Hisekela Leswi Nga Swinene!

¹ Tanihi leswi hi nghenaka eka nguva ya Xitsundzuxo xa 2003, hi ni swivangelo swo tala swa ku “hisekela leswi nga swinene.” (1 Pet. 3:13) Xivangelo lexikulu swinene i gandzelo ra nkutsulo ra Yesu Kreste. (Mat. 20:28; Yoh. 3:16) Malunghana ni leswi muapostola Petro u tsarile: “Swilo leswi onhakaka, silivhere kumbe nsuku, a mi kutsuriwanga ha swona endleleni ya ku tikhoma ka n’wina loku nga vekiki mihandzu. . . . Kambe a ku ri hi ngati ya risima, leyi fanaka ni ya xinyimpfana lexi nga solekiki, lexi pfumalaka xivati, yi nga ya yena Kreste.” (1 Pet. 1:18, 19) Ku tlangela ka hina xikombiso lexikulu ngopfu xa rirhandzu swi hi susumetela ku tshama hi ri karhi hi endla leswinene, hi ku xiya leswaku Yesu u “[tinyiketele] hikwalaho ka hina leswaku a hi kutsula eka ku kala nawu kun’wana ni kun’wana ni ku tibasisela vanhu lava nga va yena, lava hisekelaka mintirho leyinene.”—Tito 2:14; 2 Kor. 5:14, 15.

² Loko hi endla leswinene emahlweni ka Xikwembu, hi tsakela vuxaka lebyinene na xona ni ku va ehansi ka nkhathalelo wa xona wa rirhandzu. Petro u ye emahlweni a ku: “Loyi a rhandzaka vutomi ni ku vona masiku lamanene, . . . a a fularhele leswo biha kutani a endla leswi nga swinene; a a lave ku rhula, a ku landzelela. Hikuva mahlo ya Yehovha ma le ka lavo lulama, naswona tindleve ta yena ti yingisela swikombelo swa vona.” (1 Pet. 3:10-12) Eminkarhini leyi ya mangava, i nkateko lowukulu ku tiva leswaku Yehovha u hi rindzile naswona u lunghekele ku hi lwela, “a [hi] hlayisa ku fana ni ndzololo ya tihlo rakwe.”—Det. 32:10; 2 Tikr. 16:9.

³ Hambileswi a va langutane ni miringo, Vakreste vo sungula lava Petro a a tsalela vona va ngheniwe hi moya wa ku hiseka lowu a wu nga ta herisiwa hi munhu, naswona va haxe mahungu lamanene hilaha va nga kotaka hakona. (1 Pet. 1:6; 4:12) Swi tano ni le ka vanhu va Xikwembu namuntlha. Hambileswi hi hanyaka “[eminkarhini] ya mangava leyi swi nonon’hwaka ku langutana na yona,” ku tlangela vululami bya Yehovha swi hi susumetela ku endla ku rhandza ka Xikwembu hi ku hiseka. (2 Tim. 3:1; Ps. 145:7) A hi kambisiseni yin’wana ya mintirho leyinene leyi hi nga ta yi endla hi nguva ya Xitsundzuxo.

⁴ Rhambela Van’wana eXitsundzuxweni: Ndlela yin’wana leyi hi nga ku kombisaka ha yona ku tlangela nyiko yo hlawuleka swinene ya nkutsulo i ku va kona eku tlangeleni ka xitsundzuxo xa lembe na lembe xa rifu ra Yesu, lexi lembe leri xi nga ta tlangeriwa hi Ravunharhu, April 16, endzhaku ka ku pela ka dyambu. (Luka 22:19, 20) Eka xiviko xa n’wexemu xa mavandlha ya 94 600 emisaveni hinkwayo, hi kume ntsengo wa vanhu va 15 597 746 lava veke kona exitsundzuxweni! Nhlayo leyi a yi hundza ya lembe ra le mahlweni ka rero hi 220 000.

⁵ I vanhu vangani lava nga ta va kona lembe leri? Sweswo swi ta titshega ngopfu hi matshalatshala ya hina yo khutaza van’wana leswaku va hlanganyela na hina. Sungula hi ku endla nxaxamelo wa hinkwavo lava u rhandzaka ku va rhamba. U fanele u rhanga hi vandyangu wa wena eka nxaxamelo lowu. Loko u ri ni munghana wa vukati loyi a nga riki mupfumeri, n’wi tivise leswaku u nga tsaka swinene loko a famba na wena. Wanuna un’wana loyi a nga riki mupfumeri u vule leswaku u ye eXitsundzuxweni lembe leri nga hundza hileswi a swi voneke leswaku vukona bya yena a byi vula swo tala eka nsati wakwe. Lava landzelaka eka nxaxamelo wa wena ku nga va maxaka, vaakelani, lava u tirhaka na vona kumbe lava u nghenaka na vona xikolo. Tiyimisele ku rhamba swichudeni swa wena swa Bibele.

⁶ Endzhaku ko endla nxaxamelo wa wena, veka nkarhi lowu u nga ta ya rhamba un’wana ni un’wana ha wona. Tirhisa swiphephana swa xirhambo xa Xitsundzuxo. Leswaku u pfuna vanhu va tsundzuka nkarhi lowu Xitsundzuxo xi nga ta va ha wona ni ndhawu ya kona, tsala nkarhi ni ndhawu emakumu ka xiphephana xa xirhambo. Loko siku ra April 16 ri tshinela, tsundzuxa lava nga enxaxamelweni wa wena, hi ku va endzela kunene kumbe hi ku va bela riqingho. A hi pfuneni vanhu vo tala hilaha hi nga kotaka hakona leswaku va va kona eka xiendlakalo lexi xo hlawuleka swinene.

⁷ Pfuna Lava Vaka Kona eXitsundzuxweni: Minkarhi hinkwayo nkarhi wa Xitsundzuxo i nkarhi lowu tsakisaka. Hi kota ku amukela vanhu lava nga viki kona eminhlanganweni ya hina. Endla malunghiselelo yo fika ka ha ri nkarhi ni ku tshamanyana endzhaku ka xitsundzuxo, loko swiyimo swi ku pfumelela. Vana wo rhanga ku titivisa eka vanhu lavantshwa lava teke. Vana ni xinghana ni moya wa ku amukela vaendzi.—Rhom. 12:13.

⁸ Xana van’wana lava veke kona eXitsundzuxweni va nga pfuniwa ku endla nhluvuko lowu xiyekaka hi tlhelo ra moya hi ku dyondza na vona Bibele? Ringeta ku kuma mavito ni tiadirese ta hinkwavo lava nga riki na munhu loyi a va endzelaka, leswaku u ta hambeta u va pfuna. Hi mpfuno wa wena, van’wana va vona va nga endla nhluvuko ku fikela laha va fanekelaka ku va vahuweleri lava nga khuvuriwangiki ku nga si fika Xitsundzuxo xa lembe leri taka. Loko u endzela vanhu lava veke kona eXitsundzuxweni, tlhela u va rhambela eka nkulumo yo hlawuleka leyi nga ta nyikeriwa hi April 27.

⁹ Xana U Nga Teka Vuphayona Bya Nkarhinyana Lembe Leri? Lembe na lembe ku hisekela ka hina Yehovha ku hi susumetela ku tinyikela hilaha ku heleleke entirhweni wa nsimu hi tin’hweti ta ntirho wo hlawuleka. Hi March na April 2002, eAfrika Dzonga ni le matikweni lama nga ehansi ka rhavi ra hina, vanhu vo ringana 14 186 va teke vuphayona bya nkarhinyana. Nhlayo leyi a hi nhlohlorhi ntsena kambe yi kombisa matshalatshala ya mavandlha hinkwawo yo chumayela mahungu lamanene hi ku hiseka hi nguva ya Xitsundzuxo.

¹⁰ Vandlha rin’wana leri nga ni vahuweleri va 107 ni maphayona ya nkarhi hinkwawo ya 9 ri vike leswaku ri ve ni “n’hweti yo hlawuleka” hi April ya lembe leri hundzeke, laha a ku ri ni maphayona ya nkarhinyana ya 53, ku katsa ni vakulu hinkwavo ni malandza ya vutirheli. Xana vakulu va endle njhani leswaku vanhu va hisekela ku teka vuphayona bya nkarhinyana hi n’hweti yoleyo? Va sungule ka ha ri ni nkarhi ku khutaza vanhu vo tala hilaha va nga kotaka hakona leswaku va byi nghenela. Minhlangano ya ntirho wa nsimu a yi khomiwa hi minkarhi leyi hambaneke ya siku leswaku hinkwavo evandlheni va kuma nkarhi lowu va fanelaka. Ku kandziyisiwe nkoka wa ku chumayela hi riqingho ngopfu-ngopfu eka lava vabyaka.

¹¹ Makwerhu un’wana wa xisati wa malembe ya 86, loyi a nga kotiki ku famba hikwalaho ka swiphiqo swa rihanyo, u tsarise vuphayona bya nkarhinyana. A a sungula ka ha ri mixo a chumayela hi riqingho ku ringana tiawara to hlayanyana a tshame etlhelo ka tafula ekhixini, endzhakunyana a wisa ku ringana tiawaranyana kutani a tlhela a ya emahlweni a chumayela. Un’wana loyi a n’wi beleke riqingho i wansati loyi a feriweke hi nuna wakwe ni vana vambirhi va majaha emalembeni mambirhi lama hundzeke, loyi a a nga swi twisisi leswaku ha yini Xikwembu xi pfumelela swilo swo biha hi ndlela leyi swi humelela. U hlamuseriwe ntiyiso kahle, ivi ku sunguriwa dyondzo ya Bibele. Ku chumayela hi riqingho nimadyambu ni hi minkarhi yin’wana i ndlela leyinene yo vulavula ni vanhu lava tshamaka emiakweni ni le tindhawini leti swi tikaka ku nghena eka tona. Swi tlhela swi pfuna vahuweleri ku kuma vanhu lava nga kumekiki ekaya ninhlikanhi.

¹² Vakulu va gimete xiviko xa vona hi ku vula va ku: “Hi ve ni nkarhi lowunene naswona hi tlangela malunghelo ni mikateko leyi Yehovha a yi nyikeke un’wana ni un’wana wa hina.” Loko mi hlela kahle, vandlha ra n’wina na rona ri nga tsakela mikateko leyi fanaka.

¹³ Lwela Ku Hlanganyela Hi Xitalo eVutirhelini Bya Nsimu: Rirhandzu ra hina eka Xikwembu ni vaakelani ri hi susumetela ku xava nkarhi n’hweti ni n’hweti leswaku hi byela van’wana mahungu lamanene. (Mat. 22:37-39) Valanguteri va Dyondzo ya Buku ya Vandlha ni vapfuni va vona va fanele va lwela ku pfuna lava nga entlaweni wa vona leswaku va hlanganyela n’hweti yin’wana ni yin’wana evutirhelini bya nsimu. Sweswo swi nga fikeleriwa kahle hi ku endla malunghiselelo yo tirha nsimu ni munhu un’wana ni un’wana wa le ntlaweni. Ematshan’weni yo rindza ku kondza n’hweti yi hela, hlela ku endla tano to ho suka. Leswi swi ta ku nyika ndlela yo nyikela mpfuno wa rirhandzu.

¹⁴ Xana va kona vahuweleri lava vabyaka entlaweni wa wena wa buku, lava swi va tikelaka ku hlanganyela evutirhelini bya nsimu? Loko ku ri ni lava tshamaka etindhawini to hlayisa vavabyi kumbe ku ri ni lava va nga swi kotiki ku huma ekaya, swi le rivaleni leswaku va nge swi koti kahle ku kuma nkarhi wa ku chumayela. Kambe loko va ringeta ku kuma nkarhinyana wutsongo va wu tirhisela ku vangamisa ku vonakala ka vona, va nga susumetela lava vonaka mintirho ya vona leyinene leswaku va tsakela ntiyiso hakunene. (Mat. 5:16) Valanguteri va dyondzo ya buku va fanele va tiyiseka leswaku vanhu vo tano va swi tiva leswaku va nga vika ntirho wa nsimu ku sukela eka 15 wa timinete. Vahuweleri lava vo tshembeka va kuma matimba va tlhela va eneriseka loko va kote ku vika nkarhi lowu va wu heteke eku chumayeleni. Sweswo swi tlhela swi tiyisekisa leswaku xiviko xa ntirho wa misava hinkwayo wa vanhu va Xikwembu xi hetisekile.

¹⁵ Vantshwa Lava Endlaka Leswinene! Hakunene swa phyuphyisa ku vona vantshwa va Vakreste va tirhisa matimba ya vona entirhweni wa Yehovha! (Swiv. 20:29) Loko u ri muntshwa, xana u nga swi kombisa njhani leswaku u hisekela Yehovha hi nkarhi lowu wa tinh’weti to hlawuleka ta ntirho?

¹⁶ Loko u nga si va muhuweleri la khuvuriweke evandlheni, xana u nga lwela ku fikelela lunghelo rero? Tivutise swivutiso leswi landzelaka: ‘Xana ndzi ni vutivi bya xisekelo bya ntiyiso wa Bibele? Xana ndza swi lava ku hlanganyela evutirhelini bya Mfumo? Xana ndzi xikombiso lexinene? Xana ndza swi kota ku byela van’wana hi ripfumelo ra mina malunghana ni mahungu lamanene? Xana mbilu ya mina yi ndzi susumetela ku endla sweswo?’ Loko nhlamulo ya wena ko va ina eka swivutiso leswi, vulavula ni vatswari va wena malunghana ni ku navela ka wena ku va muhuweleri. Vatswari va wena va ta vulavula ni un’wana wa vakulu va komiti ya ntirho.

¹⁷ Loko ana se u ri muhuweleri wa mahungu lamanene, xana u nga tirhisa nkarhi wa wena wa ku wisa ka xikolo leswaku u hlanganyela swinene evutirhelini bya nsimu? Hikwalaho ko va ni xiyimiso lexinene ni ku pfuniwa hi vatswari ni van’wana, vantshwa vo tala lava khuvuriweke va swi kotile ku nghenela vuphayona bya nkarhinyana. Loko sweswo swi nga koteki, tiyimisele ku hlanganyela swinene evutirhelini bya nsimu. Tivekele pakani. Ku engetela eka pakani leyi u tivekeleke yona yo tirha tiawara to karhi, tivekele pakani yin’wana yo antswisa matirhelo ya wena ya nsimu. Kumbexana u nga ringeta ku hlaya tsalwa eka muti wun’wana ni wun’wana, u antswisa ndlela yo endla maendzo yo vuyela ni ku sungula dyondzo ya Bibele kumbe u ndlandlamuxa vutirheli bya wena byi katsa ni ku chumayela hi riqingho kumbe hi tindlela tin’wana. Ku vuriwa yini hi ku tivekela pakani yo rhamba muakelani, kumbe loyi u nghenaka na yena xikolo kumbe xaka ra wena leswaku mi famba swin’we eXitsundzuxweni lembe leri? Ku hlanganyela hi xitalo entirhweni lowu swi ta vuyerisa naswona swi ta khutaza van’wana hakunene evandlheni.—1 Tes. 5:11.

¹⁸ Pfuna Lava Ha Ku Sungulaka Ku Hlanganyela Leswaku Va Endla Nhluvuko: Eka lembe ra ntirho leri hundzeke, n’hweti yin’wana ni yin’wana ku fambisiwe tidyondzo ta Bibele ta kwalomu ka 90 000 eAfrika Dzonga, Botswana, Lesotho, Namibia, St. Helena ni le Swaziland. Hi ku famba ka nkarhi, swo tala swa swichudeni leswi, swi ta endla nhluvuko lerova swi tinyiketela ni ku khuvuriwa. Hambiswiritano, loko swi nga si fikelela pakani yoleyo, hi fanele hi swi pfuna leswaku swi fanelekela ku va vahuweleri va mahungu lamanene. Leri i goza ra nkoka ro dyondzisa vanhu lavantshwa leswaku va va valandzeri va Yesu Kreste. (Mat. 9:9; Luka 6:40) Xana u na xona xichudeni xa Bibele lexi lunghekeleke ku teka goza rero?

¹⁹ Loko u nga tiyiseki hi nhluvuko wa xichudeni xa wena, kombela mpfuno eka mulanguteri wa dyondzo ya buku kumbe mulanguteri wa ntirho. Kumbexana u nga n’wi rhamba leswaku a famba na wena eka dyondzo ya kona. Vamakwerhu lava va ni ntokoto lowukulu lowu nga ku pfunaka ku vona nhluvuko wa vumoya bya xichudeni. Va nga ha ringanyeta swo karhi leswi nga ta pfuna xichudeni leswaku xi hambeta xi endla nhluvuko hi tlhelo ra moya.

²⁰ Loko xichudeni xa wena xi vula leswaku xi tsakela ku va muhuweleri la nga khuvuriwangiki naswona u vona leswaku xa faneleka, vulavula ni mulanguteri la ungamelaka. U ta hlela leswaku vakulu vambirhi va hlangana na wena ni xichudeni xa wena va ta kumisisa loko xi faneleka, va tirhisa rungula leri nga eka buku leyi nge Vutirheli Bya Hina, matluka 98-9. (Vona Xihondzo xo Rindza xa November 15, 1988, tluka 17) Loko xichudeni xi faneleka ku va muhuweleri, u fanele ku sungula ku xi letela to ho suka. Loko xi humesa xiviko xa xona xa ntirho wa nsimu, vandlha ri ta tivisiwa leswaku xichudeni lexi i muhuweleri la nga khuvuriwangiki. Hi navela onge magidi ya vahuweleri lavantshwa, lavatsongo ni lavakulu va nga teka goza leri ra nkoka etin’hwetini leti to hlawuleka ta ntirho.

²¹ Ku Kunguhata Swi Pfuna Ku Hetisisa Mintirho Leyinene Ngopfu: Ku kunguhata ka ha ri emahlweni swi ta hi pfuna leswaku ntirho wa hina wu humelela hi nguva ya Xitsundzuxo. (Swiv. 21:5) Ku ni swilo swo tala leswi lavaka nyingiso wa vakulu.

²² Leswaku va pfuna vandlha ri hetisisa swo tala entirhweni wa nsimu, vakulu va fanele va endla malunghiselelo lama tiyeke yo khoma minhlangano ya ntirho wa nsimu exikarhi ka vhiki ni hi mahelo-vhiki. Mulanguteri wa ntirho hi yena a faneleke a rhangela eku endleni ka malunghiselelo lawa. Xana ku nga hleriwa minhlangano leyi engetelekeke nimixo, nindzhenga kumbe nimadyambu? Vandlha ri fanele ri tivisiwa malunghiselelo lawa. Swi nga pfuna loko xiyimiso lexi xo veheriwa eka bodo ra switiviso.

²³ Vakulu va fanele va tiyiseka leswaku ku endliwa malunghiselelo lama tiyeke ya Xitsundzuxo ku nga si fika siku ra April 16. Leswi swi katsa ku kanerisana hi ta matirhiselo ya Holo ya Mfumo loko ku ri ni mavandlha man’wana lama katsekaka, ku basisa Holo ya Mfumo, ku hlawula varindzi ni vafambisi va swifanekiselo kun’we ni ku kuma swifanekiselo. Vandlha ri fanele ri tivisiwa nkarhi wa Xitsundzuxo ni laha xi nga ta endleriwa kona, kun’we ni ku cinca kun’wana ni kun’wana ka xiyimiso xa minhlangano ya vhiki rero. Ku tikarhatela ku endla swilo leswi swi ta endla leswaku nkhuvo lowu wu “endliw[a] hi ku tenga ni hi ku hleleka.”—1 Kor. 14:40.

²⁴ Hi nkarhi wa dyondzo ya ndyangu tinhloko ta mindyangu ti nga bula ni mindyangu ya tona malunghana ni ndlela leyi yi nga hlanganyelaka hi xitalo ha yona ensin’wini hi nguva ya Xitsundzuxo. Xana ndyangu wa wena hinkwawo wu nga swi kota ku nghenela vuphayona bya nkarhinyana? Kumbe, xana ndyangu wu nga swi kota ku seketela xirho xin’we kumbe ku tlula, loko xi nghenele vuphayona? Loko sweswo swi nga koteki, tivekeleni tipakani to karhi tanihi ndyangu leswaku mi heta nkarhi wo tala evutirhelini bya nsimu. Xana ku ni xirho xa ndyangu lexa ha riki xitsongo hi malembe, lexi loko xi khutaziwa ni ku pfuniwa xi nga swi kotaka ku fanelekela ku va muhuweleri la nga si khuvuriwaka? Xana i vanhu vangani lava ndyangu wa wena wu nga va rhambaka leswaku va ta eXitsundzuxweni lembe leri? Ku hlela kahle swi ta endla leswaku ndyangu wa wena wu kuma mikateko yo tala ni ku va ni ntsako.

²⁵ Wu Tirhise Swinene Nkarhi Lowu Seleke: Loko a tsalela Vakreste va lembe-xidzana ro sungula, muapostola Petro u va tsundzuxe leswaku va hiteka hikuva makumu ya mafambiselo ya swilo ya Xiyuda a ma tshinerile. (1 Pet. 4:7) Namuntlha vumbhoni hinkwabyo byi kombisa leswaku makumu ya mafambiselo lawa ya swilo ma le kusuhi. Siku ni siku, ndlela leyi hi hanyaka ha yona yi fanele yi kombisa leswaku ha tiyiseka leswaku leyi i minkarhi ya makumu. Tanihi malandza ya Yehovha lama hisekaka, hi fanele hi tiyimisela entirhweni wa xihatla wo chumayela mahungu lamanene.—Tito 2:13, 14.

²⁶ Sweswi i nkarhi wo kombisa ku hiseka ni ku teka goza! Anakanyisisa hi swilo leswi Yehovha a ku endleleke swona, ni leswi a swi endleleke ndyangu wa wena ni vandlha. Hambileswi hi nga ta ka hi nga swi koti ku hakela Yehovha hikwalaho ka swilo swo tala leswi a hi pfuneke ha swona, hi nga swi kota ku n’wi gandzela hi moya-xiviri hinkwawo. (Ps. 116:12-14) U ta hi katekisa hikwalaho ka matshalatshala ya hina. (Swiv. 10:22) Onge hinkwerhu hi nga “hisekela leswi nga swinene” hi nkarhi lowu wo hlawuleka wa ntirho lowu engetelekeke, “leswaku eka swilo hinkwaswo Xikwembu xi dzunisiwa ha Yesu Kreste.”—1 Pet. 3:13; 4:11.

[Bokisi leri nga eka tluka 3]

Nhlayo Ya Misava Hinkwayo Ya Lava Veke Kona eXitsundzuxweni

1999 14 088 751

2000 14 872 086

2001 15 374 986

2002 15 597 746

[Bokisi leri nga eka tluka 4]

Xana I Vamani Lava U Nga Ta Va Rhamba eXitsundzuxweni?

□ Swirho swa ndyangu swa le kusuhi kun’we ni maxaka

□ Vaakelani ni vanhu lava u va toloveleke

□ Lava u tirhaka na vona ni lava u nghenaka na vona xikolo

□ Maendzo yo vuyela ni swichudeni swa Bibele

[Bokisi leri nga eka tluka 5]

Pfuna Lava Teke eXitsundzuxweni

□ Va amukele hi swandla swimbirhi

□ Va endzele

□ Ringanyeta dyondzo ya Bibele eka vona

□ Va rhambe leswaku va ta yingisa nkulumo yo hlawuleka

[Bokisi leri nga eka tluka 6]

Hi Tihi Tipakani Ta Wena Ta Nguva Ya Xitsundzuxo?

□ Endla leswaku loyi u n’wi rhambeke a va kona eXitsundzuxweni

□ Fanelekela ku va muhuweleri wa mahungu lamanene

□ Heta tiawara to karhi entirhweni wa nsimu

□ Antswisa nchumu wo karhi evutirhelini bya wena bya nsimu

□ Nghenela vuphayona bya nkarhinyana