Tiphine Hi Ku Dyondza Buku Leyi Nge Xana Bibele Yi Dyondzisa Yini Hakunene?
1 Nchumu lowu tsakeriweke ngopfu eka Ntsombano wa Muganga wa “Ku Yingisa Xikwembu” a ku ri ku humesiwa ka buku leyi nge Xana Bibele Yi Dyondzisa Yini Hakunene? Ku nga ri khale hi ta yi tirhisa ensin’wini, ngopfu-ngopfu loko hi fambisa tidyondzo ta le kaya ta Bibele. Hikwalaho, hi fanele hi yi tolovela. Sweswo swi ta hi olovela hikuva hi ta yi dyondza eka Dyondzo ya Buku ya Vandlha ku sukela hi vhiki leri sungulaka hi April 17, 2006.
2 Mulanguteri wa Dyondzo ya Buku ya Vandlha u ta dzikisa mianakanyo ya hina eka swivutiso leswi nga eku sunguleni ka ndzima ha yin’we. Kutani dyondzo yi ta fambisiwa hi ku tirhisa swivutiso leswi kumekaka le hansi ka tluka. Matsalwa ya nkoka ma ta hlayiwa ivi ku buriwa ha wona, naswona bokisi leri nge “Leswi Bibele Yi Swi Dyondzisaka” leri nga emakumu ka ndzima ha yin’we ri ta pfuna ku pfuxeta rungula leri dyondziweke, hikuva ri tamele tinhlamulo ta Matsalwa ta swivutiso leswi nga le ku sunguleni ka ndzima. U ta tiphina hi ku hlamula hikuva buku leyi yi hlamusela mhaka hi ndlela leyi twisisekaka ni leyi tsakisaka, leyi nga lo dlaa, erivaleni.
3 Xiengetelo xa buku leyi xi hlamusela tinhloko-mhaka to hambana-hambana hi vuxokoxoko. Hi ta kota ku tirhisa rungula leri loko swichudeni swa Bibele swi lava rungula leri engetelekeke etimhakeni to karhi. Minkarhi yin’wana rungula ra xiengetelo ri ta tlhuvutsiwa loko Dyondzo ya Buku ya Vandlha yi ri karhi yi ya emahlweni. Rungula hinkwaro ra xiengetelo ri ta hlayiwa hi loyi a hlayaka tindzimana edyondzweni ya buku kasi laha ku nga ni rungula ro leha, ri ta pandziwa hi swiphemu. Eka tinhloko-mhaka ta xiengetelo a ku na swivutiso. Kambe mulanguteri a nga ha vutisa swivutiso hi ku kandziyisa tinhla ta nkoka ivi vayingiseri va hlamula.
4 Dyondzo ya buku leyi nge Leswi Bibele Yi Swi Dyondzisaka yi ta famba hi ku hatlisa eDyondzweni ya Buku ya Vandlha. Kambe a hi fanelanga hi endla tano loko hi dyondza ni vanhu ensin’wini, ngopfu-ngopfu loko va nga tivi nchumu hi Bibele. (Mint. 26:28, 29) Loko hi ri karhi hi fambisa tidyondzo ta le kaya ta Bibele hi fanele hi ma hlamusela swi twala matsalwa, hi hlamusela swifaniso ni swin’wana. Kutani tivekele pakani yo va kona vhiki rin’wana ni rin’wana leswaku u ta hlanganyela hi xitalo loko hi dyondza buku leyi nge Xana Bibele Yi Dyondzisa Yini Hakunene?