Xihondzo Xo Rindza Ni Xalamuka!—Timagazini Leti Nga Enkarhini Leti Nga Ni Ntiyiso

‘U ndzi kutsurile, wena Yehovha Xikwembu xa ntiyiso.’—PISALEMA 31:5.

1, 2. (a) Makwerhu un’wana wa xisati u titwise ku yini hi leswi a swi hlayeke eka Xihondzo xo Rindza? (b) I swivutiso swihi leswi vutisiwaka malunghana ni timagazini ta hina?

MAKWERHU un’wana wa xisati la nga Mukreste u tsarile a ku: “Ndza mi tlangela swinene hikwalaho ka rungula lerinene ra xihloko xa Xihondzo xo Rindza lexi nge ‘U Nga Kuma Nchavelelo eMinkarhini Ya Gome.’a Tinhla to tala swinene leti mi ti andlaleke ti hlamusela mintlhaveko leyi mina ndzi hlangavetaneke na yona; swi vonaka onge xihloko lexi a a xi lo tsaleriwa mina hi ku kongoma. Loko ndzi xi hlaya ro sungula, mihloti a yi khapa-khapa ematihlweni ya mina. Swa tsakisa swinene ku vona leswaku u kona loyi a tivaka ndlela leyi ndzi titwaka ha yona! Swa ndzi tsakisa swinene leswi ndzi nga un’wana wa Timbhoni ta Yehovha. Ku hava kun’wana laha hi nga kumaka switshembiso swa vutomi lebyi nga heriki eParadeyisini ku nga ri khale, naswona sweswo swi tiyisa mimoya-xiviri ya hina sweswi! Ndza mi nkhensa. Ku dya i ku engeta.”

² Xana u tshama u titwa hi ndlela yoleyo? Xana u tshama u kuma swin’wana eka Xihondzo xo Rindza kumbe magazini lowu fambisanaka na xona wa Xalamuka! leswi onge a swi tsaleriwe wena hi ku hlawuleka? Ha yini timagazini ta hina ti khumba timbilu ta vanhu swonghasi? Hi nga va pfunisa ku yini van’wana leswaku va pfuneka eka rungula ra tona leri ponisaka vutomi?—1 Timotiya 4:16.

Timagazini Leti Yimelaka Ntiyiso

3. Timagazini ta Xihondzo xo Rindza na Xalamuka! ti khumbe timbilu ta vahlayi vo tala hi swivangelo swihi leswinene?

³ Yehovha i ‘Xikwembu xa ntiyiso.’ (Pisalema 31:5) Rito ra yena, Bibele, i buku ya ntiyiso. (Yohane 17:17) Vanhu va timbilu letinene va wu amukela ntiyiso. (Ringanisa Yohane 4:23, 24.) Xin’wana lexi nga endla leswaku timagazini ta Xihondzo xo Rindza na Xalamuka! ti khumba timbilu ta vahlayi va timiliyoni hi leswi ti nga timagazini leti tshembekaka ni leti nga ni ntiyiso. Kahle-kahle Xihondzo xo Rindza xi sungule ku humesiwa hikwalaho ka mphikamakaneta ya ku tshembeka ka ntiyiso wa Bibele.

4, 5. (a) Hi swihi swiyimo leswi vangeleke C. T. Russell ku humesa Xihondzo xo Rindza? (b) Magazini wa Xihondzo xo Rindza wu tirhisiwa njhani hi “nandza la tshembekaka, wo tlhariha”?

⁴ Hi 1876, Charles T. Russell u sungule ku tirhisana na Nelson H. Barbour wa le Rochester, eNew York. Russell u humese mali leswaku ku tlhela ku kandziyisiwa magazini wa vukhongeri wa Barbour lowu nge Herald of the Morning, lowu a wu kandziyisiwa nkarhi na nkarhi, laha Barbour a a ri muhleri-nkulu, kasi Russell a a ri xandla xa muhleri. Hambi swi ri tano, kwalomu ka lembe ni hafu endzhakunyana, Barbour u tsale xihloko lexi a xi kaneta ntikelo wa rifu ra Kreste tanihi nkutsulo enkandziyisweni wa Herald wa August 1878. Russell, loyi Barbour a a n’wi hundza hi malembe ya kwalomu ka 30, u hlamule hi ku tsala xihloko lexi a xi seketela nkutsulo eka nkandziyiso lowu landzeleke, laha a vuleke leswaku nkutsulo hi “yin’wana ya tidyondzo ta nkoka swinene eRitweni ra Xikwembu.” (Matewu 20:28) Endzhaku ko ringeta hi matimba leswaku a kombisana na Barbour hi Matsalwa, Russell u hetelele a bohe ku hambana hi ku helela na magazini wa Herald. Ku sukela eka nkandziyiso wa magazini wolowo wa June 1879, vito ra Russell a ra ha humelelanga tanihi xandla xa muhleri. Endzhaku ka n’hweti, Russell loyi a a ri ni malembe ya 27 hi vukhale u sungule ku humesa Zion’s Watch Tower and Herald of Christ’s Presence (lowu sweswi ku nga Xihondzo xo Rindza Xi Huwelela Mfumo Wa Yehovha), leyi ku sukela eku sunguleni yi seketeleke ntiyiso wa Matsalwa, tanihi nkutsulo.

⁵ Emalembeni ya 114 lama hundzeke, Xihondzo xo Rindza, xi tirhe hi matimba xi va xisirheleli xa ntiyiso ni dyondzo ya Bibele, tanihi gqweta ra vutlharhi. Hi ku famba ka nkarhi, xi tsakeriwe hi timiliyoni ta vahlayi lava tlangelaka. Xa ha wu seketela swinene nkutsulo. (Hi xikombiso, vona nkandziyiso wa February 15, 1991.) Naswona xa ha ri xitirho-nkulu xa “nandza la tshembekaka, wo tlhariha,” ni Huvo ya yena leyi Fumaka, xo twarisa Mfumo wa Yehovha lowu tlhomiweke ni ku hangalasa swakudya swa moya “hi nkarhi wa kona.”—Matewu 24:14, 45.

6, 7. Xikongomelo lexi boxiweke xa The Golden Age a xi ri xihi, naswona i yini lexi kombisaka leswaku vanhu lava anakanyaka va ri amukerile rungula ra yona?

⁶ Ku vuriwa yini hi magazini wa Xalamuka!? Ku sukela loko wu ve kona, magazini wa Xalamuka! na wona wu yimele ntiyiso. Tanihi leswi eku sunguleni a wu vitaniwa The Golden Age, xikongomelo xa ku humesiwa ka magazini lowu a ku ri leswaku wu hangalasiwa evanhwini. Malunghana ni xikongomelo xa wona, nkandziyiso wo sungula, wa October 1, 1919, wu te: “Xikongomelo xa wona i ku nyikela nhlamuselo ya ntiyiso ya xiendlakalo lexikulu xa namuntlha, ni ku kombisa vanhu lava anakanyaka, hi ku tirhisa vumbhoni lebyi tiyeke ni lebyi khorwisaka, leswaku nkarhi wa nkateko lowukulu ehenhla ka vanhu se wu tshinele, hinkwaswo swi hlamuseriwa hi ku landza vutlharhi bya Xikwembu.” Vanhu lava anakanyaka va ri amukerile rungula ra The Golden Age. Hi malembe yo hlayanyana, a wu hangalasiwa hi nhlayo leyikulu ku tlula Xihondzo xo Rindza.b

⁷ Hambi swi ri tano, xivangelo xa ku tsakeriwa ka timagazini ta Xihondzo xo Rindza na Xalamuka! a hi leswi ti hangalasaka tidyondzo ta ntiyiso ni ku nyikela nhlamuselo ya vuprofeta ya swiyimo swa misava ntsena. Ngopfu-ngopfu eka khume ra malembe kumbe makume mambirhi lama hundzeke, timagazini ta hina ti fikelele timbilu ta vanhu hi xivangelo xin’wana.

Swihloko Leswi Nga eNkarhini Leswi Khumbaka Vutomi Bya Vanhu

8. I ndzulamiso wihi wa vutsari lowu Yuda a wu endleke, a khutaza vahlayi vakwe ku lwisana ni nkucetelo wihi lowu a wu ri exikarhi ka vandlha?

⁸ Kwalomu ka malembe ya 30 endzhaku ka ku fa ni ku pfuxiwa ka Yesu Kreste, Yuda mutsari wa Bibele u langutane ni xiyimo lexi ntlhontlhaka. Vanhu va mahanyelo yo biha, lava hlongorisaka ku navela ka nyama va nghenile exikarhi ka Vakreste. Yuda a a lava ku tsalela Vakreste-kulobye malunghana ni dyondzo yo karhi—ku kutsuriwa loku Vakreste lava totiweke a va ri na kona hinkwavo. Ematshan’wini ya sweswo, hi ku kongomisiwa hi moya lowo kwetsima, u vone swi fanela ku khutaza vahlayi vakwe ku lwisana ni nkucetelo wo homboloka lowu nga kona evandlheni. (Yuda 3, 4, 19-23) Yuda u titwananise ni xiyimo lexi, kutani a nyikela ndzayo leyi nga enkarhini leyi fanekeleke swilaveko swa vamakwavo va Vakreste.

9. I yini lexi katsekaka eku humeseni ka swihloko leswi nga enkarhini swa timagazini ta hina?

⁹ Hi ku fanana, ku lunghiselela swihloko leswi nga enkarhini swa timagazini ta hina i vutihlamuleri lebyikulu. Minkarhi ya hundzuka, ni vanhu va hundzuka—leswi va swi lavaka ni leswi va swi tsakelaka a swa ha ri swona leswi a va swi lava khume ra malembe kumbe makume mambirhi lama hundzeke. Mulanguteri la famba-fambaka wa ha ku vula leswi landzelaka: “Loko ndzi va Mbhoni hi va-1950, ndlela leyi a hi dyondza Bibele ni vanhu a yi fambisana ni tidyondzo to karhi ntsena—a hi va dyondzisa ntiyiso malunghana ni Vunharhu-un’we, ndzilo wa tihele, moya-xiviri ni swin’wana. Kambe sweswi swi vonaka onge vanhu va ni swiphiqo swo tala swinene evuton’wini, lerova hi fanele hi va dyondzisa ndlela leyi va faneleke ku hanya ha yona.” Ha yini ke?

10. Ha yini swi nga fanelanga ku hi hlamarisa leswi ku veke ni ku nyanya ka vuhomboloki evuton’wini bya vanhu ku sukela hi 1914?

¹⁰ Malunghana ni ‘masiku ya makumu,’ Bibele yi vhumbhile yi ku: “Vanhu lavo biha ni vakanganyisi va ta ya emahlweni va nyanya ku biha, va ri karhi va xisa, na vona va xisiwa.” (2 Timotiya 3:1, 13) Kutani a swi fanelanga swi hi hlamarisa leswi ku veke ni ku nyanya ka vuhomboloki evuton’wini bya vanhu ku sukela loko nkarhi wa makumu wu sungula hi 1914. Sathana, loyi nkarhi wa yena lowu saleke wu komeke swinene, u humesa vukarhi byakwe ehenhla ka vanhu hi ndlela leyi nga ringanisiwiki. (Nhlavutelo 12:9, 12) Hikwalaho, mahanyelo ni misinya ya milawu ya mindyangu yi hambana swinene ni leswi a yi ri xiswona malembe ya 30 kumbe 40 ntsena lama hundzeke. Vanhu hi ntolovelo a va ha byi rhandzi vukhongeri hi laha a va byi rhandza ha kona eka makume ya malembe lama hundzeke. Vugevenga byi andzile swinene lerova vanhu va tisirhelela hi tindlela leti a ti nga tiviwi malembe ya 20 kumbe 30 lama hundzeke.—Matewu 24:12.

11. (a) I timhaka ta muxaka muni leti nga emianakanyweni ya vanhu, naswona ntlawa wa nandza lowo tshembeka ni wa vutlharhi u angule njhani eka swilaveko swa kona? (b) Nyika xikombiso xa xihloko xa Xihondzo xo Rindza kumbe Xalamuka! lexi khumbeke vutomi bya wena.

¹¹ Kutani a swi hlamarisi leswi vanhu vo tala va anakanyaka ngopfu hi timhaka ta mintlhaveko, ntshamisano ni ta ndyangu. Ntlawa wa nandza la tshembekaka ni wa vutlharhi wu angule hi xivindzi eka Xihondzo xo Rindza na Xalamuka! hi ku humesa swihloko leswi nga enkarhini leswi hlangavetaneke ni swilaveko swa xiviri swa vanhu, ni leswi khumbeke vutomi bya vona swinene. Xiya swikombiso swin’wana.

12. (a) Ha yini swihloko leswi vulavulaka hi mindyangu ya mutswari un’we swi lunghiseleriwile leswaku swi nghena eka Xihondzo xo Rindza hi 1980? (b) Makwerhu un’wana wa xisati u yi phofule njhani ndlela leyi a swi tlangeleke ha yona swihloko leswi a swi vulavula hi mindyangu ya mutswari un’we?

¹² Timhaka ta ndyangu. Loko swiviko emisaveni hinkwayo swi kombisa ku engeteleka lokukulu ka nhlayo ya mindyangu ya mutswari un’we, swihloko swo sungula ehenhleni ka nhloko-mhaka leyi nge “Mindyangu Ya Mutswari Un’we—Yi Lwa Ni Swirhalanganya” swi humesiwile enkandziyisweni wa Xihondzo xo Rindza xa March 1, 1981. Swihloko leswi a swi ri ni swikongomelo swimbirhi: (1) ku pfuna vatswari lava nga hava munghana wa vukati leswaku va hlangavetana ni swiphiqo leswikulu leswi va langutaneke na swona, na (2) ku pfuna van’wana ku kuma vutivi byo antswa leswaku va kombisa ‘ntwela-vusiwana’ ni ku ‘hlayisa’ mindyangu ya mutswari un’we hi moya lowunene. (1 Petro 3:8; Yakobo 1:27) Vahlayi vo tala va tsarile va tlangela swihloko leswi. Mutswari un’wana la nga riki na munghana wa vukati u tsarile a ku: “Entiyisweni ndzi hume mihloti loko ndzi vona xifunengeto, naswona loko ndzi pfula magazini, ndzi hlaya rungula ra wona, ndzi n’wi tlangerile swinene Yehovha hikwalaho ko lunghiselela rungula ro tano hi nkarhi lowu faneleke.”

13. Hi rihi bulo leri nyikeriweke hi vuenti malunghana ni gome, leri humesiweke eka Xalamuka! hi 1981, naswona muhlayi un’wana u te yini?

¹³ Timhaka ta mintlhaveko. Mhaka ya gome yi hlamuseriwile eka Xihondzo xo Rindza na Xalamuka! ku sukela hi va-1960. (1 Vatesalonika 5:14) Kambe langutelo lerintshwa ni lerinene eka mhaka leyi ri kombisiwile eka nxaxamelo wa nhloko-mhaka ya xifunengeto leyi nge “U Nga Lwisana Na Rona Gome!” eka Awake! ya September 8, 1981. Mapapila yo tlangela ya fike hi xitalo eka Sosayiti ya Watch Tower, ma huma emisaveni hinkwayo. Makwerhu un’wana wa xisati u tsarile a ku: “Xana ndzi nga swi kotisa ku yini ku phofula mintlhaveko ya mbilu ya mina hi ku tsala? Ndzi ni malembe ya 24 hi vukhale, naswona a ndzi tshamela ku va ni gome hi malembe ya khume lama hundzeke. Kambe sweswi ndzi titwa ndzi ri kusuhi swinene na Yehovha, naswona ndza n’wi tlangela swinene leswi a hlamuleke swilaveko swa vanhu lava nga ni gome hi ku tirhisa swihloko leswi swi chavelelaka, kutani hi sweswo leswi a ndzi lava ku mi byela swona.”

14, 15. (a) Mhaka ya ku pfinyiwa ka vana hi maxaka ya le kusuhi yi hlamuseriwe njhani eka timagazini ta hina? (b) Hi swihi swihloko swa magazini leswi khumbeke mugadi wa tihanci le Australia?

¹⁴ Timhaka ta ntshamisano. Bibele yi vhumbhe leswaku “emasikwini ya makumu,” vanhu a va ta va “lava tirhandzaka, . . . vanhu va tihanyi, . . . lava nga tikotiki, lavo leva, lava vengaka leswo lulama.” (2 Timotiya 3:1-3) Hikwalaho, a swi fanelanga swi hi hlamarisa leswi ku pfinyiwa ka vana hi maxaka ya le kusuhi swi andzeke ngopfu namuntlha. Mhaka leyi yi hlamuseriwe hi ku kongoma eka xihloko lexi nge “Mpfuno Eka Lava Va Pfinyiweke Hi Maxaka Ya Le Kusuhi” eka The Watchtower ya October 1, 1983. Malembe ya nhungu endzhaku ka kwalaho, nxaxamelo wa nhloko-mhaka ya xifunengeto leyi nge “Ku Horisa Timbanga Ta Vana Lava Pfinyiweke Hi Maxaka Ya Le Kusuhi” eka Awake! ya October 8, 1991 wu hleriwe hi vukheta leswaku wu pfuna vahlaseriwa ku twisisa xiyimo lexi va nga eka xona ni ku va nyika ntshembo, kun’we ni ku hlamusela van’wana leswaku va kota ku pfuna vahlaseriwa hi ndlela leyi humelelaka. Nxaxamelo wa swihloko leswi wu endle leswaku vahlayi va hina va hi tsalela swinene ku tlula ematin’wini hinkwawo ya timagazini ta hina. Muhlayi un’wana u tsarile a ku: “Lexi ndzi pfuneke swinene ku hlakarhela a ku ri mianakanyo leyi tiyisaka ni tinhlamuselo ta Matsalwa leti nga eswihlokweni leswi. Ku tiva leswaku Yehovha a a nga ndzi honisi swi ndzi chavelerile swinene. Swin’wana leswi ndzi chaveleleke i ku tiva leswaku a hi mina ntsena.”

¹⁵ Mugadi wa tihanci le Melbourne, eAustralia, u be riqingho a ri ekule swinene, a ri kongomisa eka hofisi ya rhavi ra Sosayiti ya Watch Tower le Sydney, a hlamusela ndlela leyi a nga karhateka ha yona hi xiyimo xa rivala ra mphikizano wa tihanci. U vule leswaku wa ha ku hlaya Xalamuka! ya March 8, 1993, leyi nge “Ku Pfinya—Khombo Leri Vavasati Va Langutaneke Na Rona,” naswona a a nga swi tivi leswaku ku na timagazini to tano ta nkoka. U vutise swivutiso hi nkarhi wa kwalomu ka 30 wa timinete naswona u tlangerile tinhlamulo leti a ti tweke ti nyikeriwa.

16. U nga swi kombisa hi tindlela tihi leswaku wa ti tlangela timagazini ta hina?

¹⁶ Wena ke? Xana vutomi bya wena byi khumbiwile hi xihloko xo karhi lexi humesiweke eka Xihondzo xo Rindza kumbe Xalamuka!? Loko swi ri tano, handle ko kanakana mbilu ya wena ya ti tlangela swinene timagazini ta hina. Xana u nga swi kombisa njhani leswaku wa ti tlangela? U nga swi kombisa hi ku tihlayela nkandziyiso wun’wana ni wun’wana. Nakambe u nga hlanganyela hi ku hangalasa timagazini leti ta risima hi laha u nga kotaka ha kona. Xana leswi swi nga endlisiwa ku yini ke?

Ti Fambisele Van’wana!

17. Mavandlha ma nga endla yini leswaku ma engetela nhlayo ya timagazini leti hangalasiwaka?

¹⁷ Xo sungula, ku ni xo karhi lexi vandlha rin’wana ni rin’wana ri nga xi endlaka. Nkandziyiso wa October 1952 wa Informant (leyi sweswi ku nga Vutirheli Bya Hina Bya Mfumo) wu te: “Ndlela leyi humelelaka swinene eku hangalaseni ka timagazini i ku famba hi yindlu na yindlu ni xitolo hi xitolo. Kutani Sosayiti yi khutaza leswaku tindlela leti ta ku hangalasa timagazini ti va xiphemu xa nkarhi na nkarhi xa ntirho wa Siku ra Timagazini.” Xitsundzuxo xexo xa ha tirha ni namuntlha. Mavandlha ma nga hlela Siku ra Timagazini nkarhi na nkarhi, ku nga siku leri hlawuleriweke ku nyikela vumbhoni ngopfu-ngopfu hi timagazini. Eka mavandlha yo tala, Migqivela yo karhi yi ta va yi fanerile hakunene. Ina, vandlha rin’wana ni rin’wana a ri hlele masiku kumbe madyambu yo hlawuleka yo nyikela vumbhoni hi timagazini—hi yindlu na yindlu, hi xitolo hi xitolo, eswitarateni, kumbe hi ku tirhisa ntila wa timagazini. Tlhandla-kambirhi, xana wena muhuweleri wa Mfumo u nga endla yini leswaku u pfuna ku tlakusa nhlayo ya timagazini leti hangalasiwaka?

18, 19. (a) Ku ngheniwa hi Xihondzo xo Rindza na Xalamuka! engatini swi nga ku pfuna njhani ku fambisa timagazini? (b) Rungula ro koma, leri baka nhloko ya mhaka ri pfuna yini loko u nyikela timagazini? (c) I yini lexi kombaka nkoka wa ku siya timagazini emakaya ya vanhu?

¹⁸ Goza ro sungula i ku ngheniwa hi “Xihondzo xo Rindza” na “Xalamuka!” engatini. Hlaya timagazini ka ha ri na nkarhi. Loko u hlaya xihloko xin’wana ni xin’wana, tivutise, ‘Xana xihloko lexi xi fanele vanhu va njhani?’ Anakanya hi marito ma nga ri mangani lawa u nga ma vulaka leswaku u endla munhu a tsakela xihloko xexo. Ku engetela eku seketeleni ka wena Siku ra Timagazini nkarhi na nkarhi, ha yini u nga fambi ni tikopi ta timagazini leswaku u ta tirhisa nkarhi wihi ni wihi lowu ku pfulekelaka wo ti fambisela van’wana—loko u teka riendzo kumbe u ya eku xaveni, ni loko u vulavula ni vatirhi-kuloni, vaakelani, lava u dyondzaka na vona xikolo kumbe mathicara?

¹⁹ Xiringanyeto xa vumbirhi hi leswaku olovisa rungula ra wena. The Watchtower ya December 1, 1956 yi te: “Rungula ro koma, leri baka nhloko ya mhaka ra antswa swinene loko u nyikela timagazini. Xikongomelo xa kona i ku fambisa tikopi to tala. Tona ti ta ‘tivulavulela.’” Vahuweleri van’wana va swi kume swi humelela ku tshaha mhaka yin’we exihlokweni, va yi veka hi marito ma nga ri mangani, kutani va nyikela timagazini. Loko timagazini ti amukeriwile ekaya, ti nga “vulavula” ni van’wana, handle ka munhu loyi a ti tekeke eka wena. Le Ireland, nhwanyana un’wana loyi a nga xichudeni xa le yunivhesiti u hlaye nkandziyiso wa Xihondzo xo Rindza xa September 1, 1991, lowu tata wakwe a wu kumeke eka Mbhoni. Swihloko leswi vulavulaka hi ku vulavurisana ni timhaka tin’wana swi pfuxe ku tsakela kakwe. Loko a heta ku hlaya magazini lowu, u hatlise a bela Timbhoni riqingho, a tirhisa nomboro leyi kombisiweke ebukwini ya tiqingho. Hi ku hatlisa ku sunguriwe dyondzo ya Bibele, kutani nhwanyana loyi u khuvuriwile eka Ntsombano wa Muganga wa “Dyondzo Ya Xikwembu” hi July 1993. A hi ringeteni hi tindlela hinkwato ku siya timagazini emakaya, laha ti nga “vulavulaka” na vanhu! Mulanguteri la famba-fambaka u nyikele xiringanyeto xin’wana xo olova: “Humesa timagazini enkwameni wa wena.” Kunene, loko leswi u swi vulaka swi nga pfuxi ku tsakela ka n’wini wa muti, kumbexana swifaniso swa swifunengeto swa timagazini leswi kokaka mahlo swi nga ku fambisela tona.

20, 21. (a) U nga pfumelelana njhani ni swiyimo loko u hlanganyela entirhweni wo fambisa timagazini? (b) U nga endla yini leswaku u fambisa timagazini leti engetelekeke n’hweti na n’hweti?

²⁰ Xiringanyeto xa vunharhu i ku pfumelelana ni swiyimo. (Ringanisa 1 Vakorinto 9:19-23.) Lunghiselela tindlela ti nga ri tingani to koma to nyikela timagazini. Xi tive kahle xihloko xo karhi lexi nga ta tsakisa vavanuna, kun’we ni xin’wana lexi nga ta tsakisa vavasati. Vantshwa u nga va kombisa xihloko xa “Vantshwa Va Vutisa. . . .” Nakambe pfumelelana ni swiyimo loko u hlanganyela entirhweni wa timagazini. Ku tlhandlekela eka Siku ra Timagazini, u nga kuma leswaku ku veka vumbhoni ni madyambu swi pfula ndlela leyinene yo nyikela timagazini hi yindlu na yindlu.

²¹ Xiringanyeto xa vumune i ku tivekela pakani ya munhu hi xiyexe. Xiengetelo lexi a xi ku “Timagazini Ti Kombisa Ndlela Leyi Yisaka eVuton’wini,” lexi humeleleke eka Our Kingdom Ministry ya May 1984, xi te: “Vahuweleri kumbexana va nga tivekela pakani yo fambisa timagazini ta 10 hi n’hweti, hi ku ya hi swiyimo swa vona; maphayona ma nga lwela ku fambisa 90. Kavula, vahuweleri van’wana va nga swi kota ku fambisa timagazini leti engetelekeke hi n’hweti, xisweswo va nga tivekela pakani ya vona yo fambisa timagazini to tala. Hambi swi ri tano, hikwalaho ka rihanyo leri tsaneke, muxaka wa nsimu, kumbe swivangelo swin’wana leswi twalaka, tipakani ta van’wana ti nga ha va ehansi. Kambe ntirho lowu va wu endlelaka Yehovha wa amukeriwa swinene. (Mt. 13:23; Lk. 21:3, 4) Nchumu wa nkoka i ku va ni pakani ya munhu hi xiyexe.”

22. Hi nga swi kombisa hi tindlela tihi leswaku ha n’wi nkhensa Yehovha hikwalaho ka timagazini ta hina leti nga enkarhini leti nga ni ntiyiso?

²² Ha tlangela swonghasi leswi Yehovha, ‘Xikwembu xa ntiyiso,’ a tirhiseke ntlawa wa nandza wo tshembeka ni wa vutlharhi kun’we ni Huvo yakwe leyi Fumaka ku hi lunghiselela timagazini leti ti nga enkarhini! (Pisalema 31:5) Loko Yehovha a swi rhandza, timagazini leti ti ta hambeta ti hlangavetana ni swilaveko swa xiviri swa vanhu. Ti ta hambeta ti seketela mimpimanyeto ya Yehovha ya mahanyelo leyi tlakukeke. A ti nge tshiki ku seketela dyondzo ya ntiyiso. Naswona ti ta phikelela ti yisa nyingiso eku hetisekeni ka vuprofeta lebyi funghaka masiku ya hina tanihi nkarhi lowu Mfumo wa Xikwembu wu fumaka ha wona, ni lowu ku rhandza ka Xikwembu ku endliwaka ha yona emisaveni ku tlula rini na rini hi vunyingi lebyi engetelekaka bya vagandzeri va Yehovha va ntiyiso. (Matewu 6:10; Nhlavutelo 11:15) Xihondzo xo Rindza na Xalamuka! swi hi khomele rifuwo ra risima swonghasi! A hi tirhiseni nkarhi wihi na wihi lowu hi pfulekelaka hi fambisela vanhu va timbilu letinene timagazini leti ta nkoka leti khumbaka vutomi bya vanhu, ni leti seketelaka ntiyiso wa Mfumo hi ku hlawuleka.

[Tinhlamuselo ta le hansi]

Nhlamulo Ya Wena Yi Ri Yini Ke?

◻ I yini lexi kombisaka leswaku Xihondzo xo Rindza na Xalamuka! i timagazini leti nga ni ntiyiso?

◻ Timagazini ta Xihondzo xo Rindza na Xalamuka! ti byi khumbe njhani vutomi bya vanhu?

◻ Mavandlha ma nga endla yini leswaku ma engetela nhlayo ya timagazini leti hangalasiwaka?

◻ I swiringanyeto swihi leswi nga ku pfunaka ku fambisa timagazini leti engetelekeke?

[Bokisi leri nga eka tluka 22]

Swihloko Swin’wana Leswi Khumbeke Vutomi Bya Vanhu

Hi malembe layo tala, vahlayi vo tala va tsale mapapila va phofula ku tlangela ka vona swihloko swo karhi leswi humesiweke eka Xihondzo xo Rindza na Xalamuka! Laha hansi ku xaxametiwe ti nga ri tingani ta tinhloko-mhaka to tala leti khumbeke vahlayi va hina. Xana swihloko leswi kumbe swin’wana swi byi cincile vutomi bya wena?

Xihondzo xo Rindza

“Amukela Mpfuno Wa Xikwembu Wo Hlula Swihoxo Swa Xihundla” (April 1, 1985)

“Ku Tirhisa Vukhongeri Eka Vatswari Lava Dyuhaleke” (June 1, 1987)

“Dyondzo Leyi Nga Ni Xikongomelo” (November 1, 1992)

Xalamuka!

“U Nga Lwisana Na Rona Gome!” (Awake! ya September 8, 1981)

“Loko Murhandziwa Wa Wena A Fa . . .” (Awake! ya April 22, 1985)

“Sirhelela Vana Va Wena!” (October 8, 1993)

[Xifaniso lexi nga eka tluka 23]

Le Canada—ku chumayela hi yindlu na yindlu hi timagazini

[Xifaniso lexi nga eka tluka 24]

Le Myanmar—ku nyikela timagazini leti kombisaka ndlela ya vutomi