Xana Wa Ti Hlaya Timagazini?

¹ Mpatswa wun’wana wa varhumiwa laha Afrika wu hi byela leswi landzelaka malunghana ni timagazini ta hina: “Xihondzo xo Rindza xi hi pfuna ku tshama hi hitekile emoyeni ensin’wini ya ka hina. Hi kuma xikhutazo ni matimba eka nkandziyiso wun’wana ni wun’wana.” Xana u kombisa ku tlangela timagazini ta hina hi ndlela leyi fanaka? Naswona xana u hisekela ku ti hlaya?

² Swi teka nkarhi wo tala ku tsala swihloko swa magazini leswi nga hlayiwaka hi timinete ti nga ri tingani ntsena. Leswi se u tivaka mhaka leyi, xana wa ha ta phendla-phendla swihloko, u nyanga swifaniso, kumbe minkarhi yin’wana u tihlayela swihloko leswi ku kokaka rinoko ntsena? Hi ta va hi tlharihile loko hi nga endli sweswo ntsena. Hi fanele hi tinyika nkarhi wa ku hlaya ni ku anakanyisisa hi swihloko hinkwaswo leswi nga enkandziyisweni wun’wana ni wun’wana wa timagazini ta hina. Xihondzo xo Rindza i magazini-nkulu wa hina wa swakudya swa moya leswi nga enkarhini. Xalamuka! yi ni swihloko leswi tsakisaka ni leswi nga ni mahungu hi tinhloko-mhaka to tala. Leswi hi swi dyondzaka loko hi hlaya timagazini leti a swi hi tiyisi emoyeni ntsena kambe swi tlhela swi hi lunghiselela ku hlanganyela hi xitalo evutirhelini. Loko hi ri vahlayi va nkarhi na nkarhi, hi ta hisekela ku fambisela van’wana timagazini leti.

³ Ndlela Yo Antswisa Mukhuva Wo Hlaya: Xana u nga antswisa mukhuva wa wena wo hlaya timagazini? Hi leswi swiringanyeto swimbirhi leswi tirhaka eka vo tala. (1) Vana ni xiyimiso xa nkarhi na nkarhi xa ku hlaya. Loko wo heta timinete ta 10 ku ya ka 15 ntsena siku na siku, u ta hlamarisiwa hi ku hlaya loku u nga ta va u ku endlile loko ku hela vhiki. (2) Titolovete ku fungha laha u nga hlaya u fika kona. Kumbexana u nga veka mfungho eku sunguleni ka xihloko xin’wana ni xin’wana lexi u xi hlayaka. Handle ko endla leswi, u nga ha hundza swihloko swin’wana u nga swi hlayanga kumbe hambi ku ri magazini hinkwawo. I swa nkoka ku simeka hlayelo leri ku olovelaka ivi u fambisana na rona.—Ringanisa Vafilipiya 3:16.

⁴ “Hlonga ro tshembeka ni ro tlhariha” hi vuxiya-xiya ri fambisana ni minkarhi leyi cincaka hi ku humesa swihloko leswi vulavulaka hi swilaveko swa xiviri swa vanhu. (Mat. 24:45) Entiyisweni, timagazini ti khumbe vutomi bya hina. Mukhuva lowu nhluvuko wa hina wa moya wu fambaka ha wona, wu lawuriwa hi ntikelo wa ku hlaya ka hina swilo swa le tilweni. Mikateko leyi fuweke ya moya yi hlayiseriwe lava tinyikaka nkarhi wa ku hlaya timagazini hinkwato.