Valanguteri Lava Rhangelaka—Matsalani
1 Matsalani wa vandlha u endla ntirho wa nkoka hi ku tiyiseka leswaku ‘swilo hinkwaswo swi endliwa hi ku tenga ni hi ku hleleka.’ (1 Kor. 14:40) Tanihi xirho xa Komiti ya Ntirho ya Vandlha, u langutela mapapila ya vandlha ni tirhekhodo tin’wana ta nkoka. Hambileswi mintirho yakwe yi nga vonakiki eka van’wana ku fana ni ya vakulu van’wana, ya laveka naswona ya tlangeriwa swinene.
2 Loko ku fika mapapila lama humaka eka Sosayiti kumbe eka van’wana, matsalana u endla leswi lavekaka eka wona ni ku vona leswaku ma hlamuriwa loko swi fanerile. U fanele a vona leswaku mapapila lama amukeriwaka ma voniwa hi vakulu hinkwavo ivi ma nghenisiwa efayilini leswaku ma ta kumeka loko ma laveka. U kambisisa tifomo to oda timagazini ni tibuku ivi a ti rhumela eka Sosayiti. I mulanguteri wa lava langutelaka tiakhawunti ni swikhokhelo kun’we ni timhaka leti fambisanaka ni ntsombano.
3 Tanihi leswi matsalana a faneleke a rhumela xiviko xa ntirho wa nsimu xa vandlha eka Sosayiti hi siku ra vutsevu ra n’hweti yin’wana ni yin’wana, i swa nkoka leswaku hinkwerhu ka hina hi vika ntirho wa hina wa nsimu hi ku hatlisa eku heleni ka n’hweti yin’wana ni yin’wana. Kutani u nghenisa swiviko swa ntirho wa nsimu emakhadini ya Rhekhodo ya Muhuweleri wa Vandlha. Muhuweleri wihi na wihi a nga ha kombela ku vona rhekhodo ya ntirho wa yena n’wini.
4 Loko muhuweleri a rhurha kumbe a ta evandlheni, matsalana u kombela papila ra ku n’wi tivisa kun’we ni khadi ra Rhekhodo ya Muhuweleri wa Vandlha eka vakulu va vandlha lerin’wana kumbe a swi rhumela eka vona.—Vutirheli Bya Hina, matl. 105-6.
5 Matsalana u pfuxeta ntirho wa maphayona, a tivisa vakulu, ngopfu-ngopfu mulanguteri wa ntirho, hi swiphiqo leswi maphayona ma nga ha vaka ma langutana na swona. U tivisa vafambisi va Dyondzo ya Buku ya Vandlha hi ta vahuweleri lava nga viki kona nkarhi na nkarhi entirhweni wa nsimu. Matsalana ni mulanguteri wa ntirho va rhangela eku pfuneni ka vahuweleri lava nga hola.—Vutirheli Bya Hina Bya Mfumo, November 1987, tl. 1.
6 Leswi se hi yi twisisaka ku antswa mintirho ya matsalana, onge hi nga endla leswi hi nga swi kotaka leswaku swi n’wi olovela ku hetisisa vulanguteri byakwe.—1 Kor. 4:2.