Tirhisa Timagazini Ta Hina Hi Ndlela Leyinene
1 Loko u ya endhawini yo xavisela maphepha-hungu, xana u vona yini? Timagazini. Ekhon’weni ya xitolo, i yini lexi mahlo ya wena ma hlanganaka na xona? I Timagazini. I yini lexi endlaka leswaku munhu wa poso a goveka loko a rhwele nkwama wakwe wa poso? I Timagazini. Xisweswo, i yini lexi vanhu vo tala va xi hlayaka? I Timagazini. Nkambisiso wu kombise leswaku vantshwa va 9 eka 10 lava nga exikarhi ka malembe ya 10 na 18, ni tiphesente leti fanaka eka vanhu lavakulu, va hlaya magazini wun’we n’hweti yin’wana ni yin’wana. Misava yi ngheniwe hi timagazini engatini.
2 Xana hi nga swi kota ku endla vanhu va timbilu letinene leswaku va nghena hi Xihondzo xo Rindza ni Xalamuka! engatini? Ina, loko HINA hi ngheniwe hi Xihondzo xo Rindza ni Xalamuka! engatini. I yini lexi nga hi pfunaka? Xiya swiringanyeto leswi:
◼ Hlaya Timagazini: Mulanguteri un’wana la famba-fambaka u vike leswaku, hi xiringaniso, ko va muhuweleri un’we ntsena eka vanharhu exifundzheni xa yena loyi a hlayaka nkandziyiso wun’wana ni wun’wana wa Xihondzo xo Rindza ni Xalamuka! hinkwawo. Xana wa wu hlaya? Loko u hlaya xihloko xin’wana ni xin’wana, tivutise, ‘I mani loyi a nga tlangelaka rungula leri—i manana, la nge Xikwembu a xi tiviwi, n’wamabindzu, muntshwa?’ Eka kopi ya wena n’wini, fungha yinhla yin’we kumbe timbirhi leti u nga ta ti tirhisa loko u fambisa magazini. Kutani ehleketa hi ndlela leyi u nga ta pfuxa ku tsakela ha yona emhakeni yo karhi hi xivulwa xin’we kumbe swimbirhi ntsena.
◼ Vana Ni Odara Yo Karhi Ya Timagazini: Endla odara yo karhi eka makwerhu la tamelaka timagazini ya nhlayo ya tikopi leti ringaneke eka nkandziyiso wun’wana ni wun’wana. Hi ndlela leyi, wena ni ndyangu wa wena mi ta va ni mphakelo wa nkarhi na nkarhi ni lowu faneleke wa timagazini.
◼ Endla Xiyimiso Xa Siku Ra Timagazini Ra Nkarhi Na Nkarhi: Mavandlha yo tala ma hlawule siku ro karhi leri ma nga ta ri tirhisela ngopfu-ngopfu ku nyikela vumbhoni hi timagazini. Xana u nga ri seketela Siku ra Timagazini ra vandlha? Loko swi nga ri tano, ringeta leswaku nkarhi na nkarhi u tirhisa nkarhi wun’wana wa nsimu u nyikela vumbhoni exitarateni ni ku hangalasa timagazini hi wexe, hi yindlu ni yindlu ni hi mintila ya timagazini.
◼ Ku Ngheniwa Hi “Xihondzo xo Rindza” ni “Xalamuka!” eNgatini: Tshama u ri ni tikopi ta timagazini loko u ri eku fambeni kumbe u ya eku xaveni. Ti fambise loko u vulavula ni vatirhi-kuloni, vaakelani, vadyondzi-kuloni kumbe vadyondzisi. Mpatswa wun’wana lowu hakanyingi wu fambaka hi xihaha-mpfhuka wu tirhise yinhla eka wun’wana wa timagazini ta sweswinyana leswaku wu sungula bulo ni mukhandziyi loyi a tshame ekusuhi na wona. Wu tiphine hi mintokoto yo tala leyi tsakisaka. Vantshwa van’wana nkarhi na nkarhi va ya exikolweni ni swihloko leswi va tivaka leswaku swi ta tsakisa vadyondzisi va vona kumbe swichudeni-kulobye. Famba ni tikopi loko u ya endla mintirho yin’wana, kutani u ti fambisela van’wamabindzu loko u ta va u hetile ntirho wa wena. Vo tala va hina hi xava petirolo nkarhi na nkarhi; ha yini u nga fambiseli mutirhi wa le ndhawini yo chela petirolo timagazini? Tshama u ri na tona ekusuhi loko maxaka ma ku endzela, loko u tirhisa swo famba swa mani na mani, kumbe loko u rindzele swin’wana. Xana yi kona minkarhi yin’wana leyi faneleke leyi u nga anakanyaka ha yona?
◼ Lunghiselela Xingheniso Xo Koma Xa Magazini: Kunguhata ku vula marito ma nga ri mangani, kambe u ma vula kahle. Hiseka. Fikelela mbilu. Kongoma. Hlawula yinhla yin’we eka xihloko, u yi hlamusela hi marito ya wena ma nga ri mangani, kutani u fambisa timagazini. Ndlela yo antswa ya ku ti fambisa i ku vutisa xivutiso eka mhaka leyi tsakisaka kutani u kombetela eka xihloko lexi nyikaka nhlamulo ya Matsalwa. Xiya swikombiso swi nga ri swingani swa ndlela leyi leswi swi nga endliwaka ha yona:
3 Loko u hlamusela xihloko lexi vulavulaka hi ku andza ka vugevenga, u nga ha vutisa:
◼ “Xana ku laveka yini leswaku hi kota ku etlela ni vusiku hi nga chavi vugevenga?” N’wini wa muti a nga ha karhateka hi ku lava leswaku swilo swi sungula ku antswa. U nga ha hlamula hi ku vula leswaku vanhu vo tala va titwa hi ndlela leyi fanaka kutani u engetela hi ku vula leswaku u ni rungula leri u tshembaka leswaku ri ta n’wi tsakisa. Kutani vulavula hi yinhla leyi faneleke leyi nga exihlokweni.
4 Loko u fambisa xihloko lexi vulavulaka hi vutomi bya ndyangu, u nga ha ku:
◼ “Vanhu vo tala va kuma leswaku i ntlhontlho lowukulu ku kuma swo tihanyisa ni ku wundla ndyangu masiku lawa. Ku tsariwe tibuku to tala leti vulavulaka hi mhaka leyi, kambe hambi ku ri vatshila a va tshembi leswaku ku ni ntlhantlho wa swiphiqo swa hina. Xana ku kona laha hi nga yaka kona leswaku hi kuma nkongomiso wo tshembeka?” Kutani hlamusela yinhla yo karhi eka magazini leyi kombisaka vutlhari lebyi kumekaka eBibeleni.
5 U nga ha tirhisa xingheniso lexi loko u kombisa xihloko lexi vulavulaka hi xiphiqo xa ntshamisano:
◼ “Vanhu vo tala va tshikilelekile namuntlha. Xikwembu a xi nga kunguhatanga nikatsongo leswaku hi hanya hi ndlela leyi.” Kutani kombisa ndlela leyi mhaka leyi sekeriweke eBibeleni exihlokweni yi nga hi pfunaka ha kona ku langutana ni swiphiqo swa vutomi sweswi ni ku nyikela ntlhantlho lowu nga heriki enkarhini lowu taka.
6 A hi fanelanga hi kanakana ku kombela munyikelo lowu ringanyetiweke, hi anakanya leswaku timagazini ta hina ti durha ngopfu; timagazini ta hina a ti durhi nikatsongo loko ti ringanisiwa ni timagazini ta misava. Hikwalaho, hi fanele ku kongoma loko hi boxa munyikelo lowu hakelelaka minxavo ya ku kandziyisiwa ka timagazini.
7 Vumbhoni Bya Le Xitarateni Bya Pfuna: A ku ri eka nkandziyiso wa Informant (Vutirheli Bya Hina Bya Mfumo) wa January 1940, laha vahuweleri va khutaziweke ro sungula leswaku va endla xiyimiso xa siku ro hlawuleka vhiki rin’wana ni rin’wana, leswaku va ta nyikela vumbhoni exitarateni hi ku tirhisa timagazini. Xana wa hlanganyela eku nyikeleni ka vumbhoni exitarateni nkarhi na nkarhi? Loko u hlanganyela, xana endlelo leri u ri tirhisaka ra pfuna hakunene? Vahuweleri van’wana va voniwe va yimile etikhonweni ta switarata leti nga ni vanhu vo tala, va ri karhi va dya mabulo loko vanhu vo tala va ri karhi va hundza va nga va lemuki. Ematshan’weni yo yima ndhawu yin’we mi khome timagazini, swa pfuna swinene ku hambana kutani mi tshinelela vanhu. Vanhu vambe va nga ha yima va yingisela katsongo loko va yimisiwa hi munhu un’we ntsena, kambe a hi vangani lava nga tshinelelaka ntlawa wa vanhu lava tivulavulelaka. Tanihi leswi hi voniwaka hi vanhu vo tala loko hi ri exitarateni, ku laveka leswaku hi tilunghisa kahle ni ku ambala hi ndlela leyi xiximekaka leyi fanelaka vatirheli va Xikwembu.—1 Tim. 2:9, 10.
8 Mintila Ya Timagazini: Lava nga ni ntila wa timagazini va fambisa timagazini to tala hambi loko masimu ma hlanganisiwa nkarhi na nkarhi. Mintila ya timagazini i xihlovo lexinene ngopfu xa tidyondzo ta le kaya ta Bibele leti humelelaka.
9 Loko u endla maendzo yo vuyela nkarhi na nkarhi leswaku u heleketa timagazini, u ta kuma leswaku vunghana lebyinene bya rirhandzu exikarhi ka wena ni n’wini wa muti bya kula. Loko mi tolovelana ku antswa, swi ta olova ku bula hi tinhloko-mhaka ta Matsalwa. Leswi swi nga yisa eku sunguleni ka dyondzo ya le kaya ya Bibele leyi humelelaka. Eka maendzo yo vuyela laha ku nga ni ku tsakela timagazini, fambisa xikhokhelo. Naswona tsundzuka, nkarhi wun’wana ni un’wana lowu u kumaka n’wini wa muti ha wona u nga vika riendzo ro vuyela.
10 Makwerhu un’wana wa xisati a a hamba a yisela wansati un’wana timagazini loyi a ti teka nkarhi na nkarhi kambe a ku: “A ndzi swi tshembi leswi u ndzi byelaka swona.” Eriendzweni rin’wana, makwerhu loyi wa xisati u kume nuna wa wansati loyi a ri ekaya. Endzhaku ka bulo ra xinghana, ku endliwe malunghiselelo yo sungula dyondzo ya Bibele. Makwerhu wa xisati u endle xinghana ni vana vanharhu va majaha lava teke ku ta yingisela dyondzo. Eku heteleleni, manana ni vana va yena va majaha va nyiketele vutomi bya vona eka Yehovha naswona va khuvuriwile. Namuntlha, swirho wa ndyangu swo ringana 35 swi amukele ntiyiso. Leswi hinkwaswo swi endleke hikwalaho ka leswi makwerhu wa xisati a landzeleleke ntila wa yena wa timagazini!
11 Ku ni tindlela to tala to sungula ntila wa timagazini. U nga sungula ntila hi ku hlayisa rhekhodo ya ku fambisa ka wena ni ku endla malunghiselelo ya ku tlhelela endzhaku ka mavhiki mambirhi ni minkandziyiso ya sweswinyana. Ndlela yin’wana i ku tirhisa rungula leri nga eka xihloko lexi nge “Enkandziyisweni Werhu Lowu Landzelaka.” Loko u tlhelela, byela n’wini wa muti leswaku u ni xihloko lexi u vulavuleke ha xona enkarhini lowu hundzeke. Kumbe, loko u endla riendzo ro vuyela, u nga ha ku: “Loko ndzi hlaya xihloko lexi, ndzi anakanye leswaku xi ta ku tsakisa . . .” Kutani hlamusela xihloko lexi hi ku komisa kutani u wu fambisa. Loko u hetile riendzo ra wena, tsala tinhla ta ntlhanu to olova eka rhekhodo ya wena ya yindlu ni yindlu: (1) vito ra n’wini wa muti, (2) adirese ya n’wini wa muti, (3) siku ro endza, (4) minkandziyiso leyi u yi fambiseke ni (5) xihloko lexi u xi kombiseke. Vahuweleri van’wana va humelerile swinene eku endleni ka mintila ya timagazini, va hlengeleta maendzo yo vuyela yo tlula 40 enxaxamelweni wa vona!
12 Nsimu Ya Mabindzu: Timagazini to tala ti fambisiwa hi vahuweleri lava tirhaka nsimu ya mabindzu. Xana u tshama u ringeta ntirho wo nyikela vumbhoni eswitolo? Swiviko swi kombisa leswaku emavandlheni man’wana, a va talanga lava hlanganyelaka eka xiyenge lexi xa ntirho. Eku sunguleni, van’wana a va chava ku endzela vanhu va mabindzu, kambe endzhaku ka loko va swi ringetile minkarhi yo hlayanyana, va swi kume swi tsakisa ni ku tlhela swi vuyerisa. Ha yini u nga kombeli muhuweleri kumbe phayona leri nga ni ntokoto ri ku pfuna ku sungula?
13 Ku ni mimbuyelo yo hlayanyana yo tirhela eswitolo. A va talanga lava nga kumekiki hi nkarhi wa ntirho! Vanhu va mabindzu hi ntolovelo va ni mahanyelo lamanene, hambi loko va nga yi tsakeli Bibele. Sungula ka ha ri mixo; swi nga ha endleka u amukeriwa kahle. Endzhaku ko titivisa, u nga ha vula leswaku a hi kanyingi u kuma vanhu lava tirhaka ekaya, kutani u va endzerile swa xinkarhana entirhweni wa vona leswaku u ta va fambisela minkandziyiso ya sweswinyana ya Xihondzo xo Rindza ni Xalamuka! Kombisa leswaku van’wamabindzu vo tala va ti tsakela timagazini ta hina hikuva va lava ku fambisana ni swiendlakalo swa misava kambe va ni nkarhi wutsongo wo ti hlaya. Timagazini leti ti ni rungula leri tlhontlhaka mianakanyo hi langutelo lerinene, a ti na xihlawu-hlawu etimhakeni ta vukhongeri, tipolitiki kumbe ta mabindzu. Ntila wa timagazini wu nga ha sunguriwa ni vanhu lava tsakelaka lava hi va kumaka ensin’wini ya mabindzu.
14 Lunghiselelani Mi Ri Ndyangu: U nga ha veka nkarhi wun’wana etlhelo hi nkarhi wa dyondzo ya ndyangu wa wena leswaku mi bula hi swihloko swa timagazini ta sweswinyana leswi nga ha vaka swi fanerile ku swi tirhisa ensin’wini ya ka n’wina. Swirho swa ndyangu—ku katsa ni vana—swi nga titoloveta swingheniso swa swona hi ku cincana ni ku hlula nkaneto lowu talaka ku va kona, wo tanihi ku: “Ndzi khomekile,” “Hi ni vukhongeri bya hina,” kumbe “A ndzi tsakeli.” Ntirhisano lowunene wu nga endla swi koteka eka ndyangu hinkwawo leswaku wu hlanganyela nkarhi na nkarhi eku hangalaseni ka timagazini.
15 Vafambisi Va Dyondzo Ya Buku Va Nga Pfuna: Loko swi koteka, endlani xiyimiso xa minhlangano ya ntirho wa nsimu hi Siku ra Timagazini etindhawini ta dyondzo ya buku ematshan’weni yo va vandlha hinkwaro ri hlangana eHolweni ya Mfumo. Lava nga ni vutihlamuleri bya minhlangano ya ntirho wa nsimu va fanele va lunghiselela kahle va ri ni swiringanyeto swo karhi swa ntlawa. Leswi swi nga ha katsa xingheniso xo karhi lexi nga xa xikombiso ni yinhla yin’we kumbe timbirhi leti humaka eminkandziyisweni ya sweswinyana leyi nga ha tirhisiwaka ku pfuxa ku tsakela endhawini ya ka n’wina. Minhlangano ya ntirho wa nsimu—leyi katsaka ku hlela ntlawa—yi fanele ku komisiwa, yi nga hundzi timinete ta 10 ku ya eka 15. Vafambisi va dyondzo va fanele ku tiyiseka leswaku ku ni nsimu leyi ringaneke leswaku ntlawa wu ta tshama wu khomekile enkarhini hinkwawo wa ntirho wa nsimu.
16 Kombisa Ku Tlangela Timagazini: Xihloko lexi nge “Ku Tirhisa Kahle Xihondzo xo Rindza Ni Xalamuka!” lexi humesiweke enkandziyisweni wa Vutirheli Bya Hina Bya Mfumo bya July 1993 xi vule yinhla leyi ya nkoka: “Xihondzo xo Rindza ni Xalamuka! a ti heleriwi hi nkarhi, hambi loko ti nga fambisiwanga hi n’hweti yin’we kumbe timbirhi ta siku ra tona. Rungula leri ti ri tameleke a ri heleriwi hi matimba hi ku famba ka nkarhi . . . Ku tshika tikopi ta khale ti pakelana naswona hi nga ti tirhisi, swi komba ku pfumala ku tlangela switirho leswi swa nkoka. . . . Ematshan’weni yo veka minkandziyiso ya khale etlhelweni hi yi rivala, xana a swi nga ta antswa ku yi fambisela vanhu lava tsakelaka?”
17 Namuntlha ku ni vanhu vo tala lava nga ni timbilu letinene lava lavisisaka ntiyiso. Rungula leri nga eka magazini wun’we ri nga va rona leri va ri lavaka leswaku va nghena entiyisweni! Yehovha u hi nyike rungula leri tsakisaka leswaku hi ri twarisa, naswona timagazini ta hina ti tlanga xiphemu xa nkoka eku endleni ka leswaku rungula leri ri ya eka van’wana. Xana u ta xalamukela ku hangalasiwa ka timagazini swinene enkarhini lowu taka? Xana u ta swi tirhisa swin’wana swa swiringanyeto leswi mahelo-vhiki lawa? U ta katekisiwa swinene loko u endla sweswo.
Swiringanyeto Leswi Tirhaka:
◼ Hlaya timagazini ka ha ri emahlweni, kutani u tolovelana ni swihloko swa kona.
◼ Hlawula xihloko lexi vulavulaka hi swilo leswi tsakisaka vanhu va ndhawu ya ka n’wina.
◼ Lunghiselela xingheniso lexi nga ta fanela vanhu vo hambana-hambana, hambi i vavanuna, vavasati kumbe vantshwa. Kombisa ndlela leyi magazini wu n’wi khumbaka ha yona n’wini wa muti ni ndlela leyi ndyangu hinkwawo wu nga ta tiphina ha yona.
◼ Kunguhata ku hlanganyela entirhweni wa wena wa le nsin’wini loko vanhu vo tala va ri ekaya. Mavandlha man’wana ma endla malunghiselelo ya ku veka vumbhoni ni madyambu hi timagazini.
◼ Komisa xingheniso xa wena naswona u ba nhloko ya mhaka.
◼ U nga vulavuli hi ku hatlisa. Loko muyingiseri wa wena a nga tsakeli, a swi nge pfuni nchumu ku vulavula hi ku hatlisa. Ringeta ku vulavula u ntshunxekile, naswona u nyika n’wini wa muti nkarhi wo hlamula.
Ku Fambisa Timagazini Hi Yindlu Na Yindlu:
◼ Vana ni n’wayitelo wa xinghana ni mpfumawulo lowunene wa rito.
◼ Hisekela timagazini.
◼ Vulavula hi ku nonoka ni hi laha ku twakalaka.
◼ Vulavula hi mhaka yin’we ntsena; pfuxa ku tsakela hi xinkarhana kutani u kombisa n’wini wa muti nkoka wa tona.
◼ Kandziyisa xihloko xin’we ntsena.
◼ Kombisa magazini wun’we ntsena, u fambisa ni lowun’wana tanihi munghana wa wona.
◼ Nyika n’wini wa muti timagazini.
◼ Byela n’wini wa muti leswaku u kunguhata ku vuya.
◼ Gimeta hi ndlela ya xinghana, leyi faneleke loko timagazini ti ariwa.
◼ Va tsale eka xiphephana xa rhekhodo ya yindlu na yindlu hinkwavo lava kombiseke ku tsakela ni leswi u swi fambiseke.
Minkarhi Ya Ku Fambisa Timagazini:
◼ Ku nyikela vumbhoni hi yindlu na yindlu
◼ Ku nyikela vumbhoni exitarateni
◼ Ntirho wa ku nyikela vumbhoni eswitolo
◼ Ntila wa timagazini
◼ Ku nyikela vumbhoni ni madyambu
◼ Loko u endla maendzo yo vuyela
◼ Loko u endzela khale ka swichudeni swa Bibele
◼ Loko u ri eku fambeni, ni le ku xaveni
◼ Loko u vulavula ni maxaka, vatirhi-koloni, vaakelani, vadyondzi-kuloni, vadyondzisi
◼ Etindhawini ta swo famba swa mani na mani, loko u ri endlwini yo rindzela eka yona