindzawulo to tala leti ntirho wa tona ku nga ku seketela ku kandziyisiwa ka tibuku leti.

Leswi swi kombisa ku tirhisiwa ka rifuwo hi ndlela leyikulu. Kutani van’wana va vutisa, “Xana mali yi huma kwihi?”

Lava endzelaka eyindlu-nkulu ya Sosayiti ya misava hinkwayo na vona va tsaka. Va tlakusa tinhamu ta vona leswaku va vona muako lowuntshwa wo tshama eka wona wa swithezi swa 30, wu nga wun’wana wa miako leyi tirhiseriwaka ku rhurhela vatirheli va ku tirhandzela lava tirhaka kwalaho vo tlula 3 000. Ku endzela le Ntsindza wa Dyondzo wa Watchtower lowuntshwa lowu nga kwalomu ka 110 wa tikhilomitara en’walungwini wa Brooklyn na swona swi tsakise vo tala. Hambi leswi wa ha akiwaka, wu rhurhela vatirhi va kwalomu ka 1 200. Titlilasi timbirhi ta varhumiwa ti ta leteriwa kwalaho lembe na lembe leswaku va ta rhumeriwa eswiavelweni swa vona swa le ntsungeni. Nakambe nkongomiso lowu nyikiwaka mavandlha yo tlula 10 000 ya Timbhoni ta Yehovha eUnited States wu huma eka yona ndhawu leyi. Marhavi yo tala emisaveni hinkwayo na wona ma ha ku engetela miako ya wona kumbe ma ha ri eku engeteleni. Ku endla mintirho leyi hinkwayo swi lava mali yo tala. Vanhu va vutisa “Xana mali yi huma kwihi?”

Nhlamulo hi leswaku yi huma eka vanhu lava tolovelekeke ku fana ni un’wana na un’wana wa hina. I vanhu lava nga emisaveni hinkwayo lava navelaka ku endla xin’wana ni xin’wana hi laha va nga kotaka ha kona leswaku va sekela ntirho wa nkoka wa Vukreste wo chumayela ni ku dyondzisa. Moya wo tano wo endla hi ku tirhandzela i khale wu ri kona.

Xikombiso Lexi Vekiweke Hi Israyele Wa Khale

Ku tlula 3 500 wa malembe lama hundzeke, ku ve ni xilaveko xa minyikelo yo tirhandzela. Yehovha u letele Muxe leswaku a aka tabernakele, kumbe “yindlu ya nhlengeletano,” leswaku yi ta tirhiseriwa vugandzeri bya Yena. Lunghiselelo leri ra Xikwembu a ri lava swilo swo tala swa nkoka. Yehovha u lerisile a ku: “Humesani ŝilo ŝa ṅwina leŝi mi ŝi nyikaka Yehova. E munhu uṅwana ni uṅwana l’a ŝi ranḍaka hi mbilu, o ta tisela Yehova e ku nyika ka yena.” (Eksoda 35:4-9) Xana vanhu va angule njhani? Mhaka yi hi byela leswaku “kutani munhu uṅwana ni uṅwana l’a tunḍušiweke hi mbilu ya yena, ni hikwav̌o la’v̌a ŝi ranḍeke, v̌a tisa le’ŝi v̌a ŝi nyikaka Yehova, ku ta tira ntiro wa Yindlu ya nhlengeletano, ni hikwaŝo ŝa ntiro wa yona, ni tinguv̌u le’ti hlawuriweke.” “Minyikelo leyi yo tirhandzela” yi andze hakatsongo-tsongo lerova yi ‘tlurisa leswi a swi laveka eka ntirho lowu Yehovha a a lerise leswaku wu endliwa.’ (Eksoda 35:21-29; 36:3-5) Mayana moya wo nyikela, wo pfumala vutianakanyi lowu vanhu va wu kombiseke!

Malembe lama nga hansi ka 500 endzhakunyana, ku tlhele ku va ni xilaveko xa minyikelo yo tirhandzela eka Vaisrayele. Ku navela ka hosi Davhida ko aka yindlu ya Yehovha eYeruselema a ku ta hetisisiwa hi n’wana wakwe Solomoni. Davhida hi yexe u hlengelete ni ku nyikela xiphemu lexikulu xa swilo leswi a swi ta laveka. Van’wana va hoxe xandla loko Davhida a endla xirhambo xo tisa “nyiko ya Yehovha.” Ku ve ni vuyelo byihi? “Tiko ri ṭakela e ku nyika ka v̌ona, hikuv̌a a v̌a humeserile Yehova e mihlengo hi timbilu hikwato ta v̌ona, na yena hosi Davida, a ṭaka hi ku ṭaka lo’kukulu.” (1 Tikronika 22:14; 29:3-9) Silivhere ni nsuku ntsena a swi ringana 180 wa magidi ya timiliyoni ta tirhandi hi mahlayelelo ya namuntlha!—2 Tikronika 5:1.

Ha swi xiya leswaku eka swikombiso leswi, a nga kona loyi a sindzisiwaka ku nyika. A yi ri minyikelo yo “tirhandzela” naswona a yi nyikeriwa hi “mbilu hinkwayo.” Yehovha a a ta tsakisiwa ntsena hi munyikelo wa mbilu hinkwayo. Hi laha ku fanaka, loko ku ve na xilaveko xo nyikela hi mali leswaku ku pfuniwa Vakreste lava pfumalaka, muapostola Pawulo u tsale leswaku a ku fanelanga ku va “hi ku vilela.” U engeterile: “Un’wana ni un’wana a a nyike hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.”—2 Vakorinto 9:5, 7.

Xilaveko Namuntlha

Xana ku ni xilaveko xa minyikelo namuntlha? Entiyisweni xi kona, naswona xi ta ya xi kula hi ku famba ka nkarhi. Hikwalaho ka yini?

Vakreste va nyikiwe swileriso leswi kongomeke enkarhini lowu wa makumu. Yesu u lerise vadyondzisiwa va yena a ku: “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.”—Matewu 28:19, 20.

Leswaku hi hetisisa ntirho lowu lowukulu wo dyondzisa ni ku chumayela tanihi leswi hi yaka hi tshinela eku chaputeni ka “makumu ya mafambiselo lawa ya swilo,” (NW) mali leyi eneleke ni nkarhi swa laveka. Hikwalaho ka yini? Hikwalaho ka leswi hinkwaswo swi katsekaka eku rhwaleni ka rungula ra Mfumo wa Xikwembu “ku ya fika emakun’wini ya misava.” (Mintirho 1:8) Vanhu vo tala a va ma tolovelanga Matsalwa hi laha Vayuda va lembe-xidzana ro sungula a va ri ha kona. Kahle-kahle, nhlayo leyikulu ya vaaki va misava a va yi tolovelanga Bibele naswona a va yi teki tanihi Rito ra Xikwembu. Vachumayeri va fanele ku leteriwa kutani va rhumeriwa ematikweni ya le kule. (Varhoma 10:13-15) Kutani anakanya hi nhlayo ya tindzimi leti nga kona! Lava va chumayeriwaka va fanele va va na Tibibele na tibuku leti sekeriweke eBibeleni leswaku va ti hlaya ni ku dyondza hi tindzimi ta vona vini. Leswaku hi fikelela vanhu hinkwavo hi ndlela leyi hlelekeke ni ku va endla va ya va wupfa emoyeni leswaku na vona va ta pfuna van’wana, swi lava ku hleleka lokukulu.—2 Timotiya 2:2.

Yesu u vule leswaku “Evhangeli leyi ya Mfumo” yi fanele ku rhanga yi “twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Kutani lowu i nkarhi wa ku va hi nyikela hinkwaswo leswi hi nga swi kotaka leswaku ntirho lowu wa nkoka wu endliwa. Rifuwo ra hina ri nga tirhisiwa kahle ku nga si fika nkarhi lowu ri nga ta ka ri nga ha pfuni nchumu.—Ezekiyele 7:19; Luka 16:9.

Xana Mali Yi Ya Kwihi?

Sosayiti ya Watch Tower yi humesa tibuku ta Bibele hi tindzimi to tlula 230, ni Tibuku ta lavo fe mahlo kun’we ni tivhidiyo leti nga ni ririmi ra mavoko ta lavo fe tindleve. Sweswo swi lava vahundzuluxeri ni vaxopaxopi va swihoxo swa ririmi rin’wana ni rin’wana. Anakanya ntsena hi ku endla ntirho lowu, ngopfu-ngopfu magazini wa Xihondzo xo Rindza, lowu humesiwaka n’hweti na n’hweti hi tindzimi ta 121 ni lowu humaka kambirhi hi n’hweti hi tindzimi ta 101, swa hlamarisa. Kambe swa fanela leswaku vanhu emisaveni hinkwayo va hlaya rungula leri fanaka. Lembe na lembe nxavo wa maphepha ni switirho swin’wana leswi tirhiseriwaka ku kandziyisa rungula ra Mfumo emaphepheni kumbe hi ku rhekhoda tikhasete ta thepi kumbe ta tivhidiyo swa tlakuka hi nxavo. Minxavo yo tano yi fanele ku hakeleriwa hi minyikelo leyi humaka eka vamakwerhu.

Ntirho lowu wo chumayela ni ku dyondzisa wu endliwa emasin’wini lama hlanganisiwaka hi mavandlha yo tlula 75 000 ya Timbhoni ta Yehovha emisaveni hinkwayo. Leswaku va va ni vun’we ni ku khutaziwa, valanguteri lava famba-fambaka lava leteriweke va endzela vandlha rin’wana ni rin’wana kambirhi hi lembe. Tinhlengeletano na tona ta pfuna swinene eku nyikeleni ka swiletelo. Miako leyikulu yi fanele ku hirhiwa leswaku ku khomeriwa mintsombano, leyi tiyisaka ripfumelo. Minyikelo ya n’wina na yona ya tirhisiwa eka swikongomelo leswi.

Hambi leswi hi ntolovelo tinhlengeletano ti khomiwaka kanharhu hi lembe, mavandlha ya kwalaho ma hlanganyela ntlhanu wa minhlangano vhiki na vhiki. (Ringanisa Eksoda 34:23, 24.) Ku khitikana ka lavantshwa lava amukelaka mahungu lamanene swi vula ku engeteleka ka magidi ya mavandlha lembe na lembe. Hi mpfuno wa timiliyoni ta tirhandi leti lombisiwaka hi Sosayiti, madzana ya Tiholo ta Mfumo ma akiwa lembe na lembe, naswona tin’wana to tala ta pfuxetiwa ni ku ndlandlamuxiwa. Hambi leswi leyi ku ngo va mali leyi rhendzelekaka, yi tirhisiwa hi ku phindha-phindha, loko xilaveko xi hambeta xi kula.

Ndhawu yin’wana laha ku veke ni ku andza loku nga languteriwangiki hi le matikweni ya Yuropa Vuxa lama a ma lawuriwa hi khale ka Soviet Union. Mayana ntsako lowu veke kona wa mahungu lama yaka emahlweni ya leswaku ntirho wu pfulekile ematikweni lawa! Sweswi varhumiwa va karhi va rhumeriwa eka yo tala ya matiko lawa. Marhavi lamantshwa ma akiwile ematikweni man’wana, leswi tlakusaka nhlayo ya vatirheli vo tirhandzela lava tlulaka 15 000 emakaya ya Bethele ya misava hinkwayo. Kavula, miako ya marhavi yo va rhurhela yi fanele ku xaviwa kumbe ku akiwa. Minyikelo ya wena yi pfuna ku fikelela xilaveko lexi.

Ntirho lowu hinkwawo wa karhi wa voniwa hi Sathana ni mademona yakwe. Va endla hi laha va nga kotaka ha kona ku herisa matshalatshala ya malandza yo tshembeka ya Yehovha kumbe ku va vangela swiphiqo. (Nhlavutelo 12:17) Leswi swi vula ndzhwalo lowu engetelekeke wa ku sirhelela timfanelo ta vanhu va Xikwembu, leswaku va chumayela ni ku hanya hi ku pfumelelana ni milawu ya xona leyo lulama. Tlhandlakambirhi, ku onhetela ka nyimpi emafambiselweni ya Sathana ya swilo, xikan’we ni timhangu ta ntumbuluko, swi vula leswaku mphalalo wa laveka nkarhi na nkarhi ku pfuna vamakwerhu va xinuna ni va xisati lava weriweke hi khombo ni van’wana lava nga na vona. Minyikelo ya wena yi pfuna ku phakela mphakelo lowu wa nkoka.

Yehovha U Ta Ku Hakela

Ku tirhisa nkarhi ni rifuwo ra hina hi malwandla leswaku hi tirha ntirho wa Hosi swi tisa mikateko leyikulu. Hi ndlela yihi? Hikuva Xikwembu lexi kahle-kahle swilo hinkwaswo swi nga swa xona, xi ta hi hakela. Swivuriso 11:25 yi ri: “L’a hananaka o ta nona, l’a tšheletaka o ta tšheletiwa na yena.” Hakunene Yehovha u tsakisiwa hi loko hi endla xiphemu xa hina ku yisa vugandzeri bya yena emahlweni. (Vaheveru 13:15, 16) U tshembise Vaisrayele va khale lava a va ta tisa minyikelo leyi a yi laveka ehansi ka ntwanano wa Nawu: “Mi nḍi ringa ha kona, ku vula Yehova wa mav̌andla, kutani mi ta v̌ona šana nḍi nga ka nḍi nga mi pfuleri mafester ya tilo, ndi v̌a nḍi mi tšhululela e ku kateka hi mpimo lo’wu tlurisaka!” (Malakiya 3:10) Ku humelela loku ka swilo swa moya loku malandza ya Yehovha ma ku tsakelaka namuntlha i vumbhoni bya leswaku Xikwembu xa xi hetisisa xitshembiso xa xona.

Ntirho lowu lowukulu wo huwelela siku ra ku ponisiwa eka hinkwavo ni ku pfuna vanhu va timbilu letinene ku ya endleleni ya vutomi a wu nga vi wa hi laha ku nga heriki. (Matewu 7:14; 2 Vakorinto 6:2) Kambe hinkwavo lava va “tinyimpfu tin’wana” ta Hosi va fanele ku hlengeletiwa. (Yohane 10:16) Vona ndlela leyi swi nga swa nkoka ha yona ku hlangavetana ni mphikamakaneta yoleyo namuntlha! Naswona mayana ndlela leyi un’wana ni un’wana wa hina a nga ta tsaka ha yona, loko a languta endzhaku a ri emisaveni leyintshwa yo lulama, ivi a ku, ‘ndzi ve ni xiphemu lexikulu entirhweni wolowo wo hetelela wa ku hlengeleta’!—2 Petro 3:13.

[Bokisi/Xifaniso lexi nga eka tluka 30, 31]

Ndlela Leyi Van’Wana Va Nyikelaka Ha Yona eNtirhweni Wo Chumayela Hi Mfumo

MINYIKELO ENTIRHWENI WA MISAVA HINKWAYO: Vo tala va vekela etlhelo kumbe va hlengeleta mali leyi va nga ta yi nghenisa emabokisini eHolweni ya Mfumo. N’hweti na n’hweti mavandlha ma rhumela minyikelo leyi hi ku kongoma e yindlu-nkulu eBrooklyn, New York, kumbe ehofisini ya rhavi ya le kusuhi.

TINYIKO: Minyikelo ya ku tirhandzela ya mali yi nga ha rhumeriwa hi ku kongoma eka Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, kumbe ehofisini ya rhavi ra Sosayiti leyi langutelaka tiko ra ka n’wina. Swin’wetsin’wetsi kumbe swilo swin’wana swa nkoka na swona swi nga ha nyikeriwa. Minyikelo yo tano yi fanele ku fambisana ni papila ro koma leri kombisaka leswaku i nyiko.

LUNGHISELELO RA MINYIKELO YA KU YA HI SWIYIMO: Mali yi nga nyikiwa Sosatiyiti ya Watch Tower leswaku yi yi hlayisa ku kondza loyi a yi nyikeleke a lova, swi endliwa hi lunghiselelo ra leswaku loko munhu wa kona a yi lava, yi ta tlheriseriwa eka yena.

NDZINDZA-KHOMBO: Sosayiti ya Watch Tower yi nga ha tsarisiwa tanihi leyi nga ta vuyeriwa eka fambiselo ra ndzindza-khombo wa vutomi kumbe eku kunguhateni ka ku tshika ntirho/mudende. Sosayiti yi fanele ku tivisiwa hi lunghiselelo rihi na rihi ro tano.

MALI LEYI LOMBISIWEKE: Mali leyi lombisiweke yi nga nyikeriwa eka Sosayiti ya Watch Tower tanihi munyikelo yi ri hinkwayo kumbe hi lunghiselelo ra leswaku ntswalo wa yona wu ta hamba wu nyikiwa munhu la yi nyikeleke.

PURASI: Purasi leri xavisiwaka ri nga ha nyikeriwa eka Sosayiti ya Watch Tower tanihi nyiko leyi heleleke kumbe hi ntwanano wa leswaku a ri nge tekiwi loko loyi a ri nyikeleke a ha tshama ka rona, a ha hanya. Munhu u fanele a tivisa Sosayiti a nga si nyikela ndhawu yo karhi eka Sosayiti.

SWIBOHO: Nhundzu kumbe mali swi nga ha nyikiwa Watch Tower Bible and Tract Society of Pennsylvania hi ku tirhisa xileriso xa mufi lexi nga enawini. Kopi ya xiboho xa mufi yi fanele yi rhumeriwa eka Sosayiti.

Leswaku u kuma rungula leri engetelekeke hi timhaka ta muxaka lowu, tsalela, Treasurer’s Office, Watch Tower Bible and Tract Society of Pennsylvania, Private Bag X2067, Krugersdorp, 1740 kumbe ehofisini ya rhavi ya Sosayiti leyi langutelaka tiko ra ka n’wina.