Tekelela Mudyondzisi Lonkulu Loko U Tirhisa Buku Leyi Nge Leswi Bibele Yi Swi Dyondzisaka
1. Xana Yesu a a dyondzisa njhani?
1 Yesu, Mudyondzisi Lonkulu, minkarhi hinkwayo a a hlamusela swilo hi ndlela yo olova naswona a swi veka erivaleni. Leswaku a endla vayingiseri vakwe va rhanga va ehleketa, minkarhi yin’wana a a rhanga hi ku va vutisa xivutiso lexi lavaka va phofula mavonelo ya vona. (Mat. 17:24-27) A a va hlamula hi Rito ra Xikwembu. (Mat. 26:31; Mar. 7:6) A a ri ni vuxiyaxiya leswaku a nga fumbi vadyondzisiwa va yena hi rungula ro tala, hikuva a a swi tiva leswaku va ta ri dyondza hi ku famba ka nkarhi. (Yoh. 16:12) Nakambe Yesu a a lava ku vona loko vadyondzisiwa vakwe va pfumela ni ku twisisa leswi a a va dyondzisa swona. (Mat. 13:51) Buku leyi nge Leswi Bibele Yi Swi Dyondzisaka yi endleriwe ku hi pfuna leswaku hi dyondzisa ku fana na yena.
2. Xana hi nga swi tirhisa njhani swivutiso leswi nga eku sunguleni ka ndzima?
2 Swivutiso Leswi Nga Eku Sunguleni: Loko u sungula ndzima, swa pfuna ku rhanga hi ku kambisisa swivutiso leswi nga ehansi ka nhloko-mhaka. Vutisa swivutiso sweswo hi ndlela leyi nga ta phomisa xichudeni marha leswaku xi navela swakudya swa moya leswi xi nga ta swi dya. Kumbe u nga ha xi kombela xi hlamula swivutiso sweswo hi ku komisa. A swi kali swi lava leswaku u hlamusela swo tala kumbe u lulamisa nhlamulo yin’wana ni yin’wana leyi hoxeke. U ngo ho nkhensa xichudeni xa wena hi tinhlamulo ta xona kutani mi sungula ku dyondza. Tinhlamulo ta xona ta swivutiso leswi nga eku sunguleni ti ta ku pfuna ku tiva laha u faneleke u xi voningela kona eka dyondzo yoleyo.
3. Hi nga yi olovisa njhani dyondzo?
3 Matsalwa: Dyondzo yi fanele yi sekeriwa eMatsalweni. (Hev. 4:12) Kambe a swi bohi ku hlaya tsalwa rin’wana ni rin’wana leri kombisiweke. Kandziyisa Matsalwa lama kombisaka laha tidyondzo ta hina ti sekeriweke kona. Matsalwa lama hlamuselaka rungula ra dyondzo ma nga ha tshikiwa ma nga hlayiwi. Buku leyi nge Leswi Bibele Yi Swi Dyondzisaka yi andlala ntiyiso hi ndlela yo olova. Olovisa dyondzo. Kandziyisa tinhla-nkulu, naswona u papalata mboyamelo wa ku hlamusela vuxokoxoko byo tala kumbe ku nghenisa rungula rin’wana leri nga bohiki eka dyondzo ya n’wina.
4. I yini leswi nga ta hi pfuna ku tiva loko hi fanele hi bula hi rungula leri nga eka xiengetelo?
4 Xiengetelo: Xiengetelo xi tamele rungula ra tinhloko-mhaka ta 14 leti seketelaka rungula leri nga eka ndzima. Loko u swi lava mi nga bula hi tinhloko-mhaka leti loko mi ri karhi mi dyondza. Eka tinhla tin’wana u nga khutaza xichudeni xa wena leswaku xi tihlayela rungula leri nga eka xiengetelo, ngopfu-ngopfu loko xi ri twisisa kahle rungula ra ndzima leyi mi yi dyondzaka ni ku ri pfumela. Hi xikombiso, loko xichudeni ana se xi pfumela leswaku Yesu i Mesiya, a swi nge bohi ku bula na xona hi nhloko-mhaka leyi nge “Yesu Kreste I Mesiya La Tshembisiweke” loko mi dyondza ndzima 4, leyi nge “Yesu Kreste I Mani?” Minkarhi yin’wana, swi nga pfuna leswaku loko mi ri karhi mi dyondza mi pfa mi bula hi rungula leri nga eka xiengetelo kumbe tindzimana to karhi leti nga eka xona.
5. Loko hi hlawula ku dyondza rungula leri nga eka xiengetelo, xana hi nga ri dyondza njhani ni xichudeni?
5 Loko u hlawula ku bula hi rungula leri nga eka xiengetelo, u nga ha tiendlela swivutiso ka ha ri ni nkarhi kutani mi hlaya tindzimana ta kona swin’we ni xichudeni ivi u xi vutisa xivutiso ku fana niloko mi dyondza hala ka ndzima. Kumbe, hi ku ya hi leswi swi fanelaka xichudeni xexo, u nga ha bula na xona hi rungula leri loko mi ri karhi mi dyondza ndzima ya kona. Sweswo swi ta ku pfuna leswaku u tiyiseka loko xi ri twisisile rungula leri xi ri hlayeke xi ri xoxe.
6. Xana hi nga ri tirhisa njhani bokisi ra mpfuxeto emakumu ka dyondzo ha yin’we?
6 Bokisi Ra Mpfuxeto: Bokisi leri nga emakumu ka ndzima ha yin’we ri ni tinhlamulo leti hakanyingi ti hlamulaka swivutiso leswi nga eku sunguleni ka ndzima. U nga ha tirhisa tinhlamulo leti leswaku mi pfuxeta ha tona tinhla-nkulu ta ndzima yoleyo. Vahuweleri van’wana va swi vone swi pfuna ngopfu ku hlaya nhlamuselo yin’wana ni yin’wana kumbexana ku katsa ni matsalwa ya kona, swin’we ni xichudeni. Endzhaku ka sweswo va kombela xichudeni leswaku xi hlamusela hi ku komisa ndlela leyi matsalwa wolawo ma yi tiyisekisaka ha yona nhlamulo yoleyo. Leswi swi pfuna mudyondzisi leswaku a vona loko xichudeni xi ti twisisile tinhla-nkulu ta dyondzo ni ndlela leyi Bibele yi ti seketelaka ha yona ni ku vona loko xi pfumelelana na tona. Nakambe swi letela xichudeni leswaku xi tirhisa Bibele loko xi ri karhi xi hlamusela van’wana ntiyiso.
7. Xana hi nga yi tirhisa njhani buku leyi nge Leswi Bibele Yi Swi Dyondzisaka leswaku hi hetisisa ntirho wa hina?
7 Ndlela ya kahle ngopfu yo hetisisa ntirho wa hina wo dyondzisa vanhu ni ku endla vadyondzisiwa i ku va hi tekelela madyondziselo ya Yesu. (Mat. 28:19, 20) Buku leyi nge Leswi Bibele Yi Swi Dyondzisaka yi ta hi pfuna leswaku hi endla tano. Yi tirhise loko u ri karhi u dyondzisa van’wana ntiyiso hi ndlela yo olova, leyi vekaka mhaka erivaleni ni leyi tsakisaka.