Timagazini Ta Hina—Ti Endleriwe Ku Koka Rinoko Ra Vanhu Hinkwavo
1. Hlonga ro tshembeka ni ro tlhariha ri n’wi tekelela njhani muapostola Pawulo?
1 Hilaha muapostola Pawulo a pfumelelaneke ni swiyimo hakona leswaku a chumayela mahungu lamanene leswaku a kuma “vanhu va mixaka hinkwayo,” ntlawa wa hlonga ro tshembeka ni ro tlhariha wu tirhisa timagazini ta hina leswaku wu fikelela vanhu va tinxaka ni vukhongeri byo hambana-hambana. (1 Kor. 9:22, 23) Leswaku hi xi tirhisa hi ndlela leyinene Xihondzo xo Rindza ni Xalamuka! hi fanele hi twisisa hi tlhela hi tsundzuka vanhu lava tsaleriweke timagazini leti.
2. Xana Xalamuka! yi endleriwe ku koka rinoko eka vamani?
2 Xalamuka!: Xikongomelo xa magazini lowu i ku fikelela vanhu va muxaka lowu fanaka ni lowu muapostola Pawulo a vulavuleke ha wona loko a vulavula ni “vavanuna va Atena.” (Mint. 17:22) Vavanuna volavo a va nga tivi nchumu hi Vukreste naswona a va nga ma tivi Matsalwa. Hilaha ku fanaka, vanhu lava Xalamuka! leyi yi tsaleriweke vona a va na byona vutivi bya Bibele. Swi nga ha endleka leswaku a va tivi nchumu hi tidyondzo ta Vukreste, a va byi tshembi vukhongeri kumbe a va yi xiyi dyondzo ya nkoka leyi nga eBibeleni. Xikongomelo-nkulu xa Xalamuka! i ku khorwisa vahlayi va yona leswaku Xikwembu xa ntiyiso xi kona. Xikongomelo xin’wana xa magazini lowu i ku endla leswaku vahlayi va tshemba Bibele ni ku va pfuna ku twisisa leswaku Timbhoni ta Yehovha ti hambanile ni vukhongeri byin’wana.
3. Nkandziyiso ha wun’we wa Xihondzo xo Rindza wu tsaleriwe vamani?
3 Xihondzo xo Rindza: Vanhu lava tsaleriweke nkandziyiso wa vanhu hinkwavo wa Xihondzo xo Rindza va xi xixima Xikwembu swin’we ni Matsalwa. Va na byona vutivi bya Bibele kambe a va ti twisisi hi ku kongoma tidyondzo ta yona. Va fana ni vayingiseri lava Pawulo a kombeteleke eka vona tanihi lava “chavaka Xikwembu.” (Mint. 13:14-16) Nkandziyiso wa vandlha wa Xihondzo xo Rindza wu tsaleriwe ngopfu-ngopfu Timbhoni ta Yehovha. Pawulo a ehleketa leswaku lava va hlayaka mapapila yakwe a va tolovelane ni Matsalwa naswona a va ri ni vutivi lebyi kongomeke bya ntiyiso. (1 Kor. 1:1, 2) Hilaha ku fanaka, swihloko leswi nga eka nkandziyiso wa vandlha swi tsaleriwe lava taka eminhlanganweni ya hina ni lava tolovelaneke ni swiga leswi tirhisiwaka hi Timbhoni.
4. Ha yini hi fanele hi tolovelana ni nkandziyiso ha wun’we wa timagazini leti hi ti tirhisaka ensin’wini?
4 Hambileswi hi ntolovelo hi fambisaka timagazini timbirhi, hakanyingi hi vulavulela wun’we eka xingheniso xa hina. Hikokwalaho, tiendlele pakani yo tolovelana ni nkandziyiso ha wun’we. Kutani u ta kota ku endla leswaku ti koka rinoko ra vanhu lava u nga ta hlangana na vona.