Ku Fambisa Timagazini Swi Pfuna Ku Sungula Tidyondzo Ta Bibele
1. Ha yini ku ri khale nhlengeletano ya Yehovha yi khutaza vahuweleri ku va ni vanhu lava va fambiselaka timagazini n’hweti na n’hweti?
1 Vanhu vo tala a va swi tsakeli ku dyondza Bibele na hina kambe va swi tsakela ku hlaya timagazini ta hina. Hikwalaho, i khale nhlengeletano ya Yehovha yi khutaza vahuweleri leswaku va va ni vanhu lava va fambiselaka timagazini n’hweti na n’hweti. Loko vanhu va hlaya timagazini ta hina nkarhi na nkarhi, hakanyingi va navela ku dyondza Rito ra Xikwembu. (1 Pet. 2:2) Hi ku famba ka nkarhi, swilo leswi va swi hlayaka swi nga ha va khumba timbilu, ivi va amukela dyondzo ya Bibele.
2. Hi nga ku hlakulela njhani ku tsakela ka lava hi va fambiselaka timagazini n’hweti na n’hweti?
2 ‘Cheleta’ Mbewu Ya Ntiyiso: Ematshan’weni yo siya timagazini ntsena, bula ni n’wini wa muti naswona u ringeta ku va ni vuxaka lebyinene na yena. Leswi swi ta ku pfuna leswaku u tiva swiyimo swa yena, leswi a swi tsakelaka ni swilo leswi a pfumelaka eka swona leswi nga ta endla leswaku u kota ku bula na yena hi vutlhari. (Swiv. 16:23) Lunghiselela riendzo rin’wana ni rin’wana. Loko swi koteka, hi ku komisa kandziyisa yinhla yo karhi ni tsalwa leri nga eka timagazini leri fambisanaka ni mhaka yoleyo, u cheleta mbewu yin’wana ni yin’wana ya ntiyiso leyi nga embilwini ya yena. (1 Kor. 3:6) Tsala siku ra riendzo rin’wana ni rin’wana, nkandziyiso lowu u wu siyeke, mhaka leyi mi nga bula ha yona ni matsalwa lawa mi buleke ha wona.
3. Hi fanele hi tlhelela kangani eka vanhu lava hi va fambiselaka timagazini n’hweti na n’hweti?
3 Hi Fanele Hi Tlhelela Kangani? U fanele u tlhelela kan’we hi n’hweti leswaku u va yisela timagazini letintshwa lava u va fambiselaka tona n’hweti na n’hweti. Hambiswiritano, loko munhu wa kona a kombisa ku tsakela u nga ha hlawula ku n’wi endzela ko hlayanyana loko swiyimo swa wena swi ku pfumelela. Hi xikombiso, u nga ha tlhelela endzhaku ka vhiki kumbe mambirhi u n’wi siyele timagazini, ivi u ku, “Ndzi ku endzele swa xinkarhana leswaku ndzi ta ku komba swin’wana eka timagazini leti ndzi ku siyeleke tona.” Leswi swi ta endla leswaku a tsakela ku hlaya xihloko xo karhi. Loko se a xi hlayile, u nga n’wi vutisa leswaku u anakanya yini hi xihloko xolexo kutani u bula na yena katsongo. Kumbe loko munhu yoloye a rhandza ku hlaya minkandziyiso ya hina, u nga ha tlhelela eka yena u n’wi khomele xiphephana, broxara kumbe buku leyi fambisiwaka n’hweti yoleyo.
4. I yini leswi hi nga swi endlaka nkarhi na nkarhi leswaku hi vona loko lava hi va fambiselaka timagazini n’hweti na n’hweti va swi tsakela ku dyondzeriwa Bibele?
4 U nga yimeli leswaku n’wini wa muti a kombela ku dyondzeriwa. Kombela ku dyondza na yena. Hambiloko a tshame a ala ku dyondzeriwa Bibele, nkarhi na nkarhi u nga n’wi komba nhloko-mhaka leyi nga eka Xihondzo xo Rindza leyi nge “Tinhlamulo Ta Swivutiso Swa Bibele” kutani u vona loko a swi tsakela ku va a bula na wena hi yona. Kumbexana hi nga sungula ku dyondza na yena hi yime enyangweni. Hambiswiritano, loko swi nga koteki ku sungula dyondzo, u nga hambeta u n’wi yisela timagazini leswaku u hlakulela ku tsakela kakwe.