Kunguhata Ku Ndlandlamuxa Vutirheli Bya Wena
1. I yini lexi nga xa nkoka malunghana ni nkarhi wa xitsundzuxo naswona hi nga ma endla njhani malunghiselelo?
1 Xitsundzuxo xa lembe ni lembe xi hi nyika lunghelo ra leswaku hi n’wi “dzunisa swinene Yehovha.” (Ps. 109:30) Xana u ta ndlandlamuxa vutirheli bya wena bya nsimu hi March tanihi ndlela yin’wana yo kombisa ku tlangela Munyiki wa nkutsulo? Kunguhata sweswi ku endla malunghiselelo.—Swiv. 21:5.
2. Xana wena ni van’wana mi angurise ku yini eka lunghiselelo ra ku hungutiwa ka tiawara ta vuphayona bya nkarhinyana hi April n’waxemu?
2 Vuphayona Bya Nkarhinyana: N’wexemu mavandlha a ma tsake ngopfu, loko ma twe hi ta lunghiselelo ra ku hungutiwa ka tiawara ta vuphayona bya nkarhinyana hi April. Makwerhu un’wana u tsarile: “Ndza ha ri exikolweni xa le henhla, naswona ndzi vona onge a ndzi nge swi koti ku teka vuphayona bya nkarhi hinkwawo. Kambe ndzi ta teka bya 30 wa tiawara naswona ndzi ta lwela ku fikelela 50 wa tiawara hi n’hweti ya April.” Makwerhu un’wana wa xisati la tirhaka ntirho wo tihanyisa wa nkarhi hinkwawo u tsarile: “Tiawara ta 30 swa olova ku ti fikelela!” Loko ku tivisiwa hi ta lunghiselelo leri, wansati wun’wana loyi a tshameke a va phayona, loyi sweswi a nga ni malembe ya kwalomu ka va-80, u te: “Lowu i nkarhi lowu a ndzi wu rindzerile! Yehovha wa swi tiva leswaku ku phayona a ku ri nkarhi wa kahle wa vutomi bya mina!” Van’wana lava a va nga ta swi kota ku teka vuphayona bya nkarhinyana va tivekele pakani yo heta nkarhi wo tala ensin’wini.
3. Hi swihi swivangelo leswi endlaka leswaku ku tekiwa vuphayona bya nkarhinyana hi March, April na May?
3 March yi ta va n’hweti ya kahle yo nghenela vuphayona bya nkarhinyana hikuva hi ta tlhela hi hlawula ku tirha 30 kumbe 50 wa tiawara. Ku tlula kwalaho, hi Mugqivela wa March 17, hi ta sungula tsima ro hlawuleka ro rhambela van’wana eXitsundzuxweni hi April 5. Vo tala va ta tiphina swinene hi ku heta nkarhi wo tala va ri ensin’wini lerova va navela ku teka vuphayona bya nkarhinyana hi April na May, hi tiawara ta 50.
4. Hi nga wu engetela njhani nkarhi lowu hi wu hetaka ensin’wini, naswona vuyelo byi ta va byihi?
4 Eka Vugandzeri bya n’wina bya Ndyangu lebyi landzelaka, ha yini mi nga buli hi ndlela leyi ha un’we wa n’wina a nga ndlandlamuxaka ha yona vutirheli byakwe hi nkarhi wa Xitsundzuxo? (Swiv. 15:22) Kombelani Yehovha leswaku a katekisa matshalatshala ya n’wina. (1 Yoh. 3:22) Loko mi ri nkarhi mi engetela nkarhi lowu mi wu hetaka ensin’wini, a mi nge yisi ku dzuneka eka Yehovha ntsena kambe mi ta tlhela mi va ni ntsako lowu engetelekeke.—2 Kor. 9:6.