“Ku Byala Mbewu Ya Mfumo” Hi Mintila Ya Timagazini

¹ Risimu 133 ebukwini leyi nge Yimbelelelani Yehovha Swidzuniso ri ni nhloko-mhaka leyi nge “Ku Byala Mbewu Ya Mfumo.” Ri sekeriwe eka xifaniso xa Yesu lexi fanisaka ntirho wa ku endla vadyondzisiwa ni wa ku byala mbewu. (Mat. 13:4-8, 19-23) Marito ya risimu leri ma ri: “Leswaku timbewu ti wela kwihi swi tala ku ya hi wena.” Xana hi nga ku engeterisisa ku yini ku humelela ka hina evutirhelini? Ndlela yin’wana i ku simeka ni ku hlayisa ntila wa timagazini.

² Ku nga fikeleriwa tipakani to tala hi ntila wa timagazini. (1) Maendzo ya nkarhi na nkarhi endzhaku ka mavhiki man’wana ni man’wana mambirhi ma nga ku pfuna leswaku u aka xinghana ni munhu la tsakelaka. (2) U ta endla leswaku munhu yoloye a tshama a ri karhi a nyikiwa rungula leri ponisaka vutomi leri kumekaka eka Xihondzo xo Rindza ni Xalamuka! (3) Hi mabulo ya wena u nga ha pfuna munhu loyi leswaku a sungula ku navela ntiyiso wa Matsalwa, lowu nga yisaka eka dyondzo ya Bibele.—1 Pet. 2:2.

³ Ndlela Yo Sungula Ntila Wa Timagazini: Nkarhi wihi na wihi lowu munhu a kombisaka ku tsakela timagazini, hlamusela leswaku swihloko leswi xiyekaka swi kumeka eka nkandziyiso wun’wana ni wun’wana ni leswaku u nga tsakela ku n’wi yisela swona endzhaku ka mavhiki man’wana ni man’wana mambirhi. Endzhaku ka loko u fambile, tsala vito ni adirese ya munhu wa kona, siku leri u nga n’wi endzela ha rona, masiku ya timagazini leti u n’wi fambiseleke tona, xihloko lexi u xi vulavuleleke ni timhaka leti tsakiseke munhu loyi swinene.

⁴ U nga sungula ntila wa timagazini hambi u ri ni vanhu va nga ri vangani. Kutani tirhela ku ndlandlamuxa ntila wa wena hi ku engetela van’wana lava u va fambiselaka timagazini. Loko ntila wa wena wu ya wu kula, u nga wu hlela hi ku ya hi nsimu leswaku u ta kota ku va fikelela hi ku olova. Tiyiseka leswaku u tsala minkandziyiso leyi u yi fambiseke eka riendzo rin’wana ni rin’wana ni leswaku u yi fambise rini. Tlhela u tsala ni leswi u vulavuleke ha swona ni ndlela ya ku kurisa ku tsakela ka munhu ka ntiyiso eka riendzo leri landzelaka.

⁵ Katsa Ni Van’wamabindzu Ni Swidyondzeki: Ntokoto wu kombisa leswaku vini va switolo ni swidyondzeki swin’wana va swi tsakela ku amukela timagazini ta hina nkarhi na nkarhi. Nkulu un’wana u tshame a sungula ntila wa timagazini ni meyara wa doroba ra ka vona. Muhuweleri un’wana u sungule dyondzo ni n’wini wa khamphani ya swo aka la nga ni malembe ya 80 hi vukhale endzhaku ka loko a n’wi yisele timagazini ku ringana malembe ya khume hi ku tlhandlamana ka wona!

⁶ Makwerhu wa xisati la nga phayona u tshame a nghena exitolo laha a nga vulavula ni mpatswa lowu nga n’wi amukelangiki hi ku tsaka. Hambiswiritano, leswi va amukeleke timagazini, u kunguhate ku nghenisa mpatswa lowu eka ntila wakwe wa timagazini. Hi ku famba ka nkarhi, makwerhu wa xisati u lave ku tshika ku va endzela hikuva a va nga ri na xinghana naswona a va nga lavi ku vulavula, hambiloko a va vutisa xivutiso lexi lavaka mavonelo ya vona. Kambe makwerhu loyi wa xisati u khongerile hi mhaka leyi laha eku heteleleni a fambiseleke mpatswa lowu buku leyi nge Hanya Hi Masiku. Endzhaku ka loko a yi hlayile, nsati wa kona u te: “Ahaa, ndzi wu kumile ntiyiso!” Ku sunguriwe dyondzo ya Bibele, naswona endzhaku mpatswa lowu wu khuvuriwile. Ku phikelela ka phayona leri ku vile ni mihandzu leyinene hakunene.

⁷ Ku Endla Maendzo Yo Vuyela: Loko u kuma magazini lowuntshwa, hlaya swihloko hinkwaswo. Lava tinhla leti nga ta tsakisa munhu un’wana ni un’wana entileni wa wena wa timagazini. Kutani loko u tlhelela, u nga ha ku: “Loko ndzi ri karhi ndzi hlaya xihloko lexi, ndzi ehlekete hi wena ni ndlela leyi xi nga ha ku tsakisaka ha yona.” Vahuweleri va malembe hinkwawo va nga tsakela ku va ni ntila wa timagazini. Hambi ku ri n’wana lontsongo a nga ha ku: “Ndzi tsakela ku tlhela ndzi ku vona. Timagazini ta wena ta sweswinyana ta Xihondzo xo Rindza ni Xalamuka! ti fikile. Ndza tshemba u ta yi tsakela nhloko-mhaka leyi nge . . . ”

⁸ Va endle va navela ku kuma timagazini leti landzelaka hi ku va komba bokisi leri nge “Enkandziyisweni Werhu Lowu Landzelaka.” Loko swihloko swi humelela hi ku tlhandlamana, kombisa yinhla leyi ivi u khutaza muhlayi leswaku a nga hundziwi hi xiyenge xihi na xihi xa wona. U nga rivali leswaku nkarhi na nkarhi loko u yisa timagazini eka munhu loyi a nga entileni wa wena wa timagazini, u nga ha n’wi hlaya tanihi riendzo ro vuyela. Ku tlula kwalaho, tsundzuka leswaku pakani ya hina i ku sungula tidyondzo ta le kaya ta Bibele eka maendzo lawa.

⁹ Endzela Vanhu Lava Nga eNtileni Wa Wena Nkarhi Na Nkarhi: U nga endzela vanhu lava nga entileni wa wena wa timagazini nkarhi wihi na wihi lowu u wu kumaka—nimixo exikarhi ka vhiki, nindzhenga, hi mpima-vayeni kumbe hi mahelo-vhiki endzhaku ka ntirho wa yindlu na yindlu. Loko u nga swi koti ku endzela vanhu lava nga entileni wa wena hikwalaho ka mavabyi kumbe maendzo, kombela muhuweleri un’wana endyangwini wa wena kumbe evandlheni leswaku a ku yisela timagazini ta wena. Hi ndlela yoleyo, vanhu lava nga enxaxamelweni wa wena a va nge tsandzeki ku kuma timagazini ta vona hi nkarhi.

¹⁰ Ndlela yin’wana ya ku byala mbewu ya Mfumo i ku yisela vanhu hinkwavo lava nga entileni wa wena wa timagazini Xihondzo xo Rindza ni Xalamuka! nkarhi na nkarhi. Loko u ri karhi u va dyondzisa ntiyiso wa Matsalwa, va nga ha kuma mongo wa rito ra Mfumo ivi va hetelela hi ku humesa mihandzu ya Mfumo kun’we na wena.—Mat. 13:8, 23.