Fambisa Timagazini eNsin’wini
1, 2. Xana timagazini ta Xihondzo xo Rindza ni Xalamuka! ti ti khumbhe njhani timbilu ta vanhu?
1 “Ta tsakisa, ti vulavula hi swilo leswi endlekaka sweswi naswona ta khutaza.” “A ndzi si tshama ndzi hlaya timagazini leti khutazaka ku fana na tona.” Marito lawa ma yi hlamusela kahle ndlela leyi vahlayi emisaveni hinkwayo va titwaka ha yona hi Xihondzo xo Rindza ni Xalamuka! Hakunene, timagazini ta hina i nchumu wa nkoka swinene wo chumayela mahungu lamanene eka “vanhu va mixaka hinkwayo.”—1 Tim. 2:4.
2 N’wamabindzu un’wana u kume magazini wa Xalamuka! lowu a wu vulavula hi mhaka leyi n’wi tsakiseke. Endzhakunyana u hlaye Xihondzo xo Rindza, lexi a xi ri ni xihloko lexi n’wi susumeteleke ku kambisisa dyondzo ya Vunharhu-un’we, leyi se a ku ri malembe a yi kholwa. Leswi a swi hlayeke swi n’wi fikelele mbilu. Endzhaku ka tin’hweti ta tsevu u khuvuriwile. Wanuna un’wana a a tshama a ri karhi a kuma timagazini kambe a a nga ti hlayi. Hi hala tlhelo, nsati wakwe yena a a nga swi lavi ku vulavula ni Timbhoni kambe a a ti hlaya timagazini leti a ti tiseriwa nuna wakwe. Mbilu yakwe yi khumbiwe hi xitshembiso xa Bibele xa misava leyi nga ta va paradeyisi leyi ku nga ta tshama vanhu vo lulama eka yona. Hi ku famba ka nkarhi n’wana wakwe wa jaha, ni sesi wakwe va ve malandza ya Yehovha.
3. Swi pfuna hi ndlela yihi ku fambisa timagazini hatimbirhi-mbirhi?
3 Ti Fambise Hatimbirhi-mbirhi: Hilaha xikombiso lexi nga eka ndzimana ya vumbirhi xi swi kombiseke hakona, a hi nge swi tivi leswaku i vamani lava nga ta hlaya timagazini terhu kumbe leswaku i yini lexi nga ta va endla va tsakela. (Ekl. 11:6) Hikwalaho, swa pfuna ku fambisa Xihondzo xo Rindza ni Xalamuka! hi nkarhi wun’we, hambileswi hi talaka ku vulavulela magazini wun’we ntsena. Minkarhi yin’wana, swi nga ha fanela ku fambisa timagazini to hlayanyana to hambana emutini wun’we.
4. Xana hi nga wu hlela njhani ntirho wa hina wa timagazini?
4 Swa pfuna ku tivekela siku ro fambisa timagazini vhiki rin’wana ni rin’wana. Eka 2005 Calendar of Jehovah’s Witnesses, Mugqivela wun’wana ni wun’wana wu hlawuriwe ku va “Siku ra Timagazini.” Tanihi leswi swiyimo swa ndhawu ni swa munhu un’wana ni un’wana swi nga faniki, van’wana va nga ha tihlawulela siku rin’wana ro fambisa timagazini. Xana na wena u na rona siku ro tano eka xiyimiso xa wena xa vhiki ni vhiki?
5. Hi kwihi laha hi nga xalamukelaka ku fambisa timagazini, naswona i yini lexi nga hi pfunaka leswaku hi endla tano?
5 Tivekele Pakani: Ku tivekela pakani ya ku fambisa timagazini n’hweti ni n’hweti swi nga hi pfuna leswaku hi fambisa timagazini to tala. Xana va kona lava u hambetaka u va yisela timagazini? Xana lava u va chumayelaka ensin’wini wa va fambisela timagazini? Xana u nga fambisa timagazini exitarateni, ensin’wini ya mabindzu ni le tindhawini ta mani na mani? Xana u tamela timagazini loko u ri eriendzweni, u ya exitolo ni loko u ya laha u lavekaka kona hi nkarhi wo karhi? Nkarhi wun’wana ni un’wana lowu u wu kumaka wu tirhisele ku fambisela vanhu Xihondzo xo Rindza ni Xalamuka!
6. Xana hi nga ti tirhisa njhani timagazini ta khalenyana?
6 Nakambe hi nga tivekela pakani yo fambisa timagazini ta khalenyana leti hi nga na tona. Hambiloko timagazini ti ri ta n’hweti yin’we kumbe timbirhi leti nga hundza, rungula ra tona ri va ri nga hundzeriwanga hi nkarhi. Ti fambisele vanhu lava tsakelaka. Eka timiliyoni ta vanhu, rungula ra Xihondzo xo Rindza ni Xalamuka! ri ve “rito leri vuriweke hi nkarhi wa kona.” (Swiv. 25:11) A hi ti tirhiseleni ku pfuna timiliyoni ta vanhu leswaku ti tiva Yehovha ni ku n’wi tirhela.