Mahanyelo Lama Vangamisaka Xikwembu

1. Ha yini Timbhoni ta Yehovha ti vonaka hi ku olova loko ti ri emintsombanweni ya miganga?

¹ Loko hi ri emintsombanweni ya miganga, vanhu va hi vona hi ku olova. Emadorobeni yo tala lawa ku khomeriwaka kona mintsombano, ku hangalasiwa mahungu lama tivisaka vaaka-tiko hi ta vukona bya hina. Hakanyingi tihotela ni switolo leswi xavisaka swakudya swa tala hi vapfhumba naswona vanhu lava tshama endhawini yoleyo va vona vaendzi vo tala va ambale tibeji ta ntsombano. Switsundzuxo leswi landzelaka swi ta hi pfuna leswaku hi vangamisa Xikwembu hi mahanyelo lamanene loko hi ri etindhawini ta ntsombano.—1 Pet. 2:12.

2. Xana hi nga xi vangamisa njhani Xikwembu hi maambalelo ya hina loko hi ri etindhawini ta mintsombano?

² Maambalelo Lamanene: Maambalelo ya hina lamanene loko hi ya entsombanweni, hakanyingi ma tsakisa vanhu lava hi vonaka. Hambiswiritano, ndlela leyi minkarhi yin’wana hi ambalaka ha yona loko hi ya ehotela, loko hi ri eku dyeni eswitolo leswi xavisaka swakudya, loko hi ya eku xaveni eswitolo ni kun’wana, i ya nkoka i ka lava hi languteke. Hambileswi hi nga ta ka hi nga ambali swiambalo leswi hi swi ambalaka entsombanweni kambe hi fanele hi ambala hi ndlela leyinene, leyi xiximekaka naswona ku nga ri leyi hundzeletiweke. Vanhu va fanele va vona ku hambana loko nga kona exikarhi ka hina ni vanhu lava nga riki timbhoni. (Rhom. 12:2) Ku engetela kwalaho, hi fanele hi vehela tibeji ta hina ta ntsombano tanihi leswi ti nga ta va ti kombisa leswaku hi te entsombanweni naswona ti ta hi pfulela ndlela yo chumayela ni ku endla leswaku vapfhumba van’wana va kota ku hi tiva.

3. Xana hi nga swi kotisa ku yini ku lehisa mbilu ni ku va ni xichavo?

³ Ku Lehisa Mbilu Ni Xichavo: Eka minkarhi leyi vanhu vo tala laha misaveni va nga ni vutianakanyi naswona va nga nkhensiki, vatirhi va le hotela ni le ka switolo swo xavisa swakudya va tsaka hi ku lehisa mbilu ni xichavo leswi hi swi kombisaka! (2 Tim. 3:1-5) Loko hi vekela vanhu van’wana switulu kumbe loko hi fole layini ya ku ya phaka tibuku letintshwa, a hi fanelanga hi tianakanyela kambe hi fanele hi anakanyela ni van’wana. (1 Kor. 10:23, 24) Endzhaku ko va a ye entsombanweni wo sungula, wanuna un’wana la tsakelaka u te: “A ndzi ti tsundzuki tinkulumo leti nyikeriweke hi siku rero, kambe mahanyelo ya Timbhoni ma ndzi tsakise ngopfu.”

4. Ha yini hi fanele hi pfuneta entsombanweni loko swiyimo swi hi pfumelela?

⁴ Vatirhi Vo Tirhandzela: Moya wa ku tinyiketela hi ku tirhandzela i mfungho wa Vakreste va ntiyiso. (Ps. 110:3) Xana u nga va mutirhi wo tirhandzela entsombanweni? Entsombanweni wun’wana, vamakwerhu va 600 va tinyiketerile eku basiseni ntsombano wu nga si sungula. Vatirhi va kwalaho va te: “Leswi i swilo leswi hlamarisaka leswi hi nga si tshamaka hi swi vona! A swi tshembisi leswaku vanhu lava hinkwavo i vatirhi vo tirhandzela.” Hi wu langutele hi mahlo-ngati ntsombano wa muganga wa 2013 ni nkarhi lowu hi nga ta va na wona ku nga ri wo yingisa ni ku dyondza eka Xikwembu ntsena kambe ni wo xi vangamisa.

[Bokisi leri nga eka matluka 3-6]

Switsundzuxo Swa Ntsombano Wa Muganga Wa 2013

◼ Minkarhi Ya Nongonoko: Vuyimbeleri lebyi tlangaka loko nongonoko wu nga si sungula byi ta sungula hi 9:00 nimixo masiku hamanharhu. Hi nkarhi wolowo, hinkwerhu hi fanele hi tshamiseka leswaku nongonoko wu ta sungula hi ndlela leyi xiximekaka. Risimu ro hetelela ni xikhongelo xo pfala swi ta va hi 4:30 nindzhenga hi Ravuntlhanu ni hi Mugqivela kasi hi Sonto swi ta va hi 3:15 nindzhenga.

◼ Ku Paka Timovha: Etindhawini hinkwato leti mintsombano yi nga ta khomeriwa eka tona, ku ta va ni ndhawu yo paka timovha mahala ya lava va nga ta va kona naswona swi ta ya hileswaku i mani loyi a rhangeke ku fika. Leswi hakanyingi ndhawu yo paka yi kayivelaka, swi ta va swinene leswaku mi famba hi movha wun’we loko swi koteka.

◼ Byetlelo: Fomo leyi vuriwaka Special Needs Room Request (CO-5) ya kumeka naswona vahuweleri lava lavaka byetlelo va nga tikumela yona. Komiti ya Ntirho ya Vandlha yi fanele yi kambisisa timfanelo ta muhuweleri hi ku tirhisa swiletelo leswi kumekaka eka fomo yoleyo ni papila ra December 14, 2010, leri tsaleriweke tihuvo hinkwato ta vakulu. Lunghiselelo leri i ra vahuweleri lava nga exiyin’weni lexinene swin’we ni vana va vona lava nga ni mahanyelo lamanene.

◼ Ku Vekela Van’wana Ndhawu Yo Tshama: Ndhawu yo tshama yi nga vekeriwa ntsena lava u tshamaka na vona ekaya kumbe lava u fambaka na vona hi movha kumbe swichudeni swa wena swa Bibele. Switulu swa lava dyuhaleke ni lava vabyaka a swi talanga, hikwalaho a swi nge koteki leswaku swirho hinkwaswo swa ndyangu swi tshama vona. Hi kombela leswaku ku tshama lava dyuhaleke ni lava vabyaka swin’we ni lava va va pfunaka.—1 Kor. 13:5.

◼ Swakudya Swa Ninhlikanhi: Hi kombela mi ta ni swakudya ematshan’weni yo suka endhawini ya ntsombano leswaku mi ya xava swakudya hi nkarhi wo wisa. Mi nga ha tirhisa nkwama lowutsongo wo endla leswaku swakudya swi nga hisi, lowu nga ringanaka ehansi ka xitulu. Minkwama leyikulu yo titimerisa swakudya yi fanele yi vekiwa laha varindzi va nga ta kongomisa leswaku yi vekiwa kona. Swibya leswi fayekaka ni swakunwa swa xihoko a swi pfumeleriwi endhawini ya ntsombano.

◼ Minyikelo: Hi kombisa leswaku ha ma tlangela matshalatshala yo lunghiselela ntsombano hi ku nyikela eka ntirho wa misava hinkwayo entsombanweni. Loko u nyikela hi cheke u fanele u yi kongomisa eka “Christian Congregation of Jehovah’s Witnesses.” Ku sukela lembe leri, mintsombano hinkwayo yi ta pfumela ku nyikela hi khadi ra swikweleti ku katsa ni mali swin’we ni cheke.

◼ Vutshunguri: Loko u kongomisiwe hi dokodela ku nwa mirhi yo karhi, hi kombela u titela na yona, tanihi leswi mirhi ya wena yi nga ta va yi nga ri kona entsombanweni. Vanhu lava tirhisaka tineleta kumbe swilo swin’wana swa vutshunguri, va fanele va swi cukumeta endhawini leyi faneleke loko va heta ku swi tirhisa kumbe endhawini leyi hlayisekeke.

◼ Tintangu: Lembe ni lembe ku va ni timhangu to tala leti vangiwaka hi tintangu. Hikwalaho, i swinene ku ambala tintangu leti xiximekaka, leti ku ringanaka kahle leswaku u kota ku famba kahle eswitepisini, endhawini leyi ehlelaka ni le tindhawini tin’wana to fana ni teto.

◼ Tipureme Ta Vana Ni Switulu Leswi Rhwalekaka: A swi fanelanga swi nghenisiwa eholweni ya ntsombano. Hambiswiritano, switulu swa vana swi nga pfumeleriwa ntsena loko swi ta va swi hlayisekile naswona swi vekiwe ekusuhi ni vatswari.

◼ Tiphefumu: Mintsombano yo tala yi khomeriwa etindhawini leti pfalekeke, laha moya wu kumekaka hi ku tirhisa michini ya moya. Kutani hi ta va hi kombisa rirhandzu loko hi papalata ku tirhisa tiphefumu leti nuhelaka ngopfu, leti nga ha endlaka leswaku van’wana swi va tikela ku hefemula kahle.—1 Kor. 10:24.

◼ Fomo Leyi Nge Please Follow Up (S-43): Tifomo leti ti fanele ti tirhisiwa ku tsala rungula ra mani na mani la tsakelaka, loyi a kumiweke loko hi ri karhi hi chumayela hi xitshuketa kumbe hi nkarhi wa ntsombano. Tifomo leti tsariweke vuxokoxoko bya kona ti fanele ti yisiwa eka Ndzawulo ya Tibuku kumbe mi ti nyika matsalana wa vandlha ra n’wina loko mi vuya entsombanweni.

◼ Tikhefi: Xixima vito ra Yehovha hi ku tikhoma hi ndlela leyinene loko u ri etikhefini. Ambala hi ndlela leyi kombisaka leswaku u Mukreste. Nkhensa vatirhi hi mali yo karhi loko swi tolovelekile endhawini yoleyo.

◼ Ntirho Wa Ku Tirhandzela: Munhu un’wana ni un’wana la tsakelaka ku pfuna entsombanweni u fanele a tivisa Ndzawulo ya Ntirho wa ku Tirhandzela. Vana lava nga ehansi ka malembe ya 16 va fanele va tirha ehansi ka nkongomiso wa vatswari kumbe muhlayisi kumbe munhu un’wana lonkulu loyi a komberiweke ku endla tano hi mutswari kumbe muhlayisi.