Byi Twariseni Hinkwako-nkwako Vunene Bya Yehovha
1. I yini lexi hi susumetelaka ku twarisa vunene bya Yehovha hinkwako-nkwako?
1 “Wena Yehovha, vukulu, matimba, ku saseka, vunene ni xindzhuti i swa wena; hikuva hinkwaswo leswi nga ematilweni ni leswi swi nga emisaveni i swa wena.” (1 Tikr. 29:11) Xana ndlela leyi hi rhandzaka Yehovha ni ku n’wi tlangela ha yona swi hi khumba njhani? Swi hi susumetela ku ‘twarisa hinkwako-nkwako vunene bya loyi a hi vitaneke hi huma emunyameni hi nghena eku vonakaleni kakwe loku hlamarisaka.’ (1 Pet. 2:9) A hi nge tshiki ku byela van’wana hi Xikwembu xa hina lexikulu! Hi ta va ni malunghelo yo hlamarisa yo twarisa vunene bya Yehovha hi n’hweti ya March, April na May.
2. Hi rihi tsima ro hlawuleka leri hleriweke leswaku vanhu va ta rhamberiwa eXitsundzuxweni naswona i vamani lava nga hlanganyelaka eka rona?
2 Tsima Ro Hlawuleka Ra Ku Rhambela Vanhu eXilalelweni Xa Hosi: Hi Musumbhunuku, April 2, hi ta byi veka erivaleni vunene bya Yehovha hi ku tsundzuka Xilalelo xa Hosi. Ku ta fambisiwa xirhambo xo hlawuleka xa xiendlakalo lexi xa nkoka emisaveni hinkwayo, ku sukela hi March 17 ku ya fika hi April 2. Vahuweleri hinkwavo va khutaziwa ku hlanganyela hi xitalo eka tsima leri. Lowu wu ta va wu ri nkarhi wa kahle wa leswaku lava ha ku sungulaka ku hlanganyela va sungula ku chumayela mahungu lamanene loko ku ri leswaku va faneleka. Loko u ri ni dyondzo ya Bibele leyi fanelekaka ku va muhuweleri kumbe vana va wena va faneleka, namba u vulavula ni vakulu.
3. Hi nga ku yini loko hi rhamba munhu leswaku a va kona eXitsundzuxweni?
3 Tsima leri ri ta fana niloko vanhu va rhamberiwa eka Ntsombano wa Muganga lowu nge “Nkutsulo Wu Tshinele!” Mavandlha ma ta rhumeriwa swirhambo leswi ringaneke leswaku muhuweleri ha un’we a kuma swirhambo swa 30, leswi saleke swi fanele swi nyikiwa maphayona. Komisa xingheniso xa wena u ku: “Ndzi ku rhambela eka xiendlakalo xa nkoka xa lembe ni lembe. U ta amukeriwa hi mandla mambirhi kwale. Xirhambo lexi xi tamele vuxokoxoko bya leswi nga ta endleka.” Loko n’wini wa muti a ri ni swivutiso, swi hlamule. Xiengetelo lexi nga eka xihloko lexi nge Xilalelo Xa Hosi eka tluka 206 ra buku leyi nge Leswi Bibele Yi Swi Dyondzisaka ri ta ku pfuna ku hlamula swivutiso sweswo. Hi mahelo-vhiki, hi ta fambisa timagazini ta n’hweti yoleyo swin’we ni xirhambo xexo xo hlawuleka. Tsala mavito ya hinkwavo lava tsakelaka kutani u endla maendzo yo vuyela eka vona.
4. Xana xirhambo xo hlawuleka xa Xitsundzuxo xi ta fambisiwa hi ndlela yihi?
4 Loko swi koteka, xirhambo lexi xo hlawuleka xi fanele xi nyikiwa n’wini wa muti ha un’we evokweni. Hikwalaho, tsala tindlu leti u nga kumangiki munhu eka tona kutani u endla malunghiselelo yo tlhelela eka tona nkarhi wun’wana. Hi vhiki ro hetelela ku nga si fika Xitsundzuxo, mavandlha lama nga ta saleriwa hi swirhambo swo tala ma nga swi siya emitini leyi vahuweleri va nga kumangiki munhu eka yona kambe va nga endli tano ku nga si fika vhiki leri. Tiyisekani leswaku xirhambo lexi mi xi nyika lava mi endlaka maendzo yo vuyela eka vona, lava mi dyondzaka na vona Bibele, maxaka, vatirhi-kuloni, vaakelani ni van’wana lava mi va tivaka.
5. Ha yini hi fanele ku sungula sweswi ku endla malunghiselelo yo teka vuphayona bya nkarhinyana?
5 Vuphayona Bya Nkarhinyana: Xana u nga twarisa vunene bya Yehovha hilaha ku engetelekeke hi ku teka vuphayona bya nkarhinyana hi March, April na hi May? Ku nghenela vuphayona byebyo swi ta lava leswaku u cinca swo karhi eka xiyimiso xa wena xa siku ni siku. (Efe. 5:15-17) Tiyiseka leswaku ku endla matshalatshala yo tirha hilaha ku engetelekeke entirhweni wa Yehovha swi ta ku nyika ntsako naswona Yehovha u ta ku katekisa. (Swiv. 10:22) Leswi Xitsundzuxo xi nga ekusuhi, lowu i nkarhi wo sungula ku endla malunghiselelo.—Swiv. 21:5.
6. Xana hi nga dyondza yini eka makwerhu wa malembe ya 90 hi vukhale loyi n’wexemu a nga teka vuphayona bya nkarhinyana?
6 Makwerhu un’wana wa xisati wa malembe ya 90 hi vukhale, u tiphine hi lunghelo ra vuphayona bya nkarhinyana n’wexemu. U te: “Hambileswi ndzi wu rhandzaka ngopfu ntanga wa jarata ra mina naswona se a ndzi lava ni ku sungula ku byala, ndzi xiye leswaku ndzi fanele ndzi rhangisa leswi faneleke. Leswi ndzi lavaka ku rhangisa Mfumo ku sungula, ndzi hlele ku teka vuphayona bya nkarhinyana hi March.” Xana u katekisiwile hikwalaho ka matshalatshala ya yena? U ri, “Ndzi titwa ndzi ri xirho xa vandlha naswona leswi swi ndzi tshinete ngopfu eka Yehovha.” Xana hi nga kambisisa leswi hi faneleke hi rhangisa swona hi tlhela hi lulamisa laha swi faneleke?
7. Xana swa tika ku va phayona ra nkarhinyana?
7 Ku fikelela tiawara leti lavekaka ta 50 eka vuphayona bya nkarhinyana swi nga ha va swi nga tiki hilaha u ehleketaka hakona. Hlela mintirho ya wena ya siku ni siku, endla xiyimiso kutani u xi tsala eka khalendara ya wena leyi u tsalaka mintirho ya swa moya eka yona. Hi wena u swi tivaka kahle swiyimo swa wena n’wini. Loko u nga ri na rihanyo naswona u nga ri na ntamu, kumbexana u nga ha tirha nsimu tiawara ti nga ri tingani ntsena siku ni siku. Loko u ri ni ntirho wo tihanyisa wa nkarhi hinkwawo kumbe u nghena xikolo, u nga kota ku teka vuphayona bya nkarhinyana hi ku tirha nsimu ni madyambu kumbe hi mahelo-vhiki.
8. Mpatswa wun’wana wu swi kotise ku yini ku teka vuphayona bya nkarhinyana?
8 Vo tala va swi kotile ku teka vuphayona bya nkarhinyana tanihi ndyangu. Eka malembe lama hundzeke mpatswa wun’wana lowu tekaneke a wu kanakana ku nghenela vuphayona bya nkarhinyana hikuva a wu vona onge swiyimo swa wona a swi nge wu pfumeleli. Xana wu endle yini ha swona? Wu te: “Hi khongele Yehovha leswaku a hi pfuna hi hetisisa leswi ku nga khale hi lava ku swi endla.” Leswi wu hleleke hi ndlela ya kona wu swi kotile ku fikelela pakani ya wona. Wu tlhele wu ku: “A byi nandziha ngopfu. Hi kume mikateko yo tala. Hi ringanyeta leswaku na wena u byi ringeta. Leswi hina hi nga kota ku byi nghenela, na wena u nga swi kota.”
9. I yini leswi mi nga swi endlaka eka dyondzo ya n’wina ya ndyangu leyi landzelaka leswaku mi lunghiselela ntirho wo hlawuleka eka tin’hweti leti landzelaka?
9 Mi nga tivekela nkarhi wo karhi eka dyondzo ya n’wina ya ndyangu leyi landzelaka leswaku mi ta bula hi ndlela leyi hinkwenu mi nga wu ndlandlamuxaka ha yona ntirho wa n’wina eka tin’hweti leti landzelaka. Hambiloko swi nga ta koteka leswaku swirho hinkwaswo swa ndyangu wa ka n’wina swi va maphayona ya nkarhinyana, wun’we endyangwini a nga phayona hi ku pfuniwa hi swirho leswin’wana swa ndyangu ni hi ntirhisano wa swona. Loko sweswo swi nga koteki, swirho swa ndyangu swi nga tivekela tipakani to tirha nkarhi lowu engetelekeke ensin’wini eka tin’hweti leti to hlawuleka ta ntirho wo chumayela.
10. Ha yini hi fanele hi bula ni van’wana hi ta ku navela ka hina ku va maphayona ya nkarhinyana hi nkarhi lowu wa Xitsundzuxo?
10 Pfunanani: Ku hiseka ka tluletana. Vulavula hi ku navela ka wena ku va phayona ra nkarhinyana. Leswi swi nga ha khutaza van’wana leswaku va byi nghenela. Ku engetela kwalaho, lava va nga tshama va phayona eka malembe lama hundzeke va nga ha ku nyika swiringanyeto leswi nga ta ku pfuna leswaku u hlela timhaka ta wena ni ku endla xiyimiso leswaku u ta fikelela pakani ya wena. (Swiv. 15:22) Loko u swi kota ku va phayona ra nkarhinyana, ha yini u nga rhambi muhuweleri un’wana, kumbexana loyi swiyimo swakwe swi fanaka ni swa wena leswaku mi ta phayona swin’we entirhweni lowu wo tsakisa?
11. Xana vakulu va nga wu khutaza njhani moya wo hisekela vuphayona bya nkarhinyana eka tin’hweti leti landzelaka?
11 Vakulu vo tala va endle malunghiselelo lama faneleke leswaku va hlanganyela entirhweni lowu wo hlawuleka. (Hev. 13:7) Hakunene leswi swa ri khutaza vandlha! Vakulu va tlhela va endla leswaku vandlha ri hiseka hi mabulo ya vona. Marito yo khutaza kumbe swiringanyeto swin’wana leswi tirhaka swi nga ha va swi ri swona leswi lavekaka leswaku van’wana va va maphayona ya nkarhinyana. Swi nga endleka leswaku mulanguteri wa ntirho a hlela minhlangano leyi engetelekeke ya ntirho wa nsimu leswaku hinkwavo va ta kota ku hlanganyela eku chumayeleni tanihi ntlawa, hambiloko se va chayisile entirhweni kumbe va humile exikolweni. Malunghiselelo lawa ma fanele ma tivisiwa nkarhi na nkarhi. Nakambe u ta tiyiseka leswaku hinkwavo va ni nsimu ni minkandziyiso leyi eneleke.
12. I yini leswi hi nga ha kotaka ku swi endla loko hi nga swi koti ku va maphayona ya nkarhinyana?
12 Hambiloko swiyimo swi nga ku pfumeleli leswaku u va phayona ra nkarhinyana, u nga ha khutaza lava phayonaka ni ku va khongelela. (Swiv. 25:11; Kol. 4:12) Kumbexana u nga endla malunghiselelo yo tirha na vona nsimu siku rin’wana exikarhi ka vhiki kumbe u tirha nsimu tiawara leti engetelekeke ku tlula masiku laman’wana.
13. Hi yihi pakani leyi vekiweke ematikweni lama welaka erhavini ra Afrika Dzonga, naswona vandlha ra n’wina ri nga pfuna njhani leswaku yi fikeleriwa?
13 Pakani Ya Maphayona Ya Nkarhinyana Ya 14 000 Hi April: Nhlohlorhi ya maphayona ya nkarhinyana ya matiko lama welaka erhavini ra Afrika Dzonga a yi ri 11 214. (Afrika Dzonga 10 126, Botswana 270, Lesotho 326, Namibia 183, St. Helena 18 na Swaziland 291) Hikwalaho, pakani leyi hi nga kotaka ku yi fikelela hi April i ya maphayona ya nkarhinyana ya 14 000. (Afrika Dzonga 12 480, Botswana 275, Lesotho 550, Namibia 250, St. Helena 20 na Swaziland 425) Hi nga yi fikelela loko muhuweleri un’we eka va tsevu evandlheni rin’wana ni rin’wana o nghenela vuphayona bya nkarhinyana. Ina, mavandlha man’wana ma ta va ni vahuweleri lava engetelekeke lava swiyimo swi va pfumelelaka ku va maphayona ya nkarhinyana. Mavandlha yo tala ma ta swi kota ku fikelela pakani leyi. Anakanya ndlela leyi swi nga ta tsakisa ha yona evandlheni ra ka n’wina ni vuyelo lebyinene lebyi nga ta va kona entirhweni wo chumayela ensin’wini ya n’wina!
14. Ha yini n’hweti ya April yi ri n’hweti ya kahle ngopfu yo nghenela vuphayona bya nkarhinyana?
14 Ha yini n’hweti ya April yi ri n’hweti ya kahle yo nghenela vuphayona bya nkarhinyana? Xitsundzuxo xi ta va eku sunguleni ka n’hweti, sweswo swi ta hi nyika nkarhi lowu engetelekeke wo endla maendzo yo vuyela eka lava va veke kona. Hi ta fambisa timagazini hi xikongomelo xo siya buku leyi nge Leswi Bibele Yi Swi Dyondzisaka loko hi endla maendzo yo vuyela nileswaku hi sungula tidyondzo ta Bibele. Hi April 14, ku ta va ku ri Siku ro Hlawuleka ra Timagazini laha Afrika Dzonga ni le matikweni lawa hi akelaneke na wona. Hikwalaho, vuphayona bya nkarhinyana hi April byi ta nyika vo tala nkarhi wo sungula tidyondzo ta Bibele. Hi ntolovelo ku va ku nga si titimela hi April. Ku engetela kwalaho, n’hweti ya April yi ni Tisonto ta ntlhanu ni holideyi ya misava, sweswo swi endla leswaku swi olova eka lava tirhaka ni le ka lava nghenaka xikolo leswaku va byi nghenela.
15. Ha yini hi fanele hi hiteka tanihi leswi Xitsundzuxo xi nga ekusuhi?
15 Xitsundzuxo xa lembe ni lembe loko xi hundza swi kombisa leswaku se hi ya hi tshinela emakumu ka mafambiselo lawa ya swilo. Nkarhi lowu saleke wa ku byela van’wana hi Xikwembu xa hina lexikulu wu komile. (1 Kor. 7:29) Loko Xitsundzuxo lexi xi hundza, nkarhi lowu hi veke na wona wo dzunisa Tata wa hina la nge matilweni wu va se wu hundzele makumu. Onge hi nga sungula sweswi ku endla malunghiselelo ya leswaku hi endla hinkwaswo leswi hi nga swi kotaka hi March, April na hi May leswaku hi twarisa vukulukumba bya Yehovha!
[Bokisi leri nga eka tluka 4]
Xana Hi Nga Va Ni Maphayona Ya Nkarhinyana Ya 14 000 Hi April?
◼ Kambisisa swilo leswi u faneleke u rhanga u endla swona
◼ Bulani hi tipakani tanihi ndyangu
◼ Vulavula ni van’wana hi leswi u hleleke swona