“Nyikela Vumbhoni Bya Rixaladza Hi Mahungu Lamanene”
1. Hi wahi mahungu lamanene lawa hi faneleke hi ma byela van’wana?
1 Hi ni lunghelo ro “nyikela vumbhoni bya rixaladza hi mahungu lamanene ya musa lowu nga faneriwiki wa Xikwembu,” emisaveni leyi mahungu yo biha ku ngo va tshamelo-maxelo! (Mint. 20:24) Leswi swi katsa ku tivisa vanhu leswaku ku nga ri khale ‘masiku yo hetelela’ ma ta siviwa hi misava leyintshwa yo lulama ya Yehovha, laha ‘swilo swa khale swi nga ta va swi hundzile.’ (2 Tim. 3:1-5; Nhlav. 21:4) Hi nkarhi wolowo vanhu a va nge he vabyi. (Esa. 33:24) Lava feke va ta pfuxiwa va tlhela va hanya ni mindyangu ya vona. (Yoh. 5:28, 29) Misava hinkwayo yi ta va paradeyisi yo xonga. (Esa. 65:21-23) Lawa i man’wana ya mahungu lamanene lawa hi faneleke hi ma byela van’wana!
2. Ha yini nkarhi wa Xitsundzuxo wu ri nkarhi lowunene wo chumayela mahungu lamanene?
2 Tin’hweti ta March, April na May ti ta va nkarhi lowunene wo chumayela mahungu lawa lamanene. Hi tin’hweti leti, maxelo ma va ma ri kahle etindhawini to tala emisaveni naswona dyambu a ri hatli ri pela kutani hi kuma nkarhi lowu engetelekeke wo chumayela. Ku tlula kwalaho, xiendlakalo xa nkoka swinene elembeni, ku nga Xitsundzuxo, xi ta khomiwa emisaveni hinkwayo endzhaku ka ku pela ka dyambu, hi Mugqivela March 22. Sweswi i nkarhi wo sungula ku endla malunghiselelo leswaku hi ta engetela nkarhi lowu hi wu hetaka ensin’wini.
3. I yini lexi nga ta hi pfuna leswaku hi heta nkarhi wo tala ensin’wini tanihi ndyangu?
3 Vuphayona Bya Nkarhinyana: Xana u nga hlela xiyimiso xa wena leswaku u kota ku va phayona ra nkarhinyana hi n’hweti yin’we, timbirhi kumbe hi vunharhu bya tona? Swi nga va swinene leswaku mi bula hi mhaka leyi eka dyondzo ya ndyangu. Loko mo khomisana, xirho xin’we kumbe leswi engetelekeke swi nga swi kota ku va maphayona ya nkarhinyana. (Swiv. 15:22) Khongelani hi mhaka leyi kutani mi ta vona ndlela leyi Yehovha a nga ta mi katekisa ha yona. (Swiv. 16:3) Hambiloko a nga ri kona la phayonaka endyangwini, hinkwenu mi nga tivekela pakani yo heta nkarhi lowu engetelekeke ensin’wini, hi hala tlhelo mi tirha ni lava phayonaka.
4. Xana hi nga swi kotisa ku yini ku va maphayona ya nkarhinyana hambiloko hi tirha?
4 Loko u tirha u nga swi kota ku va phayona ra nkarhinyana hi ku tiendlela xiyimiso lexinene. Kumbexana u nga chumayela hi nkarhi wo wisa. Kumbe u nga kombela nsimu leyi nga le kusuhi ni kaya ra wena kumbe laha u tirhaka kona, leswaku u ta kota ku chumayela ku ringana awara kumbe ku tlula u nga si sungula ku tirha niloko se u chayisile. U nga kuma nkarhi lowu engetelekeke, hi ku tshika mintirho leyi nga riki ya nkoka, u yi endla hi n’hweti yin’wana ni hi ku heta siku hinkwaro hi mahelo-vhiki u ri ensin’wini. Van’wana va teke siku rin’we kumbe mambirhi yo wisa leswaku va ta ya ensin’wini.
5. Xana u nga va pfuna njhani lava dyuhaleke kumbe lava vabyaka leswaku va kota ku va maphayona ya nkarhinyana?
5 Loko u dyuharile kumbe u vabya, u nga swi kota ku va phayona ra nkarhinyana hi ku chumayela nkarhi lowu u nga wu kotaka hi siku. Kombela Yehovha leswaku a ku nyika “matimba lama tlulaka lama tolovelekeke.” (2 Kor. 4:7) Makwerhu un’wana wa xisati u swi kotile ku va phayona ra nkarhinyana hambileswi a a ri ni malembe ya 106 hi vukhale. Maxaka ya yena lama nga Vakreste ni van’wana evandlheni, va n’wi pfunile leswaku a kota ku chumayela hi yindlu ni yindlu, a endla maendzo yo vuyela, a ya fambisa tidyondzo ta Bibele ni ku hlanganyela eka tindlela tin’wana to chumayela. U kote ku sungula tidyondzo ta Bibele ni vanhu va khume. U ri: “Loko ndzi anakanya hi lunghelo lerikulu leri ndzi veke na rona ro va phayona ra nkarhinyana, ndzi tsake ngopfu naswona ndzi nkhensa Yehovha, N’wana wa yena ni nhlengeletano ya yena leyi nga ni rirhandzu. Ndzi ba mandla ndzi vuyelela eka Yehovha!”
6. Xana vantshwa lava khuvuriweke, lava ha nghenaka xikolo, va nga endla njhani leswaku va kota ku va maphayona ya nkarhinyana?
6 Loko u ri muntshwa la khuvuriweke naswona wa ha nghena xikolo, u nga swi kota ku va phayona ra nkarhinyana. Ku fana ni lava tirhaka, na wena u nga swi kota ku chumayela hi mahelo-vhiki. Kumbexana masiku man’wana u nga ha chumayela awara kumbe ku tlula loko xikolo xi humile. Xana u nga swi kota ku chumayela loko ku ri masiku yo wisa exikolweni? Loko u navela ku va phayona ra nkarhinyana, vulavula ni vatswari va wena.
7. Xana vakulu va nga endla yini leswaku vandlha ri hisekela ntirho wa nsimu hi nkarhi wa Xitsundzuxo?
7 Pfunani Vandlha Ri Hiseka: Vakulu va nga pfuna vandlha leswaku ri hiseka hi ku va xikombiso lexinene. (1 Pet. 5:2, 3) Va nga ha hlela leswaku ku va ni minhlangano leyi engetelekeke ya ntirho wa nsimu nimixo, loko xikolo xi huma kumbe nimadyambu. Mulanguteri wa ntirho u fanele a tiyiseka leswaku ku ni vamakwerhu lava fanelekaka, lava nga ta rhangela ntirho wa nsimu nileswaku ku ni nsimu leyi ringaneke swin’we ni timagazini ni minkandziyiso hi tin’hweti leti to hlawuleka.
8. Hi dyondza yini eka leswi nga endleka evandlheni rin’wana?
8 Evandlheni rin’wana, vakulu va sungule ku khutaza vamakwerhu leswaku va va maphayona ya nkarhinyana, ka ha sele tin’hweti to hlayanyana leswaku ku va nkarhi wa Xitsundzuxo. Vhiki rin’wana ni rin’wana a va tivisa vandlha leswaku i vangani vahuweleri lava tsariseke ku va maphayona ya nkarhinyana. Leswi swi pfune lava lavaka ku va maphayona ya nkarhinyana va vona leswaku va ta seketeriwa. Va hlele minhlangano yin’wana ya ntirho wa nsimu nimixo ni nimadyambu. Vuyelo bya kona a ku ri leswaku vahuweleri va 53 va ve maphayona ya nkarhinyana hi April, ku nga kwalomu ka hafu ya vandlha!
9. Ha yini nkarhi wa Xitsundzuxo wu ri nkarhi wa kahle leswaku lava fanelekaka ku va vahuweleri va sungula ku chumayela mahungu lamanene?
9 Pfuna Van’wana Va Chumayela: Loko vanhu lava ha ku sungulaka ku hlanganyela ni lava ha riki vantshwa va faneleka ku va vahuweleri, va nga ha tirha nsimu ni vahuweleri lava nga ni ntokoto. Leswi swi nga ha endleka hi nkarhi wa Xitsundzuxo loko vanhu vo tala evandlheni va lava ku tirha nkarhi lowu engetelekeke ensin’wini. Xana u ni xichudeni xa Bibele lexi endlaka nhluvuko, lexi hanyaka hi ku pfumelelana ni milawu yo lulama ya Yehovha? Xana u ni vana lava tikhomeke kahle, lava endlaka nhluvuko kambe va nga si vaka vahuweleri? Loko xichudeni kumbe n’wana wa wena a vula leswaku u lava ku va muhuweleri la nga khuvuriwangiki naswona u swi vona leswaku wa faneleka, tivisa un’wana wa vakulu. Mulanguteri la ungamelaka u ta hlela leswaku wena ni n’wana kumbe xichudeni xa wena, mi hlangana ni vakulu vambirhi mi bula hi mhaka leyi.
10. Xana vakulu va nga endla yini leswaku va pfuna lava holeke?
10 Tin’hweti leti taka ti ta tlhela ti va nkarhi wa kahle leswaku lava holeke va sungula ku chumayela nakambe. Valanguteri va Dyondzo ya Buku ya Vandlha ni vakulu van’wana va fanele va endla hinkwaswo leswi va nga swi kotaka leswaku va endzela lava holeke ni ku va rhamba leswaku va famba na vona ensin’wini. Loko se ku ri khale va horile, vakulu vambirhi va fanele va rhanga hi ku bula na vona, ku vona loko va faneleka.—km-TS 11/00 tl. 3.
11. Hi xihi xikombiso lexikulu xa “musa lowu nga faneriwiki wa Xikwembu?”
11 Lunghiselela Ku Va Kona eXitsundzuxweni: Nkutsulo i xikombiso lexikulu xa “musa lowu nga faneriwiki wa Xikwembu.” (Mint. 20:24) Timiliyoni ta vanhu lava nga ni timbilu letinene emisaveni hinkwayo va ta va va hlanganile hi Mugqivela, March 22, endzhaku ka ku pela ka dyambu leswaku va tsundzuka Rifu ra Kreste. Hi lava ku va rhamba hinkwavo hi tlhela hi va pfuna leswaku va va kona eka xiendlakalo lexi xa nkoka, lexi nga vumbhoni bya musa lowu nga faneriwiki wa Yehovha, lowu a wu kombeke vanhu.
12. I vamani lava hi nga va rhambelaka eXitsundzuxweni?
12 Tsala mavito ya lava u lavaka ku va rhamba. A swi kanakanisi leswaku va ta katsa maxaka, vaakelani, lava u tirhaka na vona ni lava u nghenaka na vona xikolo, lava u nga tshama u dyondza na vona Bibele ni lava u dyondzaka na vona sweswi swin’we ni hinkwavo lava u hambetaka u va endzela. Loko van’wana va lava u va rhambaka va lava ku tiva hi ta Xitsundzuxo, u nga pfula xiengetelo xa buku leyi nge Leswi Bibele Yi Swi Dyondzisaka, eka matluka 206-8, laha ku vulavuriwaka hi Xilalelo xa Hosi. Leswi swi nga ha ku pfuna leswaku u sungula dyondzo ya Bibele hikuva swi ta endla leswaku loyi a ku vutisaka u n’wi komba buku leyi hi yi tirhisaka ku fambisa tidyondzo ta Bibele.
13. Xana Yehovha u ma katekise njhani matshalatshala ya vamakwerhu vambirhi lava rhambeleke vanhu eXitsundzuxweni?
13 Makwerhu un’wana u tsale mindyangu ya 48 leyi a a lava ku yi rhamba. Loko a heta ku rhamba ndyangu, a a wu sula enxaxamelweni wa yena a tlhela a tsala ni siku leri a wu rhambeke ha rona. U tsakile ku vona vanhu va 26 emindyangwini leyi a yi rhambeke va ri kona eXitsundzuxweni! Makwerhu la nga ni xitolo u rhambe mutirhi loyi a nga tshama a va mufundhisi. Wanuna loyi u tile kutani endzhaku a ku: “Ndzi dyondze swo tala eBibeleni hi awara yin’we ku tlula leswi ndzi swi dyondzeke hi malembe ya 30 ndzi nghena Kereke ya Khatoliki.” Endzhakunyana ka Xitsundzuxo, u sungule ku dyondzeriwa Bibele hi buku leyi nge Leswi Bibele Yi Swi Dyondzisaka.
14. Hi rihi tsima leri nga ta endliwa emisaveni hinkwayo ku sukela hi March 1?
14 Tsima: Ku sukela hi Mugqivela, March 1, ku ya fika hi March 22, ku ta va ku fambisiwa xirhambo xo hlawuleka xa Xitsundzuxo emisaveni hinkwayo. Hinkwerhu hi fanele hi hlanganyela hi xitalo eka tsima leri ro hlawuleka. Swa antswa ku nyika n’wini wa muti xirhambo evokweni ku ri ni ku xi siya enyangweni. Hambiswiritano, loko vandlha ra n’wina ri ri ni nsimu leyikulu, vakulu va nga ha endla xiboho xa leswaku vahuweleri va siya swirhambo hi vutlhari emakaya lama nga riki na vanhu. Hi mahelo-vhiki hi ta va hi fambisa timagazini.
15. Xana hi nga xi fambisa njhani xirhambo xa Xitsundzuxo?
15 Leswi hi nga riki na nkarhi wo tala wo fambisa swirhambo, hi fanele hi komisa swingheniso swa hina. Vana ni xinghana naswona u hiseka. U nga ha ku: “Hi rhamba vanhu hinkwavo eka xiendlakalo xa nkoka hi March 22 kutani hi lava leswaku wena ni swirho swa ndyangu wa wena swin’we ni vanghana va wena, mi va kona. Hi lexi xirhambo xa wena. Xi ta ku hlamusela hinkwaswo hi vuxokoxoko.” N’wini wa muti a nga vutisa swivutiso. Kumbe a nga ha amukela xirhambo a tlhela a vula leswaku u ta va kona. Tsala vito ra yena kutani u endla malunghiselelo yo tlhelela.
16. Hi wihi ntokoto lowu kombisaka leswaku tsima ro rhambela vanhu eXitsundzuxweni i ra nkoka?
16 N’wexemu socha rin’wana ri kume xirhambo xa Xitsundzuxo enyangweni wa yindlu ya rona. A ri lava ku ya kambe a ri fanele ri kuma mpfumelelo eka ndhuna ya rona. Loko ri komba ndhuna ya rona xirhambo, yi miyerilenyana kutani yi ri byela leswaku vatswari va yona i Timbhoni nileswaku a yi ya eminhlanganweni na vona. Yi pfumerile leswaku socha leri ri ya eXitsundzuxweni yi tlhela yi famba na rona.
17. Xana hi swi kombisa njhani leswaku a hi xi hupanga xikongomelo xa musa wa Xikwembu lowu nga faneriki?
17 Nkhensa Xiendlakalo Lexi: Loko nkarhi wa Xitsundzuxo xa 2008 wu ri karhi wu tshinela, onge un’wana ni un’wana wa hina a nga anakanyisisa hi musa lowu nga faneriwiki lowu Yehovha a hi kombeke wona. Muapostola Pawulo u tsale a ku: “Ha mi kombela nakambe leswaku mi nga amukeli musa lowu nga faneriwiki wa Xikwembu kutani mi hupa xikongomelo xa wona.” (2 Kor. 6:1) Xana hi nga swi kombisa njhani leswaku a hi xi hupanga xikongomelo xa musa wa Xikwembu lowu nga faneriki? Pawulo u te: “Kambe hi ndlela yin’wana ni yin’wana hi tibumabumela tanihi vatirheli va Xikwembu.” (2 Kor. 6:4) Hikwalaho hi tlangela nyiko leyi ya Yehovha hi mahanyelo ya hina lamanene ni ku hisekela ntirho wo chumayela mahungu lamanene. Hi ta kuma nkarhi lowu engetelekeke wo andzisa ntirho wa hina wo chumayela mahungu lamanene hilaha hi nga kotaka hakona hi nkarhi lowu wa Xitsundzuxo.
[Bokisi eka tluka 3]
I Vamani Lava Nga Kotaka Ku Va Maphayona Ya Nkarhinyana?
◼ I swirho swa ndyangu
◼ Lava tirhaka
◼ Lava dyuhaleke ni lava vabyaka
◼ Lava nghenaka xikolo
[Bokisi eka tluka 4]
Loko U Fambisa Swirhambo Swa Xitsundzuxo:
◼ Komisa xingheniso xa wena; u vulavula hi ku hiseka
◼ Tsala mavito ya lava tsakelaka leswaku u ta tlhelela eka vona
◼ Fambisa timagazini hi mahelo-vhiki