Endla Ntirho Wo Kwetsima Vusiku Ni Nhlikanhi
1 Hi nyikiwe lunghelo ro hlawuleka. I ra ku va timbhoni ta Yehovha. Hi xiphemu xa nhlengeletano ya misava hinkwayo ya vaevhangeli lava tirhisiwaka hi Yehovha leswaku a hetisisa ntirho lowukulu ngopfu wa ku twarisa Mfumo eka mintirho leyi nga tshama yi endliwa! (Mar. 13:10) Hikwalaho ka xihatla xa minkarhi ya hina, xana hi hlanganyela entirhweni lowu hi xitalo hi laha hi nga kotaka ha kona?
2 A hi swi tivi leswaku eku heteleleni ku ta va ku ri vangani lava nga ta angula eku chumayeleni ka hina. Yehovha wa hi tiyisekisa leswaku ku ta va “ntshungu lowukulu” lowu hinkwawo ka wona wu tiviwaka hi ku n’wi “tirhela vusiku ni nhlekanhi.” (Nhlav. 7:9, 15) Ku tlula ntlhanu wa timiliyoni ta Timbhoni leti ana se ti khomekeke hi ntirho wa Xikwembu a ko va vayingiseri lava tsakelaka ntsena, kumbe vanhu lava taka eminhlanganweni ntsena. I vatirhi lava twarisaka mahungu lamanene emisaveni hinkwayo!
3 Masiku hinkwawo, ku ni minkarhi yo dzunisa Yehovha, entirhweni wa nsimu kumbe hi xitshuketa. Anakanya hi vumbhoni lebyikulu lebyi nga nyikeriwaka loko un’wana ni un’wana wa hina o avelana ntiyiso ni munhu un’we ntsena siku na siku. Ku tlangela ka hina Yehovha ku fanele ku hi susumetela ku vulavula hi yena hi ku hiseka.—Ps. 92:1, 2.
4 Pfuna Van’wana Leswaku Va Endla Ntirho Wo Kwetsima: Yehovha u hambeta a hi katekisa hi ku andzisa. (Hag. 2:7) Eka lembe ra ntirho leri nga hundza matiko lama tirhaka ehansi ka rhavi ra Afrika Dzonga ma fambise nhlayo-xikarhi ya tidyondzo ta Bibele ta le kaya ta 65 170 n’hweti na n’hweti. Pakani ya hina yo dyondza ni vanhu lava i ku va pfuna leswaku va va vadyondzisiwa va Yesu. (Mt. 28:19, 20) Vo tala va vona ana se va endle nhluvuko lowunene hi ku va kona eminhlanganweni. Va sungule ku “vulavula hi mintirho leyikulu ya Xikwembu” leyi va yi dyondzeke va byela lava va va toloveleke. (Mint. 2:11) Xana sweswi va nga rhambiwa ku hlanganyela evutirhelini bya le rivaleni?
5 Hi April hi fanele hi endla matshalatshala yo hlawuleka leswaku hi rhamba lavantshwa lava fanelekaka, leswaku va hlanganyela na hina entirhweni wa nsimu. Xana xichudeni xa wena xi phofule ku navela ku endla tano? Loko swi ri tano, xana xi na tona timfanelo leti nge Matsalweni? (Vona buku leyi nge Vutirheli Bya Hina, matluka 97-9.) Loko xichudeni xi navela ku hlanganyela entirhweni wa nsimu, bula hi ku navela ka xona ni mulanguteri la ungamelaka, la nga ta hlela leswaku vakulu vambirhi va kambisisa mhaka leyi. Loko xichudeni xi faneleka ku amukeriwa tanihi muhuweleri la nga khuvuriwangiki, xi rhambe leswaku xi famba na wena ensin’wini. Mulanguteri wa ntirho ni mufambisi wa dyondzo ya buku va fanele va xalamukela ngopfu-ngopfu ku pfuna lava va nga ha fanelekaka ku sungula ku va vahuweleri hi April.
6 Vatswari va nga ha xiya loko vana va vona va fanelekela ku va vahuweleri lava nga khuvuriwangiki. (Ps. 148:12, 13) Loko n’wana wa wena a navela ku tiphofula hi yexe entirhweni wa Mfumo naswona a ri na mahanyelo lamanene u nga ha tshinelela nkulu la nga wa komiti ya ntirho leswaku u bula na yena hi xiyimo xa yena. Endzhaku ka loko va vonanile na wena ni n’wana, vakulu vambirhi va ta endla xiboho xa loko n’wana a faneleka ku hlayiwa tanihi muhuweleri. I mhaka yo tsakisa swinene loko vana va hlanganyela na hina eku dzuniseni Xikwembu!
7 I Yehovha ntsena la faneriwaka hi ntirho wa hina lowo kwetsima. (Lk. 4:8) Onge un’wana ni un’wana wa hina a nga tirhisa lunghelo ra hina lero hlawuleka a n’wi dzunisa “swinene ngopfu.”—Ps. 109:30, ringanisa NW; 113:3.