Ku Tirhisa Kahle Xihondzo xo Rindza Ni Xalamuka!

¹ Xihondzo xo Rindza ni Xalamuka! i timagazini ta nkoka ni leti pfunaka swinene, leti vanhu va nga ti hlayaka namuntlha. Hikwalaho ka yini? Hikuva ntiyiso wa moya lowu ti wu tameleke wu nga va ni vuyelo lebyinene evuton’wini bya vanhu hi laha ku nga heriki. Hambi swi ri tano, lavanyingi a va na mhaka ngopfu ni xilaveko xa vona xa moya, kumbe a va ku tivi lomu va faneleke va ya kona leswaku va xi enerisa. I lunghelo ra hina ku tekelela muapostola Pawulo hi pfuna vanhu va pfula mahlo ya vona hi tlhelo ra moya.​​—⁠⁠Mt. 5:⁠3; Mint. 26:⁠18.

² Tiyiseka, U Lunghiselela Kahle: Kumbexana va kona vanhu lava fanaka ni tinyimpfu ensin’wini ya ka n’wina lava nga ta amukela ntiyiso. Van’wana va nga ha lava ntsena xikhutazo lexinene leswaku va hlaya timagazini. Hikwalaho, tiyiseka naswona u fikelela mbilu loko u fambisa Xihondzo xo Rindza ni Xalamuka! Tshama u ri ni timagazini naswona u tirhisa nkarhi wun’wana ni wun’wana u ti hangalasa, hambi loko u fambisa tibuku tin’wana.

³ I yini lexi nga hi endlaka hi humelela eku hangalaseni ka timagazini? Xo sungula, hina vini hi fanele hi xiya nkoka wa tona. Hi fanele hi tiva swihloko leswi nga eka timagazini leti hi ti fambisaka, kutani leswi swi ta tiyisa xivindzi xa hina ni ku hisekela ku ti fambisa. Tsundzuka mhaka leyi nkarhi hinkwawo loko u ti hlaya ro sungula. Xalamukela ku hlawula tinhla leti u nga ta ti kandziyisa evutirhelini. Tivutise: ‘Xana i mani loyi ngopfu-ngopfu a nga tsakisiwaka hi xihloko lexi? Xana xi nga tsakisa wansati wa muti, muntshwa kumbe n’wamabindzu ke? Xana yinhla leyi yi ta rhandziwa hi xichudeni, munhu la ngheneleke vukati, un’wana loyi a khumbekaka hi mbango?’ Leswaku hi humelela hakunene, hi fanele hi kota ku vulavulela timagazini hi vutivi bya hina ni ku tsakela swihloko swa tona leswi fikaka hi nkarhi.

⁴ Tirhisa Minkandziyiso Ya Khale Hi Ndlela Leyinene: Tsundzuka, Xihondzo xo Rindza ni Xalamuka! a ti heleriwi hi nkarhi, hambi loko ti nga fambisiwanga hi n’hweti yin’we kumbe timbirhi ta siku ra tona. Rungula leri ti ri tameleke a ri heleriwi hi matimba hi ku famba ka nkarhi naswona a hi fanelanga hi kanakana ku fambisa tikopi ta khale loko ta ha languteka. Ku tshika tikopi ta khale ti pakelana naswona hi nga ti tirhisi, swi komba ku pfumala ku tlangela switirho leswi swa nkoka. Magazini wun’wana ni wun’wana wu ni ntiyiso lowu nga kotaka ku pfuxa ni ku enerisa ku tsakela ka moya. Ematshan’wini yo veka minkandziyiso ya khale etlhelweni hi yi rivala, xana a swi nga ta antswa ku yi fambisela vanhu lava tsakelaka, kumbexana hi yi siya endhawini leyi sirhelelekeke loko vanhu va nga ri kona ekaya? U nga si swi endla sweswo nkarhi hinkwawo tiyiseka leswaku u tsale leswi “Kopi Ya Mahala.”

⁵ Magazini wa Xalamuka! wu pfune vanhu vo tala lava eku sunguleni a va nga swi rhandzi swilo swa moya leswaku va vona xilaveko xa vona xa moya. Xihondzo xo Rindza i xitirho lexikulu enongonokweni wa mphamelo wa moya wa vanhu va Yehovha. Timagazini leti ti fambelana khwatsi, naswona ti endla xiphemu xa nkoka eku chumayeleni ka mahungu lamanene.

⁶ Loko hi tirhisa nkarhi wihi na wihi hi fambisa timagazini, hi nga tiyiseka leswaku ti ta eneta swilaveko swa moya swa lava fanaka ni tinyimpfu hi ndlela leyi humelelaka. Hi lava ku hlayisa langutelo lerinene, hi lunghiselela kahle, ni ku tshama hi ri kona evutirhelini. Tanihi vahuweleri va mahungu lamanene, onge hinkwerhu ka hina hi nga tirhisa kahle timagazini ta Xihondzo xo Rindza ni Xalamuka!