Malunghiselelo Lama Engetelekeke Yo Dzunisa Yehovha
1. Hi rihi lunghiselelo lerintshwa leri nga ta hi pfuna ku n’wi “dzunisa swinene Yehovha”?
1 Ku sukela hi March, ku endliwe lunghiselelo lerintshwa leri nga ta nyika vahuweleri nkarhi wo teka vuphayona bya nkarhinyana va vika tiawara ta 30 n’hweti yin’wana ni yin’wana ya March na April ni hi n’hweti ya ku endza ka mulanguteri wa xifundzha. Loko ku ri leswaku mulanguteri wa xifundzha u ta endza hi vhiki leri katsaka tin’hweti timbirhi, vahuweleri lava tekaka vuphayona bya nkarhinyana byo vika tiawara ta 30 va nga ha hlawula n’hweti yin’we leyi va lavaka ku phayona ha yona. Maphayona ya nkarhinyana ma nga va kona eka nhlangano hinkwawo lowu mulanguteri wa xifundzha a nga ta va na wona ni maphayona ya nkarhi hinkwawo ni yo hlawuleka. Leswi vula leswaku loko hi nga swi koti ku fikelela tiawara ta 50, hi ta hambeta hi n’wi “dzunisa swinene Yehovha” hi vuphayona bya nkarhinyana ka mune hi lembe hi ku vika tiawara ta 30!—Ps. 109:30; 119:171.
2. I yini leswi lava tekaka vuphayona bya nkarhinyana hi nkarhi wa ku endza ka mulanguteri wa xifundzha va nga ta swi tsakela?
2 Hi Nkarhi Wa Ku Endza Ka Mulanguteri Wa Xifundzha: Sweswi vo tala va ta kota ku teka vuphayona bya nkarhinyana hi nkarhi wa ku endza ka mulanguteri wa xifundzha ni ku tsakela swikhutazo leswi va swi kumaka hi ku tirha na yena ensin’wini. (Rhom. 1:11, 12) Maphayona yo tala ya nkarhinyana ma nga ha teka masiku yo wisa leswaku ma ta tirha ni mulanguteri wa xifundzha. Vo tala lava tirhaka ntirho wo tihanyisa exikarhi ka vhiki va nga ha kombela leswaku a tirha na vona hi mahelo-vhiki. Ku engetela kwalaho, mawaku ndlela leyi swi nga ta khutaza ha yona loko maphayona ya nkarhinyana ma va kona eka nhlangano lowu mulanguteri wa xifundzha a nga ta va na wona ni maphayona ya nkarhi hinkwawo!
3. Ha yini nkarhi wa Xitsundzuxo ku ri nkarhi wa kahle wo teka vuphayona bya nkarhinyana?
3 Hi March Na April: Lava va tekaka vuphayona bya nkarhinyana bya tiawara ta 30 hi nkarhi wa Xitsundzuxo n’hweti yin’we, sweswi va nga engetela ‘xitlhavelo xa vona xa ku dzunisa’! (Hev. 13:15) Tin’hweti leti ta March na April i tinene leswaku hi ndlandlamuxa vutirheli bya hina hi ku teka vuphayona bya nkarhinyana. Lembe ni lembe hi hlanganyela eka tsima leri tsakisaka ro rhambela vanhu eXitsundzuxweni. Ku engetela kwalaho, hikwalaho ka leswi vo tala va ndlandlamuxaka vutirheli bya vona hi nkarhi wa Xitsundzuxo, hi nga tirha ni vahuweleri vo hambana-hambana. Endzhaku ka Xitsundzuxo, hi tlhelela eka vanhu lava veke kona eXitsundzuxweni lava kombiseke ku tsakela kutani hi va khutaza leswaku va va kona eka nkulumo yo hlawuleka. Xana mbilu ya wena yi ta ku susumetela ku teka vuphayona bya nkarhinyana?—Luka 6:45.