Timagazini Ti Huwelela Mfumo

¹ Tanihi Timbhoni ta Yehovha, ha tiveka swinene hikwalaho ka ku chumayela ka hina hi Mfumo wa Xikwembu hi ku hiseka. Timagazini ta Xihondzo xo Rindza ni Xalamuka! leti hi ti hangalasaka ti endla ntirho lowukulu eku pfuneni ka vanhu va timiliyoni leswaku va dyondza swikongomelo swa Xikwembu. Rungula leri ti nga na rona i mahungu lamanene hakunene, hikuva ri huwelela Mfumo wa Xikwembu wa le tilweni tanihi ntshembo wu ri woxe wa vanhu.

² Timagazini ti vulavula hi swilaveko swa vanhu swa xiviri—mintlhaveko, ntshamisano ni swa moya. Tanihi leswi mimpimanyeto ya mahanyelo ni ya ndyangu yi hohlokaka emisaveni hinkwayo, timagazini ta Xihondzo xo Rindza ni Xalamuka! ti pfuna vanhu leswaku va antswisa ntikelo wa vutomi bya vona hi ku va kombisa ndlela yo tirhisa misinya ya milawu ya Bibele. Hi ta tsakela ku fambisa swikhokhelo swa timagazini leti hi April na May. Lomu swi kotekaka kona, fambisani Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi Xibunu, Xizulu, Xisuthu, Xixhosa ni Xitswana kun’we ni timagazini hi munyikelo wa R6,00.

³ Ta Tsakisa Hakunene: Timagazini ta Xihondzo xo Rindza ni Xalamuka! ta kumeka hi tindzimi ta kwalomu ka vaaki hinkwavo va misava. Hikwalaho ka leswi, timagazini ta hina ti tiviwa ngopfu. Hi leswi swivangelo swin’wana leswi endlaka vanhu va ti tsakela:

◼ Leswi ti nga timagazini leti tshembekaka ni ta ntiyiso, ti kombisa ku hambana ka leswinene ni leswo biha.

◼ Ti nyika ntshembo malunghana ni paradeyisi leyi taka yo lulama, leyi sekeriweke eka xitshembiso xa Xikwembu xa ku tisa misava ehansi ka vulawuri bya Mfumo wa xona.

◼ Ti khome timhaka to tala to hambana-hambana leti nga enkarhini, leti tsakisaka vanhu va swiyimo ni mindhavuko hinkwayo.

◼ Swihloko swa tona swi ba nhloko ya mhaka, swa dyondzisa, swi ni tinhla naswona a hi swa xihlawuhlawu kumbe ku hundzeleta.

◼ Swifaniso leswi kokaka mahlo swi pfuxa ku tsakela lokukulu, naswona matsalelo lamanene ma endla leswaku timagazini leti ti hlayeka hi ku olova.

⁴ Ti Hangalase Swinene: Ku hangalasa timagazini hi ndlela leyi humelelaka swi titshege ngopfu hi ku tikarhatela ka hina ku lunghiselela swingheniso, hi veka nkarhi, ni ku hlela ntirho wa hina wo chumayela. Swiringanyeto leswi pfunaka swi hlamuseriwe eka minkandziyiso ya Vutirheli Bya Hina Bya Mfumo bya September 1995 ni bya October 1996, i swinene ku va hi swi pfuxeta ni ku swi tirhisa.

⁵ Titolovete Timagazini: Loko u hlaya nkandziyiso wun’wana ni wun’wana, anakanya hi munhu loyi a nga tsakelaka ku tikumela kopi ya wona. Languta tinhla leti pakanisaka kumbe matsalwa lawa u nga ta ma tshaha eka xingheniso xa wena. Anakanya hi xivutiso lexi u nga ta xi vutisa leswaku u sungula bulo ra wena ni ku endla leswaku mhaka yi tsakisa.

⁶ Pfumelelanisa Xingheniso Xa Wena Ni Munhu Loyi: Lunghiselela xingheniso xo olova, lexi cincekaka lexi u nga ta xi tirhisa loko u vulavula ni wanuna, wansati kumbe munhu lonkulu, muntshwa, hambiloko u n’wi toloverile kumbe a ri xitaxifamba.

⁷ Fambisa Xihondzo xo Rindza Ni Xalamuka!: Leswi timagazini ti nghenaka hi ku olova enkwameni, exibekanini kumbe exikhwameni, hi nga famba na tona loko hi ri eriendzweni kumbe eku xaveni. Ti fambise loko u vulavula ni maxaka, vaakelani, vatirhi-kuloni, lava u dyondzaka na vona xikolo kumbe vadyondzisi. Vhiki rin’wana ni rin’wana tivekele siku ra ku nyikela vumbhoni hi timagazini.

⁸ Kombisa Ku Tlangela Timagazini: A ti hundzeriwi hi nkarhi. Rungula leri nga eka timagazini ra ha ri na nkoka hambiloko ti ri ta khale. Kavula, loko hi tikarhatela ku fambisa timagazini hinkwato leti hi ti kumaka, a hi nge vi na minkandziyiso ya khale emakaya ya hina.

⁹ Ku Nyikela Vumbhoni eXitarateni Swa Pfuna: Leyi hi yin’wana ya tindlela letinene eku fambiseni ka timagazini eka vanhu vo tala swinene. Vahuweleri van’wana va tirha eswitarateni leswi tshamaka swi tele hi vanhu hi masiku lawa ku xaviwaka ha wona.

¹⁰ Nsimu Ya Mabindzu Yi Ni Mihandzu: Loko hi nyikela vumbhoni eswitolo, a hi kanyingi hi nga va kumi vanhu. Van’wamabindzu vo tala va ni xinghana naswona vo tala va amukela timagazini ta hina hi ntsako. Vulavulela swihloko leswi fanelaka nsimu yo karhi ya mabindzu leyi ku tirhiwaka eka yona.

¹¹ Mintila Ya Timagazini Ya Humelela: Tanihi leswi Xihondzo xo Rindza xi humesiwaka kambirhi hi n’hweti, lexi lavekaka i ku tlhelela eka vanhu lava ti hlayaka ni ku va nyika minkandziyiso leyi landzelaka. Hi fanele hi tlhelela nkarhi na nkarhi, ku nga ri ku ya fambisa timagazini ntsena kambe ni ku ya khutaza munhu leswaku a dyondza Bibele. Mintila ya timagazini i masungulo lamanene ya tidyondzo ta Bibele.

¹² Tirhisa N’hweti Ya April na May Hi Xitalo: Timagazini ta Xihondzo xo Rindza ni Xalamuka! ti rhandziwa hi vahlayi va timiliyoni lava tlangelaka. Ta pfuna swinene eku huweleleni ka Mfumo lerova hi fanele hi tikarhatela ku tshama hi ri na tona ni ku ti fambisa nkarhi wun’wana ni wun’wana. Onge tin’hweti ta April na May ti nga va tin’hweti letinene ta ku kuma swikhokhelo ni ku fambisa timagazini!