Endla Leswaku Nkarhi Lowu Wa Xitsundzuxo Wu Va Lowu Tsakisaka!

1. Hi yihi ndlela yin’wana yo engetela ntsako wa hina hi nkarhi lowu wa Xitsundzuxo?

¹ Xana u nga tsakela ku engetela ntsako wa wena hi March, April na May? Ndlela yin’wana yo endla sweswo i ku endla leswi engetelekeke entirhweni wa nsimu naswona loko swi koteka, u nga teka vuphayona bya nkarhinyana. Leswi swi ta wu engetela njhani ntsako wa wena?

2. Ku endla leswi engetelekeke entirhweni wa nsimu swi ta endla leswaku hi va ni ntsako lowu engetelekeke hi ndlela yihi?

² Engetela Ntsako Wa Wena: Yehovha u hi vumbele leswaku hi tsaka naswona hi eneriseka hi ku n’wi gandzela ni ku enerisa xilaveko xa hina xa moya lexi hi tswariweke na xona. (Mat. 5:3) U tlhele a endla leswaku hi tsaka loko hi nyika van’wana. (Mint. 20:35) Ntirho wa nsimu wu hi pfuna leswaku hi gandzela Xikwembu ni ku pfuna vanhu. Xisweswo, loko munhu a tirha nsimu hi xitalo u va ni ntsako lowukulu. Ku engetela kwalaho, loko hi chumayela hi xitalo, hi ta antswisa vuswikoti bya hina. Loko hi antswisa vuswikoti bya hina, hi va ni xivindzi ivi ku chava ka hina ku hunguteka. Hi ta pfulekeriwa hi nkarhi wo tala wo chumayela ni wo sungula tidyondzo ta Bibele. Hinkwaswo leswi swi endla leswaku ntirho wa nsimu wu tsakisa swinene.

3. Ha yini March na April ti ta va tin’hweti ta kahle to teka vuphayona bya nkarhinyana?

³ March na April ti ta va tin’hweti ta kahle to teka vuphayona bya nkarhinyana hikuva hi nga ha hlawula ku tirha tiawara ta 30 kumbe ta 50. Ku engetela kwalaho, ku sukela hi Mugqivela wa March 22, ku ya fikela hi siku ra Xitsundzuxo hi Musumbhunuku wa April 14, hi ta hlanganyela eka tsima ro tsakisa ro rhambela vanhu eXitsundzuxweni. Mavandlha ma ta va ma tsake swinene tanihi leswi vo tala va nga ta va va tirha “hi mbilu yin’we” leswaku va hlanganisa nsimu ya vona hi nkarhi wo karhi.—Sof. 3:9.

4. Loko hi lava ku teka vuphayona bya nkarhinyana, hi fanele hi endla yini?

⁴ Lunghiselela Sweswi: Loko ku ri leswaku a wu si endla malunghiselelo, tinyike nkarhi wa ku pfuxeta xiyimiso xa wena kutani u vona leswaku hi yihi mindzulamiso leyi u nga yi endlaka leswaku u endla leswi engetelekeke ensin’wini ku ringana n’hweti yin’we kumbe ku tlula. Khongela hi mhaka leyi. (Yak. 1:5) Bula ni vandyangu wa wena hi mhaka leyi ni van’wana evandlheni. (Swiv. 15:22) U ta kuma leswaku ku nga khathariseki swiphiqo swa rihanyo kumbe ku tshama u khomekile, na wena u nga kuma ntsako hi ku teka vuphayona bya nkarhinyana.

5. Vuyelo byi ta va byihi loko hi endla leswi engetelekeke entirhweni wa hina wa nsimu hi nkarhi lowu wa Xitsundzuxo?

⁵ Yehovha u lava leswaku malandza ya yena ma tsaka. (Ps. 32:11) Loko hi tikarhatela ku endla leswi engetelekeke entirhweni wa hina wa nsimu hi nkarhi lowu wa Xitsundzuxo, a hi nge engeteli ntsako wa hina ntsena kambe hi ta tlhela hi tsakisa Tata wa hina wa le tilweni.—Swiv. 23:24; 27:11.