Masiku Manharhu Lawa Ha Wona Hi Nga Ta Phyuphyisiwa Hi Tlhelo Ra Moya
1. Xana hi ta vuyeriwa njhani eka ntsombano wa muganga wa lembe leri?
1 Etikweni leri vavuriweke hi tlhelo ra moya, ku nga misava ya Sathana, Yehovha u hambeta a phyuphyisa malandza yakwe. (Esa. 58:11) Lunghiselelo rin’wana leri Yehovha a ri tirhisaka leswaku a hi tiyisa i ntsombano wa muganga wa lembe ni lembe. Tanihi leswi ntsombano wa muganga wa lembe leri wu yaka wu tshinela, hi nga tilunghiselela njhani leswaku hi ta phyuphyisiwa hi tlhelo ra moya?—Swiv. 21:5.
2. Hi wahi malunghiselelo lawa hi faneleke hi ma endla?
2 Loko u nga si endla malunghiselelo, tinyike nkarhi wo hlela xiyimiso xa wena sweswi ni ku kombela entirhweni leswaku u va kona masiku hamanharhu ya ntsombano. Xana se wa swi tiva leswaku siku ni siku u ta famba nkarhi wo tanihi kwihi ku ya entsombanweni, leswaku u ta fika hi nkarhi naswona u kuma ndhawu yo tshama emahlweni ko va nongonoko wu sungula? A hi swi lavi ku kayela swakudya leswi swa moya leswi tiyisaka leswi Yehovha a hi lunghiseleleke swona! (Esa. 65:13, 14) Xana se u ma endlile malunghiselelo ya byetlelo ni swo famba ha swona?
3. Hi swihi swiringanyeto leswi nga ta hi pfuna swin’we ni mindyangu ya hina leswaku hi vuyeriwa hi xitalo hi nkarhi wa nongonoko?
3 I yini leswi nga ta ku pfuna leswaku u rhiya ndleve hi nkarhi wa nongonoko? Loko swi koteka, hatla u etlela hi masiku ya ntsombano. Languta xivulavuri. Pfula Bibele ya wena leswaku u fambisana ni xivulavuri. Tsala tinhla to koma. Mindyangu yi endla kahle loko yi tshama swin’we leswaku vatswari va ta pfuna vana va vona ku rhiya ndleve. (Swiv. 29:15) Kumbexana madyambu man’wana ni man’wana, mi nga ha bula hi tinhla-nkulu ta nongonoko tanihi ndyangu. Leswaku ndyangu wa wena wu ta hambeta wu phyuphyile hambi ku ri endzhaku ka ntsombano, u nga tirhisa nkarhi wa Vugandzeri bya Ndyangu leswaku mi kambisisa tinhla leti mi nga ta ti tirhisa.
4. Xana hi nga va pfuna njhani van’wana evandlheni ra hina leswaku na vona va phyuphyisiwa hi tlhelo ra moya?
4 Pfuna Van’wana Leswaku Va Phyuphyisiwa: Hi lava leswaku van’wana na vona va phyuphyisiwa hi tlhelo ra moya. Xana evandlheni ra n’wina ku ni vahuweleri lava dyuhaleke kumbe van’wana lava lavaka mpfuno leswaku va kota ku va kona entsombanweni? Xana u nga swi kota ku va pfuna? (1 Yoh. 3:17, 18) Vakulu, ngopfu-ngopfu valanguteri va mintlawa, va fanele va vona leswaku vahuweleri vo tano va kuma mpfuno lowu va wu lavaka.
5. Xana hi ta swi fambisa njhani swirhambo entsombanweni? (Nakambe vona bokisi leri nga laha henhla.)
5 Ku fana ni le nkarhini lowu hundzeke, loko ka ha sele mavhiki manharhu leswaku ntsombano wu sungula hi ta hlanganyela eka tsima ro rhamba vanhu leswaku na vona va va kona. Mavandlha ma fanele ma tivekela pakani yo fambisa swirhambo hinkwaswo leswi ma nga na swona ni ku tirha nsimu ya wona hinkwayo hilaha ma nga kotaka hakona. Hambiswiritano, loko ndyangu wa wena wu sale ni swirhambo loko tsima ri hela, hi kombela mi ta na swona entsombanweni leswaku swi ta tirhiseriwa ku rhamba vanhu lava hi va chumayelaka hi xitshuketa loko hi ri endhawini ya ntsombano. Ndlela leyi swirhambo sweswo swi nga ta fambisiwa ha yona yi ta tivisiwa entsombanweni hi Ravuntlhanu. Swirhambo leswi engetelekeke leswi ndyangu wa wena wu nga ta ka wu nga swi fambisi loko wu ri entsombanweni swi fanele swi nyikiwa varindzi loko mi nghena endhawini ya ntsombano. Hi kombela u siya xirhambo xin’we lexi u nga ta xi tirhisa eka nkulumo yo hetelela hi Sonto.
6. Hi tihi tindlela leti ha tona hi nga kombisaka mahanyelo lamanene loko hi ri entsombanweni?
6 Mahanyelo Lamanene Ma Phyuphyisa: Leswi vanhu vo tala va “tirhandzaka” naswona va nga riki na mhaka ni vanhu van’wana, hakunene swa phyuphyisa ku va ni Vakreste-kulorhi lava tikarhatelaka ku kombisa mahanyelo lamanene! (2 Tim. 3:2) Hi ta va hi kombisa mahanyelo lamanene loko hi nghena emuakweni hi ndlela leyinene loko wu pfuriwa hi awara ya nkombo nimixo naswona hi vekela swirho swa ndyangu ntsena ndhawu yo tshama kumbe lava hi fambaka na vona hi movha kumbe swichudeni swa hina swa Bibele. Hi fanele hi landzela nkongomiso wa mutshama-xitulu loko a hi kombela leswaku hi tshama ehansi ivi hi yingisela vuyimbeleri lebyi vaka kona loko nongonoko wu nga si sungula. Hi ta va hi kombisa mahanyelo lamanene loko hi tima tiselfoni kumbe swiciyoti swa hina leswaku swi nga kavanyeti van’wana hi nkarhi wa nongonoko. Nakambe hi ta va hi kombisa mahanyelo lamanene loko hi nga vulavuli, hi nga rhumelani marungula, hi nga dyi kumbe hi nga yi hala ni hala hi nkarhi wa nongonoko.
7. Hi nga ha phyuphyisiwa ni ku phyuphyisa van’wana hi ndlela yihi loko hi tihlanganisa ni vamakwerhu?
7 Vunakulobye Lebyi Phyuphyisaka: Mintsombano yi hi nyika nkarhi lowu engetelekeke wo tiphina hi vun’we ni vunakulobye bya Vukreste lebyi phyuphyisaka. (Ps. 133:1-3) Ha yini u nga vi wo rhanga ku va la ‘ndlandlamukaka’ hi ku va u tivana ni vamakwerhu lava nga kona vo huma emavandlheni man’wana? (2 Kor. 6:13) U nga ha tivekela pakani yo tiva munhu un’we kumbe ndyangu wun’we hi siku. Leswi u nga swi endla kahle hi nkarhi wo wisa. Kutani leswaku u tihlanganisa ni van’wana, tana ni swakudya leswaku u ta tiphina ha swona endhawini ya ntsombano ematshan’weni yo famba u ya xava swakudya kumbe u ya dya erhesiturente ya le kusuhi. Leswi swi nga ha endla leswaku u kuma vanghana lavantshwa lava u nga ta heta nkarhi wo leha na vona.
8. Ha yini hi fanele hi tirha hi ku tirhandzela entsombanweni naswona hi nga swi endla njhani sweswo?
8 Hakunene swa phyuphyisa ku tirha ni vagandzeri-kulorhi entirhweni wo kwetsima! Xana u nga tirha hi ku tirhandzela eka ndzawulo kumbe u pfuna vandlha ra n’wina eka xiavelo xa rona xo basisa? (Ps. 110:3) Loko u nga averiwanga ntirho, hi kombela u ya eka Ndzawulo ya Ntirho wa ku Tirhandzela entsombanweni. Loko vanhu va pfuneta va tele, swi endla leswaku ntirho wu tsakisa wu tlhela wu olova.
9. Ha yini hi fanele hi xiya ndlela leyi hi tikhomaka ha yona ni ku languteka ka hina hi nkarhi wa ntsombano?
9 Mahanyelo Ya Hina Ma Tsakisa Vanhu Lava Hi Vonaka: Eka masiku manharhu ya ntsombano, hi va hi ri vapfhumba va ntsombano, ku nga ri hi nkarhi wa nongonoko ntsena. Lava hi vonaka hi ri endhawini ya ntsombano va fanele va vona ku hambana loku nga kona exikarhi ka hina ni vanhu lava nga riki Timbhoni. (1 Pet. 2:12) Maambalelo ni ku tilunghisa ka hina loko hi ri entsombanweni, laha hi etlelaka kona ni le tirhesiturente swi fanele swi vangamisa Yehovha. (1 Tim. 2:9, 10) Loko hi vehela tibeji ta hina hi ta endla leswaku vanhu lava hi vonaka va kota ku vona leswaku hi Timbhoni ta Yehovha. Leswi swi nga hi nyika nkarhi wo va byela hi ta ntsombano wa hina ni ku va chumayela.
10. Xana hi nga swi endla njhani leswaku vatirhi va le hotela ni le rhesiturente va va ni langutelo lerinene hi ntsombano wa hina?
10 Xana hi nga tirhisana njhani ni vatirhi va le hotela ni le rhesiturente? A hi fanelanga hi buka makamara yo tala ya le hotela lawa hi nga ta ka hi nga ma tirhisi tanihi leswi swi nga ta endla leswaku vapfhumba van’wana va nga yi kumi ndhawu naswona swi nga endla leswaku hotela yi lahlekeriwa hi mali. Loko hotela yi ri bizi hi nkarhi lowu hi nghenaka ha wona ni lowu hi humaka ha wona, hi fanele hi lehisa mbilu naswona hi va ni nsovo. (Kol. 4:6) Hi fanele hi va nyika mali yo nkhensa vatirhi va le tirhesiturente ni va le hotela lava hi rhwalelaka tibege ta hina, lava hi basiselaka kamara ni ku hi endlela mintirho yin’wana.
11. Hi yihi mintokoto leyi kombisaka vuyelo lebyinene lebyi veke kona hikwalaho ka mahanyelo ya hina ya Vukreste?
11 Xana mahanyelo ya hina lamanene ma va khumba njhani van’wana hi nkarhi wa ntsombano? Hi ku ya hi phepha-hungu rin’wana, mininjhere wa muako lowu tirhiseriwaka ku khoma mintsombano u vule leswi: “Vanhu va kona va ni mahanyelo lamanene. Swa hi tsakisa ku va na vona lembe ni lembe.” N’wexemu munhu un’wana la nga riki Mbhoni u lahlekeriwe hi xipachi xakwe ehotela leyi a yi ri ni vapfhumba va ntsombano. Loko xipachi xi yisiwa eka mininjhere wa hotela xi ri ni swilo hinkwaswo, mininjhere u byele n’wini wa xona a ku: “U ve ni nkateko hikuva Timbhoni ta Yehovha a ti ri ni ntsombano kwala kusuhi naswona hotela a yi tele hi tona. Kumbexana i nge u nga ha xi kumanga xipachi xa wena.”
12. Leswi ntsombano wu nga kwala nyongeni, i yini leswi hi faneleke hi tiyimisela ku swi endla naswona ha yini?
12 Mintsombano ya lembe leri yi kwala nyongeni. Sweswi ku endliwa matshalatshala ya leswaku xiyimiso ni ndhawu ya ntsombano swi va leswi phyuphyisaka. Tilunghiselele ku va kona masiku hamanharhu leswaku u ta twa leswi Yehovha ni nhlengeletano yakwe va ku lunghiseleleke swona. Tiyimisele ku endla leswaku mahanyelo ya wena lamanene ni mabulo ya wena lama tsakisaka swi va leswi phyuphyisaka eka van’wana. Kutani wena ni van’wana mi nga ha titwa hilaha mupfhumba un’wana wa lembe leri nga hundza a titweke hakona, loyi a tsaleke a ku: “A ndzi nge pfuki ndzi yi rivarile mintokoto yo tsakisa leyi ndzi veke na yona!”
[Marito lama tshahiweke exihlokweni lama nga eka tluka 4]
Ku fana ni le nkarhini lowu hundzeke, loko ka ha sele mavhiki manharhu leswaku ntsombano wu sungula hi ta hlanganyela eka tsima ro rhamba vanhu leswaku na vona va va kona
[Marito lama tshahiweke exihlokweni lama nga eka tluka 6]
Maambalelo ni ku tilunghisa ka hina loko hi ri entsombanweni, laha hi etlelaka kona ni le tirhesiturente swi fanele swi vangamisa Yehovha
[Marito lama tshahiweke exihlokweni lama nga eka tluka 7]
Tiyimisele ku endla leswaku mahanyelo ya wena lamanene ni mabulo ya wena lama tsakisaka swi va leswi phyuphyisaka eka van’wana
[Bokisi leri nga eka matluka 4]
Switsundzuxo Swa Ntsombano Wa Muganga Wa 2011
◼ Minkarhi Ya Nongonoko: Nongonoko wu ta sungula hi 9:00 nimixo masiku hamanharhu. Loko vuyimbeleri lebyi rhangelaka nongonoko byi sungula, hinkwerhu hi fanele hi tshamiseka leswaku nongonoko wu ta sungula hi ndlela leyi xiximekaka. Hi Ravuntlhanu nongonoko wu ta hela hi 4:15 nindzhenga, hi Mugqivela wu hela hi 4:30 nindzhenga kasi hi Sonto wu ta hela hi 3:05 nindzhenga.
◼ Ku Paka Timovha: Etindhawini hinkwato ta ntsombano leti rindziweke, timovha ti ta paka handle ko hakerisiwa naswona ndhawu yi ta kumiwa ntsena hi lava nga ta hatla va fika. Leswi hakanyingi ndhawu yo paka yi nga yitsongo, ematshan’weni ya leswaku munhu un’we kumbe vambirhi va famba hi movha va ri voxe, swa antswa leswaku va khandziyisana ni van’wana leswaku ku nga tali timovha.
◼ Byetlelo: Tifomo leti nge Special Needs Room Request (CO-5) ta kumeka loko vahuweleri va lava ku kombela byetlelo. Komiti ya Ntirho ya Vandlha yi fanele yi kambela timfanelo ta muhuweleri la endlaka xikombelo, yi tirhisa swiletelo leswi tsariweke eka fomo leyi ni le ka papila ra December 14, 2010, leri kongomisiweke eka tihuvo hinkwato ta vakulu. Lunghiselelo leri i ra vahuweleri lava tikhomeke kahle swin’we ni vana va vona.
◼ Ku Vekela Van’wana Vutshamo: Ndhawu yo tshama u nga yi vekela ntsena lava u fambaka na vona hi movha kumbe lava mi tshamaka muti wun’we swin’we ni lava u dyondzaka na vona Bibele.—1 Kor. 13:5.
◼ Swakudya Swa Ninhlikanhi: Hi kombela mi titela ni swakudya swa ninhlikanhi, ematshan’weni yo suka endhawini ya ntsombano mi ya xava swakudya hi nkarhi wo wisa. Mi nga ha tirhisa minkwama leyitsongo yo titimerisa swakudya leyi nga vekiwaka ehansi ka xitulu. Minkwama leyikulu yo titimerisa swakudya yo fana ni leyi rhwariwaka loko ku yiwa epikinikini, yi fanele yi vekiwa laha varindzi va nga ta vula leswaku yi vekiwa kona. Mabodlhela lama fayekaka ni swakunwa leswi nga ni xihoko, a swi pfumeleriwi endhawini ya ntsombano.
◼ Minyikelo: Hi nga kombisa leswaku ha ma tlangela matshalatshala lama nga endliwa leswaku hi va ni ntsombano hi ku nyikela eka bokisi ra ntirho wa misava hinkwayo eHolweni ya hina ya Mfumo kumbe entsombanweni. Loko u lava ku nyikela hi cheke, hi kombela u vutisa nomboro ya akhawunti eka Komiti ya Ntsombano. Etindhawini tin’wana ta mintsombano ku ta va ku ri ni michini leyi nga ta endla leswaku lava nga ni makhadi ya le bangi va kota nyikela ha wona. Hi kombela u tihlanganisa ni Komiti ya Ntsombano loko u lava ku tiva laha muchini lowu wu vekiweke kona.
◼ Timhangu Ni Swiyimo Swa Xihatla: Loko ku tshuka ku va ni loyi a lavaka vutshunguri bya xihatla entsombanweni, hi kombela a tivisa murindzi la nga ekusuhi na yena, kutani murindzi yoloye u ta tivisa va Ndzawulo ya Xilamulela-mhangu, leswaku vamakwerhu lava nga ni vuswikoti va vona leswaku va nga n’wi pfunisa ku yini.
◼ Mirhi: Loko ku ri hileswaku ku ni mirhi yo karhi leyi u yi tirhisaka, hi kombela u titela na yona entsombanweni tanihi leswi yi nga ta va yi nga ri kona.
◼ Tintangu: Lembe ni lembe ku va ni timhangu to tala leti vangiwaka hi tintangu leti ambariwaka. Kutani i swa nkoka ku ambala tintangu leti xiximekaka ni leti ku ringanaka kahle leswaku u kota ku famba kahle eswitepisini, endhawini leyi nga riki na switepisi ni le tindhawini tin’wana to fana ni teto.
◼ Ku Rhekhoda: Michini hinkwayo yo rhekhoda a yi fanelanga yi tlhomiwa eka fambiselo ra gezi kumbe ra mpfumawulo naswona loko u yi tirhisa u nga kavanyeti van’wana.
◼ Tipureme Ta Vana Ni Switulu Leswi Rhwalekaka: A swi fanelanga swi nghenisiwa eholweni leyi ntsombano wu nga ta khomeriwa eka yona. Kambe switulu swa vana leswi boheleriwaka ehenhla ka switulu leswi nga ekusuhi ni vatswari swa pfumeleriwa.
◼ Tiphefumu: Mintsombano yo tala yi khomeriwa etindhawini leti pfalekeke, laha moya wa kona hi wu kumaka hi ti-aircondition ntsena. Kutani hi ta va hi kombisa musa loko hi papalata ku tirhisa tiphefumu leti nuhelaka ngopfu, leti nga ha endlaka leswaku van’wana swi va tikela ku hefemula.—1 Kor. 10:24.
◼ Fomo Leyi Nge Please Follow Up (S-43): Tifomo leti ti fanele ti tirhisiwa ku tsala rungula ra mani na mani la tsakelaka, loyi a kumiweke loko hi ri karhi hi chumayela hi xitshuketa kumbe hi nkarhi wa ntsombano. Vahuweleri va fanele va ta ni fomo yin’we kumbe timbirhi entsombanweni. Tifomo leti tsariweke vuxokoxoko bya kona ti fanele ti yisiwa eka Ndzawulo ya Tibuku kumbe mi ti nyika matsalana wa vandlha ra ka n’wina loko mi vuya entsombanweni.—Vona Vutirheli Bya Hina Bya Mfumo bya November 2009, tl. 4.
◼ Tikhefi: Xixima vito ra Yehovha hi ku tikhoma hi ndlela leyinene loko u ri etikhefini. Etindhawini to tala swi tolovelekile leswaku u nkhensa vatirhi hi mali leyi nga riki ehansi ka tiphesente ta khume ku ya ka 15, hi ku ya hi leswi va ku endleleke swona.
◼ Ntirho Wa Ku Tirhandzela: Ntsako lowu hi wu kumaka loko hi ri entsombanweni wu nga va wukulu loko ho tinyiketela ku pfuneta eka mintirho yin’wana. (Mint. 20:35) Un’wana ni un’wana la tsakelaka ku pfuna u komberiwa ku ya eka Ndzawulo ya Ntirho wa ku Tirhandzela entsombanweni. Vana lava nga ehansi ka malembe ya 16 na vona va nga hoxa xandla hi ku tirha swin’we ni mutswari kumbe munhu lonkulu la nga ni vutihlamuleri.
◼ Tinsimu: Mavandlha ma nga ha tsakela ku titoloveta tinsimu leti nga ta yimbeleriwa entsombanweni ka ha ri ni nkarhi. Tinsimu ta Ravuntlhanu: 5, 18, 31, 30, 86 na 19. Tinsimu ta Mugqivela: 93, 40, 59, 24, 89 na 134. Tinsimu ta Sonto: 109, 99, 133, 69, 64 na 2.
[Bokisi leri nga eka tluka 5]
Xana Hi Ta Xi Fambisa Njhani Xirhambo?
Leswaku hi kota ku hlanganisa nsimu ya hina hinkwayo, hi fanele hi komisa xingheniso xa hina. Hi nga ha ku: “Xewani. Hi le ka tsima ra misava hinkwayo ro fambisa xirhambo lexi. Hi lexi xirhambo xa wena. Vuxokoxoko byo tala u ta byi kuma eka xona.” Xirhambo xi endliwe hi ndlela leyi nga ta koka rinoko ra vanhu, kutani xi nyike n’wini wa muti leswaku a vona leswi nga emahlweni ka xona. Vana la hisekaka. Loko u hlanganyela eka tsima leri hi mahelo-vhiki, u nga ha fambisa ni timagazini loko swi koteka.