NDZIMA 8
Vachumayeri Va Mahungu Lamanene
YEHOVHA u hi nyike N’wana wakwe, Yesu Kreste, leswaku a ta hi vekela xikombiso lexinene lexi hi faneleke hi xi landzela. (1 Pet. 2:21) Loko munhu a va mulandzeri wa Yesu, munhu yoloye u chumayela mahungu lamanene, a va nandza wa Xikwembu. Loko Yesu a kombisa leswaku ku va mulandzeri wakwe swa phyuphyisa emoyeni, u te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya.” (Mat. 11:28, 29) Xitshembiso xakwe xi hetisekile eka hinkwavo lava amukeleke xirhambo lexi!
2 Leswi Yesu a nga Nandza Lonkulu wa Xikwembu, u vitane vanhu vo karhi leswaku va ta va valandzeri vakwe. (Mat. 9:9; Yoh. 1:43) U va dyondzise ndlela yo chumayela a tlhela a va rhuma leswaku va ya endla ntirho lowu fanaka ni lowu a a wu endla. (Mat. 10:1–11:1; 20:28; Luka 4:43) Endzhakunyana u rhume van’wana va 70 ku ya hlanganyela eku twariseni ka mahungu lamanene ya Mfumo wa Xikwembu. (Luka 10:1, 8-11) Loko Yesu a rhuma vadyondzisiwa vakwe, u te: “Loyi a mi yingisaka wa ndzi yingisa na mina. Naswona loyi a mi honisaka wa ndzi honisa na mina. Ku tlula kwalaho, loyi a ndzi honisaka u honisa ni loyi a ndzi rhumeke.” (Luka 10:16) Hi marito lawa, Yesu u kandziyise vutihlamuleri lebyikulu lebyi a byi nyikiwe vadyondzisiwa. A va fanele va yimela Yesu ni Xikwembu xa le Henhla-henhla! A swi ta va tano eka hinkwavo lava amukelaka xirhambo xa Yesu lexi xa ha tirhaka ninamuntlha lexi nge: ‘Tana u va mulandzeri wa mina.’ (Luka 18:22; 2 Kor. 2:17) Hinkwavo lava amukelaka xirhambo lexi va kuma xiavelo lexi humaka eka Xikwembu xo chumayela mahungu lamanene ya Mfumo ni ku endla vadyondzisiwa.—Mat. 24:14; 28:19, 20.
3 Hikwalaho, leswi hi amukeleke xirhambo xa Yesu kutani hi n’wi landzela, hi katekisiwe hi ‘ku kuma vutivi’ bya Yehovha Xikwembu ni bya Yesu Kreste. (Yoh. 17:3) Hi dyondzisiwe tindlela ta Yehovha. Hi ku pfuniwa hi yena, hi swi kotile ku cinca mianakanyo ya hina, hi cinca vumunhu bya hina kutani hi endla leswaku mahanyelo ya hina ma fambisana ni milawu yo lulama ya Yehovha. (Rhom. 12:1, 2; Efe. 4:22-24; Kol. 3:9, 10) Ku tlangela ka hina loku humaka embilwini ku hi susumetele leswaku hi tinyikela eka Yehovha kutani hi kombisa ku tinyikela koloko hi ku khuvuriwa ematini. Ku khuvuriwa ku kombisa leswaku hi hlawuriwile leswaku hi va vachumayeri va mahungu lamanene.
4 Minkarhi hinkwayo tsundzukani leswaku ntirho lowu hi wu endlelaka Xikwembu hi fanele hi wu endla hi mavoko lama baseke ni hi mbilu leyi tengeke. (Ps. 24:3, 4; Esa. 52:11; 2 Kor. 6:14–7:1) Hi ku va ni ripfumelo eka Yesu Kreste, hi kume ripfalo leri tengeke. (Hev. 10:19-23, 35, 36; Nhlav. 7:9, 10, 14) Muapostola Pawulo u khutaze Vakreste leswaku va endla swilo hinkwaswo hi xikongomelo xo dzunisa Xikwembu, leswaku va nga khunguvanyisi van’wana. Muapostola Petro u swi veke erivaleni leswaku mahanyelo lama amukelekaka eka Xikwembu ma ni matimba yo endla leswaku lava nga riki vapfumeri va amukela ntiyiso. (1 Kor. 10:31, 33; 1 Pet. 3:1) Xana u nga n’wi pfuna njhani munhu leswaku a va muchumayeri wa mahungu lamanene?
VAHUWELERI LAVANTSHWA
5 Loko u sungula dyondzo ya le kaya ya Bibele ni munhu la tsakelaka, n’wi khutaze ku byela van’wana hileswi a swi dyondzaka. U nga ha n’wi khutaza ku vulavula ni maxaka, vanghana, vatirhi-kulobye ni van’wana, hi xitshuketa. Leri i goza ra nkoka eku dyondziseni ka vanhu lava ha ku amukelaka ntiyiso leswaku va va valandzeri va Yesu Kreste, tanihi vachumayeri va mahungu lamanene. (Mat. 9:9; Luka 6:40) Loko munhu la ha ku amukelaka ntiyiso a kula hi tlhelo ra moya naswona a va ni vuswikoti byo chumayela hi xitshuketa, a swi kanakanisi leswaku u ta tsakela ku katseka entirhweni wo chumayela.
KU FANELEKELA NTIRHO LOWU
6 Loko u nga si rhamba munhu leswaku a famba na wena ensin’wini ro sungula u fanele u tiyiseka leswaku ku ni swilaveko swin’wana leswi a faneleke a swi fikelela. Munhu loyi a fambaka na hina ensin’wini, vanhu lava n’wi vonaka va n’wi teka a ri Mbhoni ya Yehovha. Kutani u tekiwa a ri munhu loyi se a hanyaka hi ku landza milawu yo lulama ya Yehovha naswona a nga va muhuweleri la nga khuvuriwangiki.
7 Handle ko kanakana loko u dyondza ni munhu naswona u bula na yena hi misinya ya milawu ya Bibele, u ta swi tiva swiyimo swakwe. U nga ha swi xiya leswaku u hanya hi ku pfumelelana ni leswi a swi dyondzeke. Kambe ku ni timhaka tin’wana leti khumbaka vutomi bya xichudeni lexi, leti vakulu va faneleke va bula na xona ha tona, na wena u ri kona.
8 Muhlanganisi wa huvo ya vakulu u ta hlela leswaku vakulu vambirhi (un’wana wa vona u fanele a va xirho xa komiti ya ntirho) va bula na wena ni xichudeni lexi xa Bibele. Emavandlheni lama nga ni vakulu vatsongo, nkulu ni nandza wa vutirheli la nga ni vuswikoti a nga ha endla leswi. Vamakwerhu lava hlawuriweke va fanele va tikarhatela ku va ni bulo leri handle ko dya nkarhi. Entiyisweni, loko va tiva leswaku xichudeni xi navela ku ya ensin’wini, va nga ha bula na wena ni xichudeni xa wena endzhaku ka nhlengeletano ya vandlha. Sweswo va fanele va swi endla hi moya wo rhula. Emahlweni ko va xichudeni xi pfumeleriwa ku va muhuweleri la nga khuvuriwangiki, xi fanele xi tirhisa tinhla leti landzelaka:
(1) Wa pfumela leswaku Bibele i Rito ra Xikwembu leri huhuteriweke.—2 Tim. 3:16.
(2) Wa ti tiva ni ku ti pfumela tidyondzo ta xisekelo ta Matsalwa lerova loko a vutisiwa swivutiso, u ta hlamula hi ku ya hi leswi Bibele yi swi vulaka ku nga ri hi ku ya hi tidyondzo ta vukhongeri bya mavunwa kumbe hi langutelo rakwe.—Mat. 7:21-23; 2 Tim. 2:15.
(3) U yingisa xileriso xa Bibele xa ku hlengeletana ni vanhu va Yehovha etinhlengeletanweni ta vandlha loko a kota ku endla tano.—Ps. 122:1; Hev. 10:24, 25.
(4) Wa swi tiva leswi Bibele yi swi dyondzisaka hi ku tikhoma loko biha ka rimbewu, ku katsa ni vuoswi, tshengwe ni vusodoma naswona u hanya hi ku pfumelelana ni tidyondzo leti. Loko munhu a tshama ni un’wana wa rimbewu leri hambaneke ni rakwe loyi a nga riki xaka rakwe, va fanele va va va tekane hi nawu.—Mat. 19:9; 1 Kor. 6:9, 10; 1 Tim. 3:2, 12; Hev. 13:4.
(5) U yingisa xileriso xa Bibele lexi yirisaka vudakwa naswona a nga swi tirhisi swidzidziharisi leswi godzombelaka kumbe swilo swin’wana leswi dungaka nhloko.—2 Kor. 7:1; Efe. 5:18; 1 Pet. 4:3, 4.
(6) Wa swi twisisa leswaku i swa risima ku papalata vanghana vo biha.—1 Kor. 15:33.
(7) A nga ha ri xirho xa minhlangano hinkwayo ya vukhongeri bya mavunwa lebyi kumbexana a ri eka byona eku sunguleni. U tshikile ku ya etinhlengeletanwini ta byona ni ku seketela kumbe ku endla mitirho ya byona.—2 Kor. 6:14-18; Nhlav. 18:4.
(8) A nga ha ngheneleli eka timhaka hinkwato ta tipolitiki ta misava.—Yoh. 6:15; 15:19; Yak. 1:27.
(9) U kholwa ni ku tlhela a hanya hi ku pfumelelana ni leswi Esaya 2:4 yi swi vulaka hi timhaka ta matiko.
(10) U swi lava hi mbilu hinkwayo ku va Mbhoni ya Yehovha.—Ps. 110:3.
9 Loko vakulu va nga tiyiseki leswaku xichudeni xi titwa njhani hi yin’wana ya timhaka leti, va fanele va xi vutisa, kumbexana va nga ha tirhisa Matsalwa lama kombisiweke laha ku seketela bulo ra vona. I swa nkoka leswaku xi swi tiva leswaku lava va hlanganyelaka ni Timbhoni ta Yehovha entirhweni wa tona wa ku chumayela, va fanele ku hanya hi ku pfumelelana ni swilaveko leswi swa Matsalwa. Tinhlamulo ta xona ti ta pfuna vakulu va vona loko xi swi tiva leswi rindzeriweke eka xona niloko xi faneleka hi ndlela leyi enerisaka lerova xi nga sungula ku ya ensin’wini.
10 Handle ko dya nkarhi, vakulu va fanele va byela xichudeni loko xi faneleka. Hakanyingi, leswi swi nga ha endliwa loko va heta ku bula. Loko xi faneleka, vakulu va nga ha xi amukela hi mandla mambirhi tanihi muhuweleri. (Rhom. 15:7) Xi fanele xi khutaziwa ku sungula ku ya ensin’wini hi ku hatlisa hilaha swi nga kotekaka hakona ni ku tisa xiviko xa xona xa ntirho wa nsimu loko n’hweti yi hela. Vakulu va nga ha hlamusela leswaku loko xichudeni xa Bibele xi faneleka ku va muhuweleri la nga khuvuriwangiki, xi endleriwa Rhekhodo Ya Muhuweleri Ya Vandlha endzhaku ka loko xi vike ntirho wa nsimu ro sungula, kutani rhekhodo yoleyo yi ta nghenisiwa efayilini ya vandlha. Xikongomelo xa vakulu xo teka rungula leri eka muhuweleri hi leswaku nhlangano wu ta kota ku khathalela mintirho ya Timbhoni ta Yehovha emisaveni hinkwayo ni leswaku muhuweleri a ta kota ku endla mintirho ya moya a tlhela a seketeriwa hi tlhelo ra moya. Ku engetela kwalaho, vakulu va nga tsundzuxa vahuweleri lavantshwa leswaku rungula rihi na rihi ra munhu wo karhi ri hlayisiwa hi ku landza Global Data Protection Policy ya Timbhoni ta Yehovha leyi kumekaka eka jw.org.
11 Loko hi n’wi tiva kahle muhuweleri lontshwa ni ku tlangela ntirho lowu a wu endleke, swi nga ha n’wi khutaza swinene. Swi nga ha n’wi susumetela leswaku a hisekela ku vika ntirho wakwe wa nsimu nkarhi ni nkarhi ni ku tirhela Yehovha.—Filp. 2:4; Hev. 13:2.
12 Loko vakulu va heta ku endla xiboho xa leswaku xichudeni xa Bibele xa faneleka ku hlanganyela ensin’wini, va fanele va xi nyika buku leyi nge Nhlangano Lowu Endlaka Ku Rhandza Ka Yehovha, leyi nga ta va ya xona n’wini. Loko xi heta ku tisa xiviko xa xona xa nsimu ro sungula, ku fanele ku endliwa xitiviso xo koma evandlheni lexi vulaka leswaku se i muhuweleri la nga khuvuriwangiki.
KU PFUNA VANA
13 Vana na vona va nga ha faneleka ku va vahuweleri va mahungu lamanene. Yesu u amukele vana kutani a va katekisa. (Mat. 19:13-15; 21:15, 16) Hambileswi vutihlamuleri bya ku kurisa vana byi byarhisiweke vatswari, van’wana evandlheni va nga ha tsakela ku pfuna vana lava timbilu ta vona ti va susumetaka leswaku va hlanganyela entirhweni wo chumayela hi Mfumo. Loko u ri mutswari, xikombiso xa wena lexinene ensin’wini xi ta ku pfuna swinene leswaku u khutaza vana va wena va hiseka entirhweni lowu va wu endlelaka Xikwembu. Loko n’wana a tikhome kahle naswona mbilu yakwe yi n’wi susumetela ku vulavula hi ripfumelo rakwe, hi ku byela van’wana mahungu lamanene, hi yihi ndlela yin’wana leyi a nga pfuniwaka ha yona?
14 Swi ta va swi fanerile leswaku mutswari a ya eka un’wana wa vakulu lava nga swirho swa Komiti ya Ntirho ya Vandlha, a bula na yena ku vona loko n’wana a faneleka ku va muhuweleri. Muhlanganisi wa huvo ya vakulu u ta hlela leswaku vakulu vambirhi (un’wana wa vona u fanele a va xirho xa komiti ya vandlha) va hlangana ni n’wana ni (va-)mutswari kumbe loyi a n’wi hlayisaka loyi a nga Mbhoni. Loko n’wana a ri ni vutivi bya xisekelo bya ntiyiso wa Bibele naswona a kombisa leswaku u lava ku hlanganyela ensin’wini, leswi swi ta kombisa leswaku u endle nhluvuko lowunene. Endzhaku ko kambisisa leswi ni swin’wana leswi kambisisiwaka eka vanhu lavakulu, vakulu volavo vambirhi va nga ha endla xiboho xa leswaku n’wana yoloye wa faneleka kumbe a nga faneleki ku va muhuweleri la nga khuvuriwangiki. (Luka 6:45; Rhom. 10:10) Loko vakulu va hlangana ni n’wana, a swi bohi leswaku va bula hi timhaka tin’wana leti hakanyingi va ti kambisisaka ni munhu lonkulu leti swi nga erivaleni leswaku a ti n’wi khumbi n’wana.
15 Loko va hlangane ni n’wana, vakulu va fanele va n’wi bumabumela hikwalaho ka nhluvuko lowu a wu endlaka ni ku n’wi khutaza leswaku a tivekela pakani ya ku khuvuriwa. Tanihi leswi swi nga erivaleni leswaku vatswari va tirhe hi matimba leswaku va endla leswaku ntiyiso wu dzika eka n’wana wa vona, na vona va fanele va bumabumeriwa. Leswaku va pfuna vatswari leswaku va ya emahlweni va pfuna n’wana wa vona, vakulu va fanele va va komba xihloko lexi nge “Rungula Leri Yaka Eka Vatswari,” lexi kumekaka eka matluka 179-181.
KU TINYIKETELA NI NKHUVULO
16 Loko se u tiva Yehovha ni ku n’wi rhandza hi ku hanya hi ku ya hi swilaveko swakwe ni hi ku hlanganyela ensin’wini, u fanele u tiyisa vuxaka bya wena na yena. Njhani? Hi ku tinyiketela eka yena kutani u kombisa ku tinyiketela koloko hi ku khuvuriwa ematini.—Mat. 28:19, 20.
17 Ku tinyiketela swi endla leswaku munhu a hlawuleka, a faneleka ku endla ntirho wo kwetsima. Ku tinyiketela eka Xikwembu swi vula ku ya eka xona hi xikhongelo kutani u xi tshembisa hi mbilu hinkwayo leswaku u ta xi tirhela evuton’wini bya wena u tlhela u famba hi tindlela ta xona. Swi vula leswaku u ta gandzela xona ntsena hilaha ku nga heriki. (Det. 5:9) Lexi i xiboho lexi munhu a tiendlelaka xona hi yexe, exihundleni. Ku hava un’wana la nga ku endlelaka xona.
18 Kambe, ku byela Yehovha u ri swaku leswaku u lava ku n’wi tirhela a swi enelanga. U fanele u kombisa van’wana leswaku u tinyiketele eka Xikwembu. U swi kombisa erivaleni hi ku khuvuriwa ematini, hilaha Yesu a endleke hakona. (1 Pet. 2:21; 3:21) Loko se u endle xiboho xa ku tirhela Yehovha naswona u lava ku khuvuriwa, u fanele u endla yini? U fanele u tivisa muhlanganisi wa huvo ya vakulu. Yena u ta hlela leswaku vakulu vo hlayanyana va bula na wena, ku tiyisekisa leswaku u hanya hi ku pfumelelana ni swilaveko swa Xikwembu swa lava lavaka ku khuvuriwa. Leswaku u kuma rungula leri engetelekeke, hi kombela u pfuxeta xihloko lexi nge “Rungula Leri Yaka Eka Muhuweleri La Nga Khuvuriwangiki,” leri kumekaka eka matluka 182-184 ya buku leyi, ni lexi nge “Swivutiso Swa Lava Lavaka Ku Khuvuriwa” eka matluka 185-207.
KU VIKA NHLUVUKO WA NTIRHO WA NSIMU
19 Swiviko swa ku kula ka vugandzeri lebyi tengeke emisaveni hinkwayo swi ve xikhutazo xa xiviri eka vanhu va Yehovha emalembeni lama hundzeke. Ku sukela loko Yesu Kreste a byele vadyondzisiwa vakwe ro sungula leswaku mahungu lamanene ma ta chumayeriwa emisaveni hinkwayo, Vakreste va ntiyiso va lave ku tiva kahle leswaku leswi swi ta endliwa njhani.—Mat. 28:19, 20; Mar. 13:10; Mint. 1:8.
20 Valandzeri vo sungula va Yesu a va swi tsakela ku tiva hi ta nhluvuko lowu nga kona entirhweni wo chumayela. (Mar. 6:30) Buku ya Bibele ya Mintirho yi hi byela leswaku a ku ri ni vanhu va kwalomu ka 120 loko moya lowo kwetsima wu chululeriwa eka vadyondzisiwa hi Pentekosta ya 33 C.E. Hi ku hatlisa nhlayo ya vadyondzisiwa yi andzile yi ya kwalomu ka 3 000 ivi yi ya kwalomu ka 5 000. Ku endliwe xiviko lexi khutazaka xa leswaku “Yehovha u hambeta a va tisela lava ponisiwaka, siku ni siku” ni leswaku “ntshungu lowukulu wa vaprista wu yingis[e] vupfumeri lebyi.” (Mint. 1:15; 2:5-11, 41, 47; 4:4; 6:7) Vadyondzisiwa va fanele va khutazekile loko va twa mahungu lawa ya ku engeteleka ka nhlayo ya vadyondzisiwa! Kunene swiviko leswi leswinene swi fanele swi va susumetele ku ya emahlweni ni ntirho lowu wu humaka eka Xikwembu, ku nga khathariseki nxaniso lowukulu lowu tisiweke hi varhangeri va vukhongeri va Vayuda!
21 Kwalomu ka 60 ku ya eka 61 C.E., epapileni rakwe leri a ri tsaleleke Vakolosa, Pawulo u vike leswaku mahungu lamanene ma ‘veka mihandzu naswona ma andza emisaveni hinkwayo’ naswona se ma ‘chumayeriwe eka ntumbuluko hinkwawo lowu nga ehansi ka tilo.’ (Kol. 1:5, 6, 23) Vakreste vo sungula a va yingisa Rito, naswona moya lowo kwetsima wu va tiyisile leswaku va hetisisa ntirho wo chumayela emisaveni hinkwayo ku nga si fika makumu ya mafambiselo ya swilo ya Vayuda hi 70 C.E. Mawaku ndlela leyi va khutazekeke ha yona vatirhi lavo tshembeka lava nga Vakreste loko va twa swiviko swa ntirho lowu endliweke!
Xana swa ku tsakisa ku vona leswaku ntirho wo chumayela wu le ku endliweni makumu ma nga si fika?
22 Hilaha ku fanaka, nhlangano wa Yehovha wa manguva lawa wu lwela ku hlayisa tirhekhodo letinene ta ntirho lowu endliwaka eku hetisiseni ka Matewu 24:14, leyi nge: “Mahungu lamanene lawa ya Mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” Leswi hi nga malandza lama tinyiketeleke ya Xikwembu, hi ni ntirho wa xihatla lowu hi faneleke hi wu endla. Hi fanele hi endla hinkwaswo leswi hi nga swi kotaka leswaku ntirho wo chumayela wu endliwa hi rixaladza makumu ma nga si fika. Yehovha u ta endla leswaku ntirho lowu wu hetiwa kutani loko hi hlanganyela eka wona, Yehovha u ta hi amukela.—Ezek. 3:18-21.
XIVIKO XA WENA XA NTIRHO WA NSIMU
23 Kahle-kahle, hi fanele hi vika yini? Xiphephana xa Field Service Report (Xiviko xa Ntirho wa Nsimu) lexi endliweke hi nhlangano xi kombisa rungula leri hi faneleke hi ri vika. Hambiswiritano, tinhlamuselo leti landzelaka ti ta pfuna.
24 Eka xibokisana lexi ku tsariweke “Placements (Printed and Electronic),” tsala nhlayo ya minkandziyiso leyi u yi fambiseke kumbe leyi u yi rhumeleke vanhu lava nga riki Timbhoni hi foni. Eka xibokisana lexi nge “Video Showings,” tsala leswaku u yi kombise kangani yinʼwana ya tivhidiyo ta hina.
25 Loko u vika “Return Visits (Maendzo yo Vuyela),” hlaya maendzo hinkwawo yo vuyela lama u ma endleke hi xikongomelo xo kondletela ku tsakela loku kombisiweke hi vanhu lava nga riki Timbhoni leti tinyiketeleke ni ku khuvuriwa. Riendzo ro vuyela ri nga endliwa hi ku endzela munhu, hi ku tsala papila, hi riqingho, hi ku rhumela rungula kumbe e-mail kumbe ku yisa minkandziyiso yo karhi. Nkarhi ni nkarhi loko u fambisa dyondzo ya le kaya ya Bibele, u nga yi hlaya tanihi riendzo ro vuyela. Mutswari a nga ha vika riendzo rin’we ro vuyela vhiki ni vhiki loko a rhangela eka vugandzeri bya ndyangu loko ku ri ni n’wana loyi a nga khuvuriwangiki.
26 Hambileswi dyondzo ya Bibele yi fambisiwaka kan’we hi vhiki, yi fanele yi vikiwa kan’we hi n’hweti. Vahuweleri va fanele va tsala nhlayo ya tidyondzo ta Bibele leti va ti fambiseke nʼhweti yoleyo. Tidyondzo ta Bibele leti vikiwaka ti nga ha katsa leti fambisiweke ni vanhu lava nga tinyiketelangiki leswaku va va Timbhoni leti khuvuriweke. U nga ha tlhela u hlaya dyondzo ya Bibele leyi u yi fambiseke ni makwerhu loyi a holeke hi ku kongomisiwa hi xirho xa komiti ya ntirho kumbe leyi u yi fambiseke ni munhu loyi a ha ku khuvuriwaka loyi a nga si hetaka ku hlaya buku leyi nge Tiphine Hi Vutomi Hilaha Ku Nga Heriki!
27 I swa nkoka ku tsala xiviko lexi pakanisaka laha ku nge “Hours (Tiawara).” Entiyisweni, lowu i nkarhi lowu u wu hetaka u chumayela hi yindlu ni yindlu, u endla maendzo yo vuyela, u fambisa tidyondzo ta Bibele kumbe u chumayela hi xitshuketa kumbe u lo hlela eka vanhu lava nga riki Timbhoni leti tinyiketeleke ni ku khuvuriwa. Loko vahuweleri vambirhi va tirha swin’we, havumbirhi va nga vika nkarhi wolowo, kambe i un’we ntsena la nga ta vika maendzo yo vuyelo lama endliweke kumbe tidyondzo ta Bibele leti fambisiweke. Vatswari havambirhi lava khomisaneke eku leteleni ka vana va vona hi nkarhi wa Vugandzeri bya Ndyangu bya nimadyambu va nga ha vika nkarhi lowu nga tluliki awara hi vhiki. Vamakwerhu lava nyikelaka tinkulumo ta le rivaleni va nga ha vika nkarhi lowu va wu hetaka va ri karhi va nyikela tinkulumo leti. Makwerhu loyi a tolokaka nkulumo ya le rivaleni na yena a nga ha vika. Ku ni mintirho yin’wana ya nkoka leyi hi nga wu vikiki nkarhi lowu hi wu tirhisaka eka yona, tanihi ku tilunghiselela ku ya ensin’wini, ku va kona enhlengeletanweni ya ntirho wa nsimu ni loko u ya kumbe u vuya ensin’wini ni swin’wana.
28 Muhuweleri un’wana ni un’wana u fanele a landzela ripfalo rakwe leri leteriweke hi Bibele a tlhela a khongela loko a lava ku tsala nkarhi lowu a wu heteke a ri karhi a chumayela. Vahuweleri van’wana va chumayela etindhawini leti nga ni vanhu vo tala, loko van’wana va tirha ensin’wini leyi nga ni vaaki vatsongo naswona swi lavaka leswaku va famba mpfhuka. Tindhawu to chumayela eka tona a ti fani; ni ndlela leyi vahuweleri va langutaka nsimu ya vona ha yona a yi fani. Huvo leyi Fumaka a yi sindzisi mavandlha hinkwawo emisaveni leswaku ma landzela ripfalo ra yona ra ndlela leyi ma faneleke ma vika ha yona ntirho wa nsimu, ku hava loyi a hlawuriweke ku kambela leswaku hi xi vika kahle xiviko xa hina xa nsimu.—Mat. 6:1; 7:1; 1 Tim. 1:5.
29 Nkarhi lowu hi wu tirhisaka ensin’wini wu fanele wu vikiwa hi tiawara leti heleleke. Vanhu lava nga ha vikaka nkarhi lowu nga endliki awara i vahuweleri lava nga kotiki ku endla swo tala hikwalaho ka ku dyuhala, lava tshamaka emakaya hikwalaho ka vuvabyi kumbe ku lamala, lava tshamaka emakaya ya vadyuhari kumbe lava lamaleke hi tindlela tin’wana. Muhuweleri wo tano a nga ha vika ntirho wakwe wa nsimu hi swiyenge swa timinete ta 15. Hambiloko a lo chumayela timinete ta 15 ntsena hi n’hweti, u fanele a ti vika. U ta ya emahlweni a hlayiwa tanihi muhuweleri wa Mfumo la humaka nkarhi hinkwawo. Lunghiselelo leri ri tirha ni le ka muhuweleri la tsandzekaka ku tirha nkarhi wo tala, kumbexana a tsandzeka ku famba ku ringana n’hweti kumbe ku tlula hikwalaho ka ku vabya ngopfu kumbe ku vaviseka. Lunghiselelo leri i ra lava hakunene va tsandzekaka ku endla swo tala entirhweni wa vona. Komiti ya ntirho hi yona yi nga ta endla xiboho xa leswaku muhuweleri wa faneleka ku va eka lunghiselelo leri kumbe a nga faneleki.
RHEKHODO YA MUHUWELERI YA VANDLHA
30 Xiviko xa wena xa ntirho wa nsimu xa n’hweti ni n’hweti xa hlanganisiwa kutani xi tsariwa eka Rhekhodo Ya Muhuweleri Ya Vandlha. Tirhekhodo leti i ta vandlha. Loko u kunguhata ku rhurhela evandlheni rin’wana, tiyiseka leswaku u byela vakulu. Matsalana u ta tiyiseka leswaku rhekhodo ya wena ya fambisiwa yi yisiwa evandlheni leri u yaka eka rona. Hi ndlela yoleyo vakulu va ta kota ku ku amukela ni ku ku pfuna hi tlhelo ra moya. Loko u ta famba evandlheni ra ka n’wina swa nkarhinyana lowu nga tluliki tin’hweti tinharhu, yana emahlweni u rhumela swiviko swa wena swa nsimu nkarhi ni nkarhi evandlheni ra le kaya.
XIVANGELO XO VIKA NTIRHO WA HINA WA NSIMU
31 Xana nkarhi wun’wana wa rivala ku yisa xiviko xa wena xa ntirho wa nsimu? Handle ko kanakana hinkwerhu hi lava ku tsundzuxiwa nkarhi ni nkarhi. Kambe loko hi hlakulela ku va ni langutelo lerinene hi xiviko xa vutirheli bya hina bya nsimu naswona hi twisisa leswaku ha yini swi ri swa nkoka leswaku hi endla tano, swi nga ha hi olovela ku tsundzuka ku vika ntirho wa hina wa nsimu hi mfanelo.
32 Van’wana va vutisile: “Tanihi leswi Yehovha a swi tivaka leswi ndzi swi endlaka entirhweni wakwe, ha yini ndzi fanele ndzi vika evandlheni?” I ntiyiso, Yehovha wa swi tiva leswi hi swi endlaka naswona wa swi kota ku vona loko ntirho wa hina hi wu endla hi moya-xiviri hinkwawo kumbe loko ku ri ku hetisisa nawu ntsena. Kambe, tsundzuka leswaku Yehovha u tsale nhlayo ya masiku lawa Nowa a ma heteke engalaveni ni nhlayo ya malembe lawa Vaisrayele va ma heteke emananga. Xikwembu xi tsale nhlayo ya lava a va tshembekile swin’we ni ya lava a va nga yingisi. Xi tsale hi ta ku hluriwa ka tiko ra Kanana hakatsongo-tsongo ni mintirho ya vaavanyisi lava tshembekeke va Israyele. Ina, xi tsale timhaka to tala malunghana ni mintirho ya malandza ya xona. Xi huhutele rungula leri tsariweke ra leswi endlekeke, xi hi kombisa kahle leswaku xi swi teka swi ri swa nkoka ku hlayisa rungula leri pakanisaka.
33 Swiendlakalo swa matimu leswi tsariweke eBibeleni swi kombisa ndlela leyi swiviko ni marungula lama hlayisiweke hi vanhu va Yehovha swi pakanisaka ha yona. Eswiyin’weni swo tala, rungula ro karhi ra Bibele a ri nga ta va na ntikelo loko tinhlayo to karhi a ti nga boxiwanga hi ku kongoma. Xiya swikombiso leswi landzelaka: Genesa 46:27; Eksoda 12:37; Vaavanyisi 7:7; 2 Tihosi 19:35; 2 Tikronika 14:9-13; Yohane 6:10; 21:11; Mintirho 2:41; 19:19.
34 Hambileswi entiyisweni swiviko swa hina swi nga katsiki hinkwaswo leswi hi swi endlaka evugandzerini bya Yehovha, swi ni xikongomelo lexi twisisekaka eka nhlangano wa Yehovha. Eka lembe-xidzana ro sungula, loko vaapostola va vuya eka tsima ro chumayela, va vikele Yesu “swilo hinkwaswo leswi va swi endleke ni ku swi dyondzisa.” (Mar. 6:30) Minkarhi yin’wana, swiviko swi nga ha kombisa leswaku hi lava mpfuno eka swiyenge swin’wana swa ntirho wa hina wo chumayela. Tinhlayo leti ti nga ha kombisa leswaku hi endle nhluvuko eka mintirho yin’wana ya hina kambe etindhawini tin’wana nhlayo ya vahuweleri yi engetelekile kumbe yi hungutekile. Swi nga ha endleka leswaku ku laveka xikhutazo kumbe ku ri ni swiphiqo leswi faneleke swi tlhantlhiwa. Valanguteri lava nga ni vutihlamuleri va ta xiya swiviko leswi kutani va lwela ku lulamisa xiyimo xihi ni xihi lexi swi nga ha endlekaka xi kavanyeta nhluvuko wa munhu hi yexe kumbe wa vandlha hinkwaro.
35 Nakambe swiviko swi pfuna nhlangano ku vona laha ku nga ni xilaveko lexikulu xa vatirhi ensin’wini. Hi tihi tindhawu leti humesaka mihandzu ngopfu? Hi kwihi laha ku nga ni nhluvuko lowutsongo? Hi tihi tibuku leti lavekaka leti nga pfunaka vanhu leswaku va dyondza ntiyiso? Swiviko swi pfuna nhlangano leswaku wu kunguhata swilaveko swa tibuku etindhawini to hambana-hambana ta misava ni ku endla leswaku ti nga pfumaleki leti nga ta tirhisiwa entirhweni wo chumayela.
36 Eka vo tala va hina, swiviko swa hi khutaza. Xana a hi tsaki loko hi twa hi ta ntirho wo chumayela mahungu lamanene emisaveni hinkwayo, lowu vamakwerhu va wu endlaka? Swiviko swa ku engeteleka ka tinhlayo ta vahuweleri swi hi pfuna ku vona ku ndlandlamuka ka nhlangano wa Yehovha. Mintokoto ya hi khutaza ni ku endla leswaku hi hiseka, yi hi susumetela ku hlanganyela hi xitalo entirhweni wo chumayela. (Mint. 15:3) Ku tirhisana ka hina ni vandlha emhakeni yo tisa swiviko swa ntirho wa nsimu i ka nkoka naswona ku kombisa ndlela leyi hi khathalaka ha yona hi vamakwerhu emisaveni hinkwayo. Hi ndlela leyi, hi kombisa leswaku ha titsongahata eka nhlangano wa Yehovha.—Luka 16:10; Hev. 13:17.
KU TIVEKELA TIPAKANI
37 A xi kona xivangelo xa leswaku hi pimanisa ntirho wa hina wa nsimu ni wa van’wana. (Gal. 5:26; 6:4) Swiyimo swa vanhu a swi fani. Hi hala tlhelo, hi nga ha pfuneka swinene loko un’wana ni un’wana a tivekela tipakani ta yena n’wini, leswi swi nga hi pfuna leswaku hi swi kota ku kambela nhluvuko wa hina entirhweni wa nsimu. Loko hi ti fikelela hi ta titwa hi enerisekile hikuva hi ta va hi tiva leswaku hi wu endlile ntirho wa hina.
38 Swi le rivaleni leswaku sweswi Yehovha u hatlisisa ku hlengeletiwa ka vanhu volavo lava a nga ta va ponisa “enhlomulweni lowukulu.” Hi hanya enkarhini lowu ku hetisekaka vuprofeta bya Esaya lebyi nge: “Lontsongo u ta va gidi, kasi lontsongo ngopfu u ta va tiko ra matimba. Mina Yehovha, ndzi ta swi hatlisisa hi nkarhi wa swona.” (Nhlav. 7:9, 14; Esa. 60:22) Hakunene i lunghelo ku va vachumayeri va mahungu lamanene emasikwini lawa yo hetelela!—Mat. 24:14.