Ku Andzisa Ntirho Wa Hina Wa Nsimu Hi Nkarhi Wa Xitsundzuxo!

1. Ha yini hi fanele hi andzisa ntirho wa hina hi March, April na May?

¹ Xana u nga swi kota ku andzisa ntirho wa wena wa nsimu hi nkarhi wa Xitsundzuxo? Vahuweleri van’wana va ta kuma nkarhi wo wisa entirhweni kumbe eswikolweni lowu va nga wu tirhiselaka ku chumayela. Ku sukela hi April 2, ku ta va ni tsima ro hlawuleka ro rhamba lava tsakelaka leswaku va ta hlanganyela na hina eka Xitsundzuxo lexi nga ta va kona hi April 17. Hi Mugqivela, April 16 ku ta va ku ri Siku ro hlawuleka ro fambisa Timagazini. Endzhaku ka Xitsundzuxo, hi ta endla matshalatshala yo hlakulela ku tsakela loku kombisiweke hi lava veke kona kutani hi va rhamba eka nkulumo yo hlawuleka leyi nga ta nyikeriwa hi vhiki ra April 25. Kutani hi ni swivangelo swo tala swo andzisa ntirho wa hina hi March, April na May.

2. Hi yihi ndlela yin’wana leyinene yo andzisa ntirho wa hina wa nsimu?

² Vuphayona Bya Nkarhinyana: Ndlela yin’wana leyinene yo andzisa ntirho wa hina wa nsimu i ku teka vuphayona bya nkarhinyana. Tanihi leswi hinkwerhu hi khomekeke, swi ta lava leswaku hi hlela ka ha ri emahlweni naswona hi antswisa xiyimiso xa hina. (Swiv. 21:5) Kumbexana u nga tshika swilo leswi nga riki swa nkoka ngopfu eka leswi u swi endlaka siku ni siku. (Filp. 1:9-11) Ha yini u nga buli ni vahuweleri van’wana evandlheni hi ku navela ka wena ku phayona, kumbexana na vona va nga swi tsakela?

3. Xana mindyangu yi nga hlela njhani leswaku yi andzisa ntirho wa yona wa nsimu?

³ Hi nkarhi wa Vugandzeri bya n’wina bya Ndyangu bya nimadyambu, swi ta va swinene ku bula hi tipakani ta n’wina tanihi ndyangu. (Swiv. 15:22) Loko mi khomisana, kumbexana swirho swin’wana swi nga swi kota ku teka vuphayona bya nkarhinyana ku ringana n’hweti kumbe to hlayanyana. Kambe ku vuriwa yini loko mi swi xiya leswaku xiyimiso xa n’wina a xi mi pfumeleli? Mi nga ha hlela ku andzisa ntirho wa n’wina wa nsimu hi ku tirha nimadyambu kumbe mi heta nkarhi wo leha mi ri ensin’wini hi mahelo-vhiki.

4. Hi yihi mikateko leyi hi nga ta yi kuma hi ku andzisa ntirho wa hina wa nsimu hi nkarhi wa Xitsundzuxo?

⁴ Yehovha wa swi xiya hinkwaswo leswi hi swi endlaka leswaku hi n’wi tirhela naswona wa ma tlangela matshalatshala lawa hi ma endlaka. (Hev. 6:10) Hi va ni ntsako loko hi nyika Yehovha ni van’wana. (1 Tikr. 29:9; Mint. 20:35) Xana u nga andzisa ntirho wa wena wa nsimu hi nkarhi wa Xitsundzuxo kutani u tiphina hi ntsako ni mikateko leyi engetelekeke?