Ku Antswisa Vutshila Bya Hina eNsin’wini—Ku Endla Leswaku Vanhu Va Tshama Va Ri Karhi Va Tsakela Ku Tiseriwa Timagazini

Lexi Endlaka Swi Va Swa Nkoka: Vanhu vo tala lava tsakelaka ku hlaya timagazini ta hina a va swi lavi ku dyondza Bibele na hina. Swi nga ha endleka leswaku va enerisekile hi vukhongeri bya vona kumbe va vona onge a va na nkarhi wo dyondza. Hambiswiritano, loko va ri karhi va hlaya timagazini ta hina nkarhi ni nkarhi, va nga ha hlakulela ku navela Rito ra Xikwembu. (1 Pet. 2:2) Ku nga ha va ni xihloko xo karhi lexi nga va khumbaka mbilu kumbe swiyimo swa vona swi nga ha cinca. Loko hi va endzela nkarhi ni nkarhi swi ta endla leswaku va hi tolovela naswona swi ta hi pfuna leswaku hi tiva leswi va swi tsakelaka ni leswi nga va dyisiki byi rhelela. Eku heteleleni, hi nga ha sungula dyondzo ya Bibele.

Ndlela Leyi U Nga Swi Endlaka Ha Yona:

Tinyike nkarhi wo yisela munhu yoloye timagazini leta ha ku humaka ta Xihondzo xo Rindza ni Xalamuka! n’hweti ni n’hweti. Kumbexana u nga tlhela u n’wi endzela exikarhi ka n’hweti leswaku u ta n’wi endla a navela ku hlaya xihloko xo karhi lexi nga eka timagazini leti u n’wi siyeleke tona kumbe u ya n’wi yisela nkandziyiso lowu fambisiwaka n’hweti yoleyo. Tsala rungula leri lavekaka.—Vona Vutirheli Bya Hina Bya Mfumo bya January 2014, tl. 3.
Lunghiselela riendzo rin’wana ni rin’wana. Ematshan’weni yo siya timagazini ntsena, bula ni n’wini wa muti kutani u ringeta ku endla xinghana na yena leswaku u ta n’wi endla a tsakela rungula ra hina.
Tshama u lunghekele ku sungula dyondzo. Loko munhu wo karhi loyi u n’wi yiselaka timagazini a ku vutisa leswi Bibele yi swi vulaka hi mhaka yo karhi, n’wi tisele nkandziyiso lowu hi wu tirhiselaka ku fambisa dyondzo lowu nga ni nhlamulo ya xivutiso xa yena kutani mi wu kambisisa swin’we. Loko u nga si famba, vutisa xivutiso lexi fambisanaka ni mhaka leyi a mi bula ha yona kutani u xi hlamula eka riendzo leri landzelaka. Loko u va ni mabulo yo koma nkarhi ni nkarhi u tirhisa Bibele kumbe yin’wana ya minkandziyiso ya hina leyi hi yi tirhiselaka ku fambisa dyondzo, u va u ri eku fambiseni ka dyondzo ya Bibele. Xana u n’wi fambiserile n’wini wa muti broxara leyi nge Mahungu Lamanene ivi u n’wi kombisa hi ku komisa ndlela leyi dyondzo ya Bibele yi fambisiwaka ha yona? Xana u n’wi kombile vhidiyo leyi nge Ha Yini U Fanele U Dyondza Bibele? ni leyi nge Leswi Endlekaka Eka Dyondzo Ya Bibele? Hambiloko munhu yoloye a nga pfumelanga ku dyondza Bibele enkarhini lowu hundzeke, swiyimo swa cinca. Xana swi nga pfuna loko wo tlhela u n’wi kombela?

Ringeta Ku Endla Leswi N’hweti Leyi:

Tsala mavito ya vanhu lava u nga ha va yiselaka timagazini. Va yisele timagazini leta ha ku humaka, kutani u va byela leswaku u ta va tisela ta n’hweti leyi landzelaka.